ಆದೇವ್ಸ್ ಮನು ಬಾಹ್ರೆಯ್ನ್, ಆದೇವ್ಸ್.

- ನಾನು ಮರೋಲ್, ತೊಟ್ಟಾಮ್

ಪಾಟ್ಲ್ಯಾ ಹಪ್ತ್ಯಾ ಥಾವ್ನ್ ಭೋವ್ ಲಾಗ್ಶಿಲ್ಯಾಂಚ್ಯಾ ಮರ್ಣಾಚಿ ಖಬರ್ ಆಯ್ಕೊನ್ ಥಕೊನ್ ಗೆಲ್ಲ್ಯಾ ಮ್ಹಜ್ಯಾ ಕಾನಾಂಕ್ ಮಾರ್ಚ್ ಮಯ್ನಾಚ್ಯಾ ಅಟ್ರಾ ತಾರಿಕೆಚೊ ದೀಸ್ ಉದೆತಾನಾ ಸಯ್ತ್ ಕಾಂಯ್ ಸಂತೊಸ್ ದೀಂವ್ಕ್ ಸಕೊಂಕ್ ನಾಂ. ಕೊಂಕ್ಣಿ ಸಾಹಿತ್ಯಾಂತ್ ಜಾಯ್ತಿ ಕ್ರಷಿ ಕರುನ್ ವಾಚ್ಪ್ಯಾಂಚಿಂ ಕಾಳ್ಜಾಂ ಮನಾಂ ಜಿಕೊನ್ ಆಪ್ಲೊಚ್ ಮ್ಹಳ್ಳೊ ಆಭಿಮಾನಿ ವ್ರಂದ್ ರುತಾ ಕೆಲ್ಲೊ ಮ್ಹಜ್ಯಾ ಮೊಗಾಚೊ ಮನು ಬಾಹ್ರೇಯ್ನ್ (ಸ್ಟ್ಯಾನಿ ವಿಲಿಯಮ್ ಲೋಬೊ) ಹಾಣೆ ಆಪ್ಲ್ಯಾ ಸಂಸಾರಿ ಪಯ್ಣಾಕ್ ಆದೇವ್ಸ್ ಮಾಗ್ಲೊ ಮ್ಹಳ್ಳಿ ಕೊಡು ಖಬರ್ ಆಯ್ಕೊಂಕ್ ಮ್ಹಜ್ಯಾ ಕಾನಾಂನಿ ಥೊಡಿಂ ಕ್ಷಣಾಂ ಘಳಾಯ್ ಕೆಲ್ಲ್ಯಾ ಬರಿ ಭೊಗ್ಲೆಂ ಮ್ಹಾಕಾ. ಅಪ್ಲೆಂ ಸಂಸಾರಿ ಪಯ್ಣ್ ಸಂಪಯ್ತಾನಾ ಮನುಕ್ 78 ವರ್ಸಾಂಚಿ ಪ್ರಾಯ್. ಥೊಡ್ಯಾ ಕಾಳಾ ಥಾವ್ನ್ ಆಸ್ವಸ್ಥ್ ಆಸ್‍ಲ್ಲೊ ಮನು ಬಾಹ್ರೇಯ್ನ್ ಆಪ್ಲಿ ಪತಿಣ್ ರೊಜಿ ಬಾಯ್, ಭುರ್ಗಿಂ ಸೊನಿಯಾ, ಶೆರಿಲ್ ಆನಿ ಸ್ಟೀವನ್ ಸಾಂಗಾತಾ ಆಪ್ಲ್ಯಾ ಆಪಾರ್ ಆಭಿಮಾನ್ ವ್ರಂದಾಕ್ ಪಾಟಿಂ ಸೊಡುನ್ ಮುಕಾರ್ ಗೆಲಾ.

ಮನು ಬಾಹ್ರೇಯ್ನ್ ಆನಿ ಮ್ಹಜಿ ವ್ಹಳೊಕ್ ಕಾಂಯ್ 1992-1993 ವ್ಯಾ ವರ್ಸಾ ಥಾವ್ನ್ ಸುರು ಜಾಲ್ಲಿ. ತೆದಾಳಾ ಹಾಂವ್ ಡೆಲ್ಲಿಂತ್ ವಾವ್ರ್ ಕರುನ್ ಆಸ್‍ಲ್ಲೊಂ. ಎಕಾ ದಿಸಾ ಸಕಾಳಿಂಚ್ಯಾ 4 ವ್ಹರಾರ್ ಮ್ಹಜ್ಯಾ Land Line (ತೆದಾಳಾ ಭಾರತಾಂತ್ ಮೊಬಾಯ್ಲಾಂ ಯೇಂವ್ಕ್ ನಾತ್‍ಲ್ಲಿಂ) ವಯ್ರ್ ಫೋನ್. ಸಕಾಳಿಂ ಫುಡೆಂ ಕೋಣ್ ಆಸೊಂಕ್ ಪುರೊ ಮ್ಹಣೊನ್ ಪೋನ್ ಉಕಲ್ತಾನಾ ತ್ಯಾ ಕುಶಿನ್ ಥಾವ್ನ್ "ಹಾಂವ್ ಮನು ಬಾಹ್ರೇಯ್ನ್ ಉಲಯ್ತಾಂ" ಮ್ಹಳ್ಳೆಂ ಆಯ್ಕೊನ್ ಹಾಂವ್ ಥಂಯ್ಚ್ ಥಟಕ್ಕ್ ಜಾಲ್ಲೊಂ. ಕಿತ್ಯಾಕ್ ಮ್ಹಳ್ಯಾರ್ ತ್ಯಾ ಕಾಳಾರ್ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ಮನು ಬಾಹ್ರೇಯ್ನ್ ಮ್ಹಳ್ಳ್ಯಾರ್ ಏಕ್ ಭೋವ್ ವ್ಹಡ್ಲೆಂ ಆನಿ ಗೌರವಾಚೆಂ ನಾಂವ್. ಝೆಲೊ ಸಂಪಾದಕ್ ಮಾನೇಸ್ತ್ ಡೊಲ್ಫಿ ಕಾಸ್ಸಿಯಾಲಾಗಿಂ ಮ್ಹಜೆಂ ನಂಬರ್ ಘೆವ್ನ್ ಮ್ಹಾಕಾ ಫೋನ್ ಕೆಲ್ಲೊ ತಾಣೆ.

ತಾಚ್ಯಾ ಉಪ್ರಾಂತ್ ತಾಚ್ಯಾ ಫೋನಾಂಕ್ ವಿರಾಮ್ ನಾತ್‍ಲ್ಲೊ. ಭಾಯ್ಲ್ಯಾ ಗಾಂವಾಂತ್ ಥಾವ್ನ್ ಫೋನಾಂ ತೆದಾಳಾ ದುಬಾರಿ ವ್ಹಯ್ ತರೀ ತೊ ಮೊಸ್ತು ಉಲಯ್ತಾಲೊ. ಕೆದಾಳಾ ತಾಚಿ ಕಾಣಿ / ಕಾದಂಬರಿ ಪ್ರಕಟ್ ಜಾತಾ ತೆದಾಳಾ ತಾಚ್ಯಾ ವಯ್ರ್ ಆಮ್ಚೆಂ ಮೊಸ್ತು Discussion ಜಾತೆಲೆಂ. ಮ್ಹಾಕಾ ಬೊರೊ ಲಾಗ್‍ಲ್ಲೊ ತಾಚೊ ವ್ಹಡ್ಲೊ ಗೂಣ್ ಮುಳ್ಳ್ಯಾರ್ ತೊ ಆಪ್ಲ್ಯಾ ಸಾಹಿತ್ಯಾಂತ್ ಕೆದ್ನಾಂಯ್ ಹೊಗ್ಳಿಕ್ ಪಸಂದ್ ಕರಿನಾತ್‍ಲ್ಲೊ. ಕಾಂಯ್ ಇಲ್ಲೆಂ ಹೊಗೊಳ್ಸುನ್ ಬರಯ್ಲ್ಯಾರ್ ತೊ ಇಲ್ಲೊ ರಾಗಾರ್ ಜಾತಾಲೊ. ತ್ಯಾಚ್ಚ್ ದೆಕುನ್ ಮ್ಹಾಕಾ ಭಗ್ತಾ ತೊ ಎಕಾ ವರ್ನಿ ಎಕ್ ಊಂಚ್ ಸಾಹಿತ್ಯ್ ರಚನ್ ಕರಿತ್ತ್ ಗೆಲೊ ಆನಿ ಯಶಸ್ವಿ ಜಾಲೊ. ತಾಚ್ಯಾ "ಆರಣ್ಯಾಂತ್ಲೊ ತಾಳೊ" ಕಾದಂಬರಿಕ್ ಸರಿಸಾಟಿ ಕಾದಂಬರ‍್ಯೊ ಭೋವ್ ಮುಳ್ಳ್ಯಾರ್ ಭೋವ್ ವಿರಳ್ ಮ್ಹಣ್ಯೆತ್. ತಾಚ್ಯಾ ಕಾಣಿಯಾಂನಿ / ಕಾದಂಬರಿಂನಿ ತೊ ರಾನಾಂಚಿ ಜಾಯ್ತಿ ಭೊಂವ್ಡಿ ಕಾಡ್ತಾಲೊ ಆನಿ ಇತ್ಲೆಂ ಸಹಜ್ ಜಾವ್ನ್ ಪಿಂತ್ರಾಯ್ತಾಲೊ ಕೀ ವಾಚ್ಪಿಚ್ಚ್ ರಾನಾ ಭಿತರ್ ಭೊಂವೊನ್ ಆಸಾ ಮ್ಹಳ್ಳೊ ಆನ್ಭೊಗ್ ವಾಚ್ಪ್ಯಾಕ್ ದಿತಾಲೊ. "ಆರಣ್ಯಾಂತ್ಲೊ ತಾಳೊ" ಹ್ಯಾ ವ್ಹಡ್ ಕಾದಂಬರಿ ಉಪ್ರಾಂತ್ ಮ್ಹಾಕಾ ಪಸಂದ್ ಜಾಲ್ಲ್ಯೊ ತಾಚ್ಯೊ ಕಾದಂಬರಿ ಜಾವ್ನಾಸಾತ್ "ನತಾಲಿಯಾ", "ಜಯ್ತಾಚಿಂ ಮೆಟಾಂ", "ಮಿನಿನಾಚೊ ಗಾಂಚ್", "ಮೊಗಾಚಿಂ ರುಪಾಂ", "ಮೋಗ್ ಆನಿ ಮಯ್ಪಾಸ್" ಆನಿ ಹೆರ್ ಕಥಾ / ಕಾದಂಬರಿ. ಮ್ಹಜ್ಯಾ ಸಾಹಿತ್ಯ್ ಪಯ್ಣಾಂತ್ ತೊ ಏಕ್ ಖರೊ ಮಾರ್ಗದರ್ಶಕ್ ಆನಿ ಪ್ರೇರಕ್ ಜಾವ್ನಾಸ್‍ಲ್ಲೊ.

ಸಾಂ ಲುವಿಸ್ ಹೈ-ಸ್ಕೂಲಾಂತ್ ಆಪ್ಲೆಂ ಧಾವಿ ಪರ್ಯಾಂತ್ಲೆಂ ಶಿಕಾಪ್ ಶಿಕೊನ್ 1969ತ್ ಆಪ್ಲೆಂ ವ್ರತ್ತಿ ಜೀವನ್ ಆರಂಭ್ ಕೆಲ್ಲ್ಯಾ ಮನು ಬಾಹ್ರೆಯ್ನ್ ಹಾಣೆಂ ಬಾಹ್ರೆಯ್ನ್ ವೆಚ್ಯಾ ಪಯ್ಲೆಂ 1969-1977 ಪರ‍್ಯಾಂತ್ ಮಫತ್‍ಲಾಲ್ ಪ್ಲೈವುಡ್ ಕಂಪೆನಿ ಬೆಂಗ್ಳೂರ್ ಹಾಂಚ್ಯಾ ಬಂಟ್ವಾಳ್ ಶಾಖ್ಯಾಂತ್ ಸುಪರ್‌ವೈಸರ್ ಜಾವ್ನ್, 1977-1978 ಪರ‍್ಯಾಂತ್ ಕಂಪೆನಿ ಥಾವ್ನ್ ಫಾರೆಸ್ಟ್ ಜವಾಬ್ದಾರಿ ಕಾಮ್ಗಾರ್ - ಹಾಸನ್, ಕೂರ್ಗ್ ಡಿವಿಜನಾಚೊ ಮೇಲ್ವಿಚಾರಕ್ ತಶೆಂಚ್ ಸರ್ಕಾರಿ ಕಾಮಾಂಚೊ ವ್ಯವಹಾರಿ ವ್ಯಕ್ತಿ  ಜಾವ್ನ್ ತಶೆಂಚ್ 1979-1986 ಪರ‍್ಯಾಂತ್ ಪ್ಲಾಂಟೆಶನ್ ವ್ಯವಹಾರ್ - ಶಿಮ್ಗೆಚ್ಯಾ ಸೊರಬಾಂತ್ಲ್ಯಾ 4 ರಾನಾಂಚಿ ಜವಾಬ್ದಾರಿ ತಾಣೆ ಸಾಂಬಾಳ್ಳ್ಯಾ.

ತಾಚ್ಯಾ ಸಾಹಿತ್ಯ್ ವಾವ್ರಾ ವಯ್ರ್ ಹಾಂವ್ ಏಕ್ ನದರ್ ಮಾರುಂ ತರ್....

ಮನು ಬಾಹ್ರೇಯ್ನ್ ಹಾಣೆ 7 ದೀರ್ಘ್ ಕಾದಂಬರಿ, 35 ಮಟ್ವ್ಯೊ ಕಾದಂಬರಿ, 500ಚ್ಯಾಕೀ ವಯ್ರ್ ಮಟ್ವ್ಯೊ ಕಥಾ, 200 ವಯ್ರ್ ಕವಿತಾ, 150 ವಯ್ರ್ ವಿನೋದ್, 25 ವಯ್ರ್ ಖಾಸ್ ಜಿಣಿಯೆಂತ್ಲಿಂ ರೋಚಕ್ ಘಡಿತಾಂ, 3 ನಾಟಕ್, 15 ನಾಟ್ಕುಳೆ, 25 ಭಂವ್ಡ್ಯೊ ಆನಿ ಪ್ರತ್ಯಕ್ಷ್ ಆನುಭವವಿಶಿಂ ಲೇಖನಾಂ, 100 ವಯ್ರ್ ಸಮಯೋಚಿತ್ ಚುಟುಕಾಂ ತಶೆಂಚ್ 600 ವಯ್ರ್ ಮತಿಂತ್ಲಿ ಚಿಂತ್ನಾ ತಾಣೆ ಲಿಖ್ಲ್ಯಾಂತ್.

ಪ್ರಕ್ರತಿ - ವಿಶೇಷ್ ಜಾವ್ನ್ ರಾನ್ ಆನಿ ರಾನ್ವಟ್ ಮನ್ಜಾತಿ ವಿಶಿಂ ರೋಮಾಂಚಕ್ ಲಿಖಿತಾಂ ಬರೊಂವ್ಚ್ಯಾಂತ್ ತಾಕಾ ಚಡ್ ಆಭಿರೂಚ್ ಆನಿ ಆಸಕ್ತ್.

ಬಾಹ್ರೇಯ್ನಾಂತ್ ಆಸ್ತಾನಾ ಸತತ್ ಪಾಂಚ್ ವರ್ಸಾಂ "ಝೆಲೊ – ಬಾಹ್ರೇಯ್ನ್‌ಗಾರಾಂಚೊ ವಿಶೇಷ್ ಆಂಕೊ" ಹಾಚೊ ಗೌರವ್ ಸಂಪಾದಕ್ ಜಾವ್ನ್ ಯಶಸ್ವಿ ವಾವ್ರ್ ದಿಲಾ. "ಮಿತ್ರ್" ವಿಶೇಷ್ ಆಂಕ್ಯಾಚೊ ಗೌರವ್ ಸಂಪಾದಕ್ ಜಾವ್ನ್ ಫಳಾಧಿಕ್ ವಾವ್ರ್ ದಿಲಾ.

ಸಾಮಾಜಿಕ್ ವಾವ್ರಾಂತ್ ಮನು ಬಾಹ್ರೇಯ್ನಾಚೊ ಉಕಲ್ಲೊಲೊ ಹಾತ್. "ಕೊಂಕ್ಣಿ ಕುಟಾಮ್ - ಬಾಹ್ರೆಯ್ನ್" ಹಾಚೊ ಸ್ಥಾಪಕ್ ಸಾಂದೊ. ಗಾಂವ್ಚೆ ರಿತಿ ರಿವಾಜಿ ಪ್ರಕಾರ್ ಬಾಹ್ರೆಯ್ನಾಂತ್ ಮೊಂತಿ ಫೆಸ್ತಾಚೆಂ ಆಚರಣ್ ಕರ್ಚ್ಯಾಕ್ ಉತ್ತೇಜನ್ ಆನಿ ಪ್ರೇರಣ್ ತಾಣೆ ದಿಲಾಂ. ತೊ ಏಕ್ ಪದಾಂ ಆನಿ ತಾಳೆ ಘಡ್ಣಾರ್, ಗಾವ್ಪಿ, ನಟ್ ಆನಿ ನಿರ್ದೇಶಕ್. ಥೊಡ್ಯಾ ಕೊಂಕ್ಣಿ ಸಾಹಿತ್ಯ್ ಶಿಭಿರಾಂನಿ ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಆಪ್ಲಿ ಜಾಣ್ವಯ್ ವಾಂಟ್ಲ್ಯಾ.

ಮನು ಬಾಹ್ರೇಯ್ನ್ ಹಾಣೆ ಸಮಾಜೆಂತ್ ಆನಿ ಸಾಹಿತ್ಯಾಂತ್ ಇತ್ಲೊ ವಾವ್ರ್ ಕೆಲ್ಲೊ ತರೀ ಪ್ರಶಸ್ತಿ ಆನಿ ಗೌರವಾಂ ಪಾಟ್ಲ್ಯಾನ್ ಕೆದಿಂಚ್ ಧಾಂವೊಂಕ್ ನಾಂ. ಬಗಾರ್ ತಾಕಾ ತೆ ಸೊಧುನ್ ಆಯ್ಲೆ. ಆಶೆಂ ತಾಕಾ ಮೆಳ್‍ಲ್ಲ್ಯಾ ಥೊಡ್ಯಾ ಪ್ರಶಸ್ತ್ಯೊ ಆನಿ ಗೌರವಾಂಚೊ ಉಲ್ಲೇಖ್ ಕರ್ಚೊ ತರ್:

• "ಕೊಂಕಣ್ ಸಿಂಗರ‍್ಸ್ ಕ್ಲಬ್-ಬಾಹ್ರೇಯ್ನ್" ಹಾಂಚೆ ಥಾವ್ನ್ ಉತ್ತೀಮ್ ಕಥಾ ಆನಿ ಲಿಖಿತಾಂ ಬರೊವ್ಪಿ ಪ್ರಶಸ್ತಿ.

• "ಫಿರ್ಗಜ್ ಕೊಂಕ್ಣಿ ಸಮುದಾಯ್, ಬಾಹ್ರೇಯ್ನ್" ಹಾಂಚೆ ಥಾವ್ನ್ ಉತ್ತೀಮ್ ಕೊಂಕ್ಣಿ ನಾಟಕಿಸ್ತ್ ಆನಿ ಸಂಘಟಕ್ ಮಾನ್.

• "ಕೊಂಕಣಿ ಟ್ಯಾಲೆಂಟ್ಸ್ ಕುವೈಟ್" ಹಾಂಚೆ ಥಾವ್ನ್ ಉತ್ತೀಮ್ ಲೇಖಕ್ ಪ್ರಶಸ್ತಿ.

• "ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಆಕಾಡೆಮಿ" ಥಾವ್ನ್ "ಚಂದ್ರರೇಖಾ" ಕಾದಂಬರೆಕ್  2005 ವ್ಯಾ ವರ್ಸಾಚಿ ಉತ್ತೀಮ್ ಕಾದಂಬರಿ ಪ್ರಶಸ್ತಿ.

• "ಕೊಂಕಣಿ ಫ್ರೆಂಡ್ಸ್ - ಯು.ಕೆ" ಹಾಂಚೆ ಥಾವ್ನ್ ವರ್ಸಾಚಿ ಉತ್ತೀಮ್ ಕವಿತಾ ಪ್ರಶಸ್ತಿ.

• "ಕೊಂಕಣಿ ಫ್ರೆಂಡ್ಸ್ - ಯು.ಕೆ" ಹಾಂಚಿ ವರ‍್ಸಾಚೊ ಉತ್ತೀಮ್ ಕೊಂಕ್ಣಿ ಬರೊವ್ಪಿ , ಭಾಶಾ ಮೊಗಿ ತಶೆಂ ಲೇಖಕ್ ಪ್ರಶಸ್ತಿ.

• "ಭಾರತಿಯ್ ಕಥೊಲಿಕ್ ಯುವ ಸಂಚಾಲನ್ - ಬಜಾಲ್" ಹಾಂಚೆ ಥಾವ್ನ್ ಉತ್ತೀಮ್ ಸಾಹಿತಿ ಸನ್ಮಾನ್.

• "ಕೊಂಕ್ಣಿ ಲೇಖಕಾಂಚೊ ಎಕ್ತಾರ್" ಹಾಂಚೆ ಥಾವ್ನ್ ಆಕಾಡೆಮಿಚಿ ಪ್ರಶಸ್ತಿ ಜೊಡ್‍ಲ್ಲ್ಯಾಕ್ ಸನ್ಮಾನ್.

• "ದೆ. ವಿಕ್ಟರ್ ರೋಡ್ರಿಗಸ್ ಸ್ಮಾರಕ್ ಪ್ರಶಸ್ತಿ" 2012 ವ್ಯಾ ಇಸ್ವೆಂತ್.

• "ದಾಯ್ಜಿ ದುಬಾಯ್ ಸಾಹಿತ್ಯ್ ಪುರಸ್ಕಾರ್" 2015 ವ್ಯಾ ಇಸ್ವೆಂತ್.

ಆಶೆಂ ಮನು ಬಾಹ್ರೆಯ್ನ್ ಮುಳ್ಳ್ಯಾರ್ ಕೇವಲ್ ಎಕ್ ಕಾವ್ಯ್ ನಾಂವ್ ನಂಯ್. ತೆಂ ಏಕ್ ಸಾಧನಾಂಚೊ ಪರ್ವತ್. ಮನು ಬಾಹ್ರೆಯ್ನ್ ಕೇವಲ್ ಎಕ್ ಲೇಖಕ್ ಜಾವ್ನ್ ನಾತ್‍ಲ್ಲೊ. ತೊ ಎಕ್ ಚಿಂತ್ಪಿ, ಎಕ್ ಆವಾಜ್ ಆನಿ ಆಮ್ಚ್ಯಾ ಸಂಸ್ಕ್ರತೆಚೊ ಪ್ರತಿನಿಧಿ ಜಾವ್ನಾಸ್‍ಲ್ಲೊ. ತಾಚಿಂ ಬರ್ಪಾಂ ಸಾದ್ಯಾ ಲೊಕಾಚ್ಯಾ ಕಾಳ್ಜಾಂಚಿಂ ಭಗ್ಣಾಂ ಜಾವ್ನಾಸ್‍ಲ್ಲಿಂ. ತಾಚ್ಯಾ ಉತ್ರಾಂನಿ ಮಾತಿಯೆಚಿ ಮೂರ್, ರಾನಾಂತ್ಲ್ಯಾ ಕಿಡಿಂಚೊ ಆನಿ ಸುಖ್ಯಾ ಖೊಲಿಯಾಂಚೊ ಆವಾಜ್, ವ್ಹಾಳ್ಚ್ಯಾ ಉದ್ಕಾಚೆಂ ಸಂಗೀತ್ ವ್ಹಾಳೊನ್ ಆಸೊನ್ ಜಿಣಿಯೆಚೆಂ ನೀಜ್ ರೂಪ್ ಪ್ರತಿಫಲಿತ್ ಜಾತಾಲೆಂ. ತಾಚ್ಯಾ ಕವಿತಾಂನಿ ಭಾವನಾಂಚಿ ಗುಂಡಾಯ್ ಜಾಯ್ತ್ಯಾ ಮಾಪಾನ್ ಆಸ್ತಾಲಿ.

ಆಪ್ಲಿ ಮಾಂಯ್‍ಭಾಸ್ ಕೊಂಕ್ಣೆ ವಯ್ರ್ ತಾಚೊ  ಮೋಗ್ ಆನಿ ಬದ್ದತಾ ಆಪರಿಮಿತ್ ಜಾವ್ನಾಸ್‍ಲ್ಲಿ. ಆಪ್ಲ್ಯಾ ಬರ್ಪಾಂ ಆನಿ ಕ್ರತಿಯಾಂ ಮುಖಾಂತ್ರ್ ಆಮ್ಚ್ಯಾ ಸಂಸ್ಕ್ರತೆಚೊ ತಾಣೆ ಪೋಸ್ ಕೆಲೊ ಆನಿ ಆಮ್ಚ್ಯಾ ಶ್ರೇಷ್ಟ್ ಮಾಲ್ಘಡ್ಯಾ ಲೇಖಕಾಂನಿ ಘಾಲ್ಲ್ಯಾ ಕೊಂಕ್ಣೆಚ್ಯಾ ಭದ್ರ್ ಬುನ್ಯಾದಿ ವಯ್ರ್ ಕುಂದೊ ಜಾಲೊ ಅನಿ ಮುಖ್ಲ್ಯಾ ಪಿಳ್ಗೆಕ್ ಕೊಂಕ್ಣೆಚ್ಯಾ ಗ್ರೇಸ್ತ್‌ಕಾಯೆಚಿ ವ್ಹಳೊಕ್ ಕರುನ್ ದಿಲಿ.

ತಾಚ್ಯಾ ಹರ್ಯೆಕಾ ಬರ್ಪಾಂನಿ ಮೋಗ್ ಆಸ್‍ಲ್ಲೊ, ಹಾಸೊ ಆಸ್‍ಲ್ಲ್ಯೊ, ಚಿಂತ್ನಾಂಕ್ ವಾಟ್ ಕರುನ್ ದಿತೆಲ್ಯೊ ಆನಿ ಥೊಡ್ಯಾ ಪಾವ್ಟಿಂ ದೊಳ್ಯಾಂನಿ ದು:ಖಾಂ ಸಯ್ತ್ ದೆಂವಯ್ತಾಲಿಂ. ತರಿಪುಣ್ ತಾಚ್ಯಾ ಹರ್ಯೆಕಾ ಬರ್ಪಾಂನಿ ಏಕ್ ಬಳಿಷ್ಟ್ ಸಂದೇಶ್ ಆಸ್ತಾಲೊ ಆನಿ ತೊ ಜಾವ್ನಾಸ್‍ಲ್ಲೊ ಮನ್ಶಾಪಣ್, ಮೋಗ್ ಆನಿ ಸತ್.

ಮನು ಬಾಹ್ರೆಯ್ನ್ ಆಜ್ ಆಮ್ಚ್ಯಾ ಸಂಗಿಂ ದೈಹಿಕ್ ಜಾವ್ನ್ ಆಸ್ಚೊ ನಾ. ಪುಣ್ ತಾಚಿಂ ಚಿಂತ್ನಾಂ, ತಾಚಿಂ ಬರ್ಪಾಂ ಸದಾಂಚ್ ಕೊಂಕ್ಣಿ ಸಮಾಜೆಂತ್ ಆಮರ್ ಜಾವ್ನ್ ಉರ್ತಲಿಂ. ತಾಚಿಂ ಹರ್ಯೆಕ್ ಉತ್ರಾಂ ತಾಚ್ಯಾ ಜಿವಿತಾಚೊ ಆಮ್ಕಾಂ ಸದಾಂಚ್ ಉಗ್ಡಾಸ್ ಹಾಡುನ್ ದಿತಲಿಂ. ಆಜ್ ಮನು ಬಾಹ್ರೆಯ್ನ್ ಆಮ್ಚ್ಯಾ ಥಾವ್ನ್ ಸಾಸ್ಣಾಕ್ ಪಯ್ಸ್ ಗೆಲಾ ಪುಣ್ ತಾಚೆಂ ಸಾಹಿತ್ಯ್ ಆಮ್ಚ್ಯಾ ಸಂಗಿಂ ಸದಾಂಚ್ ಉರ್ತೆಲೆಂ. ತೆಂ ಆಮ್ಕಾಂ ವಾಟ್ ದಾಕಯ್ತೆಲೆಂ, ಪ್ರೇರಿತ್ ಕರ್ತೆಲೆಂ ಆನಿ ಆಮ್ಚ್ಯಾ ಸಂಸ್ಕ್ರತಿಕ್ ಜಿವಂತ್ ದವರ್ತೆಲೆಂ.

ಮೊಗಾಳ್ ಮನು ಬಾಹ್ರೆಯ್ನ್ ತುವೆಂ ಮ್ಹಾಕಾ ದಿಲ್ಲ್ಯಾ ಸರ್ವ್ ಉತ್ತೇಜನಾಕ್, ಮೊಗಾಕ್ ಆನಿ ಮಾರ್ಗದರ್ಶನಾಕ್ ಆಮ್ಚ್ಯಾ "ಆಂಕ್ರಿ" ಪಂಗ್ಡಾ ಸವೆಂ ಹಿಚ್ಚ್ ಹಾವೆಂ ತುಕಾ ಪಾಟೊಂವ್ಚಿ ಶ್ರದ್ದಾಂಜಲಿ. ಆದೇವ್ಸ್ ಮನು ಆದೇವ್ಸ್..... ಪರ್ತುನ್ ಆಮಿಂ ಮೆಳ್ತಾ ಪರ್ಯಾಂತ್.

ಮನು ಬಾಹ್ರೆಯ್ನ್ ಹಾಚಿ ಪತಿಣ್ ರೊಜಿ ಬಾಯ್, ಭುರ್ಗಿಂ ಸೊನಿಯಾ, ಶೆರಿಲ್ ಆನಿ ಸ್ಟೀವನ್ ಸಾಂಗಾತಾ ತಾಚ್ಯಾ ಆಪಾರ್ ಆಭಿಮಾನಿ ವ್ರಂದಾಕ್ "ಆಂಕ್ರಿ" ಪಂಗಡ್ ಭುಜಯ್ತಾ ಆನಿ ತಾಚ್ಯಾ ವೆಗ್ಳಾಚಾರಾಚೆಂ ದೂ:ಖ್ ಸೊಸುನ್ ವ್ಹರುಂಕ್ ಸರ್ವೆಸ್ಪರ್ ದೇವ್ ಕುರ್ಪಾ ದೀಂವ್ ಮ್ಹಣ್ ಆಶೆತಾಂವ್.