ಸರಿ ಕಾಡ್ನ್, ಬೇಲ್ ಲಾವ್ನ್, ಖುಂಟಿ ಉಬಾರ್ಲೆಲೆ ತೆ ದೀಸ್,

ಶೆಣಾ ಉದಾಕ್ ಶೆಣಾವ್ನ್, ಬೇಲ್ ಖುಂಟಿ ಉತ್ರೊನ್ ವ್ಹಡ್ ಜಾತಾನಾ,

ತರ್ನಾಟ್ಯಾ ಮ್ಹಾಕಾ, ಖಾಡ್ ಮಿಶಿಂ ಆಯ್ಲೆಂ ಪರಿಂ

ಜಾಲ್ಲೊ ತೊ ಸಂತೊಸ್ ಕೆದಿಂಚ್ ವಿಸರ್ಸೊನಾ

ಬೇಲ್ ಪಾಲೆವ್ನ್, ದಾಂಕಾರ್ ಚಡವ್ನ್, ಕಣ್ಣಿ ಬಾಂದ್ಲೆಲೆ ತೆ ದೀಸ್,

ದೊರಾ ವಾವ್ಳೆಚ್ಯಾ ಪಾಸಾಂತ್, ಪಾನಾಂ ಆಂಕ್ರಿ ವೆಂಗುನ್ ಆಸ್ತಾನಾ,

ಮ್ಹಜೆಂ ಪ್ರೇಮಿಕಾ, ಮ್ಹಜ್ಯಾ ಗೊಪಾಂತ್ ಆಸ್ಲೆಲೆ ಪರಿಂ

ಜಾಲ್ಲೊ ತೊ ಅನ್ಭೊಗ್ ಕೆದಿಂಚ್ ವಿಸರ್ಸೊನಾ

ವೋತ್ ಜಾಂವ್, ಪಾವ್ಸ್ ಜಾಂವ್, ದೆಳ್ಯಾರ್ ಉಮ್ಕಳ್ಳೆಲ್ಲೆ ತೆ ದೀಸ್,

ಪಾನಾಂ ಸಕ್ಲಾ ಪಡನಾಶೆಂ, ತೊಟೆ ಪೆಂಕ್ಡಾಕ್ ಆಂರ್ದುನ್ ಬಾಂದ್ತಾನಾ,

ಪ್ಯಾಂಟ್ ನಿಸಾರ್ನಾಶೆಂ, ಬೆಲ್ಟ್ ಶಿರ್ಕೊನ್ ಆಸ್ಲೆಪರಿಂ

ಸಾಂಬಾಳ್ಳೆಲಿ ಚತ್ರಾಯ್, ಕೆದಿಂಚ್ ವಿಸರ್ಸೊನಾ

ವ್ಹಡಾಂ ಜಾಂವ್, ಲಾನಾಂ ಜಾಂವ್, ಸಾಂಗಾತಾ ಪಾನಾಂ ಕೊವೊಳ್ಳೆಲೆ ತೆ ದೀಸ್,

ಸಾಂಜೆರ್ ಪಾನಾಂ ವಿಕುನ್, ಆನ್ ಖಾಂವ್ಕ್ ಹಾಡ್ನ್ ಯೆತಾನಾ,

ಆಂಕ್ವಾರ್ ಮ್ಹಾಕಾ, ಸಯ್ರಿಕ್ ಘಟ್ ಜಾಲ್ಲೆ ಪರಿಂ

ಜಾಲ್ಲಿ ತಿ ಖುಶಿ, ಕೆದಿಂಚ್ ವಿಸರ್ಸೊನಾ

ಲಾನ್ ಥಾವ್ನ್, ಆಜ್ ಪರ್ಯಾಂತ್, ತುಜೆ ಸವೆಂ ಸಾರ್ಲೆಲೆ ತೆ ದೀಸ್,

ಕುಟಮ್ ಭುಕೆನ್ ರಾವನಾಶೆಂ, ತುವೆಂ ಕೆಲ್ಲೊ ಉಪ್ಕಾರ್

ಹೊ ಜಲ್ಮ್ ನ್ಹಂಯ್, ಅನ್ಯೇಕ್ ಜಲ್ಮ್ ಮೆಳಾತ್ ತರೀ

ತುಜೆಂ ರೀಣ್ ಕೆದಿಂಚ್ ಮ್ಹಜ್ಯಾನ್ ಫಾರಿಕ್ ಕರುಂಕ್ ಜಾಂವ್ಚೆಂ ನಾಂ

ರಿಕ್ಕು ಕಿರೆಂ