ನಿರ್ಭಾಗಿ

ಹಾವೆಂ ಮ್ಹಜಿ ದೀಶ್ಟ್ ಮ್ಹಜ್ಯಾ ಮಾಂಯ್ಚ್ಯಾ ತೊಂಡಾರ್ ಚರಯ್ಲಿ. ತಿಚಿ ಖಂತಿನ್ ಮಿರಿಯೊ ಪಡ್‌ಲ್ಲೆ ಗಾಲ್ ಆನಿ ಪ್ರಾಯೆ ವರ್ನಿ ಚಡ್‌ಚ್ ಪಿಕ್‌ಲ್ಲೆ ಕೇಸ್, ನೀದ್ ನಾತ್‌ಲ್ಲೆ ದೊಳೆ, ಮ್ಹಾಕಾ ತಿಚಿ ಭಿರ್ಮತ್ ದಿಸ್ತಾಲಿ ತರೀ ಹಾಂವ್ ಅಸಹಾಯಕ್. 

ಭಾರ್ಯ್ ನಿದ್‌ಲ್ಲೊ ಟೊಮಿ, ಘಡಾಮೊಡಿ ಘಾಲುನ್ ಸಳ್ಗೆನ್ ಘೊಂಕುಂಕ್ ಲಾಗ್ಲೊ, ಟೊಮಿಚೆ ಮೊಗಾಚೆ ಲಾಂಬ್ ಲಾಂಬ್ ಬಾಂಗ್, ಕಾಲೇಜಿ ಥಾವ್ನ್ ಯೆಂವ್ಚ್ಯಾ ಮ್ಹಜ್ಯಾ ಭಯ್ಣಿಚಾ ಸ್ವಾಗತಾಕ್ ಮ್ಹಣುನ್ ಮ್ಹಾಕಾ ಸಮ್ಜಲೆಂ.

ಮ್ಹಜೆ ಮುಕಾರ್ ಬಸುನ್ ಬಿಡಿಯೊ ರೆವ್ಡಾವ್ನ್ ಆಸ್‌ಲ್ಲಿ ಮ್ಹಜಿ ಮಾಂಯ್, ಚಾಯೆಚೆ ಅಯ್ದಾನ್ ರಾಂದ್ನಿರ್ ಚಡಂವ್ಕ್ ಕುಜ್ನಾಕ್ ಮ್ಹಣೊನ್ ಘುಸ್ಲಿ. ಮ್ಹಜ್ಯಾ ಭಯ್ಣಿಚಿ ಚುರುಕ್ ತಿ ಚಾಲ್ ಘರಾ ಭಿತರ್ ರಿಗ್‍ಲ್ಲೆಂಚ್ ಸಂಚಲನ್ ಹಾಡಯ್ತಾ, ಘರಾ ಭಿತರ್ ಹಾಸೊ, ಕಿಟ್ಕಿಟ್ಯೊ ಸರ್ವ್ ಅಯ್ಕುಂಕ್ ಮೆಳ್ತಾತ್.

ಹ್ಯಾ ಮ್ಹಜ್ಯಾ ಮೊಗಾಚ್ಯಾ ಭಯ್ಣಿಚೆ ಪಾಂಯ್ ವೊಡುಂಕ್, ತಾಕಾ ತುಕ್ಲಾಂವ್ಕ್ ಮ್ಹಾಕಾ ಸಾಧ್ಯ್ ನಾಂ ದೆಕುನ್ ಹಾಂವ್ ಮ್ಹಜ್ಯಾ ನಶೀಬಾಕ್ ದುರ್ಸಾತಾಂ, ಮ್ಹಜೆಸ್ತಕಿಂ ಖರ್ಗತಾಂ.

ಮ್ಹಾಕಾ ಮ್ಹಜ್ಯಾ ಭಯ್ಣಿಚೆರ್ ವ್ಹಡ್ ಅಭಿಮಾನ್, ಪುಣ್ ಉತ್ರಾಂನಿ ಹಾಂವ್ ತಾಕಾ ಸಾಂಗುಕ್ ಸಕಾನಾ. ತಾಕಾಯೀ ಮ್ಹಜೆಲಾಗಿಂ ಭೋವ್‍ಚ್ ಮೋಗ್.

ಕಾಲೇಜಿ ಥಾವ್ನ್ ಅಯಿಲ್ಲೆಂಚ್, ಬ್ಯಾಗ್ ದವ್ರುನ್ ಪಯ್ಲೆ ಯೇವ್ನ್ ಮ್ಹಜೆರ್ ದೀಷ್ಠ್ ಘಾಲ್ತಾ, ಮ್ಹಜೊ ಲ್ಹಾನ್ ವ್ಹಡ್ ಗರ್ಜ್ಯೊ ಸುಧಾರ್ಸುಂಕ್ ಮಾಂಯ್ ಬಾಬಾಕ್ ಅಧಾರ್ ದಿತಾ. ಮ್ಹಜ್ಯಾ ತೊಂಡಾಕ್ ಶಿತಾಚ್ಯೊ ಉಂಡಿಯೊ ದಿತಾ ಆನಿ ಮ್ಹಜ್ಯಾ ದೊಳ್ಯಾನಿಂ ಉಪ್ಕಾರ್‌ಪಣಾಚಿಂ, ಮಾಯ್ಪಾಸಾಚಿಂ ತಶೆಂಚ್ ಖುಶೆಚಿಂ ದುಖಾಂ ಹಾಡಯ್ತಾ.

ಗೆಲಾತ್ಯಾ ಹಾಫ್ತ್ಯಾಂತ್ ಆಮ್ಚ್ಯಾ ಘರಾ ಆಯಿಲ್ಲೊ ಮ್ಹಜ್ಯಾ ಬಾಪ್ಪುಚೊ ಪೂತ್ ಶಾನ್ ಮ್ಹಜ್ಯಾಚ್ ಪ್ರಾಯೆಚೊ, ಜೀನ್ಸ್ ಪ್ಯಾಂಟ್, ರೂಂದ್ ಹರ್ಧ್ಯಾರ್ ಚಿಡ್ಕಾಲ್ಲೆಂ ತಾಚೆಂ ತೆಂ ಟಿ ಶರ್ಟ್ ಪಳೆವ್ನ್ ಹಾಂವೆ ಆಂಯ್ಡೆ ಗಳಯ್‌ಲ್ಲೆ. 

"ನೊಯೆಲಿಯ್ ಆಮ್ಚ್ಯಾ ಶೊನಾ ಪರಿಂ ಅಸ್‍ಲ್ಲೊ ತರ್..."  ಮ್ಹಕಾಚ್ ಪಳೆವ್ನ್ ಮೌಶೆನ್ ಲಾಂಬಾಯ್ತಾನಾ, ಮ್ಹಜ್ಯಾ ಮಾಂಯ್ಚ್ಯಾ ಕಾಳ್ಜಾಕ್ ಸುರಿ ಘಾಲ್ಲ್ಯಾ ಬರಿ ಜಾಲ್ಲೆಂ, ತೆಂ ಮ್ಹಕಾ ತಿಚ್ಯಾ ತೊಂಡಾರ್ ಜಾಂವ್ಚ್ಯಾ ಬದ್ಲಾವಣೆಂತ್ ಪಳೆತಾನಾ ಕಳ್ತಾಲೆಂ ಅನಿ ತಿಚ್ಯಾ ದೊಳ್ಯಾಂಚ್ಯಾ ಖಾಂಚಿನಿ ಉದೆಂವ್ಚಿಂ ತಿಂ ದುಖಾಂ ಹಾಕಾ ಸಾಕ್ಸ್ ದಿತಾಲಿಂ.

ವ್ಹಯ್ ಹಾಂವ್ ಅಟ್ರಾ ವರ್ಸಾಂಚೊ ತರ್ನಾಟೊ, ಹಾತಾ ಪಾಯಾಂಕ್ ತಶೆಂಚ್ ಪೆಂಕ್ಟಾಕ್ ಬಳ್ ನಾಂ ಮ್ಹಜ್ಯಾ. ಮ್ಹಜ್ಯಾ, ಹರ್ಯೆಕಾ ಗರ್ಜಾಂಕ್ ಮಾಂಯ್ಚ್ ಮ್ಹಾಕಾ ಅಧಾರ್, ಮ್ಹಜಿ ಜೀಬ್ ಕಿತ್ಲಿ ಲೊಳಯ್ಲ್ಯಾರಿ ಅವಾಜಾ ಶಿವಾಯ್ ಉತ್ರಾಂ ಭಾಯ್ರ್ ಸರನಾಂತ್. ಕಿತ್ಯಾಕ್, ಜಲ್ಮಾ ಥಾವ್ನ್‍ಚ್ ಹಾಂವ್ ಮೊನೊ!!.

ಮ್ಹಜ್ಯಾ ಬುದ್ವಂತ್ಕಾಯೆಚೆಂ ಮಟ್ಟ್ ಉಣೆಂ ಮ್ಹಣುನ್ ಆಮ್ಚ್ಯಾ ಘರಾ ಯೆಂವ್ಚ್ಯಾ ಸೈರ‍್ಯಾಂನಿ ಸಾಂಗ್ತಾನಾ, ಹಾಂವೆ ಅಯ್ಕಲಾಂ.

ತ್ಯಾ ಎಕಾ ಆಯ್ತಾರಾ ಸಾಂಜೆರ್ ಆಮ್ಚ್ಯಾ ಘರಾ ವಾಡ್ಯಾ-ಜಮಾತ್ ಚಲ್‌ಲ್ಲಿ. ಅಯಿಲ್ಲಿಂ ಸಭಾರ್ ಮ್ಹಾಕಾ ಪಳೆವ್ನ್ ಭಿರ್ಮತ್ ಉಚಾರ್ತಾಲಿಂ ತರ್ ಆನಿ ಥೊಡಿಂ ಮ್ಹಜ್ಯಾ ಮಾಂಯ್ ಬಾಬಾಚ್ಯಾ ನಶಿಬಾಕ್ ದುರ್ಸಾತಾಲಿಂ. "ಸೆಲ್ಲಿ ಆನಿ ಸಿರಿಲಾಕ್ ಹೊ ಎಕ್ ಖುರಿಸ್‌ಚ್ ಹಾಬಾ" ಜಮಾತಿಕ್ ಅಯಿಲ್ಲ್ಯಾ ಪಯ್ಕಿ ಸೆವ್ರಿನ್ ಬಾಯೆಚಿಂ ತಿಂ ಉತ್ರಾಂ ನಾಕಾ -  ನಾಕಾ ಮ್ಹಳ್ಯಾರೀ ಮ್ಹಜಿ ಮ್ಹತ್ ದೆದೆಸ್ಪರ್ ಕರ್ತಾಲಿ. 

ಹ್ಯಾ ಮ್ಹಜ್ಯಾ ಸ್ಥಿತೆಕ್ ಕೋಣ್ ಗುನ್ಯಾಂವ್ಕಾರ್? ಹಾಂತುನ್ ಮ್ಹಜಿ ಕಿತೆಂ ಚೂಕ್ ಆಸಾ.?

ಗರ್ಭಾಂತ್ ಆಸ್ತಾನಾ, "ಸ್ಕ್ಯಾನಿಂಗಾತ್ ಭುರ್ಗ್ಯಾಚ್ಯಾ ಕುಡಿಂತ್, ತಶೆಂಚ್ ತಕ್ಲೆಂತ್ ಊಣ್ ಆಸಾ" ಮ್ಹಣೊನ್ ದಾಕ್ತೆರಾನ್ ಸಾಂಗ್‌ಲ್ಲೆಂ ಮ್ಹಣೊನ್ ಅಮ್ಚ್ಯಾ ಘರಾ ಯೆಂವ್ಚ್ಯಾ ಸೈರ‍್ಯಾನಿಂ ಉಲಯ್ತಾನಾಂ ಹಾಂವೆ ಅಯ್ಕಲಾಂ. ದಾಕ್ತೆರಾನ್ ಭುರ್ಗ್ಯಾಕ್ ಉರಂವ್ಕ್ ಯಾ ಗರ್ಭಾಪಾತ್ ಕರುಂಕ್ ಅವ್ಕಾಸ್ ದಿತಾನಾ ಮ್ಹಜ್ಯಾ ಮಾಂಯ್ ಬಾಬಾನ್ ಮ್ಹಾಕಾ ಅಪ್ಣಾವ್ಚೊಂ ನಿರ್ಧಾರ್ ಘೆತ್‌ಲ್ಲೊ. 

ಹೊ ತಾಂಚೊ ನಿರ್ಧಾರ್ ಆಪ್ಣೆಂ, ಆಪ್ಣಾಚೆಂ ಕೂಲಿಚೆಂ ಕಾಮ್ ಸಾಂಡಿಜಾಯ್ ತಶೆಂಚ್, ಫುಡೆಂ ಸಭಾರ್ ಸಾಕ್ರಿಫೀಸ್ ಕರಿಜಯ್ ಪಡ್ತಲೆಂ ಮ್ಹಣೊನ್ ತಾಂಕಾ ಕಳಿತ್ ಆಸ್ಲ್ಯಾರ್‌ಯಿ, ತಾಣಿಂ ಧಯ್ರಾನ್ ಮ್ಹಾಕಾ ಉರೊಂವ್ಚೊ ನಿರ್ಧಾರ್ ಘೆತ್‌ಲ್ಲೊ.

"ಭುರ್ಗಿಂ ದಿಂವ್ಚಿ ದೆವಾನ್, ತಾಂಕಾ ನಾಸ್ ಕರುಂಕ್ ಆಮ್ಕಾಂ ಹಕ್ಕ್ ನಾಂ" ಮಾಂಯ್ಚ್ಯಾ ಧೋರಣಾಕ್ ಬಾಬಾನ್ ಸಾಂಗಾತ್ ದಿಲ್ಲ್ಯಾನ್ ಮ್ಹಾಕಾ ಹ್ಯಾ ಸಂಸಾರಾಚೊ ಉಜ್ವಾಡ್ ದೆಕೊಂಕ್ ಫಾವೊ ಜಾಲ್ಲೊ.

ಮ್ಹಜ್ಯಾ ಆವಯ್ಚ್ಯಾ ನಿರ್ಧಾರಾಕ್ ತಿಕಾ ಸಭಾರಾಂ ಥಾವ್ನ್ ಆಯ್ಕೊಂಕ್ ಮೆಳ್ಳ್ಯಾರ್‌ಯೀ, ತೀ ಸೊಸ್ಣಿಕಾಯೆನ್ ಸರ್ವ್ ಆಯ್ಕಾತಾಲಿ.

ಭುರ್ಗ್ಯಾಚ್ಯಾ ವಾಡಾವಾಳಿಂತ್ ಊಣ್ ಆಸಾ ಮ್ಹಣುನ್ ಕಳಲ್ಲೆಂಚ್, ಭುರ್ಗೆಂ ನಾಕಾ ಮ್ಹಣುನ್, ಜಾವಾಬ್ದಾರೆ ಥಾವ್ನ್ ಹಾತ್ ಧುಂವ್ನ್ ಪೊಳ್ನ್ ಧಾಂವ್ಚಿ ಅವಯ್ ಬಾಪಾಯ್ ಆಸ್ಚ್ಯಾ ಹ್ಯಾ ಕಾಳಾಚಾ ಸಂಸಾರಾಂತ್, ಮ್ಹಜಿಂ ಆವಯ್ ಬಾಪುಯ್ ಮ್ಹಾಕಾ ನಿಜಾಯ್ಕೀ ಮ್ಹನ್ಶ್ಯಾಪಣಾಚ್ಯಾ ಸಿಂಹಾಸಣಾರ್ ಭೋವ್ ಉಂಚಾಯೆರ್ ಆಸಲ್ಲೆಂ ಪರಿಂ ದಿಸ್ತಾಲಿಂ.

ಮ್ಹಜ್ಯಾ ಯೆಣ್ಯಾ ಉಪ್ರಾಂತ್ ಮಾಂಯ್ಕ್ ಖರೆಂಚ್ ತ್ರಾಸ್ ಜಾಲ್ಲೆ, ಸ-ಸಾತ್ ವರ್ಸಾಂ ಜಾತಾ ಮ್ಹಣಾಸರ್ ಮ್ಹಜಿ ಸುಲಾಭಾಯೆನ್ ಸೆವಾ ಕೆಲ್ಲ್ಯಾ ಮಾಂಯ್ಕ್, ಆತಾಂ ವಾಡ್‍ಲ್ಲ್ಯಾ ಮ್ಹಜಿ, ಚಾಕ್ರಿ ಕರ್ಚೆಂ ತಿಕಾ ಎಕ್ ಸಾಹಸ್‍ಚ್ ಜಾಲ್ಲೆಂ. ತ್ಯಾ ವಯ್ರ್ ಮ್ಹಜ್ಯಾ ಕುಡಿಚ್ಯೊ ಗರ್ಜೊ ಸಯ್ತ್ ನೀದ್‍ಲ್ಲ್ಯಾ ಮಾಂದ್ರೆರ‍್ಚ್ ತಿರ್ಸಾತಾಲ್ಯೊ.

ಮ್ಹಜ್ಯಾ ಭುರ್ಗ್ಯಾ ಸಾರ್ಕ್ಯಾ ಮತಿಂತ್ ಉರ್ಬಾ ಆಸಾ ತರೀ, ಮ್ಹಜ್ಯಾ ಶಿರಾಂನಿ ತ್ರಾಣ್ ನಾ, ಹಾಡಾಂತ್ ಭಳ್ ನಾ..., ಕೊಣಾಚಿಚ್ ಸಹಾಯ್ ನಾಸ್ತಾನಾ ಹಾಂವ್ ಕಿತೆಂಚ್ ಕರುಂಕ್ ಸಕಾನಾ.

ಮಾಂಯ್ ಮ್ಹಜಿ, ಮ್ಹಜ್ಯಾ ಭುರ್ಗ್ಯಾಪಣಾ ಥಾವ್ನ್ ಮ್ಹಜೆ ಸರ್ಶಿಂ ಬಸೊನ್ ಮ್ಹಾಕಾ ಭಾಯ್ಲ್ಯಾ ಸಂಸಾರಾಚಿ ವಳಕ್ ಕರುನ್ ದಿಂವ್ಚೆಂ ಪ್ರಯತನ್ ಕರ್ತಾಲಿ. ಮ್ಹಜೆ ಜಾಣ್ವಾಯೆಚೆಂ ಮಟ್ಟ್ ಉಣೆ ಜಾಲ್ಲೆ ನಿಮ್ತಿಂ, ತಿಕಾ, ಮ್ಹಾಕಾ ಸಮ್ಜಂವ್ಕ್ ಭೋವ್ ಕಶ್ಟ್ ಮಾರ್ತಾಲೆ. ತರೀ ತಿ ಸಲ್ವನಾಸ್ತಾನಾ ಮ್ಹಾಕಾ ಶಿಕಯ್ತಾಲಿ. ತಿಕಾ ಮ್ಹಜಿ ಚಾಕ್ರಿ ಕರುನ್ ಭೋವ್ ಪುರಾಸಾಣ್ ಜಾತಾಲಿ ತರೀ, ತಿಚ್ಯಾ ದೊಳ್ಯಾಂನಿ ತೊ ಆಶಾವಾದಿ ಪರ್ಜಳ್ ಉಣೊ ಜಾಂವ್ಕ್ ನಾತ್‌ಲ್ಲೊ.

"ಮಾಂಯ್, ತುಜೆಂ ರೂಣ್ ಕಶೆಂ ಫಾರಿಕ್ ಕರುಂ? ಆನ್ಯೇಕ್ ಜಲ್ಮ್ ಮ್ಹಳ್ಳೊ ಆಸಾತ್ ತರ್, ಹ್ಯಾಚ್ ಮಾಂಯ್ಚ್ಯಾ ಗರ್ಭಾಂತ್ ಪರತ್ ಜಲ್ಮೊನ್, ತಿಚೆಂ ರೂಣ್ ವಾಡಿ ಸಮೇತ್ ಫಾರಿಕ್ ಕರುಂಕ್ ಮ್ಹಾಕಾ ಫಾವೊ ಕರ್ ದೆವಾ" ಮ್ಹಣುನ್ ಮ್ಹಜೆಂ ಮಾಗ್ಣೆಂ ಜಾವ್ನಾಸ್ತಾಲೆಂ.

ಮ್ಹಜೆ ಥಾವ್ನ್ ತಿಕಾ, ಖಂಯ್ ಕಾಜಾರ್ ಯಾ ಫೆಸ್ತಾ ಕಾರ್ಯಾಕ್ ಭಾಗ್ ಘೆಂವ್ಕ್ ಅವ್ಕಾಸ್ ಮೆಳ್‌ಲ್ಲೊಚ್ ನಾಂ. ಹಾಂವ್ ಮ್ಹಜ್ಯಾ ನಶಿಭಾಕ್ ರಡುಂಗೀ ವಾ ಮ್ಹಾಕಾ ರಚ್‌ಲ್ಲ್ಯಾ ರಚ್ನಾರಾಕ್ ಮ್ಹಜೆಂ ದುರ್ಸೊಣೆಂ ಭೆಟೊಂವ್? ಕಸಲೆಂ ವಿಚಿತ್ರ್ ಹೆಂ ಜಿವಿತ್?

"ಮ್ಹಾಕಾ ಕಿತ್ಯಾಕ್ ದವರ್ಲಾಯ್ ದೆವಾ, ಮ್ಹಜ್ಯಾ ವಾಂಟ್ಯಾಚೆಂ ಆವ್ಕ್, ಮ್ಹಜ್ಯಾ ಭಯ್ಣಿಕ್ ದೀ, ಆನಿ ಮ್ಹಾಕಾ ಸುಟ್ಕಾ ದೀ" ಮ್ಹಣೊನ್ ಹಾಂವೆಂ ದೆವಾಲಾಗಿಂ ಮಾಗ್‌ಲ್ಲೆಂ ಆಸಾ.

ವ್ಹಯ್ ದೆವಾನ್ ಅಪಯ್ಲೆಂ! ಮ್ಹಾಕಾ ನಹಿಂ ಮ್ಹಜ್ಯಾ ಸಂಸಾರಾಂತ್ಲೊ ದೇವ್..., ಮ್ಹಜ್ಯಾ ಮಾಂಯ್ಕ್!!!. 

ಪಾವ್ಶಿಲೆ ದೀಸ್, ಕಾಮಾಂ ಥಾವ್ನ್ ಭಿಜೊನ್‌ಚ್ ಘರಾ ಪಾಟಿಂ ಆಯಿಲ್ಲ್ಯಾ ಬಾಬಾಕ್ ಹುನೊನಿ ಕಸಾಯಾಚೊ ಲೊಟೊ ಹಾಡ್ನ್ ಅಯಿಲ್ಲಿ ಮಾಂಯ್ ಹರ್ಧೆಂ ದೂ:ಖ್ ಮ್ಹಣೊನ್ ಪರ್ತಾತಾನಾ, ತಿಚ್ಯಾ ಹಾತಾಂತ್ ಥಾವ್ನ್ ನಿಸ್ರಾಲ್ಲೊ ಲೊಟೊ, ಮ್ಹಜ್ಯಾ ಕುಡಾಚ್ಯಾ ದಾರಾ ಲಾಗ್ಸಾರ್ ಯೇವ್ನ್ ಆವಾಜ್ ಕರುಂಕ್ ಪಾವ್ಲೊ.  

ಮ್ಹಜ್ಯಾ ಭಯ್ಣಿಚ್ಯಾ ಹಾಕ್ ಬೊಬೆಕ್, ಉಟೊನ್ ದಾಂವುನ್ ಮಾಂಯ್ಕ್ ಆರಾವ್ನ್, ಉಕೊಲ್ನ್ ಆಸ್ಪತ್ರೆಕ್ ಧಾಂವ್ಯಾಂ ಮ್ಹಣುನ್ ಚಡ್ಪಾಡ್ಲೊಂ, ತರೀ ಮ್ಹಜೆ ನಿತ್ರಾಣಿ ಹಾತ್ ಪಾಂಯ್ ಆನಿಂ ತಕ್ಲಿ ಉಕ್ಲುಂಕ್ ತಾಂಕಾನಾಸ್ತಾನಾ ಆಸಾಯಕತೆನ್ ಮ್ಹಜೆ ದೊಳೆ ದು:ಖಾಂ ಪೊಲ್ಯಾರ್ ಗಳಯ್ತ್ ಆಸ್ಲೆ.

ದಾಕ್ತೆರಾಕ್ ಆಪವ್ನ್ ಹಾಡ್ನ್ ಆಯಿಲ್ಲೊ ಬಾಬ್, ಸ್ಥಬ್ಧ್ ಜಾಲ್ಲ್ಯಾ ಮಾಂಯ್ಕ್ ಪಳೆವ್ನ್ "ಸೆಲ್ಲೆ...., ಸೆಲ್ಲೆ...... ಉಲಯ್ ಸೆಲ್ಲೆ.......  ಮ್ಹಣ್ಚಿ ಬಾಬಾಚಿ ಬೊಬಾಟ್ ಮ್ಹಜೆ ಧಡ್ದಡೆ ಚಡಯ್ತಾಲೆ. ದಾಕ್ತೆರಾನ್, ಮಾಂಯ್ಚಿ ಬಿ.ಪಿ., ಹಾತಾಚಿ ಆನಿ ಹರ್ಧ್ಯಾಚಿ ಊಡಿ ಪಳೆವ್ನ್ ಜಾತಾಚ್, ಹಾತ್ ಉದಾರೆಂ ಕರ್ಚೆಂ ಮ್ಹಾಕಾಯ್ ಸ್ವಸ್ಟ್ ದಿಸ್ತಾಲೆಂ.

"ಸಮಾ ತಿಚಿ ಪರೀಕ್ಷಾ ಕರಾ ದಾಕ್ತೆರಾನೊ" ದಾಕ್ತೆರಾಚ್ಯಾ ಪಾಯಾಂಕ್ ಪಡುನ್ ಆಡ್ಡೊಸ್ ಮಾಗ್ಯಾಂ ಮ್ಹಣೊನ್ ಮ್ಹಾಕಾ ಭೊಗ್ತಾಲೆಂ ತರೀ, ಆಸಹಾಯಕ್ ಹಾಂವ್, ಮಾಂದ್ರೆ ವಯ್ಲೊ ಕುಲೊ ಉಕ್ಲುಂಕ್ ತಾಂಕಾನಾಸ್ತಾನಾ ಮ್ಹಜ್ಯಾ ದುರ್ಭಾಗ್‍ಪಣಾಕ್ ದುರ್ಸಾತಾಲೊಂ.

ಮ್ಹಜ್ಯಾ ಖಾತಿರ್ ಸಾಕ್ರಿಫಿಸ್ ಕರುನ್, ಕುಟ್ಮಾ ಖಾತಿರ್ ಜರ್ಕಟ್‌ಲ್ಲ್ಯಾ ಮಾಂಯ್ಕ್, ಮ್ಹಜೆ ಥಾವ್ನ್ ಕಿತೆಂಚ್ ಸಹಾಯ್ ದಿಂವ್ಕ್ ಜಾಯ್ನಾನೆಂ ಮ್ಹಣ್ ಮ್ಹಜೆ ಅಟೆವಿಟೆ ಚಡ್ ಜಾತಾಲೆ.

ಉಣ್ಯಾ ಬುದಿಚ್ಯಾ ಮ್ಹಾಕಾ, ಮ್ಹಜೊ ಸುರ್ಯೊ ಬುಡ್ಲೊ ಮ್ಹಣೊನ್ ಕಳ್ಳೆಂ. ಬಾಬ್ ಆನಿ ಭಯ್ಣಿಚೆ ದೂಖ್ ಸಗ್ಳ್ಯಾ ವಾಡ್ಯಾಕ್ ಜಾಗಯ್ ಲಾಗ್ಲೆಂ. ಭಯ್ಣ್ ಯೇವ್ನ್ ಮ್ಹಕಾ ದಾಂಬುನ್ ಧರುನ್ ಗಳ್ಗಳ್ಯಾಂ ರಡ್ಲೆಂ. ಸಂತೊಸಾನ್ ಆಸ್‌ಲ್ಲೆಂ ಆಮ್ಚೆಂ ಘರ್ ದುಖಾನಿಂ ಬುಡ್ಲೆಂ!!

ಹಾಂವ್ ಗಳ್ಗಳ್ಯಾ ರಡ್ತಲೊಂ ಮ್ಹಾಕಾ ಜಲ್ಮ್ ದಿಲ್ಲ್ಯಾ ದಿಸಾ ಥಾವ್ನ್ ಎಕಾ ದಿಸಾಚೆಂ ಸುಟಿ ತಿಕಾ ಮೆಳ್‌ಲ್ಲಿ ನಾಂ, ಸುಖ್ ತಿಣೆಂ ಭೊಗ್‌ಲ್ಲೆಂ ನಾಂ.

ಮೊರ್ನಾಕ್ ಆಯಿಲಿಂ ಸರ್ವಾಂ, ಮ್ಹಾಕಾ ಪಳೆವ್ನ್ ಭಿರ್ಮೊತ್ ಉಚಾರ್ತಾಲಿಂ. ಕುಟ್ಮಾಚಿಂ ಸಯ್ರಿಂ ಧಯ್ರಿಂ ಮಾಂಯ್ ಸರ್‌ಲ್ಲ್ಯಾ ದಿಸಾ ಥಾವ್ನ್ ಅಮ್ಗೆರ್ ರಾವೂನ್, ಸಾತ್ವ್ಯಾ ದಿಸಾ ಭಿತರ್ ಎಕೆಕ್ಲಿಂಚ್ ನಿಕಾಳ್ಳಿಂ.

ಮಾಂಯ್ಚ್ಯಾ ಸಾತ್ವ್ಯಾ ದಿಸಾಚ್ಯಾ ಮಿಸಾ ಉಪ್ರಾಂತ್ ಆಮಿ ಘರಾ ತೆಗಾಂಚ್... ಘರಾ ಭಿತರ್ಲೊ ಹಾಸೊ, ಸಂತೊಸ್ ಸರ್ವ್ ಮಾಂಯ್ ಸಾಂಗಾತಾಚ್ ಫೊಂಡಾಂತ್ ಪೂರ್ನ್ ಅಯಿಲ್ಲ್ಯಾಂವ್.

ಮಾಂಯ್, ಅಮ್ಕಾಂ ಸಾಂಡುನ್ ಮ್ಹಹಿನೊ ಉತರ್‌ಲ್ಲೊ. ಸವ್ಕಾಸ್ ಸಂಗ್ತಿ ಸಾಮಾನ್ಯ್ ಸ್ಥಿತಿಕ್ ಯೆಂವ್ಕ್ ಖರೊಚ್ ವೇಳ್ ಲಾಗ್ತಲೊ, ಆಮ್ಚ್ಯಾ ಘರ್ಚೊ ಖುಂದೊ ತಿ ಜಾವ್ನಾಸ್‌ಲ್ಲಿ. ಕುಟ್ಮಾಚೆಂ ಜೂಂವ್ ಬಾಬಾ ಸಾಂಗಾತಾ ಮೆಳುನ್ ವೊಡ್ತಾಲಿ ಆನಿ ಅತಾಂ ಹೆಂ ಜೂಂವ್ ವೊಡುಂಕ್ ಬಾಬ್ ಎಕ್ಲೊ ಕಶ್ಟೊನ್ ಆಸಾ.

ಬಾಬಾಕ್ ಆಧಾರ್ ಜಾಯ್ಜಯ್ ಜಾಲ್ಲೊ ತರ್ನಾಟೊ ಹಾಂವ್, ಹಾತಾ ಪಾಯಾಂಕ್ ಬಳ್ ನಾಸ್ತಾನಾ ಬಾಬಾಚ್ಯಾ ಭೊರ್ಯಾ ವರ್ಯ್ ಭೊರ್ಕುಟಿ ತಶೆಂ ಜಾಲಾಂ!! ಶಿಕಪ್ ಶಿಕ್ಚೆಂ ಭಯ್ಣ್, ಸಾಂಗಾತಾಚ್ ಮ್ಹಜ್ಯಾ ವ್ಹಕ್ತಾಂಚೊ ಖರ್ಚ್. ಭುಂಯ್ ಬಾಟ್ ಆಸ್‌ಲ್ಲಿ ಮ್ಹನ್ಶ್ಯಾ ಆಮಿಂ ನಹಿಂ. ಕುಡ್ಕ್ಯಾ ಜಾಗ್ಯಾರ್ ಲಾನ್ಶೆಂ ಘರ್ ಬಾಬಾನ್ ವಡಾ ಕಷ್ಟಾನಿಂ ಉಬಾರ್‌ಲ್ಲೆಂ.

ಬಾಬಾಚೆಂ ಕೂಲಿಚೆಂ ಕಾಮ್‌ಚ್ ಆಮ್ಚ್ಯಾ ಪೊಟಾಕ್ ಆಧಾರ್. ಮ್ಹಾಕಾ ಎಕ್ಲ್ಯಾಕ್‌ಚ್ ಘರಾ ಸೊಡುಂಕ್‌ಯಿ ಕಷ್ಟ್, ಬಾಬಾಚೆ ಹಾತ್ ಭಾಂದುನ್ ಘಾಲ್ಲ್ಯಾಬರಿ ಜಾತಾಲೆಂ, ಬಾಬ್ ಖರೊಚ್ ಕಂಗಾಲ್ ಜಾಲ್ಲೊ.

ವಾಡ್ಯಾಚೊ ಗುರ್ಕಾರ್ ಬಾಬಾಕ್ ಅಪ್ಲ್ಯಾ ತೋಟಾಚ್ಯಾ ಕಾಮಾಕ್ ಅಪಂವ್ಕ್ ಅಯಿಲ್ಲೊ. ಬಾಬ್ ಘರ್ಚ್ಯಾ ರಾಟಾವಾಳಿನಿಂ ಶಿರ್ಕಾಲ್ಲೊ ಪಳೆವ್ನ್ "ತುಜ್ಯಾ ಪುತಾಕ್ ಕೇರ್ ಸೆಂಟರಾಂತ್ ದವರುಂಕ್ ನಜೊವೆ ಸಿರ್ಲಾಬಾ? ತುಂ ಹ್ಯಾ ಪ್ರಾಯೆರ್ ಖಂಚ್ಯಾ ಜವಾಬ್ದಾರೆಕ್ ಖಾಂದ್ ಮಾರ್ತಲೊಯ್? ಧುವೆಚೊ ಪುಡಾರ್ ಪಳಯ್ತಲೊಯ್‌ಗೀ ವಾ ತುಜ್ಯಾ ಪುತಾಚಿ ಸೆವಾ ಕರುನ್ ತೂಂಯ್ ಮಾಂದ್ರೆರ್ ಪಡ್ತಲೊಯ್?" 

ಕುಡಾಂತ್ ನಿದ್‍ಲ್ಲ್ಯಾ ಮ್ಹಾಕಾ ಗುರ್ಕಾರಾಚಿಂ ಉತ್ರಾಂ ಕಾನಾಕ್ ಪಡ್ತಾಲಿಂ. ಮಾಂಯ್ ಸರ್ಲ್ಯಾ ನಂತರ್ ಬಾಬಾಕ್ ಹ್ಯಾ ರಿತಿನ್ ಬೂದ್ ಸಾಂಗ್ಚಿಚ್ ಚಡ್ ಜಾಲ್ಲಿಂ. ವ್ಹಡ್ಲ್ಯಾನ್ ಉಲೊಂವ್ಕ್‌ಯೀ ಮ್ಹಜೊ ಬಾಬ್ ನೆಣಾಂ. ಮಾಂಯ್ ತಿತ್ಲೆಂ ಧಯ್ರ್‌ಯೀ ತಾಕಾ ನಾತ್‌ಲ್ಲೆಂ.

ಮಾಂಯ್ ಘಟ್ಟ್ ಧಯ್ರಾಧಿಕ್, ಅಪ್ಲ್ಯಾ ಭುರ್ಗ್ಯಾಂಕ್ ಕೆದಾಳಾಯ್ ಸೊಡ್ನ್ ದಿನಾತ್‌ಲ್ಲಿ. ಹಾಂವ್ ಜಲ್ಮಲ್ಲ್ಯಾ ಥಾವ್ನ್, ಲೊಕಾಚೆಂ ಆಯ್ಕುನ್ ತಿಣೆಂ, ತಿಚೆ ಕಾನ್ ದಾಟ್ ಕರ್ನ್ ಘೆತ್‌ಲ್ಲೆ. ಪುಣ್ ಬಾಬ್ ಕೊಣೀ ಕಿತೆಂಯ್ ಸಾಂಗ್ಲ್ಯಾರ್‌ಯಿ ಬಾಬ್ ಗೊಮ್ಟಿ ಆಡ್ ಘಾಲ್ತಾಲೊ. ತೋ ಸಯ್ತ್ ಅಸಹಾಯಕ್... ಹಾಂವ್, ತಾಕಾ ಕಿತ್ಯಾಕ್ ದುರ್ಸುಂ?

ಹಿಂ ಸರ್ವ್ ಉತ್ರಾಂ ಮ್ಹಾಕಾ ದುಖಯ್ತಾಲಿಂ, ತರೀ ತಾಣಿಂ ಸಾಂಗ್ಚ್ಯಾತ್‌ಯೀ ಸತ್ ಝಳ್ಕತಾಲೆಂ. "ಮ್ಹಜೆ ಥಾವ್ನ್ ಮ್ಹಜ್ಯಾ ಬಾಬಾಕ್ ಕಿತ್ಲೆ ಕಷ್ಟ್" ತೆಂ ಚಿಂತಾನಾ ಬಾಬಾಚಿ ಮ್ಹಕಾ ಭಿರ್ಮತ್ ದಿಸ್ತಾಲಿ. 

"ಗುರ್ಕಾರಾನೊಂ... ಮ್ಹಜ್ಯಾ ದಾಟ್ಟು ಆನಿಂ ಮ್ಹಜ್ಯಾ ಬಾಬಾಚಿಂ ತುಮಿಂ ಖಂತ್ ಕರಿನಾಕಾತ್. ಹಾಂವ್ ತಾಂಚಿ ಜತನ್ ಘೆತಾಂ. ಮ್ಹಾಕಾ ಮ್ಹಜ್ಯಾ ಮಾಂಯ್ ಬಾಬಾನ್ ಕಷ್ಟಾನಿಂ ಶಿಕಪ್ ದಿಲಾಂ. ಕಷ್ಟ್ ಫುಡ್ ಕರುಂಕ್ ಶಿಕಯ್ಲಾಂ. ಕಿತ್ಲೆಂ ಕಠಿಣ್ ವಾದಾಳ್ ಅಯ್ಲ್ಯಾರೀ ಹೆಂ ಆಮ್ಚೆಂ ಕುಟ್ಮಾಚೆಂ ತಾರುಂ ಹಾಂವ್ ಬುಡೊಂಕ್ ಸೊಡ್ಚಿಂ ನಾಂ" ಭಯ್ಣಿಚಿಂ ಅವೇಶಾನ್ ಭರ್‌ಲ್ಲಿಂ ಉತ್ರಾಂ ಮ್ಹಜ್ಯಾ ಕಾನಾಕ್ ಪಡ್ಲಿಂ. ಭಯ್ಣಿಚ್ಯಾ ನಿರ್ಧಾರಾಕ್ ಖಂಡನ್ ಕರುಂಕ್ ಮ್ಹಾಕಾ ಸಕತ್ ನಾತ್‌ಲ್ಲಿ. "ಮ್ಹಜೆ ಖಾತಿರ್ ತುಜೊ ಫುಡಾರ್ ವಿಭಾಡಿನಾಕಾ" ಮ್ಹಣೊನ್ ಮ್ಹಜ್ಯಾ ಭಯ್ಣಿಕ್ ಸಾಂಗೊಂಕ್ ಪ್ರಯತ್ನ್ ಕರ್ತಾಲೊಂ ತರೀ ಮ್ಹಜೊ ಅವಾಜ್ ತಾಕಾ ಅಯ್ಕಲೊಚ್ ನಾ. 

ಭಯ್ಣಿನ್ ಮ್ಹಜ್ಯಾ ಆನಿ ಬಾಬಾ ಖಾತಿರ್ ತಾಚೆಂ ಪಿಯುಸಿಚೆಂ ಫಲಿತಾಂಶ್ ಜಾಲ್ಲೆಂಚ್ ಶಿಕಪ್ ಸೊಡುಂಕ್ ನಿರ್ಧಾರ್ ಕೆಲೊ. "ನಿರ್ಭಾಗಿ ಭಯ್ಣಿಚೊ ಭಾಗಿ ಭಾವ್ ಹಾಂವ್" ಭಯ್ಣಿಚೊ ಸಾಕ್ರಿಫಿಸ್  ನಿಯಾಳುನ್ ಮ್ಹಜ್ಯಾ ದೊಳ್ಯಾನಿಂ ಧಾಂವ್ಚಿ ಉಪ್ಕಾರಿ ದುಕಾಂ ಪುಸುಂಕ್ ಮ್ಹಜೆ ಹಾತ್ ವರ್ಯ್ ಸರ್ಲೆನಾಂತ್!!

ಪ್ರೀತಾ ಮಿರಾಂದ, ವಾಲೆನ್ಸಿಯಾ