ಗಡ್ದಿ ಬಸ್ಸಾಂತ್ ಮ್ಹಳ್ಳ್ಯಾ ಮಾತಾಳ್ಯಾರ್, ಕವಿ ವಿಲ್ಸನ್ ಕಟೀಲಾಚಿ ಹಿ ಕವಿತಾ ವಾಚ್ತಾನಾ ಮ್ಹಜ್ಯಾ ಕಾಳ್ಜಾಗುಂಡಾಯೆಂತ್ ಲಿಪೊನ್ ರಾವ್ಲೆಲೆ ಗಡ್ದಿ ಬಸ್ಸಾಚೆ ಸಭಾರ್ ಯಾದಿ ಪಾಕ್ಳ್ಯೊ ಪುಲೊನ್ ಜಿವಾಳ್ಳ್ಯೊ….

++++++++++

ಬುತಿಯೆಂತ್ ತುವೆಂ ಧಾಂಪುನ್ ದಿಲ್ಲಿ

ದೋಯ್ ಪೇಜ್, ಮೂಟ್ ಚೆಟ್ನಿ

ಕಾಳ್ಜಚಿ ಊಬ್ ಘೆವುನ್, ಧಂವೊನ್

ಆತುರಾಯೆನ್ ಘುಸ್ತಾಂ ಗಡ್ದಿ ಬಸ್ಸಾಂತ್

ಸೊರೊಳಾಕ್ ಉಮ್ಕೊಳ್ನ್, ಥರಾವೀನ್ ಪಾಂಯ್

ನಿಷ್ಟುರ್ ಘುಂವ್ಡೆರ್ ಲಕ್ತಾ ಆಂಗ್

ತ್ರಾಸ್ ಭೊಗ್ತಾತ್ ಸಾಂಭಾಳುಂಕ್ ಬುತಿ

ಒಪ್ಸುನ್ ದಿತಾಂ ಬಸ್ಲೆಲ್ಯಾಂ ಹಾತಿಂ

ಫಾಂತ್ಯಾರ್ ತುವೆಂ ಫುಂಕ್ಚೊ ಉಜೊ

ದನ್ಪರಾಂ ಮ್ಹಜಿ ಪೆಟ್ಚಿ ಭುಕ್

ತಾಂಕಾಂ ಕಶೆಂ ಕಳ್ತೆಲೆಂ ಸಾಂಗ್

ಕರ್ತಾತ್ ಬುತಿ ವೊಮ್ತಿ ಉದಾರಿ

ತುವೆಂ ಮೊಗಾನ್ ದಿಂವ್ಚ್ಯೆ ಪೆಜೆಚೊ

ಹಾಂವೆಂ ಆಶೆನ್ ಜೆಂವ್ಚ್ಯೆ ಪೆಜೆಚೊ

ಘೊಟ್ ನೀಸ್ ವೊತುನ್ ವೆತಾ ಗೊ

ಕೊಣಾಕೊಣಾಚ್ಯಾ ಉಸ್ಕ್ಯಾರ್...

(ಕವಿ - ವಿಲ್ಸನ್ ಕಟೀಲ್)

++++++++++

ಹಳ್ಳೆಚ್ಯಾ ಲೊಕಾಕ್ ಆನಿ ಸರ್ಕಾರಿ ಬಸ್ಸಾಂಕ್ ಏಕ್ ತುಟೊನ್ ವಚನಾ ತಸಲೊ ಬಾಂಧ್. ಆತಾಂಚ್ಯಾ ದಿಸಾನಿ ವಿವಿಧ್ ರಿತಿಚಿಂ ಖಾಸ್ಗಿ ಆನಿ ಇಸ್ಕೊಲಾಚಿ ವಾಹನಾಂ, ಬಸ್ಸಾಂ ಭುರ್ಗ್ಯಾಂಕ್ ಇಸ್ಕೊಲಾಕ್ ವಚೊಂಕ್ ಉಪ್ಕರ್ತಾತ್ ತರ್ ಆಮ್ಚ್ಯಾ ಭುರ್ಗ್ಯಾಪಣಾಂಚ್ಯಾ ದಿಸಾನಿಂ (ಸುಮಾರ್ ಪಂದ್ರಾ ವರ್ಸಾ ಪಯ್ಲೆಂ) ಸರ್ಕಾರಿ ಬಸ್ಸ್ ಆಮ್ಕಾಂ ಇಸ್ಕೊಲಾಕ್ ಪಾವಂವ್ಚಿ ವಾಟ್ ಜಾವ್ನ್ ಆಸ್‌ಲ್ಲಿ.

ಹಿಂ ಸರ್ಕಾರಿ ಬಸ್ಸಾಂ ಆಮ್ಕಾಂ ಸದಾಂ ಉಪ್ಕಾರಾಚಿಂ ತರೀ ತ್ಯಾ ಬಸ್ಸಾಂಕ್ ಆಮ್ಚಿ ವೆಗ್ಳಿಂ ವೆಗ್ಳಿಂ ನಾಂವಾಂ. ಒಟ್ಟೆ ಡಬ್ಬಿ, ತಾಬ್ಡೊ ಡಾಬ್ಬೊ, ಡಕೋಟ ಬಸ್, ಲಟರಿ ಸಾರಿಗೆ ಅಶೆಂ ಹರ್ಯೆಕ್ಲ್ಯಾನ್ ಹ್ಯಾ ಬಸ್ಸಾಚಿ ಶಿಣ್ ಉಚಾರ್ಲ್ಯಾ ತೆಂ ಖಂಡಿತ್. ಆಮ್ಚ್ಯಾ ಒಟ್ಟೆ ಡಬ್ಬಿ ಮ್ಹಳ್ಳ್ಯಾಕ್ ಸಾಕ್ಸ್ ಮ್ಹಳ್ಳ್ಯಾಪರಿಂ ಬಸ್ಸಾಂ ಪಾವ್ಶಿಲ್ಯಾ ದಿಸಾನಿಂ ಪೊವೊಂಕ್ ಸುರು ಜಾತಾಲಿಂ ಆನಿ ಆಮಿ ಇಸ್ಕೊಲಾಚ್ಯಾ ಭುರ್ಗ್ಯಾನಿ ಬಸ್ಸಾಭಿತರ್ ಸತ್ರಿ ಉಸವ್ನ್ ಧರ್ನ್ ಗಮ್ಮತ್ ಕರ್ನ್ ಇಸ್ಕೊಲಾಕ್ ವೆಚೆಂ ದೊಳ್ಯಾಂಮುಖಾರ್ ಅಜೂನ್ ಕಾಲ್ ಘಡ್ಲೆಲ್ಯಾ ಘಡಿತಾಪರಿಂ ಉಬೆಂ ಆಸಾ. ಮ್ಹಜ್ಯಾ ಹೈ ಸ್ಕೂಲ್ ದಿಸಾನಿಂ ಹ್ಯಾ ಸರ್ಕಾರಿ ಬಸ್ಸಾರ್ ಪಯ್ಣ್ ಕರ್ತಾನಾ ಘಡ್ಲೆಲೆ ಥೊಡಿಂ ಘಡಿತಾಂ ತುಮ್ಚೆ ಮುಖಾರ್ ಪಾತ್ಲಾಯ್ತಾಂ.

ಕೊಡ್ಯಾಳ್ ಥಾವ್ನ್ ಧರ್ಮಸ್ಥಳ ವೆಚ್ಯಾ ವಾಟೆರ್ ಮಧ್ವ ಮ್ಹಳ್ಳಿ ಏಕ್ ಲ್ಹಾನ್ ಹಳ್ಳಿ, ಬಂಗೆರೆಕೆರೆ ಮ್ಹಳ್ಳ್ಯಾ ನಾಂವಾಚ್ಯಾ ಮ್ಹಜ್ಯಾ ಹಳ್ಳೆಥಾವ್ನ್ ಆಮ್ಕಾಂ ರಾಜ್ ರಸ್ತ್ಯಾಕ್ ಸಂಪರ್ಕ್ ಗಾಂಚ್ ಜಾವ್ನಾಸ್‌ಲ್ಲಿ. ಹೆಂ ಏಕ್ ಲ್ಹಾನ್ ಬಸ್ ಸ್ಟೇಂಡ್ ಜಾಲ್ಲ್ಯಾನ್ ಕಸಲ್ಲಿಂಚ್ಚ್ ಎಕ್ಸ್‌ಪ್ರೆಸ್ ಬಸ್ಸಾಂ ಆಮ್ಚ್ಯಾ ಜಾಗ್ಯಾರ್ ರಾವಾನಾತ್‌ಲ್ಲಿಂ. 8.15ಕ್ ಶಿಶಿಲ ವೆಚೆಂ ಬಸ್, 8.45ಕ್ ಧರ್ಮಸ್ಥಳ ವೆಚೆಂ ಬಸ್ ಮಾತ್ರ್ ಆಮ್ಕಾಂ 9.30 ವ್ಹರಾರ್ ಮಡಂತ್ಯಾರ್ ಇಸ್ಕೊಲಾಕ್ ಪಾವೊಂಕ್ ಆಸ್ಲೆಲಿಂ ಕೇವಲ್ ದೋನ್ ವಾಹನಾಂ.

ಆಮ್ಚ್ಯಾ ಬಸ್ ಸ್ಟ್ಯಾಂಡಾಚ್ಯಾ ಪಯ್ಲೆಂ ಮೆಳ್ಚೆಂ ಕಾರಿಂಜ ಕ್ರಾಸ್ ಆನಿ ಉಪ್ರಾಂತ್ ಮೆಳ್ಚೆಂ ಕಾವಳಕಟ್ಟೆ ಬಸ್ ಸ್ಟ್ಯಾಂಡಾಂತ್ ಬಸ್ಸಾಕ್ ರಾಕೊನ್ ರಾಂವ್ಚಿಂ ಅಮ್ಚ್ಯಾಕೀ ಚಡ್ ಭಾಗಿ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ಕಾರಿಂಜ ಕ್ರಾಸ್ ಮ್ಹಳ್ಳೆಕಡೆ 8.30ಕ್ ದಾವಣಗೆರೆ ವೆಚೆಂ ಎಕ್ಸ್‌ಪ್ರೆಸ್ ಬಸ್ ರಾವ್ತಾಲೆಂ ಆನಿ ಕಾವಳಕಟ್ಟೆಚ್ಯಾ ಭುರ್ಗ್ಯಾಂಕ್ ಲಾಗ್ಶಿಲೊ ಅನ್ಯೇಕ್ ಗಾಂವ್ ಜಾವ್ನಾಸ್ಚೊ ನೆಲ್ಲಿಗುಡ್ಡೆ ಮ್ಹಳ್ಳೆಕಡೆ ವೆಚೆಂ ಬಸ್ 8.45ಕ್ ಮೆಳ್ತಾಲೆಂ ಜಾಲ್ಲ್ಯಾನ್ ತಾಂಕಾ ಪಯ್ಣಾಕ್ ಕಸಲ್ಲೆಚ್ಚ್ ಉಪಾದ್ರ್ ಜಾಯ್ನಾತ್ಲೆ. ಕಶ್ಟೊಂಚೆಂ ಆಮಿ, ಮಧ್ವಗಾರ್. ಏಕ್ ಬಸ್ಸ್ ಚುಕ್ಲೆಂ ತರ್ ಇಸ್ಕೊಲಾಕ್ ಲೇಟ್ ಆನಿ ಬಾಗ್ಲಾರ್ Outstanding performance. ತ್ಯಾ ಪರ್ಫೋರ್ಮೆನ್ಸಾಂತ್ ಸಯ್ತ್ ಏಕ್ ಗಮ್ಮತ್. ಅಮಿ ಮಧ್ವ ಮ್ಹಳ್ಳ್ಯಾ ಜಾಗ್ಯಾರ್ ಬಸ್ಸಾಕ್ ರಾಕೊನ್ ರಾಂವ್ಚೆ 3 ಜಣ್ ಆಟ್ವೆ ಕ್ಲಾಸಿಚೆ ಭುರ್ಗೆ ಆಸ್‌ಲ್ಲ್ಯಾಂವ್. ಹಲೀಮ್, ಪ್ರಕಾಶ್ ಆನಿ ಹಾಂವ್. ಜರ್ ಏಕ್ ಬಸ್ ಚುಕ್ಲೆಂ ತರ್ ಆಮಿ ಇಸ್ಕೊಲಾಕ್ ಲೇಟ್ ಆನಿ ಅಟ್ವ್ಯಾ ಕ್ಲಾಸಿಚ್ಯಾ A, B ಆನಿ C ವಿಭಾಗಾಚ್ಯಾ ಕ್ಲಾಸಿ ಬಾಗ್ಲಾರ್ ತೇಗ್ ಜಣ್ ಸೆಕ್ಯುರಿಟಿ ಅಮಿ ಮಧ್ವಗಾರ್ ಉಬೆ.

ಅಶೆಂ ಸಾಡೆ ಆಟ್ ವ್ಹರಾಂಕ್ ಪಾಶಾರ್ ಜಾಂವ್ಚೆಂ ದಾವಣಗೆರೆ ಬಸ್ ಯೆತಾನಾ ಆಮಿ ಕೆದಾಳಾರೀ ತಾಕಾ ಹಾತ್ ಧರ್ಚೊ ಆನಿ ತೆಂ ಬಸ್ "ಪೆಂ" ಕರ್ನ್ ಹಾರ್ನ್ ಕರ್ನ್ ಧುಳ್ ಉಬವ್ನ್ ವೆಚೆಂ. ಹೆಂ ಆಮ್ಚೆಂ ಸದಾಚೆಂ ಸಾಡೆ ಆಟ್ ವ್ಹರಾಚೆಂ ಎಕ್ಸರ್ಸೈಝ್ ಜಾಲ್ಲೆಂ. ತ್ಯಾ ಬಸ್ಸಾಚೊ ಡ್ರೈವರ್ ಆಮ್ಕಾಂ ಸದಾಂ ಪಳೆತಾಲೊ ಆನಿ ಪೆಂ ಕರ್ನ್ ಮುಖಾರ್ ವೆತಾಲೊ. ಥೊಡೆ ದೀಸ್ ಗೆಲ್ಲ್ಯಾ ನಂತರ್ ಆಮಿ ಸದಾಂಚ್ಯಾ ಸವಯೆನ್ ತ್ಯಾ ಬಸ್ಸಾಕ್ ಹಾತ್ ಧರ್ಲೊ ಆನಿ ಬಸ್ ಪೆಂ ಕರ್ನ್ ಚಿಕ್ಕೆ ಮುಖಾರ್ ವಚೊನ್ ಸಡನ್ನ್ ರಾವ್ಲೆಂ. ಆಮಿ ಕಿತೆಂ ಜಾಲೆಂಗಾಯ್ ಮ್ಹಣ್ ಪಳೆಯ್ಜೆ ಜಾಲ್ಯಾರ್, ಬಸ್ಸಾಚೊ ಕಂಡೆಕ್ಟರ್ ಬಾಗಿಲ್ ಉಗ್ತೆಂ ಕರ್ನ್ "ಬನ್ನಿ ಬನ್ನಿ" ಮ್ಹಣ್ ಆಮ್ಕಾಂ ಆಪೊವ್ಕ್ ಲಾಗ್ಲೊ ಆನಿ ಆಮ್ಚೊ ಆನಂದ್ ವರ್ಣುಂಕ್ ಜಾಯ್ನಾ ತಸಲೊ. ಅಶೆಂ ಸುಮಾರ್ ಏಕ್ ಮಹಿನೊ ಭರ್ ದಾವಣಗೆರೆ ಬಸ್ ಮಧ್ವ ಸದಾಂ ರಾವ್ತಾಲೆಂ ಅನಿ ಆಮಿ ನೋವ್ ವ್ಹರಾಂಕ್ ಇಸ್ಕೊಲಾಂತ್.

ಪುಣ್ ಏಕ್ ದಿಸಾ, ಆಮಿ ಬಸ್ಸಾಕ್ ಹಾತ್ ದಾಕಯ್ಲೊ ಆನಿ ಬಸ್ "ಪೆಂ" ಸಯ್ತ್ ಕರಿನಾಸ್ತಾಂ ಶೀದಾ ಗೆಲೆಂ. ತ್ಯಾ ದಿಸಾ ಥಾವ್ನ್ ತ್ಯಾ ಬಸ್ಸಾಚೊ ಡ್ರೈವರ್ ಬದ್ಲಲ್ಲೊ ಆನಿ ಆಮ್ಚೆಂ ಇಸ್ಕೊಲಾಂತ್ ಆಮ್ಚೆಂ ಔಟ್ ಸ್ಟ್ಯಾಂಡಿಗ್ ಫರ್ಫೋರ್ಮೆನ್ಸ್ ಪರತ್ ಸುರು ಜಾಲ್ಲೆಂ.

ಆಶೆಂ ದಾವಣಗೆರೆ ಬಸ್ಸಾಥಾವ್ನ್ ಕಸಲ್ಲಿಚ್ಚ್ ಉಮೇದ್ ಆಮ್ಕಾಂ ನಾತ್‌ಲ್ಲ್ಯಾ ವೆಳಾರ್ ವಾಟೆರ್ ವೆಚ್ಯಾ ಬೈಕಾಂಕ್ ಹಾತ್ ಉಸಂವ್ಕ್ ಸುರ್ವಾತ್ಲೆಂ. ಥೊಡೆ ಪಾವ್ಟಿಂ ಕೋಣ್ ತರೀ ಬಾವ್ಡೊ ಬೈಕ್ ರಾವಾಯ್ತಾಲೊ ಆನಿ ಆಮಿ ತೆಗಾಂ ಪಯ್ಕಿ ಕೋಣ್ ತರೀ ಎಕ್ಲೊ ವೆಳಾರ್ ಕ್ಲಾಸಿಕ್ ಪಾವ್ತಾಲ್ಯಾಂ. (ಹಾಂಗಾ ಏಕ್ ಉತಾರ್ ಉಗ್ಡಾಸ್ ದವ್ರಿಜೆ. ಆಮ್ಕಾಂ ಆಸ್ಚೆಂ 8.45ಚೆಂ ಧರ್ಮಸ್ಥಳ ಬಸ್ಸಾರ್ ಗೆಲ್ಯಾರ್ ಆಮಿ ಸಾರ್ಕ್ಯಾ ವೆಳಾರ್ ಇಸ್ಕೊಲಾಕ್ ಪಾವ್ತಾಲ್ಯಾಂ. ಪುಣ್ ಬಂಟ್ವಾಳ್ಚ್ಯಾ ಮಣಿಹಳ್ಳಥಾವ್ನ್ ಭುರ್ಗಿಂ ಮಡಂತ್ಯಾರ್ ಇಸ್ಕೊಲಾಕ್ ಆನಿ ಕಾಲೇಜಿಕ್ ಯೆತಾಲಿಂ ಆನಿ ಹ್ಯಾ ಸರ್ವಾಂಕ್ ಹೆಂ ಬಸ್ಸ್‌ಚ್ಚ್ ಆಧಾರ್ ಜಾವ್ನಾಸ್‌ಲ್ಲೆಂ. ಪುಣ್ ಜೆದ್ನಾಂ ಬಸ್ ಯೇವ್ನ್ ಅಮ್ಚ್ಯಾ ಜಾಗ್ಯಾಕ್ ಪಾವ್ತಾಲೆಂ, ತಾಚ್ಯಾ ಭಿತರ್ ಸಾಸಾಂವ್ ಘಾಲುಂಕ್ ಸಯ್ತ್ ಇಡೆಂ ನಾತ್‌ಲ್ಲ್ಯಾ ತಿತ್ಲಿಂ ಭುರ್ಗಿಂ ಆನಿ ಇತರ್ ಪ್ರಯಾಣಿಕ್ ಆಸ್ತಾಲೆ. ತಶೆಂ ಜಾಲ್ಲ್ಯಾನ್ ತೆಂ ಬಸ್ ಆಮ್ಚ್ಯಾ ಸ್ಟೋಪಾರ್ ರಾವಾನಾಸ್ತಾಂ ಗೆಲ್ಲೆ ದೀಸ್ ಸಭಾರ್ ತರ್, ಥೊಡೆ ದೀಸ್ ಬಸ್ ರಾವ್ಲ್ಯಾರೀ ಚಡೊಂಕ್ ಜಾಯ್ನಾತ್ಲಿ ಗತ್ ಆಮ್ಚಿ.)

ಆಶೆಂ ಬೈಕ್, ಬಸ್ ಮ್ಹಳ್ಳ್ಯಾ ದಿವೊಡ್-ನಿಸ್ಣಿ ಖೆಳಾಂತ್ ನವೆಂ ಉಜ್ವಾಡ್ ಜಾವ್ನ್ ಆಯಿಲ್ಲೆಂ ಆಮ್ಚೆಂ ನಂದಿನಿ. ನಂದಿನಿ ಕಾಂಯ್ ಚೆಡುಂ ನಂಯ್ ಬಗಾರ್ ತಿ ಏಕ್ ಕುಲ್ಷೇಕರ್ ಆಸ್ಚ್ಯಾ ಕೆ ಎಮ್ ಎಫ್ ಸಂಸ್ಥ್ಯಾಕ್ ದುದಾ ಡಿಪೊ ಥಾವ್ನ್ ದೂದ್ ಪಾವಂವ್ಚಿ ಟ್ಯಾಂಕರ್. ಆಮಿ ಇಸ್ಕೊಲಾಕ್ ವೆಚ್ಯಾ ವೆಳಾರ್ ಮದ್ದಡ್ಕ ಮ್ಹಳ್ಳ್ಯಾ ಜಾಗ್ಯಾರ್ ದೂದ್ ಶೀತಲೀಕರಣ್ ಘಟಕ್ ನವ್ಯಾನ್ ಆರಂಭ್ ಜಾಲ್ಲೊ ಆನಿ ತ್ಯಾ ಘಟಕಾಥಾವ್ನ್ ದೂದ್ ಸಂಗ್ರಹ್ ಕರುಂಕ್ ಹೆಂ ವಾಹನ್ ಸದಾಂ ಸಾಡೆ ಆಟ್ ವ್ಹರಾಂಥಾವ್ನ್ ಸೊವಾಯ್ ನೋವ್ ವ್ಹರಾಂ ಪಯ್ಲೆಂ ಆಮ್ಚ್ಯಾ ಮಧ್ವ ಪಾಶಾರ್ ಜಾತಾಲೆಂ. ಏಕ್ ದೀಸ್ ಅಚಾನಕ್ ಮ್ಹಳ್ಳ್ಯಾಪರಿಂ ಆಮ್ಚೊ ಸಾಂಗಾತಿ ಪ್ರಕಾಶ್ ಹಾಣೆಂ ಹ್ಯಾ ನಂದಿನಿಕ್ ಹಾತ್ ದಾಕಯ್ಲೊ ಆನಿ ನಂದಿನಿ ಮಧ್ವಾಂತ್ ರಾವ್ಲೆಂ.

ಆಮ್ಚೆ ಭಾಗ್ರಾಳೆ ದೀಸ್ ಪರತ್ ಶುರು ಜಾಲೆ. ಆಮಿ ಅತಾಂ ಬಸ್ಸಾಕ್ ಜಾಂವ್, ಬೈಕಾಂಕ್ ಜಾಂವ್ ರಾಕಾನಾತ್‌ಲ್ಲ್ಯಾಂ. ಆಮ್ಕಾಂ ನಂದಿನಿ ಮೆಳ್ತಾಲೆಂ. ಆಮಿ ಸುಮಾರ್ ಸ ಮಹಿನೆ ಭರ್ ಹ್ಯಾ ನಂದಿನಿ ವಾಹನಾರ್ ಪಯ್ಣ್ ಕೆಲಾಂ. ನಂದಿನಿ ಆಮ್ಕಾಂ ಮೊಗಾಚೆಂ ಕಿತ್ಯಾಕ್ ಮ್ಹಳ್ಯಾರ್, ತಾಚೊ ವೇಳ್ ಸಾರ್ಕೊ ಆಸ್ತಾಲೊ, ಆಮಿ ಸಕ್ಕಡ್ ಸಾಂಗಾತಾ ಬಸೊನ್ ಇಸ್ಕೊಲಾಕ್ ವೆತಾಲ್ಯಾಂವ್ ಆನಿ ತ್ಯಾ ಗಾಡಿಯೆರ್ ಡ್ರೈವರಾನ್ ಘಾಲ್ಚಿಂ ಕನ್ನಡ ಆನಿ ಹಿಂದಿ ಪದಾಂ ಆಮ್ಕಾಂ ಮೊಗಾಚಿಂ ಜಾಲ್ಲಿಂ. ಹಿ ಆಮ್ಚಿ ಇಷ್ಟಾಗಾತ್ ಇತ್ಲಿ ಗುಂಡಾಯೆಚಿ ಜಾಲ್ಲಿಗೀ ಆಮಿ ಘರಾ ಜಾಲ್ಲಿ ಫಳ್ ವಸ್ತು ಸಯ್ತ್ ಹಾಡ್ನ್ ಡ್ರೈವರಾಕ್ ದಿತೆಲ್ಯಾಂವ್.

ಜೆದ್ನಾಂ ಆಮ್ಚೆಂ ಆಟ್ವಿ ಶಿಕಾಪ್ ಮುಗ್ದೊನ್ ಯೇಂವ್ಕ್ ಸುರು ಜಾಲೆಂ ತ್ಯಾ ವೆಳಾರ್ ಖಾಸ್ಗಿ ಬಸ್ಸಾಂನಿಂ ಕೊಡ್ಯಾಳ್ ಧರ್ಮಸ್ಥಳ ರಸ್ತ್ಯಾರ್ ಧಾಡ್ ಘಾಲಿ. ಹ್ಯಾ ಖಾಸ್ಗಿ ಬಸ್ಸಾಂಕ್ ಸ್ಪರ್ಧೊ ದಿಂವ್ಚ್ಯಾಕ್ ಸರ್ಕಾರಾನ್ Swaraj Mazda ಮಿನಿ ಬಸ್ಸಾಂ ರಸ್ತ್ಯಾಕ್ ದೆವಯ್ಲಿಂ. ಆತಾಂ ರಸ್ತ್ಯಾರ್ ಬಸ್ಸಾಂಕ್ ಬರ್ಗೊಳ್ ನಾ‌‌ತ್‌ಲ್ಲೊ ಆನಿ ಆಮ್ಕಾಂ ಪಯ್ಲೆಂಚ್ಯಾಕೀ ಚಡ್ ಬಸ್ಸಾಂ ಆಸ್‌ಲ್ಲಿಂ ಜಾಲ್ಯಾನ್ ಆಮ್ಚ್ಯಾ ನಂದಿನಿಕ್ ರಾಕೊನ್ ರಾಂವ್ಚಿ ಗರ್ಜ್ ಪಡನಾತ್‌ಲ್ಲಿ. ಪುಣ್ ಥೊಡೆಪಾವ್ಟಿಂ ಜರ್ ನಂದಿನಿ ಆಮ್ಚ್ಯಾ ಬಸ್ಸಾಚ್ಯಾಕೀ ಪಯ್ಲೆಂ ಆಯ್ಲ್ಯಾರ್ ನಂದಿನಿರ್ ವೆಚೊ ಆವ್ಕಾಸ್ ಆಮಿ ಚುಕಯ್ನಾತ್‌ಲ್ಲ್ಯಾಂವ್. ಮುಖ್ಲ್ಯಾ ದಿಸಾನಿಂ ನಂದಿನಿ ವಾಹನಾಚೊ ವೇಳ್ ಬದ್ಲಲೊ ಆನಿ ಆಮಿ ಜಾಯ್ ಪುರ್ತಿಂ ಸರ್ಕಾರಿ ಬಸ್ಸಾಂ ಆಸ್‌ಲ್ಲ್ಯಾ ಪಾಸೊನ್ ಸಾರ್ಕ್ಯಾ ವೆಳಾಕ್ ಇಸ್ಕೊಲಾಕ್ ಪಾವ್ತೆಲ್ಯಾಂವ್.

ಹ್ಯಾ ಸರ್ವ್ ಘಡಿತಾಂ ಮಧೆಂ ಏಕ್ ವಿಷಯ್ ಸಾಂಗಾಜಯ್ ತೊ ಅಸಾ ಸರ್ಕಾರಿ ಯೋಜನ್ ಜಾವ್ನಾಸ್ಚೆಂ ಇಸ್ಕೊಲಾಚ್ಯಾ ವಿದ್ಯಾರ್ಥಿಂಕ್ ರಿಯಾಯ್ತೆರ್ ಸರ್ಕಾರಿ ಬಸ್ಸಾರ್ ಪಯ್ಣಾಕ್ ಬಸ್ ಪಾಸ್. ಸರ್ಕಾರಾಚ್ಯಾ ಹ್ಯಾ ಯೋಜನಾದ್ವಾರಿಂ ಹಜಾರೊಂ ಭುರ್ಗಿಂ ಅಪ್ಲ್ಯಾ ಘರಾಥಾವ್ನ್ ಪಯ್ಸ್ ಆಸ್ಚ್ಯಾ ಇಸ್ಕೊಲಾಕ್ ವಚೊಂಕ್ ಜಾಲೆಂ ಆನಿ ಮ್ಹಾಕಾ ಉಗ್ಡಾಸ್ ಆಸ್‌ಲ್ಲ್ಯಾ ಪರ್ಮಾಣೆ ಸುಮಾರ್ ತಿನ್ಶಿಂ ರುಪ್ಯಾಂಚ್ಯಾ ಅಯ್ವಜಾರ್ ವರ್ಸ್‌ಭರ್ ಆಮ್ಚಿ ಭುರ್ಗಿಂ ಇಸ್ಕೊಲ್ ಕಾಲೆಜಿಕ್ ವೆತಾಲೆ. ಆನಿ ಹಾಂವೀ ಸುಮಾರ್ ಪಾಂಚ್ ವರ್ಸಾಂ ಹ್ಯಾ ಸರ್ಕಾರಿ ಬಸ್ ಪಾಸಾಚೊ ಉಪ್ಕಾರಿ ಜೊಡ್ಲೊಲೊ ವಿದ್ಯಾರ್ಥಿ.

ವಯ್ರ್ ಕವಿನ್ ಸಾಂಗ್ಲೆಲ್ಯಾ ಪರ್ಮಾಣೆ ಮ್ಹಜ್ಯಾ ಜಿವಿತಾಂತ್ ಬುತ್ಯೆ ಪೆಜೆಚೊ ನೀಸ್ ಕೊಣಾಕೊಣಾಚ್ಯಾ ಉಸ್ಕ್ಯಾರ್ ಗಳೊನ್ ವಚೊಂಕ್ ನಾಂ ತರೀ, ಪೊತ್ಯಾಭಿತರ್ ಪಾಜರ್ನ್ ಮ್ಹಜ್ಯಾ ಬುಕಾಂಕ್ ಆಗ್ಮೆಂತ್ ಶೆಣಾಯ್ಲಾಂ ತೆಂ ಮಾತ್ರ್ ವ್ಹಯ್. ಇಸ್ಕೊಲಾಚ್ಯಾ ಬ್ಯಾಗಾ ಭಿತರ್ ಆಸ್ಚ್ಯಾ ಬುತ್ಯೆಚೆಂ ಧಾಪ್ಣೆಂ ಉಗ್ತೆಂ ಜಾವ್ನ್ ಇಸ್ಕೊಲಾಚೆ ಬೂಕ್ ಪೂರಾ ಭಿಜ್‌ಲ್ಲೆ, ಭಿಜ್‌ಲ್ಲೆ ಬೂಕ್ ವೊತಾಕ್ ಸುಕಯಿಲ್ಲೆ ಆನಿ ದಾಟ್ ನೀಸ್ ಗಮ್ಮಾಬರಿ ಜಾವ್ನ್ ಬೂಕಾಚಿಂ ಪಾನಾಂ ಪೂರಾ ಎಕಾಮೆಕಾ ಅಂಟೊನ್ ಅನ್ಯೇಕ್ ಪಾವ್ಟಿಂ ದುಸ್ರೊಚ್ಚ್ ನೋಟ್ಸ್ ಬರಯ್ಜಯ್ ಜಾಲ್ಲೆಂ ವಯ್ಲ್ಯಾ ಕವಿತೆಚಿ ವೋಳ್ ವಾಚ್ತಾನಾ ಮತಿ ಪರ್ದ್ಯಾರ್ ಪಾಶಾರ್ ಜಾಲಿ.

ಸರ್ಕಾರಿ ಬಸ್ಸ್ ಮ್ಹಣ್ತಾನಾ ಆಮಿ ಬಸ್ಸಾಂಚ್ಯಾ ಡ್ರೈವರ್ ಕಂಡೆಕ್ಟರಾಂಕ್ ಸಲಾಮ್ ಕರಿಜಯ್ ತೆಂ ಖಂಡಿತ್. ಹಳ್ಳಿ ಪ್ರದೇಶಾಂಚ್ಯಾ ಸೀಮಿತ್ route ಆಸ್ಚ್ಯಾ ಬಸ್ಸಾಂಕ್ ಘೆವ್ನ್ ತೊ ಅರ್ಧೊ ಡಾಮಾರ್ ಉಕ್ಲಲೆಲ್ಯಾ, ಅಶೀರ್ ರಸ್ತ್ಯಾರ್ ಬಸ್ಸಾಂ ಘೆವ್ನ್, ಮುಖಾರ್ ವಾಹನಾಂ ಆಯ್ಲ್ಯಾರ್ ತಾಂಕಾ ಸೈಡ್ ದಿಂವ್ಚ್ಯಾಕ್ ರಿಸ್ಕ್ ಘೆವ್ನ್ ಮಾರ್ಗಥಾವ್ನ್ ಬಸ್ಸಾಂ ಸಕಯ್ಲ್ ದೆವಂವ್ಚ್ಯಾ, ಜರ್ ಟೈರ್ ಪಂಕ್ಚರ್ ಜಾಲ್ಯಾರ್, ತಾಂತ್ರಿಕ್ ಕಾರಾಣಾಂಕ್ ಲಾಗೊನ್ ಬಸ್ಸ್ ಪಾಡ್ ಜಾಲ್ಯಾರ್ ಜಾಗ್ ಮಾಗ್ ನಾತ್ಲೆಲ್ಯಾ ಗುಡ್ಯಾನಿಂ ಟೆಕ್ನಿಶಿಯನ್ ಯೆತಾ ಪರ್ಯಾಂತ್ ರಾಕೊನ್ ರಾವೊನ್, ಸಾಸಂವ್ ಘಾಲುಂಕ್ ಇಡೆಂ ನಾತ್‌ಲ್ಲ್ಯಾ ಬಸ್ಸಾರ್ ಅಭಿಮನ್ಯುಪರಿಂ ರಿಗೊನ್ ಸಕ್ಡಾಂಕ್ ಟಿಕೆಟ್ ದೀವ್ನ್, ಪಯ್ಣಾಚ್ಯಾ ಮೊಲಾಪರ್ಮಾಣೆ ಟಿಕೆಟಿ ಪಂಚ್ ಕರ್ನ್, ಎಕಾ ಪೆಪರಾರ್ ಬರವ್ನ್ ಘೆಂವ್ಚೆಂ,(ಅತಾಂ ಟಿಕೆಟ್ ಮಿಶಿನಾಂ ಆಸಾತ್ ಪುಣ್ ಆಮ್ಚ್ಯಾ ಕಾಳಾರ್ ಟಿಕೆಟಿ ಪಿಂದುನ್ ದಿತಾಲೆ) ಸದಾಂ ಬಸ್ಸಾರ್ ಯೆಂವ್ಚೊ ವ್ಯಕ್ತಿ ಜರ್ ಥೊಡ್ಯೊ ಘಡಿಯೊ ವೇಳ್ ಜಾವ್ನ್ ಪಯ್ಶಿಲ್ಯಾನ್ ಯೆಂವ್ಚೆಂ ದಿಸ್ತಾ ಜಾಲ್ಯಾರ್ ತಾಕಾ ರಾಕೊನ್ ರಾಂವ್ಚೆಂ, ಕೊಣಾಚಿ ಸತ್ರಿ, ಬ್ಯಾಗ್ ಉಗ್ಡಾಸ್ ನಾಸ್ತಾಂ ಬಸ್ಸಾರ್ ಉರೊನ್ ಗೆಲಾಂ ಜಾಲ್ಯಾರ್ ಫಾಲ್ಯಾಂ ವಾ ಉಪ್ರಾಂತ್ಲ್ಯಾ ಟ್ರಿಪ್ಪಾರ್ ತ್ಯಾ ವ್ಯಕ್ತಿಕ್ ತೆಂ ಪಾಟಿಂ ಪಾವಿತ್ ಕರ್ಚೆಂ, ಕೊಣಾಚೆಂ ಪಾರ್ಸೆಲ್ ಅನ್ಯೆಕಾ ಕಡೆ ಪಾವಿತ್ ಕರ್ಚೆಂ, ಲ್ಹಾನ್ ಭುರ್ಗ್ಯಾಂಕ್ ಜರ್ ಅವಯ್ನ್ ಬಸ್ಸಾರ್ ಬಸವ್ನ್ "ಮಡಂತ್ಯಾರ್‌ಡ್ ಜಪ್ಪಲೆ" ಮ್ಹಣ್ ಸಾಂಗ್ಯಾರ್ ಉಗ್ಡಾಸ್ ಕರ್ನ್ ತೊ ಭುರ್ಗೊ ದೆಂವ್ತಾಗೀ ಮ್ಹಣ್ ಜಾಗ್ರುತ್ ಘೆಂವ್ಚೆ ಬಸ್ ಡ್ರೈವರ್-ಕಂಡಕ್ಟರ್ ತ್ಯಾ ವೆಳಾರ್ ಆಸ್‌ಲ್ಲೆ. ಇಲ್ಲೊಸೊ ಗೊರೊ ಆಸ್ಲ್ಯಾರ್ "ಊರುದಾಯೆ" ಮ್ಹಣ್ ತುಳ್ವೆಂತ್ ಆನಿ ಇಲ್ಲೊಸೊ ರಂಗ್ ಕಾಳೊ ಆಸಾ ಜಾಲ್ಯಾರ್ "ಘಟ್ಟದಾಯೆ" ಮ್ಹಣ್ ವೊಲಾವ್ನ್ ಕನ್ನಡ ಭಾಷೆನ್ ಜಾಂವ್ಚಿ ಬಾಸಾಭಾಸ್, ಅಮ್ಕಾಂಚ್ಚ್ ಕಳನಾಸ್ತಾಂ ರುತಾ ಜಾಂವ್ಚೊ ತೊ ಭಾಂದ್ ಏಕ್ ವಿಶೇಸ್ ಅನ್ಭೊಗ್.

ಹ್ಯಾ ಹೈಸ್ಕೂಲಾಚ್ಯಾ ಪಯ್ಣಾರ್ ಜಾಲ್ಲಿ ಏಕ್ ಗಜಾಲ್ ಸಾಂಗೊನ್ ಹಾಂವ್ ಸಂಪಯ್ತಾಂ. ಪಾಟ್ಲ್ಯಾ ಸುಮಾರ್ ಪಂದ್ರಾ ವರ್ಸಾಂಥಾವ್ನ್ ಹೈ ಹೀಲ್ಸ್ ವಾಣೊ ಆಮ್ಚ್ಯಾ ಸ್ತ್ರೀಯಾಂಚ್ಯಾ ಪಸಂದಾಯೆಚೊ ಜಾಲ್ಯಾತ್ ಮ್ಹಣ್ ಹಾಂವ್ ಲೆಕ್ತಾಂ. ಮ್ಹಜ್ಯಾ ಹೈಸ್ಕೂಲಾಚ್ಯಾ ಪ್ರಾಯೆರ್ ಚೆಡ್ವಾಂಚ್ಯೊ ವ್ಹಾಣೊ ಪಳಂವ್ಚ್ಯಾ ತಿತ್ಲಿ ಪ್ರಾಯ್ ವಾಡೊಂಕ್ ನಾತ್‌ಲ್ಲಿ ಜಾಲ್ಲ್ಯಾನ್ ತ್ಯಾ ವೆಳಾರ್‌ಚ್ಚ್ ಹೆಂ ಫ್ಯಾಶನ್ ಸುರ್ವಾತ್ಲೆಂ ಮ್ಹಣ್ ಹಾಂವ್ ಪಾತ್ಯೆತಾಂ. ಸದಾಂಚ್ಯಾಪರಿಂ ಸಕಾಳಿಂ ವೆತಾನಾ ಕಶೆಂ ಬಸ್ ರಶ್ ಆಸ್ತಾಗೀ, ತಶೆಂಚ್ಚ್ ಪಾಟಿಂ ಯೆತಾನಾಂಯ್ ಆಸ್ತಾಲೆಂ. ಆಶೆಂ ಪಾಟಿಂ ಯೆತಾನಾ, ಮಡಂತ್ಯಾರ್ ಬಸ್ಸಾಕ್ ಚಡ್‌ಲ್ಲ್ಯಾ ಆಮಿ ಮುಖ್ಲೆಂ ಸ್ಟೋಪ್ ಪುಂಜಲಾಕಟ್ಟೆ ಯೆತಾನಾ ಕಂಡೆಕ್ಟರಾಚ್ಯಾ "ಸೇರ್ಲೆ, ಸೇರ್ಲೆ ಉಲಾಯಿ ಪೋಲೆ" ಮ್ಹಳ್ಳ್ಯಾ ಉಲ್ಯಾಕ್ ಪಾಳೊ ದೀವ್ನ್ ಅನಿಕೀ ಚಿರ್ಮುಟ್ಲೆಲಿ ಅಂಬಾಡಿ ಜಾಂವ್ಚೆಂ ಪ್ರಯತ್ನ್ ಕರ್ತಾನಾ, ಎಕಾಚ್ಚಾಣೆ ಮ್ಹಜಿ ಜ್ಯೋರಾನ್ ಕಿಂಕ್ರಾಟ್ ಜಾಲಿ. ಸಕ್ಕಡ್ ಘಾಬಾರ್ಲೆ. ಕಿತೆಂ ಜಾಲೆಂ ಮ್ಹಣ್ ಪಳೆಂವ್ಚ್ಯಾ ತಿತ್ಲೊ ಜಾಗೊ ನಾತ್‌ಲ್ಲೊ ಜಾಲ್ಯಾರೀ ಸೈಡಿಚ್ಯಾ ಸಿಟಿ ಮುಖಾರ್ ಪಾಂಯ್ ವರ್ನ್ ಪಳಯ್ಜಯ್ ತರ್, ಮ್ಹಜ್ಯಾ ದಾವ್ಯಾ ಪಾಯಾಚ್ಯಾ ವ್ಹಡ್ಲ್ಯಾ ಬೊಟಾಚಿ ನಾಕ್ಷಿ ಮ್ಹಜ್ಯಾ ಮುಖಾರ್ ಆಸ್ಚ್ಯಾ ಚೆಡ್ವಾಚ್ಯಾ ಹೈ ಹೀಲ್ಸಾಚ್ಯಾ ಭಾಲಿಯೆಕ್ ಬಲಿ ಜಾಲ್ಲಿ. ಅಜೂನ್ ಹೈ ಹೀಲ್ಸ್ ವ್ಹಾಣೊ ಪಳೆತಾನಾ ಸರ್ಕಾರಿ ಬಸ್ ಅನಿ ಮ್ಹಜ್ಯಾ ಪಾಯಾಚಿ ನಾಕ್ಷಿ ಉಗ್ದಾಸಾಕ್ ಯೆತಾ.

ವಯ್ರ್ ಸಾಂಗ್ಲೆಲೆ ಥೊಡೆ ವಿಚಾರ್ ತುಮ್ಚ್ಯಾ ಪಯ್ಣಾರ್ ಸಯ್ತ್ ಘಡ್ಲ್ಯಾಂತ್ ಕೊಣ್ಣಾ ವಾ ಹಾಚ್ಯಾಕೀ ಚಡ್ ಮಜೆದಾರ್ ಯಾದಿ ತುಮ್ಚ್ಯಾ ಕಾಳ್ಜಾಂತ್ ಆಸ್ತಿತ್ ಕೊಣ್ಣಾ. ಕವಿ ಕಟಿಲಾಚ್ಯಾ ಗಡ್ದಿ ಬಸ್ಸಾಂತ್ ಕವಿತೆನ್ ಮ್ಹಜ್ಯೊ ಯಾದಿ ಉಸ್ತಿಲ್ಲೆಪರಿಂ ಜರ್ ಹೆಂ ವಾಚ್ತಾನಾ ತುಮ್ಚ್ಯೊ ಯಾದಿ ಫುಲೊನ್ ಆಯ್ಲ್ಯೊ ತರ್ ವಾಂಟುನ್ ಘೆಂವ್ಕ್ ವಿಸರ್ನಾಕಾತ್. ಭೊಗ್ಣಾಂ ಶಿಜಯಿಲ್ಲ್ಯಾ ಕವಿ ವಿಲ್ಸನ್ ಕಟೀಲಾಕ್ ಧಿನ್ವಾಸ್. ಸರ್ಕಾರಿ ಬಸ್ ಜಿಂದಾಬಾದ್...

ಕಿರಣ್ ನಿರ್ಕಾಣ್