ಥೆಂಬೊ, ಎಕ್ ಲಾನ್ ಆಕಾರ್ ಜಾವ್ನಾಸಾ... ತ್ಯಾ ಥೆಂಬ್ಯಾ ವಯ್ರ್ ವಿಲ್ಫ್ರೆಡ್ ಆಲ್ವ ಬೊಳಿಯೆನ್ ಅಟೊವ್ ಕರುಂನ್ ಹೆ ಕವನ್ ಬರಯ್ಲಾಂ. ಥೆಂಭ್ಯಾಕ್ - ಥೆಂಬೊ ಮೆಳೊನ್ ಸಾಗೊರ್ ಜಾತಾ, ಪುಣ್ ಹಾಂಗಾಸಾರ್ ಕವಿ ದೊವಾ ಥೆಂಬ್ಯಾ ಥಾವ್ನ್ ಜಾಂವ್ಚ್ಯಾ ಬರೆಪಣಾಕ್ ಮಾತ್ರ್ ನಂಯ್, ತಾಚ್ಯೆ ಥಾವ್ನ್ ಜಾಂವ್ಚ್ಯಾ ವಿನಾಶಾ ವಿಶ್ಯಾಂತಿ ಉಲ್ಲೇಕ್ ಕರ್ತಾ. ಹೆ ಘಾಮಾ ಥೆಂಬೆ ಕುಟ್ಮಾಕ್ ಪೊಸ್ತಾತ್ ತರ್, ಸೊರ್ಯಾ ಥೆಂಬೆ ತ್ಯಾಚ್ ಕುಟ್ಮಾಕ್ ನಾಸ್ ಕರ್ತಾತ್. ಪಾವ್ಸಾ ಥೆಂಬೆ ಕ್ರಶಿಯೆಕ್ ಉಪ್ಕಾರ್ತಾತ್ ತರ್, ತೆಚ್ಚ್ ಥೆಂಬೆ ಲೆಕಾವರ್ತೆ ಜಾಲೆ ತರ್ ವಿನಾಶ್ ಕರುಂಕ್ ಪಾವ್ತಾತ್. ಜೆಜುಚ್ಯಾ ರಗ್ತಾಚ್ಯಾ ಥೆಂಬ್ಯಾನಿ ಕ್ರೀಸ್ತಾಂವಾಂಕ್ ಕಶಿ ಸೊಡ್ವೊಣಿ ಲಾಬೊನ್ ದಿಲ್ಯಾ ಮುಣ್ಚೊ ಕವಿ, ಹರ್ಯೆಕಾ ಥೆಂಬ್ಯಾಂಕ್, ಆಪ್ಲ್ಯಾ ಜೀವಿತಾಕ್ ಕಶೆ ತೆ ಮಹತ್ವಾಚೆ ಮುಣೊನ್ ಕಳಯ್ತಾ.

ಥೆಂಬೆ

ಥೆಂಬೆ ದೊವಾಚೆ

ತಣಾರ್ ವಜ್ರಾ೦

ಸಾರ್ಕೆಂ ಪರ್ಜಳ್ಚೆ

ಜಳ್ಕುರ್ಯಾ ಸುರ್ಯಾಚ್ಯಾ

ಕಿರ್ಣಾನಿಂ ತಾಕಾ ಸುಕಂವ್ಚೆ

ಥೆಂಬೆ ಪಾವ್ಳ್ಯಾಂಚೆ

ಚಡೊನ್ ಪಾವ್ಸ್

ಆವ್ರ್ ಭರೊನ್ ವಿನಾಶ್ ಕರ್ಚ್ಯಾ

ಘರ್ ಆನಿ ಗಾಂವಾಚೆ

ಥೆಂಬೆ ರೈತ್,

ಕಾಮೆಲ್ಯಾಂಚ್ಯಾ ಘಾಮಾಚೆ

ವಾವ್ರಾನ್ ಪೋಟ್ ಭರ್ತಲ್ಯಾ

ಕುಟ್ಮಾ ಆನಿ ಸಮೇಸ್ತಾಂಚೆ

ಥೆಂಬೆ ಸೊರ್ಯಾಚೆ

ಮಜೆರ್ ಜಿಯೆಂವ್ಚೆ

ಚಡಿತ್ ಜಾಲ್ಯಾರ್

ಕುಟ್ಮಾ ಸಮಾಜೆಕ್

ವಾಟೆರ್ ಘಾಲ್ಚೆ

ಥೆಂಬೆ ಆಗ್ಮೆಂತಾಚೆ

ಜಲ್ಮಲ್ಲ್ಯಾ ಭುರ್ಗ್ಯಾ ಥಾವ್ನ್

ಮರ್ಣಾಚ್ಯಾ ಫೊಂಡಾ ಪರ್ಯಾನ್

ಪವಿತ್ರ್ ಕರ್ಚೆ

ಥೆಂಬೆ ರಗ್ತಾಚೆ,

ಜೆಜು ಕ್ರೀಸ್ತಾನ್

ವ್ಹಾರಯಿಲ್ಲ್ಯಾ ರಗ್ತಾಚೆ

ಅಮಾ ಪಾತ್ಕ್ಯಾಂಕ್

ಪಾತ್ಕಾ ಥಾವ್ನ್

ಸುಟ್ಕಾ ಲಾಬಂವ್ಚೆ

ವಿಲ್ಫ್ರೆಡ್ ಆಲ್ವ, ಬೊಳಿಯೆ.