ಡಿಜಿಟಲ್ ಮಾಧ್ಯಮ್ ಆನಿ ಸಾಹಿತ್ಯ್
ಕವಿ ಶ್ರೀ ಮೆಲ್ವಿನ್ ರೊಡ್ರಿಗಸ್ ಹಾಂಚೆಥಾವ್ನ್ ವಿಚಾರ್ ಸಾದರ್ಪಣ್:

ಡಿಜಿಟಲ್ ಮಾಧ್ಯಮಾ ಮಾರಿಫಾತ್ ಆಯ್ಚ್ಯಾ ಕಾರ್ಯಾಕ್ ಹಾಜರ್ ಜಾಲ್ಲ್ಯಾ ಸಾಹಿತ್ಯ್ ಸಂವ್ಸಾರಾಂತ್ಲ್ಯಾ ಮ್ಹಜ್ಯಾ ಮೊಗಾಚ್ಯಾಂನೊ

ಪಾನಾಂ ಪಾಲೆವ್ನ್ ಯೆಂವ್ಚಿಂ ರಾವಲ್ಲಿಂ. ಬೋವ್ಶಾ ಕೋವಿಡಾಚೆಂ ಭ್ಯೆಂ ತಾಂಕಾಂಯ್ ಲಾಗಲ್ಲೆಂ. ಆತಾಂ ಹೆಂ ಭ್ಯೆಂ ಪಯ್ಸ್ ಗೆಲಾಂ. ಆಂಕ್ರೆಕ್ ನವ್ಯಾನ್ ಆಂಕ್ರಿ ಫುಟ್ಲ್ಯಾ. ಆಂಕರ್ ಫುಟ್ಚಿ ಮ್ಹಳ್ಯಾರ್ ನವ್ಯಾ ಜಿವಾಚ್ಯೆ ವಾಡಾವಳಿಕ್ ಗರ್ಜ್ ಆಸ್ಚಿ ಘಟಾಯ್, ಹುಮೆದ್, ಸಕತ್ ಸಕ್ಕಡ್ ಮೆಳುಂಕ್ ಸುರು ಜಾಲ್ಯಾ ಮ್ಹಳ್ಳೊ ಅರ್ಥ್. ಹಿ ಘಟಾಯ್, ಹುಮೆದ್, ಸಕ್ತೆಚೊ ವ್ಹಾಳೊ ಸದಾಂಚ್ ವ್ಹಾಳುನ್ ರಾವುಂ ಆನಿ ಆಂಕರ್ ಮ್ಹಳ್ಳಿ ತಿ ಆಂಕರ್‌ಚ್ ಉರನಾಸ್ತಾಂ ಆಂಕ್ರೆಕ್ ಆಂಕರ್, ಆಂಕ್ರೆಂಕ್ ಆಂಕ್ರ್ಯೊ ಫುಟುನ್‍ಚ್ ರಾವುಂ ಅಶೆಂ ಹಾಂವ್ ಬಾಳ್ಗಿತಾಂ. ಹ್ಯಾ ಎಕ್ಯೆ ಪೊಸ್ಣೆಚ್ಯಾ ಕಾಮಾಂತ್ ಬುಡಲ್ಲ್ಯಾ ಸರ್ವಾಂಕ್, ಪ್ರತ್ಯೇಕ್ ಕರುನ್ ಸನ್ನು ಮೊನಿಸ್ ತಶೆಂ ತಾಚ್ಯಾ ಬರ‍್ಯಾ ಮನಾಚ್ಯಾ ವಾವ್ರಾಂತ್ ತಾಕಾ ಸಾಂಗಾತ್ ದಿತಲ್ಯಾಂಕ್, ಮ್ಹಜ್ಯಾ ಬರ‍್ಯಾ ಮನಾಥಾವ್ನ್, ತಶೆಂಚ್ ಖರ‍್ಯಾ ಕಾಳ್ಜಾಥಾವ್ನ್ ಬರೆಪಣಾಚಿಂ ಬೆಸಾಂವಾಂ ಆಶೆತಾಂ.

Melvyn Rodrigues; is a Konkani poet, essayist, critic, orator, and Konkani language activist.

ಕೊಂಕಣಿಚ್ಯೆ ಚಳುವಳೆಂತ್ ಪಾಟ್ಲ್ಯಾ ಕಾಂಯ್ ಸತ್ತೀಸ್ ವರ್ಸಾಂ ಥಾವ್ನ್ ಹಾಂವ್ ಬುಡುನ್ ಗೆಲಾಂ. ಹಾಂವ್ ಡಿಜಿಟಲ್ ವಾ ಕಂಪ್ಯೂಟರ್ ತಾಂತ್ರಿಕತೆಂತ್ ಗಿನ್ಯಾನಿ ಮನೀಸ್ ನ್ಹಯ್. ಪುಣ್ ಏಕ್ ಸಾದೊ ಮನಿಸ್ ಜಾವ್ನ್, ಕೊಂಕಣಿ ಭಾಶೆಚ್ಯೆ ವಾಡಾವಳಿಕ್ ಮ್ಹಜೆಂ ಲ್ಹಾನ್ ಸಾನ್ ಪ್ರೇತನ್ ಕರುನ್ ಆಸ್ತಾನಾ ಆಯ್ಚಿ ತಾಂತ್ರಿಕತಾ ವಾಪರ‍್ಚ್ಯಾಂತ್ ಹಾಂವ್ ಪಾಟಿಂ ಉರುಂಕ್ ನಾ. ಕಾಂಯ್ ವೀಸ್ ವರ್ಸಾಂ ಆದಿಂ ಕವಿತೆಚೆಂ ಥಿರ್ ಪಾನ್ ಮ್ಹಳ್ಯಾರ್ ಸ್ಟಾಟಿಕ್ ಪೇಜ್ ಸುರು ಕರುನ್, ಉಪ್ರಾಂತ್ ಡೈನಾಮಿಕ್, ತ್ಯಾನಂತರ್ ಹ್ಯಾ ಡೈನಾಮಿಕ್ ತಂತ್ರಗಿನ್ಯಾನಾಂತಚ್ ಉಂಚ್ಲ್ಯಾ ಭಾಸಾಂಚೆಂ ಮಹತ್ವ್ ಸಮ್ಜುನ್ ತ್ಯೊ ವೊಳ್ಖುನ್ ಘೆವ್ನ್, ಜಾಳಿಜಾಗ್ಯಾಂನಿ ತ್ಯೊ ಕೊಂಕಣಿಚ್ಯಾ ವಾವ್ರಾ ಖಾತೀರ್ ವಾಪರ‍್ಚ್ಯಾಂತ್ ಹಾಂವ್ ಪಾಟಿಂ ಉರುಂಕ್ ನಾ. ದಿ ಕೊಂಕಣೀ ಡಿಕ್ಷನರಿ.ಕೊಮ್ ಜಾಳಿಜಾಗೊ, ಕೊಂಕಣ್ವರ್ಟರ್ ತಸಲೆಂ ಟೂಲ್‌ಕಿಟ್ - ಹಾಂತುಂ ಮ್ಹಜೆಂ ಯೋಗದಾನ್ ದಿಂವ್ಚ್ಯಾಂತ್ ಹಾಂವೆಂ ಪಾಟಿಂ ಮುಕಾರ್ ಪಳೆಲ್ಲೆಂ ನಾ. ಡಿಜಿಟಲ್ ಮಾಧ್ಯಮಾವರ್ವಿಂ ಕೊಂಕಣಿಚಿ ಬರ್ಪೂರ್ ಉದರ್ಗತ್ ಜಾಂವ್ಕ್ ಸಾಧ್ಯ್ ಆಸಾ ಮ್ಹಳ್ಳೆಂ ಮ್ಹಜೆಂ ಚಿಂತಪ್ ಕಾಂಯ್ ವೀಸ್ ವರ್ಸಾಂ ಆದ್ಲೆಂ.

ಪೇಪರಾಚೊ ವಾಪರ್ ನಾಸ್ತಾಂ ಜಾಳಿಜಾಗ್ಯಾಚೆರ್ (ಇಂಟರ್‌ನೆಟ್ಟಾಚೆರ್) ವಾಚ್ಪಾಚಿ ಸುವಿಧಾ ಘಡೊವ್ನ್ ದಿಂವ್ಚಿ ವ್ಯವಸ್ಥಾಚ್ ಡಿಜಿಟಲ್ ಮಾಧ್ಯಮ್ ಮ್ಹಣುಂಯೆತಾ. ಹ್ಯಾ ಖಾತೀರ್ ಜಾಯ್ತಿಂ ಪ್ಲೆಟ್ ಫೊರ್ಮ್ಸ್ ವಾ ವೇದಿ ಆಸಾತ್. ಡೆಸ್ಕ್ ಟೊಪ್, ಲ್ಯಾಪ್ ಟೊಪ್, ಐಪ್ಯಾಡ್ಸ್, ಮೊಬಾಯ್ಲ್ ತಸಲ್ಯಾ ಮಾಟ್ವಾಂನಿ ಭಿತರ್ ರಿಗುನ್, ತುಂವೆಂ ಹ್ಯಾ ವೇದಿಂಚ್ಯೊ ಸುವಿಧಾ ಜೊಡುಂಯೆತಾತ್. ಜಾಯ್ತ್ಯೊ ವೇದಿ ಆಸಾತ್ ಜಾಲ್ಯಾರೀ, ಆಮ್ಚ್ಯಾ ಲೊಕಾಮಧೆಂ ನಾಂವ್ ವೆಲ್ಲ್ಯೊ ವೇದಿ ಮ್ಹಳ್ಯಾರ್ ಜಾಳಿಜಾಗೆ ವಾ ವೆಬ್‍ಸೈಟ್ಸ್, ವೈಯುಕ್ತಿಕ್ ಬ್ಲೊಗ್ಸ್, ಫೇಸ್ ಬುಕ್, ಯೂಟ್ಯೂಬ್, ಟ್ವಿಟ್ಟರ್, ಇನ್‌ಸ್ಟಾಗ್ರಾಮ್ ಇತ್ಯಾದಿ.

ಚಡುಣೆ 2000 ಇಸ್ವೆಂತ್ ಕೊಂಕಣಿ ಭಾಸ್ ಡಿಜಿಟಲ್ ಮಾಧ್ಯಮಾಂತ್ ದಿಸುಂಕ್ ಸುರು ಜಾಲಿ. ಡಿಜಿಟಲ್ ಮಾಧ್ಯಮ್ ಸುರು ಜಾಲ್ಲೆಂಚ್ ಆದ್ಲ್ಯಾ ಶತಮಾನಾಚ್ಯಾ ನಿಮಾಣ್ಯಾ ವರ್ಸಾಂನಿ. ಸುರ್ವೆರ್ ಸ್ಟಾಟಿಕ್, ಉಪ್ರಾಂತ್ ಡೈನಾಮಿಕ್ ಜಾಳಿಜಾಗೆ ಆಯ್ಲೆ. ಡೈನಾಮಿಕ್ ಜಾಳಿಜಾಗ್ಯಾಂಚ್ಯಾ ಸ್ಕ್ರಿಪ್ಟ್ ಕೋಡಿಂಗಾಂತ್ ಸಯ್ತ್ ಎ ಎಸ್ ಪಿ ಥಾವ್ನ್ ಪಿ ಎಚ್ ಪಿ ಪರ್ಯಾಂತ್ ಜಾಯ್ತಿ ಪ್ರಗತಿ  ಜಾಲ್ಯಾ. ಆಜ್ ಟಿ ಟಿ ಎಸ್ (ಟೆಕ್ಸ್ಟ್ ಟು ಸ್ಪೀಚ್) ತಾಂತ್ರಿಕತೆಂತ್ ಜಾಯ್ತಿ ಪ್ರಗತಿ ಜಾಲ್ಯಾ. ಥೊಡ್ಯಾ ವರ್ಸಾಂ ಆದಿಂ ಆಮಿ ಟೈಪ್ ಕೆಲ್ಲೆಂ ವಾಚ್ಚಿ ಸುವಿಧಾ ಅಸ್ಥಿತ್ವಾಕ್ ಆಯಿಲ್ಲಿ. ಆಜ್ ಸ್ಕ್ಯಾನ್ ವಾ ಫೊಟೊಂತ್ ಆಸ್ಚೆಂ ಟೆಕ್ಸ್ಟ್ ವಾ ಬರಪ್ ಸಯ್ತ್ ವಾಚ್ಚಿ ಸುವಿಧಾ ಆಯ್ಲ್ಯಾ ಮಾತ್ರ್ ನ್ಹಯ್ ಫೊನೆಟಿಕ್ ಟ್ರಾನ್ಸ್‌ಕ್ರಿಪ್ಶನ್ಸ್ ಸಯ್ತ್ ಸ್ಪೀಚ್ ಜಾವ್ನ್ ಬದ್ಲುಂವ್ಯೆತಾ ತಿತ್ಲಿ ಪ್ರಗತಿ ಜಾಲ್ಯಾ. ಹಾಚ್ಯಾ ಬರಾಬರ್ ಉಲಯಿಲ್ಲೆಂ ಉತರ್ ಸಯ್ತ್ ಬರಪ್ ಜಾವ್ನ್ ಬದ್ಲುಂಚ್ಯೆ ತಾಂತ್ರಿಕತೆಂತ್ ಮಹತ್ವಾಚಿ ಪ್ರಗತಿ ಜಾಲ್ಯಾ. 

ಕೊಂಕಣಿಚ್ಯಾ ಸಂದರ್ಭಾರ್ ಉಲೊಂವ್ಚೆಂ ಜಾಲ್ಯಾರ್ 2000 ವರ್ಸಾ ಮಂಗ್ಳುರಾಂತ್ ಕವಿ ಮಾವ್ರಿಸ್ ಡೆಸಾನ್ ಪಯ್ಲಿ ಸ್ಟಾಟಿಕ್ ವೆಬ್‍ಸೈಟ್ ಕಾಣಿಕ್ ಒನ್‌ಲೈನ್.ಕೊಮ್ ಸುರು ಕೆಲ್ಲಿ. ತ್ಯಾ ಉಪ್ರಾಂತ್ ಜಾಲ್ಲ್ಯಾ ಪ್ರಗತೆಚೆ ಆಂಕ್ಡೆ ಸಾಂಕ್ಡೆ ಮ್ಹಜೆಲಾಗಿಂ ನಾಂತ್. ಕೊಂಕಣಿಂತ್ ಆಜ್ ಧಾರಾಳ್ ಜಾಳಿಜಾಗೆ ಆಸಾತ್. ಸಾಮಾಜಿಕ್ ಡಿಜಿಟಲ್ ಮಾಧ್ಯಮಾಂನಿ - ಜಾಂವ್ ಫೇಸ್‍ಬುಕ್, ಯೂಟ್ಯೂಬಾಂತ್ ಕೊಂಕಣಿ ಪಾಟಿಂ ಉರುಂಕ್ ನಾ. ವೆಬ್‌ಸ್ಟ್ರೀಮಿಂಗ್ ತಸಲಿ ಸುವಿಧಾ ಸಯ್ತ್ ಕೊಂಕಣಿ ಲೋಕ್ ವಾಪರುನ್ ಆಸಾ. ಅರ್ಥ್‍ಕೋಶ್, ಶಬ್ದಕೋಶ್ ಉಪಲಬ್ದ್ ಆಸಾತ್. ಲಿಪ್ಯಾಂತರಾಚ್ಯಾ ಸಂದರ್ಭಾರ್ ವಿಶ್ವ ಕೊಂಕಣಿ ಕೇಂದ್ರಾಚೆಂ ಕೊಂಕಣ್ವರ್ಟರ್ ಜಾಯ್ತ್ಯಾ ಉಪ್ಕಾರಾಚೆಂ ಜಾಲಾಂ. ಕೊಂಕಣಿ ಉತ್ರಾಂಚೊ ಉಚಾರ್ ಸಾರ್ಕೊ ಆಸ್ಚೆದಿಶಿಂ ಕಾಂಯ್ ಥೊಡಿಂ ಉಪಕ್ರಮಾಂ ಡಿಜಿಟಲ್ ಮಾಧ್ಯಮಾಚೆರ್ ಗೊಂಯ್ ಕೊಂಕಣಿ ಭಾಷಾ ಮಂಡಳಾನ್ ಸುರು ಕೆಲ್ಯಾಂತ್. ಕಾಂಯ್ ಮ್ಹಯ್ನ್ಯಾಂ ಥಾವ್ನ್ ಕೋವಿಡ್ ಪಿಡೆಕ್ ಲಾಗುನ್ ಸಾಹಿತಿಕ್ ಚರ್ಚಾ, ಪುಸ್ತಕ್ ವಿಮೋಚನ್ ಕಾರ್ಯಕ್ರಮಾಂ, ವಿಚಾರ್-ಸಾತಿಂ, ಜಮಾತ್ಯೊ ಮಾತ್ರ್ ನ್ಹಯ್ ಕೊಂಕಣಿಂತ್ ವಿದ್ಯಾಭ್ಯಾಸ್ ಲೆಗುನ್ ಡಿಜಿಟಲ್ ಮಾಧ್ಯಮಾ ವಯ್ಲ್ಯಾನ್ ಜಾತೇ ಆಸಾ.

ಆಮಿ ಉಲೊಂವ್ಚೆಂ ವಾ ಬರೊಂವ್ಚೆಂ - ಜಾಂವ್ಕ್ ಪುರೊ ಸಾಹಿತ್ಯ್, ಚರ್ಚಾ ಸಂಗೀತ್, ಪದಾಂ, ಕಾಂತಾರಾಂ, ನಾಟಕಾಂ, ಫಕಾಣಾಂ, ಗಜಾಲಿ ವಾ ಫಕತ್ ಉಲೊವ್ಪ್ - ತೆಂ ಶ್ರಾವ್ಯಾಂತ್ ವಾ ದೃಶ್ಯಾಂತ್, ಸಾಂಬಾಳುನ್ ದವರುಂಕ್ ಜಾತಾ, ಜಾಯ್ ಜಾತಾನಾ ಕಸಲೋಚ್ ವೇಳ್ ವಿಭಾಡ್ ಕರಿನಾಸ್ತಾಂ ಆಪ್ಣಾಂವ್ಕ್ ಘೆಂವ್ಕ್ ಜಾತಾ ಆನಿ ಸಂವ್ಸಾರಾಚ್ಯಾ ಖಂಯ್ಚ್ಯಾಯ್ ಕೊನ್ಶಾಕ್ ಖಿಣಾನ್ ಪಾವೊಂವ್ಕ್ ಜಾತಾ. ಹಾಕಾ ವೆಳಾಚಿ ಬಂಧಡ್ ನಾ, ಪ್ರದೇಶಾಚಿ ವಾ ಜಿಯೊಗ್ರಾಫಿಕಲ್ ಬಂಧಡ್ ನಾ, ಪಯ್ಣ್ ಕರಿಜಾಯ್ ಮ್ಹಣುನ್ ನಾ. ಹ್ಯಾ ಕಾಮಾಕ್ ಸುರ್ವಾತೆರ್ ಜಾಯ್ ತಿಂ ಉಪಕರಣಾಂ, ಸಾಹೆತಿ ಹಾಡ್ಚ್ಯಾಕ್ ಆನಿ ಉಪ್ರಾಂತ್ ಇಂಟರ‍್ನೆಟ್ಟಾಕ್ ಫಾರಿಕ್ ಕರುಂಕ್  ಪಡ್ತಾ. ವ್ಹಡ್ ಎಕಾ ಜಾಗ್ಯಾಚಿ ಗರ್ಜ್ ನಾ. ಪುಣ್ ಗರ್ಜೆಚಿ ಮ್ಹಾಯೆತ್ ಜಾಯ್ ತ್ಯೆ ರಿತಿನ್ ಜಮೊವ್ನ್ ವಾ ಮಾಂಡುನ್ ದವರ್ಚ್ಯಾಕ್ ಡಿಜಿಟಲ್ ತಾಂತ್ರಿಕತೆಂತ್ ಜಾಣ್ವಾಯ್ ಆಸ್ಚ್ಯಾ ಮನ್ಶಾಂಚಿಂ ವೊರಾಂ ವಾ ವೇಳ್ ಜಾಯ್. ಹ್ಯಾ ವೊರಾಂ ಖಾತೀರ್ ಪಾಗ್ ವಾ ಸಾಂಬಾಳ್ ದೀಜಾಯ್ ಪಡ್ತಾ.

ಕೊಂಕಣಿಚ್ಯಾ ಸಂದರ್ಭಾರ್ ಡಿಜಿಟಲ್ ಮಾಧ್ಯಮಾಚೊ ಫಾಯ್ದೊ:

ಡಿಜಿಟಲ್ ಮಾಧ್ಯಮಾವರ್ವಿಂ ಸಂವ್ಸಾರಾರ್ ಶಿಂಪಡ್ಲಲ್ಯಾ ಸಮಗ್ರ್ ಕೊಂಕಣಿ ಲೊಕಾಕ್ ಏಕ್ ಬಳ್ವಂತ್ ನಾದಿಸ್ತೊ ಡಿಜಿಟಲ್ ಸಮುದಾಯ್ ಜಾವ್ನ್ ಪರಿವರ್ತನ್ ಕರುಂಕ್ ಜಾತಾ. ಸದ್ದ್ಯಾ ಆಮಿ ಪ್ರದೇಶಾಂಕ್ ಲಾಗುನ್, ಲಿಪಿಕ್ ಲಾಗುನ್, ಬೋಲಿಂಕ್ ಲಾಗುನ್ ಆನಿ ಕಾಂಯ್ ಸಂದರ್ಭಾಂನಿ ಧರ್ಮಾಕ್ ಲಾಗುನ್ ವೆವೆಗ್ಳ್ಯಾ ಕೊಂಕಣಿಚ್ಯಾ ಜುಂವ್ಯಾಂನಿ ಮ್ಹಳ್ಯಾರ್ ಕುದ್ರ್ಯಾಂನಿ ಆಸಾಂವ್. ಹ್ಯಾ ಸಗ್ಳ್ಯಾ ಜುಂವ್ಯಾಂ ಮದೆಂ ಅದೃಶ್ಯ್ ಡಿಜಿಟಲ್ ಪೂಲ್ ಮ್ಹಳ್ಯಾರ್ ಸಾಂಕೊವ್ ಆಜ್ ವಯ್ರ್ ಯೆತೇ ಆಸಾತ್.  ಹೆ ಪೂಲ್ ಸರ್ವಯ್ ಕೊಂಕಣಿ ಲೊಕಾಕ್ ಎಕಾಚ್ ಸಾತ್ಯಾ ವಾ ಸತ್ರೆ ಪೊಂದಾ ಹಾಡುಂಕ್ ಸಕ್ಚೆ ತಸಲೆ ಆಸಾತ್.

ಡಿಜಿಟಲ್ ಮಾಧ್ಯಮಾವರ್ವಿಂ ಕೊಂಕಣಿ ಭಾಶೆಕ್ ಕಸಲೊ ಫಾಯ್ದೊ ಜಾಲಾ, ಹ್ಯಾ ಎಕಾ ಮಾದ್ಯಮಾ ಮಾರಿಫಾತ್ ಕೊಂಕಣಿ ಭಾಶೆಕ್ ಕಸಲೆಂ ಲುಕ್ಸಾಣ್ ಜಾಲಾಂ ಮ್ಹಳ್ಳೆವಿಶಿಂ ಪಾಟ್ಲ್ಯಾ ಕಾಂಯ್ ಥೊಡ್ಯಾ ಮ್ಹಯ್ನ್ಯಾಂನಿ ಸಬಾರ್ ವೆಬಿನಾರಾಂನಿ ಹಾಂವ್ ಉಲಯ್ಲಾಂ. ಮ್ಹಜ್ಯಾ ಉಪ್ರಾಂತ್ಲೆ ಮಾನೆಸ್ತ್ ಹ್ಯಾವಿಶಿಂ ಉಲೊಂವ್ಕ್ ಆಸಾತ್ ಜಾಲ್ಲ್ಯಾನ್ ತ್ಯಾವಿಶಿಂ ಹಾಂವ್ ಉಲೊಂವ್ಕ್ ವಚನಾ. ಕೊಂಕಣ್ವರ್ಟರ್ ತಸಲ್ಯಾ ಟೂಲ್ ಕಿಟ್ಟಾ ಮಾರಿಫಾತ್ ಕೊಂಕಣಿಚ್ಯಾ ಲಿಪಿಚೊ ಪ್ರಸ್ನ್ ಕಸೊ ನಪಯಿಂಚ್ ಜಾತೇ ಆಸಾ, ಶಬ್ದಕೋಶಾಂಚ್ಯಾ ಉಪಲಬ್ದೆ ವರ್ವಿಂ ಸಮಗ್ರ್ ಕೊಂಕಣಿಚ್ಯಾ ಉತ್ರಾಂವಳಿಚಿ ಜಾಣೀವ್ ಆಮ್ಕಾಂ ಜಾಯೀತ್ ಆಸಾ, ಯೂಟ್ಯೂಬ್ ಆನಿ ಈಬುಕ್ಸ್ ತಸಲ್ಯಾ ಮಾಧ್ಯಮಾ ಮಾರಿಫಾತ್ ಸಮಗ್ರ್ ಕೊಂಕಣಿಚ್ಯಾ ಸಾಹಿತ್ಯಾಚಿ ಸವ್ಕಾಸ್ ಆಮ್ಕಾಂ ವಳಖ್ ಜಾಯೀತ್ ಆಸಾ ಮ್ಹಳ್ಳೆವಿಶಿಂ ಆಮಿ ಜಾಣಾಂವ್. ಇತ್ಲೆಂಚ್ ನ್ಹಯ್ ಡಿಜಿಟಲ್ ಮಾಧ್ಯಮಾಂತ್ ಕೊಂಕಣಿಕ್ ಉಪ್ಕಾರ‍್ಚ್ಯೊ ಟಿ ಟೀ ಎಸ್ ಸುವಿಧಾ ಮ್ಹಳ್ಯಾರ್ ಟೆಕ್ಸ್ಟ್ ಟು ಸ್ಪೀಚ್ ಸುವಿಧಾ, ಸ್ಪೀಚ್ ಟು ಟೆಕ್ಸ್ಟ್ ಸುವಿಧಾ, ಗ್ರಾಮರ‍್ಲಿ ಚೆಕ್ ತಸಲ್ಯೊ ವ್ಯಾಕರಣ್ ಸುಧಾರಣಾಕ್ ಸುಚೊವ್ಣ್ಯೊ ಕರ‍್ಚ್ಯೊ ಸುವಿಧಾ, ಒ ಟಿ ಟಿ (ಓವರ್ ದ ಟೊಪ್) ತಸಲ್ಯೊ ವೇದಿ ಆಯ್ಲ್ಯೊ ಜಾಲ್ಯಾರ್ ಕೊಂಕಣಿ ಸಾಹಿತ್ಯಾಂತ್ ಏಕ್ ನವಿ ಕ್ರಾಂತಿ ಯೇಂವ್ಕ್ ಸಾಧ್ಯ್ ಆಸಾ ಆನಿ ಕೊಂಕಣಿ ಲೇಖಕಾಂಕ್, ಕಲಾಕರಾಂಕ್, ಸಾಹಿತಿಂಚೊ ಪೋಸ್ ಕರ್ಚ್ಯಾಂತ್ ನವ್ಯೊ ಆಧುನಿಕ್ ವಾಟೊ ಉಗ್ತ್ಯೊ ಜಾಂವ್ಕ್ ಸಾಧ್ಯ್ ಆಸಾತ್.

ಡಿಜಿಟಲ್ ಮಾಧ್ಯಮಾಂತ್ ಕೊಂಕಣಿ ಸಾಹಿತ್ಯ್ ಮ್ಹಳ್ಳೆಂ ತೀನ್ ವೇದಿಂನಿ ವಾಚುಂಕ್ ಮೆಳ್ತಾ. ಪಯ್ಲ್ಯಾನ್ ಪಯ್ಲೆಂ ಜಾಳಿಜಾಗ್ಯಾಂನಿ. ದುಸ್ರ್ಯಾನ್ ಯೂಟ್ಯೂಬಾಂತ್ ಆನಿ ತಿಸ್ರ್ಯಾನ್ ಈ‍ಬುಕ್ಸ್ ಮಾರಿಫಾತ್.

ಜಾಳಿಜಾಗ್ಯಾಂನಿ ಆಮ್ಕಾಂ ಕೊಂಕಣಿ ಸಾಹಿತ್ಯ್ ವಾಚುಂಕ್ ಮೆಳ್ತಾ ಜಾಲ್ಯಾರ್, ಅಸಲ್ಯಾ ವೇದಿಂಚೆ ರಚ್ಣಾರ್ ಕಾರಣ್. ತಾಂಕಾಂ ಆಸ್ಚೊ ಕೊಂಕಣಿಚೊ ಹುಸ್ಕೊ, ಕೊಂಕಣಿ ಖಾತೀರ್ ಕಿತೆಂ ತರೀ ಕರಿಜಾಯ್ ಮ್ಹಳ್ಳಿ ಉರ್ಬಾ, ಆನಿ ಕೊಂಕಣಿ ಬರೊವ್ಪ್ಯಾಂಕ್ ಆಯ್ಚ್ಯಾ ನವ್ಯಾ ಡಿಜಿಟಲ್ ಯುಗಾಂತ್ ಪಾಟಿ ಉರನಾಶೆಂ ಕರೊಂವ್ಚಿ ತಾಂಚಿ ಆಸಕ್ತ್ ಕಾರಣ್ ಜಾತಾತ್. ಹ್ಯಾ ವೇದಿಂಚ್ಯಾ ರಚ್ಣಾರಾಂಕ್ ಕೊಂಕಣಿಚ್ಯಾ ಸಂದರ್ಭಾರ್ ದುಡ್ವಾಚೊ ಫಾಯ್ದೊ ಜಾತಾ ಮ್ಹಳ್ಳೆಂ ಚಿಂತಪ್ ಫಟ್. ಬದ್ಲಾ ತಾಂಚೊ ವೇಳ್, ದುಡು ಖರ್ಚ್ ಕರುಂಕ್ ತಾಂಣಿ ಸದಾಂ ತಯಾರ್ ಆಸಜಾಯ್ ಪಡ್ತಾ ಆನಿ ಕಾಂಯ್ ಸಂದರ್ಭಾಂನಿ ಜಾಯ್ತ್ಯಾಂಚೆ ಅಣ್ಕಾಣೆಂ ಆಯ್ಕಜಾಯ್ ಪಡ್ತಾ. ಕೊಂಕಣಿ ಸಾಹಿತ್ಯ್ ಜಾಳೀಜಾಗ್ಯಾಂನಿ ವಾಚುಂಕ್ ಮೆಳುಂಕ್ ಸುರು ಜಾವ್ನ್ ಕಾಂಯ್ ವೀಸ್ ವರ್ಸಾಂ ತರೀ ಜಾಲಿಂ.

ಯೂಟ್ಯೂಬಾಚ್ಯಾ ಸಂದರ್ಭಾರ್ ಪಳೆಂವ್ಚೆಂ ಜಾಲ್ಯಾರ್ ಥೊಡ್ಯಾ ಬರೊವ್ಪ್ಯಾಂನಿ ತಾಂಚ್ಯೊಚ್ ಮ್ಹಳ್ಳೊ ವೇದಿ ರಚ್ಲ್ಯಾತ್ ಜಾಲ್ಯಾರ್ ಕಾಂಯ್ ಥೊಡ್ಯಾ ಸಂಸ್ಥ್ಯಾಂನಿ ಹೆರಾಂ ಖಾತೀರ್ ಅಸಲ್ಯೊ ವೇದಿ ರಚ್ಲ್ಯಾತ್. ಪುಣ್ ಹಾಂಗಾ ಜಾಲ್ಯಾರಿ ಕೊಣೇಂಯ್ ಕೊಂಕಣಿ ಸಾಹಿತ್ಯ್ ಘೆವ್ನ್ ದುಡು ಕೆಲಾ ಮ್ಹಳ್ಳೆಂ ಹಾಂವ್ ಮಾಂದಿನಾ. ಬದ್ಲಾ ದುಡು, ವೇಳ್ ಹ್ಯಾ ವೇದಿಂಚ್ಯಾ ರಚನ್ ಕರ್ತಾಂನಿ ಖರ್ಚಿಲಾ ಮ್ಹಳ್ಳೆಂ ಸತ್. ಕೊಂಕಣಿ ಸಾಹಿತ್ಯ್, ಚಡ್ ಕರುನ್ ಕೊಂಕಣಿ ಕವಿತಾ ಯೂಟ್ಯೂಬಾಚೆರ್ ಮೆಳುಂಕ್ ಸುರು ಜಾವ್ನ್ ಕಾಂಯ್ ಧಾ ವರ್ಸಾಂ ತರೀ ಜಾಲಿಂ.

ಆಯ್ಲೆವಾರ್ ಕೊಂಕಣಿ ಕಾಣಿಯೊಂ, ಕವಿತಾ ಈಬುಕ್ಸ್ ಮಾರಿಫಾತ್ ವಾಚುಂಕ್ ಕರೊಂವ್ಚಿ ಸುವಿಧಾ ಕಾಂಯ್ ಸಂಸ್ಥ್ಯಾಂನಿ ಕರ್ಚಿ ಆಮಿ ಪಳೆತಾಂವ್. ವಿಶ್ವ ಕೊಂಕಣೀ ಕೇಂದ್ರಾಂನಿ ಭುರ್ಗ್ಯಾಂ ಖಾತೀರ್ ಹ್ಯಾ ಎಕಾ ಶೆತಾಂತ್ ಮಹತ್ವಾಚೆಂ ಯೋಗದಾನ್ ದಿಲಾಂ. ತಾಂಕಾಂ ಹ್ಯಾ ಎಕಾ ವಾವ್ರಾ ಖಾತೀರ್ ರಾಷ್ಟ್ರೀಯ್ ಸ್ತರಾಚೊ ಬಹುಮಾನ್ ಸಯ್ತ್ ಮೆಳ್ಳಾ. ಕೊಂಕಣಿಚಿಂ ಆದ್ಲಿಂ ಪುಸ್ತಕಾಂ ಸಯ್ತ್ ಲೊಕಾಕ್ ಉಪಲಬ್ದ್ ಕರುನ್ ದಿಂವ್ಚೆಂ ತಾಂಚೆಂ ಕಾಮ್ ಚಾಲು ಆಸಾ. ಆಶಾವಾದಿ ಪ್ರಕಾಶನಾಚ್ಯಾ ವಲ್ಲಿ ಕ್ವಾಡ್ರಸಾನ್ ಪಾಟ್ಲ್ಯಾ ವರ್ಸಾಂನಿ ಹ್ಯಾ ಎಕಾ ಶೆತಾಂತ್ ಕರ್ಚೊ ಜಬರ್ದಸ್ತ್ ವಾವ್ರ್ ಆಮಿ ಪಳೆವ್ನ್ ಆಸಾಂವ್. ಥೊಡ್ಯಾಚ್ ದಿಸಾಂ ಆದಿಂ ದುಬಾಯ್ ಥಾವ್ನ್ ದಿನೇಶ್ ಕೊರೆಯಾನ್ ಕೊಂಕಣಿ ಈ-ಬುಕ್ಸ್ ಲೊಕಾಕ್ ಉಪಲಬ್ದ್ ಕರೊಂವ್ಚಿ ಸುವಿಧಾ ಘಡೊವ್ನ್ ಹಾಡ್ಲ್ಯಾ. ಹಾಂಗಾ ಜಾಲ್ಯಾರಿ ಕೊಂಕಣಿಚ್ಯಾ ಸಂದರ್ಭಾರ್ ಆರ್ಥಿಕ್ ಫಾಯ್ದೊ ಕೊಣಾಯ್ಕಿ ಜಾಲ್ಲ್ಯಾವಿಶಿಂ ಮ್ಹಾಕಾ ಖಬರ್ ನಾ.

ಮಾಗೀರ್ ಜಾಳಿಜಾಗ್ಯಾಂನಿ, ಯೂಟ್ಯೂಬಾರ್ ತಶೆಂ ಈಬುಕ್ಸಾಂನಿ ಪರ್ಗಟ್ ಜಾಲ್ಲೆಂ ಸಾಹಿತ್ಯ್ ಫೇಸ್ ಬುಕ್, ವೊಟ್ಸಪ್ ಆನಿ ಇತರ್ ಡಿಜಿಟಲ್ ಮಾಧ್ಯಮಾಂನಿ ಲಿಂಕ್ ವಾಂಟುನ್ ಘೆವ್ನ್ ವಾಚುಂಕ್ ಸಕ್ಡಾಂಕಿ ಮೆಳ್ಟಾ ಜಾಲ್ಯಾರಿ ಫೇಸ್ ಬುಕ್, ವೊಟ್ಸಪ್ ತಸಲ್ಯಾ ಸಾಮಾಜಿಕ್ ಮಾಧ್ಯಮಾಂನಿ ಶೀದಾ ಕೊಂಕಣಿ ಸಾಹಿತ್ಯ್ ವಾಚುಂಕ್ ಮೆಳ್ಚೆಂ ಉಣೆಂ ಆನಿ ಅಪ್ರೂಪ್. ಮೆಳ್ಳ್ಯಾರಿ ಚಡಿತ್ ಸಂದರ್ಭಾಂನಿ ಗರ್ಜೆಚೆಂ ವಜನ್ ಹ್ಯಾ ಸಾಹಿತ್ಯಾಕ್ ಆಸನಾ.

ಜಾಳಿಜಾಗೆ, ಯೂಟ್ಯೂಬ್ ಆನಿ ಈಬುಕ್ಸಾಂ ಖಾತೀರ್ ಜೆ ಮನೀಸ್ ವಾವುರ‍್ತಾತ್, ತಾಂಚೆ ಖಾತೀರ್ ಥೊಡಿಂ ಖಾಲ್ತಿಂ ಸುಚನಾಂ ಹ್ಯಾ ಸಂದರ್ಭಾರ್ ದೀಜಾಯ್ ಮ್ಹಣುನ್ ಮ್ಹಾಕಾ ಭೊಗ್ತಾ:

ತುಮ್ಚಿ ಉರ್ಬಾ, ಉದ್ದೇಶ್, ಕೊಂಕಣಿ ಥಂಯ್ ತುಮ್ಕಾಂ ಆಸ್ಚೊ ಹುಸ್ಕೊ - ಹೆಂ ಸಕ್ಕಡ್ ವಾಖಣ್ಣೆಕ್ ಫಾವೊ ಜಾಲ್ಲೊಚ್. ತುಮಿ ಸಾಹಿತ್ಯ್ ಮ್ಹಳ್ಳೆಂ ತೆಂ ತುಮಿ ಘಡೊವ್ನ್ ಉಬಾರಲ್ಲ್ಯೆ ವೇದಿಚೆರ್ ಹೆರಾಂಕ್ ವಾಂಟುನ್ ದಿತಾತ್. ತುಮ್ಚ್ಯಾ ಜಾಳಿಜಾಗ್ಯಾಕ್ ತುಮ್ಚೆಂಚ್ ಮ್ಹಳ್ಳೆಂ ಮಿಸಾಂವ್ ಆನಿ ಶೆವೊಟ್ ಆಸಾ ಮ್ಹಳ್ಳೆಂ ಹಾಂವ್ ಸಮ್ಜತಾಂ. ನವ್ಯಾಂಕ್ ಹುಮೆದ್ ದಿಂವ್ಚಿಂ ವೊಕ್ತಾಂ ವಾಂಟ್ಚೊ ತುಮ್ಚೊ ಹೆತೂ ಆಸುಂಕ್ ಪುರೊ. ಪುಣ್ ತಶೆಂ ಮ್ಹಣುನ್ ವೊಂಕಲ್ಲೆಂ, ಗಿಚ್ಚಿಲ್ಲೆಂ ಸಗ್ಳೆಂ ತುಮಿ ಪರ್ಗಟ್ ಕರುಂಕ್ ನಜೊ. ತುಮಿ ಪರ್ಗಟ್ ಕರುಂಕ್ ಚಿಂತ್ಚ್ಯಾ ಸಾಹಿತ್ಯಾಚೆಂ ವಜನ್ ಕಿತ್ಲೆಂ ತೆಂ ಪಾರ್ಕುಂಚಿ ಸಕತ್ ತುಮ್ಕಾಂ ಆಸಜಾಯ್. ಎಕ್ಲೊ ನವೊ ಬರೊವ್ಪಿ ತಾಚ್ಯಾ ಬರ್ಪಾಂತ್ ಫುಡಾರಾಂತ್ಲಿ ತಾಚಿ ತಾಂಕ್ ಜಾಹೀರ್ ಕರ್ತಾ ತರ್ ಜರೂರ್ ತಾಕಾ ತುಮ್ಚ್ಯಾ ವೇದಿಚೆರ್ ಬಸಯಾ. ಪುಣ್ ಸಾಂಗಾತಾಚ್, ತಾಚ್ಯೊ ಚುಕಿ ಕಿತೆಂ ತ್ಯೊ ದಾಕೊವ್ನ್ ದೀವ್ನ್, ಫುಡಾರಾಂತ್ ಬಳ್ವಂತ್ ಸಾಹಿತ್ಯ್ ರಚ್ಚೆದಿಶಿಂ ತಾಕಾ ಜೊಕ್ತೆಂ ಮಾರ್ಗದರ್ಶನ್ ತುಮಿ ದೀಂವ್ಕ್ ಜಾಯ್.

ದುಸ್ರ್ಯಾನ್ ತುಮಿ ಕೊಂಕಣಿ ಸಾಹಿತ್ಯ್ ಪರ್ಗಟ್ ಕರ್ತಾತ್. ಕೊಂಕಣಿಕ್ ತಾಚೆಂಚ್ ಮ್ಹಳ್ಳೆಂ ವ್ಯಾಕರಣ್ ಆಸಾ. ತ್ಯಾ ವ್ಯಾಕರಣಾಚಿ ಜಾಣೀವ್ ಪಯ್ಲ್ಯಾನ್ ಪಯ್ಲೆಂ ಸಂಪಾದಕ್ ಜಾವ್ನ್ ತುಮ್ಕಾಂ ಆಸುಂಕ್ ಫಾವೊ. ತುಮಿ ಕೊಂಕಣಿ ವ್ಯಾಕರಣ್ ಸಮ್ಜುನ್ ಘೆಯಾ. ತ್ಯಾ ಪರ್ಮಾಣೆಂ ಕೊಂಕಣಿ ಬರ್ಪಾಂ ಸುಧಾರಣ್ ಕರುಂಕ್ ಪಾಟಿಂ ಸರನಾಕಾತ್.

ತಿಸ್ರ್ಯಾನ್ ಹ್ಯಾ ಡಿಜಿಟಲ್ ಯುಗಾಂತ್ ಬರ್ಪಿ ಆನಿ ಸಂಪಾದಕಾ ಮದ್ಲೊ ಸಂಬಂಧ್ ಫಕತ್ ಡಿಜಿಟಲ್ ಉರ್ಚೊ ನ್ಹಯ್. ಫಕತ್ ಈಮೇಯ್ಲಾಂಚ್ಯಾ ವ್ಯವಹಾರಾಕ್ ಹೊ ಸಂಬಂಧ್ ಸೀಮಿತ್ ಕರ್ಚೊ ನ್ಹಯ್. ಬದ್ಲಾ ಫೊನಾಚೆರ್ ಉಲಯಿಲ್ಲ್ಯಾಂತ್ ಆನಿ ಪಾವ್ಟ್ ಮೆಳ್ತಾನಾ ಸಾಂಗಾತಾ ಮೆಳುನ್ ಉಲಯಿಲ್ಲ್ಯಾಂತ್, ಸಂಪಾದಕಾಚ್ಯೆ ಜವಾಬ್ದಾರಿಚಿ ಸಮ್ಜಣಿ ಲೇಖಕಾಕ್ ಮೆಳುಂಕ್ ಸಾಧ್ಯ್ ಆಸಾ. ತಿತ್ಲೆಂ ಮಾತ್ರ್ ನ್ಹಯ್ ತ್ಯಾ ಲೇಖಕಾ ಥಾವ್ನ್ ಸಂಪಾದಕ್ ಕಿತೆಂ ಆಶೆತಾ ತೆಂ ಲೇಖಕಾಕ್ ಸೊಂಪ್ಯಾನ್, ಮೊಗಾನ್ ಕಳೊಂವ್ಕ್ ಸಾಧ್ಯ್ ಜಾತಾ. ಆಪ್ಲ್ಯೆ ಜವಾಬ್ದಾರೆಂತ್ ಸಂಪಾದಕಾನ್ ಚಡ್ತಿಕ್ ಪಾವ್ಲ್ ಕಾಡ್ಲೆಂ ತರ್, ಲೇಖಕಾಚ್ಯೆ ಸಾಹಿತೀಕ್ ವಾಡಾವಳಿಕ್ ತಾಚೆಥಾವ್ನ್ ಸಹಕಾರ್ ಮೆಳಲ್ಲ್ಯಾ ಬರಿ ಜಾತಲೆಂ ಮಾತ್ರ್ ನ್ಹಯ್ ಹಾಂತುಂ ಕೊಂಕಣಿಚೆಂ ಬರೆಪಣ್ ಸಯ್ತ್ ಘಡೊನ್ ಯೇಂವ್ಕ್ ಸಾಧ್ಯ್ ಆಸಾ.

ಚೊವ್ತ್ಯಾನ್ ತುಮ್ಕಾಂ ಪಾವ್ಟ್ ಜಾಲಿ ತರ್, ತುಮ್ಚ್ಯಾ ಜಾಳಿಜಾಗ್ಯಾಚೆರ್ ಉತ್ತೀಮ್ ಸಾಹಿತ್ಯ್ ಪರ್ಗಟ್ ಕರುಂಕ್ ಧಾಡ್ತಲ್ಯಾಂಕ್ ತಶೆಂಚ್ ಸರಾಗ್ ಬರಯ್ತಲ್ಯಾಂಕ್ ಅಪ್ರೂಪ್ ತರೀ ಕಿತೆಂ ತರೀ ಪಾಟಿಂ ದಿಂವ್ಚೆಂ ಬರೆಂ ಚಿಂತಪ್ ತುಮ್ಚೆ ಥಂಯ್ ಆಸುಂದಿ. ಜಾಳಿಜಾಗ್ಯಾಂಚ್ಯಾ ಸಂಪಾದಕಾಂಚಿ ಆರ್ಥಿಕ್ ಸ್ಥಿತಿ ಹಾಂವ್ ಸಮ್ಜತಾಂ ತರೀ, ಕಿತ್ಲೆ ಸಂಪಾದಕ್ ಹ್ಯಾ ಮ್ಹಜ್ಯಾ ಚಿಂತ್ಪಾಥಂಯ್ ಸಹಮತ್ ಆಸ್ತಲೆ ಹಾಂವ್ ನೆಣಾಂ. ಕವಿತಾ.ಕೊಮಾಚೊ ಸಂಪಾದಕ್ ಜಾವ್ನ್, ಪಾವ್ಟ್ ನಾತಲ್ಲಿ ತರೀ, ಕಾಂಯ್ ಥೊಡ್ಯಾ ಲೇಖಕಾಂಕ್ ಅಪ್ರೂಪಾನ್ ಹಾಂವೆಂ ಸಂಭಾವಣ್ ದಿಲ್ಲೆಂ ಆಸಾ ಆನಿ ಹೆರ್ ಥೊಡ್ಯಾಂಕ್ ತಾಂಚಿಂ ಪುಸ್ತಕಾಂ ಪರ್ಗಟ್ ಕರುನ್ ಹೆಂ ಋಣ್ ಫಾರಿಕ್ ಕೆಲ್ಲೆಂ ಆಸಾ. 

ಡಿಜಿಟಲ್ ವೇದಿಂನಿ ಪರ್ಗಟ್ ಕರುಂಕ್ ಸಾಹಿತ್ಯ್ ಧಾಡ್ತಲ್ಯಾಂನೀಂಯ್ ಕಾಂಯ್  ಮನಾಕ್ ವ್ಹರ್ಚ್ಯೊ ಗಜಾಲಿ ಆಸಾತ್:

ತುಮ್ಚೊ ಸಂಪಾದಕ್ ತುಮ್ಕಾಂ ಮೆಳನಾ, ತುಮ್ಚೆಲಾಗಿಂ ಈಮೇಯ್ಲ್ ಸೊಡ್ಲ್ಯಾರ್ ಹೆರ್ ರಿತಿಂನಿ ಸಂಪರ್ಕ್ ದವರಿನಾ ಮ್ಹಳ್ಳ್ಯಾಫಾರಾ, ತುಮಿ ಗಿಚ್ಚಿಲ್ಲೆಂ ಹರ್ಯೆಕ್ ಸಂಪಾದಕಾನ್ ಪರ್ಗಟ್ ಕರಿಜಾಯ್ ಮ್ಹಣುನ್ ಧಾಡ್ಚೆಂ ನ್ಹಯ್. ಸಂಪಾದಕಾಚ್ಯೊ ಜವಾಬ್ದಾರಿ ತುಮಿ ಸಮ್ಜುನ್ ಘೆಂವ್ಚೆಂ ಪ್ರೇತನ್ ಕರಿಜಾಯ್. ತುಮಿ ಖಂಯ್ಚೇಂಯ್ ಬರಪ್ ಸಂಪಾದಕಾಕ್ ಶೀದಾ ಧಾಡ್ನ್, ತಾಚೆಂ ಕಾಮ್ ಚಡೊಂವ್ಚ್ಯಾ ಬದ್ಲಾ, ತುಮ್ಚ್ಯೆ ವೊಳ್ಕಿಚ್ಯಾ, ಪುಣ್ ಜಾಣ್ತ್ಯಾ ಎಕಾ ಬರೊವ್ಪ್ಯಾಲಾಗಿಂ ತುಮ್ಚೆಂ ಬರಪ್ ತಜ್ವೀಜ್ ಕರುಂಕ್ ದಿಲ್ಯಾರ್ ಬರೆಂ. ಡಿಜಿಟಲ್ ಮಾಧ್ಯಮಾಂತ್ ಸಂಪಾದಕಾಕ್ ಜಾಗ್ಯಾಚಿ ಅಡ್ಚಣ್ ಆಸನಾ ತೆಂ ಖರೆಂ, ತಶೆಂ ಮ್ಹಣುನ್ ತಾಣೆಂ ತುಮಿ ಧಾಡಲ್ಲೆಂ ಹರ್ಯೆಕ್ ಪರ್ಗಟ್ ಕರಿಜಾಯ್ ಮ್ಹಣುನ್ ನಾ. ಹಾಂವೆಂ ಜಾಯ್ತ್ಯಾ ಸಂದರ್ಭಾಂನಿ ಪಳೆಲಾಂ, ನವೆ ಬರೊವ್ಪಿ ತಾಂಚೆಂ ಬರಪ್ ಜಾಳಿಜಾಗ್ಯಾಂಕ್ ಧಾಡ್ನ್ ದೀವ್ನ್ ಥೊಡ್ಯಾಚ್ ದಿಸಾಂನಿ ಕಿತ್ಯಾಕ್ ಪರ್ಗಟ್ ಜಾಂವ್ಕ್ ನಾ ಮ್ಹಳ್ಳಿಂ ಸವಾಲಾಂ ಆನಿ ಮೆಸೇಜಿ ಧಾಡುಂಕ್ ಸುರು ಕರ್ತಾತ್ ಆನಿ ಥೊಡಿ ಗಳಾಯ್ ಜಾಲಿ ತರ್, ಆನ್ಯೆಕಾ ಜಾಳಿಜಾಗ್ಯಾಕ್ ತೆಂಚ್ ಬರಪ್ ಧಾಡುನ್ ದಿತಾತ್. ಹಿ ಸವಯ್ ಬರಿ ನ್ಹಯ್. ಎಕಾ ಜಾಳಿಜಾಗ್ಯಾರ್ ತುಮ್ಚೆಂ ಬರಪ್ ಪರ್ಗಟ್ ಜಾಂವ್ಕ್ ನಾ ತರ್, ತೆಂ ಕಿತ್ಯಾಕ್ ಪರ್ಗಟ್ ಜಾಂವ್ಕ್ ನಾ ಮ್ಹಳ್ಳೆಂ ಸಮ್ಜುಂಚೆಂ ಪ್ರೇತನ್ ಕರಾ ಆನಿ ಸಂಪಾದಕಾನ್ ಸಾಹಿತ್ಯಾಚ್ಯಾ ಮಟ್ಟಾವಿಶಿಂ ತುಮ್ಕಾಂ ಸಾಂಗ್ಲೆಂ ತರ್, ಬೆಜಾರ್ ಪಾವನಾಸ್ತಾಂ, ತುಮ್ಚೆಂ ಬರಪ್ ಬರೆಂ ಕರ್ಚೆದಿಶಿಂ ಪ್ರೇತನ್ ಕರಾ. ಹೆಂ ತುಮ್ಚೆ ಸಾಹಿತೀಕ್ ವಾಡಾವಳಿಕ್ ಉಪ್ಕಾರ್ತಲೆಂ. ಆಮ್ಸರ್ಲ್ಯಾತ್ ತರ್ ತುಮ್ಚೊ ಫೊಂಡ್ ತುಮಿಂಚ್ ಖೊಂಡಲ್ಲ್ಯಾಬರಿ ಜಾತಲೊ.

ಡಿಜಿಟಲ್ ಮಾಧ್ಯಮಾಚ್ಯಾ ಸಂದರ್ಭಾರ್, ಪ್ರತ್ಯೇಕ್ ಕರುನ್ ಕೊಂಕಣಿ ಸಂವ್ಸಾರಾಂತ್ ವಾಚ್ಪ್ಯಾಂಚಿ ಜವಾಬ್ದಾರಿ ವ್ಹಡ್ ಆಸಾ. ಛಾಪ್ಯಾ ಮಾಧ್ಯಮಾಚೆಂ ಸಾಹಿತ್ಯ್ ಜಾಲ್ಯಾರ್, ವಾಚ್ಪಿ ಜಾವ್ನ್ ತುಮಿ ವರ್ಗಣಿ  ಭರ್ತಾತ್. ಡಿಜಿಟಲ್ ಮಾಧ್ಯಮಾಂತ್ ಪೇಪರ್ ಖರ್ಚನಾ ಜಾಲ್ಯಾರಿ, ಸರ್ವರಾ ಖಾತೀರ್, ಡೊಮೇಯ್ನಾ ಖಾತೀರ್, ಡಿಸಾಯ್ನಾ ಖಾತೀರ್ ಖರ್ಚ್ ಆಸಾ. ತ್ಯಾದೆಕುನ್ ತುಮ್ಚಿ ಜವಾಬ್ದಾರಿ ಆಸಾಕಿ ಬರೆಂ ಸಾಹಿತ್ಯ್ ಪರ್ಗಟ್ ಕರ್ಚ್ಯಾ ಜಾಳಿಜಾಗ್ಯಾಂಚೊ ತುಮಿ ಪೋಸ್ ಕರುಂಕ್ ಜಾಯ್.

ಕೊಂಕಣಿ ಸಾಹಿತ್ಯಾಚೊ ಪ್ರಸಾರ್ ಆನಿ ಪರ್ಗಟ್ಣಿ ಎಕಾ ನವ್ಯಾ ಹುಂಬ್ರಾಂತ್ಲ್ಯಾನ್ ಪಾಶಾರ್ ಜಾತೇ ಆಸಾ. ಡಿಜಿಟಲ್  ಮಾಧ್ಯಮಾಂತ್ಲೆ ಕಾಂಯ್ ಥೊಡೆ ಕೊಂಕಣಿ ಜಾಳಿಜಾಗೆ ಯೆದೊಳಚ್ ಲೊಕಾಮೊಗಾಳ್ ಜಾಲ್ಯಾತ್. ಕಾಂಯ್ ಥೊಡ್ಯೊ ಯೂಟ್ಯೂಬ್ ವೇದಿ ಸಯ್ತ್ ಫಾಮಾದ್ ಆಸಾತ್. ಪುಣ್ ಯೂಟ್ಯೂಬ್ ವೇದಿಂನಿ ಸಂಪಾದಕ್ ಮ್ಹಣುನ್ ಆಸನಾಂತ್. ಕೊಣ್ ಪರ್ಗಟ್ ಕರ್ತಾತ್, ತೆಚ್ ಸಂಪಾದಕ್. ಜಾಳೀಜಾಗ್ಯಾಂನಿ ಲೊಕಾಕ್ ಆಕರ್ಶಿತ್ ಕೆಲ್ಲ್ಯಾ ತಿತ್ಲ್ಯಾ ಮಾಪಾನ್ ಈಬುಕಾಂನಿ ವಾಚ್ಪ್ಯಾಂಕ್ ಆಕರ್ಶಿತ್ ಕೆಲಾಂ ಮ್ಹಣ್ ಸಾಂಗುಂಕ್ ಮ್ಹಾಕಾ ಧೈರ್ ಪಾವನಾ. ಕೊಂಕಣಿ ಈ ಬುಕಾಂಚ್ಯಾ ಸಂದರ್ಭಾರ್ ಇಲ್ಲ್ಯಾ ಚಡಿತ್ ಮಾಪಾನ್ ಹ್ಯಾ ಎಕಾ ಸುವಿಧಾಚೊ ಪ್ರಸಾರ್ ಜಾಂವ್ಕ್ ಜಾಯ್. ಲಿಪಿಂಚಿ ಆಡ್ಖಳ್ ಆಸಲ್ಲ್ಯಾಂಕ್, ಕೊಂಕಣಿ ಸಮ್ಜತಾ ತರೀ ವಾಚುಂಕ್ ಯೇನಾತಲ್ಲ್ಯಾಂಕ್ ಈ ಬೂಕ್ ಏಕ್ ವ್ಹರ್ತೆಂ ಮಾಧ್ಯಮ್. ತಿತ್ಲೆಂ ಮಾತ್ರ್ ನ್ಹಯ್ ಕೊಂಕಣಿ ಸಾಹಿತ್ಯ್ ಜಗೊಂವ್ಚೆ ನದ್ರೆನ್, ಜಾಯ್ ತ್ಯಾ ಸಂದರ್ಭಾರ್ ಸಲೀಸಾಯೆನ್ ರೆಫರ್ ಕರುಂಕ್ ಹೆ ಈ ಬೂಕ್ ಉಪ್ಕಾರ್ತಲೆ ಮ್ಹಣ್ಚ್ಯಾಕ್ ದುಬಾವ್ ನಾ.

ಕೊಂಕಣಿ ಸಾಹಿತ್ಯ್ ಡಿಜಿಟಲ್ ಮಾಧ್ಯಮಾಚೆರ್ ಖಂಯ್ಚ್ಯಾ ನಮುನ್ಯಾಚಿ ವಾಟ್ ಧರ್ತಲೆಂ ಹೆಂ ಆತಾಂಚ್ ಸಾಂಗುಂಕ್ ಹಾಂವ್ ಸಕನಾ. ಪುಣ್ ಬರಯಿಲ್ಲೆಂ ಆಯ್ಕುಂಚಿ ಸುವಿಧಾ ಆಯಿಲ್ಲ್ಯಾವೆಳಾ, ಉಲಯಿಲ್ಲೆಂ ಬರಪ್ ಜಾವ್ನ್ ಬದ್ಲುಂಚಿ ಸುವಿಧಾ ಆಯಿಲ್ಲ್ಯಾ ವೆಳಾ, ಬರಯಿಲ್ಲೆಂ ಚುಕಿಚೆಂ ಆಸ್ತಾನಾ ತೆಂ ಸುಧಾರಣ್ ಕರ‍್ಚಿ ಸುವಿಧಾ ಆಯಿಲ್ಲ್ಯಾ ವೆಳಾ, ಕೊಂಕಣಿ ಸಾಹಿತ್ಯಾಂತ್ ನವಿ ಏಕ್ ಕ್ರಾಂತಿ ಜಾತಲಿ ಮ್ಹಣ್ಚ್ಯಾಕ್ ದುಬಾವ್ ನಾ.

ಆಂಕ್ರಿ ಜಾಳಿಜಾಗ್ಯಾಕ್ ಪರತ್ ಏಕ್ ಪಾವ್ಟಿಂ ಬರೆಂ ಮಾಗುನ್ ಮ್ಹಜೆಂ ಉಲೊವ್ಪ್ ಸೊಂಪಯ್ತಾಂ. ದೇವ್ ಬರೆಂ ಕರುಂ.