‘ಮಂಗ್ಳುರಾಂತ್ ಕವಿತಾ ಟ್ರಸ್ಟಾಚಿ ‘ಮನೋಹರ್ ಸಾಂಜ್’

ಕೊಂಕಣಿ ಕವಿತೆಚ್ಯಾ ಸಮಗ್ರ್ ವಾಡಾವಳಿ ಖಾತೀರ್ ವಾವುರ‍್ಚ್ಯಾ ಕವಿತಾ ಟ್ರಸ್ಟಾನ್, ಭಾರತಾಚೊ ಉಂಚ್ಲೊ ಕೊಂಕಣಿ ಕವಿ ಮನೋಹರ್ ರಾಯ್ ಸರ್ದೇಸಾಯಿಚ್ಯಾ ಮಾನಾಕ್ ಹ್ಯಾಚ್ ಎಪ್ರಿಲ್ 6, 2025 ತಾರಿಕೆರ್ ಮಂಗ್ಳುರ್ ಆಂಜೆಲೊರ್ ಲಾಗ್ಸಾರ‍್ಚ್ಯಾ ಜವಾಹರ್-ಜ್ಯೋತಿ ಘರಾಂತ್ ’ಮನೋಹರ್ ಸಾಂಜ್’ ಕಾರ್ಯಾವಳ್ ಮಾಂಡುನ್ ಹಾಡ್‌ಲ್ಲಿ.

ಕವಿತಾ ಟ್ರಸ್ಟಾಚೊ ಸ್ಥಾಪಕ್ ಮೆಲ್ವಿನ್ ರೊಡ್ರಿಗಸ್ ಹಾಣೆ ಸುರ‍್ವಾತಿರ್ ಆಪ್ಲ್ಯಾ ಪ್ರಾಸ್ತಾವಿಕ್ ಉಲೊವ್ಪಾಂತ್ ಮನೋಹರ್ ಸರ್ದೇಸಾಯಿಚೆಂ ಜಿವಿತ್ ಆನಿ ಸಾಹಿತ್ಯಾವಿಶಿಂ ಉಜ್ವಾಡ್ ಫಾಂಕಯ್ಲೊ. ತಾಚ್ಯಾ ಜಿವಿತಾಚ್ಯಾ ವೆವೆಗ್ಳ್ಯಾ ಕಾಳಾಂಕ್ ದಾಖಲ್ ಕೆಲ್ಲ್ಯೊ ಕವಿತಾ ವಿಂಚುನ್ ತಾಣೆಂ ಹ್ಯಾ ಸಂದರ್ಭಾರ್ ಸಾದರ್ ಕೆಲ್ಯೊ.

ನಾಮ್ಣೆಚೊ ಉಲೊವ್ಪಿ ಎಚ್ಚೆಮ್ ಪೆರ್ನಾಳ್ ಹಾಣೆ ಸರ್ದೇಸಾಯಿ ಕಸೊ 1950-1990 ವರ್ಸಾಂಚ್ಯಾ ಕಾಳಾಚೊ ಪ್ರಮುಖ್ ಕವಿ ಜಾವ್ನಾಸಲ್ಲೊ ಮ್ಹಳ್ಳೆಂ ಸಾಂಗ್ಲೆಂ. ಜಿವಿತ್, ಧರ್ಮ್ ಆನಿ ಅಧ್ಯಾತ್ಮಿಕತೆಚಿಂ ತತ್ವಾಂ ತಾಚ್ಯಾ ವ್ಯಕ್ತಿತ್ವಾಂತ್ ಕಶಿಂ ಆಯ್ಲ್ಯಾಂತ್ ಮ್ಹಳ್ಳೆವಿಶಿಂ ಕವಿತೆಂಚೆ ದಾಕ್ಲೆ ದೀವ್ನ್ ತಾಣೆ ಕಳಯ್ಲೆಂ.

ಹ್ಯಾ ಸಾಹಿತೀಕ್ ಸಂಭ್ರಮಾ ವೆಳಾರ್ ಮನೋಹರ್ ರಾಯ್ ಸರ್ದೇಸಾಯಿಚ್ಯೊ ವೆವೆಗ್ಳ್ಯೊ ಕವಿತಾ ಫೆಲ್ಸಿ ಲೋಬೊ, ಜೊಯ್ಸ್ ಪಿಂಟೊ, ಮನೋಜ್ ಫೆರ್ನಾಂಡಿಸ್, ಸಲೋಮಿ ಮಿಯಾಪದವ್, ಗ್ರೀಶ್ಮಾ ಸಲ್ಡಾನ್ಹಾ, ಜೇಸನ್ ಲೋಬೊ ಆನಿ ಫ್ಲಾವಿಯಾ ಆಲ್ಬುಕೆರ್ಕ್ ಹಾಂಣಿ ವಾಚುನ್ ಸಾಂಗ್ಲ್ಯೊ. ಹಾಜರ್ ಆಸಲ್ಲ್ಯಾ ಜಾಯ್ತ್ಯಾ ಸಭಿಕಾಂನಿ ಸರ್ದೇಸಾಯಿಚ್ಯಾ ’ಜಾಯೊ-ಜುಯೊ’ ಆನಿ ’ಪಿಸೊಳಿಂ’ ಪುಸ್ತಕಾಂತ್ಲ್ಯೊ ಕವಿತಾ ಸಾದರ್ ಕೆಲ್ಯೊ.

ಕಾರ್ಯಾವಳಿಚ್ಯಾ ಮುಕ್ಲ್ಯಾ ಭಾಗಾಂತ್ ಆಂಜೆಲೊರ‍್ಚ್ಯಾ ರಾಸ್ಕಿಞ್ ಕುಟ್ಮಾಥಾವ್ನ್ ಮ್ಹಾಲ್ಗಡ್ಯಾಂ ಥಾವ್ನ್ ದೆಂವೊನ್ ಆಯಿಲ್ಲ್ಯಾ ಆದ್ಲ್ಯಾ ಪದಾಂಚೆಂ ವಾಚಪ್ ತಶೆಂ ಸಾದರೀಕರಣ್ ಚಲ್ಲೆಂ. ದಿವಂಗತ್ ಭಾವ್ ಸೈಮನ್ ರಾಸ್ಕಿಞ್ ಆನಿ ಜೆ. ಬಿ. ರಾಸ್ಕಿಞ್ ಹಾಂಚೆ ಸುಪುತ್ರ್ ಆರ್ಥರ್ ರಾಸ್ಕಿಞ್ ಆನಿ ಉಲ್ಲಾಸ್ ರಾಸ್ಕಿಞ್ ಹಾಂಣಿ ವೇದಿ ಸಜಯಿಲ್ಲಿ.

ಕುಟ್ಮಾಚ್ಯಾಂನಿ ಹ್ಯಾ ಸಂದರ್ಭಾರ್ ನೊವೊದ್ ವರ್ಸಾಂ ಆದಿಂ ಜೆ.ಜೆ. ರೇಗೊನ್ ಸಂಕಲನ್ ಕೆಲ್ಲ್ಯಾ ’ಚಾಲ್ತಿಂ ಪದಾಂ’ ಪುಸ್ತಕಾಂತ್ಲಿಂ ಗಿತಾಂ ಗಾಯ್ಲಿಂ ತಶೆಂ ವಾಚುನ್ ಸಾಂಗ್ಲಿಂ. ಪಾರಂಪಾರಿಕ್ ಕವಿತಾಂಚಿ ರೀತ್ ಆನಿ ಆಧುನಿಕ್ ಕವಿತಾಂಚಿ ರಿತಿಂ ಮಧ್ಲ್ಯಾ ಫರಕಾವಿಶಿಂ ಹ್ಯಾ ಸಂದರ್ಭಾರ್ ಆರ್ಥರ್ ರಾಸ್ಕಿಞ್ ಉಲಯ್ಲೊ.

ಆಯ್ಲೆವಾರ್ ಶ್ರೀನಿವಾಸ್ ಮ್ಹಾವಿದ್ಯಾಲಯಾ ಥಾವ್ನ್ ಕೊಂಕಣಿ ಭಾಶೆಂತ್ ಡೊಕ್ಟರೇಟ್ ಸನದ್ ಆಪ್ಣಾಯಿಲ್ಲ್ಯಾ ಡೊ. ಪ್ರೇಮ್ ಮೊರಾಸಾಕ್ ಕವಿತಾ ಟ್ರಸ್ಟಾ ತರ್ಫೆನ್ ಘರ‍್ಚಿ ಯೆಜ್ಮಾನ್ ಜೋಸೆಫಿನ್ ಡಿಸೋಜಾ ಹಿಣೆ ಶೊಲ್ ಪಾಂಗ್ರುನ್ ಮಾನ್ ಕೆಲೊ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಫುಲಾಂ ದಿಲಿಂ. ಎಚ್ಚೆಮ್ ಪೆರ್ನಾಳಾನ್ ಟ್ರಸ್ಟಾಚಿಂ ಪುಸ್ತಕಾಂ ದಿಲಿಂ. ಹ್ಯಾಚ್ ಸಂದರ್ಭಾರ್ ಕವಿತಾ ಟ್ರಸ್ಟಾನ್ ಪರ್ಗಟ್ ಕೆಲ್ಲ್ಯಾ ಪುಸ್ತಕಾಂ ಖಾತೀರ್ ಗೊಂಯ್ ಕೊಂಕಣಿ ಅಕಾಡೆಮಿ ಆನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಪುರಸ್ಕಾರ್ ಜೊಡಲ್ಲ್ಯಾ ಎಚ್ಚೆಮ್ ಪೆರ್ನಾಳ್ ಆನಿ ಫೆಲ್ಸಿ ಲೋಬೊ ಹಾಂಕಾಂ ಫುಲಾಂ ತುರೆ ದೀವ್ನ್ ಮಾನ್ ಕೆಲೊ.

ಸುರ್ವೆರ್ ಯೆಜ್ಮಾನ್ ಜೋಸೆಫಿನ್ ಡಿಸೋಜಾನ್ ಸಗ್ಳ್ಯಾಂಕ್ ಯೆವ್ಕಾರ್ ದಿಲೊ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಅಸಲ್ಯಾ ಮೆಳಾವ್ಯಾಂಚಿ ಗರ್ಜ್ ಸಾಂಗುನ್, ಹಾಲಿಂಚ್ಯಾ ದಿಸಾಂನಿ ಕಶೆಂ ಮಂಗ್ಳುರಾಂತ್ಲಿಂ ಇತಿಹಾಸಿಕ್ ಪೊರ‍್ನಿಂ ಬಾಂದ್ಪಾಂ ಆಧುನಿಕತೆಕ್ ಲಾಗುನ್ ಕೊಸ್ಳಾವ್ನ್ ಘಾಲ್ತಾತ್ ಮ್ಹಳ್ಳೆವಿಶಿಂ ಜಾಗ್ ಹಾಡಂವ್ಚೆಂ ಉಲೊವ್ಪ್ ಕೆಲೆಂ ಆನಿ ಸಗ್ಳ್ಯಾಂಚೆ ಉಪ್ಕಾರ್ ಆಟಯ್ಲೆ.