ಲಗ್ನ್ - ಕ್ರಿಸ್ತಾಂವ್ ಲೊಕಾಚ್ಯಾ ಸಂಸ್ಕೃತೆಂತ್ ಏಕ್ ಸೊಭಿತ್ ಆಚರಣ್

ಲಗ್ನಾಂ ಘಡ್ತಾತ್ ಸರ್ಗಾರ್. ಖಂಯ್ ಘಡಿತ್ ಥಂಯ್ ವೊಡಿತ್. ಅಸಲ್ಯಾ ಸೊಭಿತ್ ಉತ್ರಾಂ ಮಾಳಾಂನಿ ಆಮ್ಚ್ಯಾ ಪುರ್ವಜಾಂನಿ ಲಗ್ನಾ ಸಂಸ್ಕಾರಾ ವಿಶ್ಯಾಂತ್ ಉತ್ರಾಂ ಘುಂತ್ಲ್ಯಾಂತ್. ಆಮಿ ಲಗ್ನ್ ಏಕ್ ಪವಿತ್ರ್ ಸಂಸ್ಕಾರ್ ಮಾನ್ತಾಂವ್. ದೆವಾಕ್ ಸಾಕ್ಸ್ ದವರ್ನ್ ವ್ಹಡಾ ಭರ್ವಾಶ್ಯಾನ್, ಆಧಿಂ ಮಾಗಾಂ ಥಾವ್ನ್ ಹೆಂ ಘಡೊನ್ ಆಯ್ಲಾಂ. ಅಜೂನ್ ಆಮಿಂ ಸಂಸ್ಕೃತಿಚ್ಯಾ ವಾಂಟ್ಯಾಂತ್ ಪವಿತ್ರ್ ಪಣಾಕ್ ವಾಂಟೊ ದಿತಾಂವ್. 

ಸಯ್ರಿಕ್ ಪಳೆಂವ್ಚೆ ಥಾವ್ನ್ ಲಗ್ನಾ ಕಾರ್ಯಾಕ್ ಚಾಲನ್ ಲಾಭ್ತಾ. ಸಯ್ರಿಕೆಚ್ಯಾ ಮಾಲ್ಯಾಂಕ್ ಬರೊಚ್ಚ್ ಡಿಮ್ಯಾಂಡ್ ಆಸ್ ಲ್ಲೊ. ಆತಾಂ ಮ್ಯಾರೇಜ್ ಬ್ಯೂರೊ ಹೆಂಚ್ ಕಾಮ್ ಕರುನ್ ಆಸಾತ್. ಮಾಲೊ, ಚಡಾವತ್ ಚಲೊ ಆನಿ ಚಲ್ಯಾಚಿ, ತಾಂಚ್ಯಾ ಕುಟ್ಮಾಚಿ ಚರಿತ್ರಾ ಸಮ್ಜೊನ್, ಥೊಡೆ ಪೌವ್ಟಿಂ ಕುಶೆಲಾಂನಿ ಸಯ್ರಿಕ್ ಯಶಸ್ವಿ ಜಾಂವ್ಕ್ ಪೆಚಾಡ್ತಾ. ಉಪ್ರಾಂತ್ ತಾಕಾ ಏಕ್ ಬಾಟ್ಲಿ ಗಿ ಯಾ ಇನಾಮ್ ಜರೂರ್ ದೊನೀ ಪಾಡ್ತಿಂ ಥಾವ್ನ್ ಮೆಳ್ತಾ ತಿ ಗಜಾಲ್ ವೆಗ್ಳಿ. 

ಸಯ್ರಿಕ್ ಘಟ್ ಕರ್ಚ್ಯಾಕ್ ಏಕ್ ದೀಸ್ ನಮಿಯಾರ್ತಾತ್. ಹೊರೆತ್, ತಾಚಿಂ ಅವಯ್ ಬಾಪುಯ್, ಲಾಗ್ಶಿಲಿಂ ಕುಟ್ಮಾಚಿಂ ಸಯ್ರಿಂ ತೆಗಾಂ ವ ಪಾಂಚ್ ಅಶೆಂ ಸಂಖ್ಯಾನ್ ಯೆತಾತ್. ಪಾತ್ಯೆಣಿ ಅಸಾ ಕಿ ಸಂಖೊ ಅಸೊ ಅಸೊಂಕ್ ಜಾಯ್. ದೊಗ್, ಚೊವ್ಗ್ ವ ಸ ಜಣ್ ನಯ್ (ಸರಿ ಅನಿ ಮುಗುಲಿ ಮ್ಹಣ್ತಾತ್). ಸಯ್ರಿಕ್ ಘಟ್ ಜಾಲ್ಲೆಂಚ್ ಲಗ್ನಾಕ್ ಖರಾರಾಕ್ ದೀಸ್ ನಮ್ಯಾರ್ತಾತ್. ಖರಾರಾಕ್ ಹೊಕ್ಲೆಗೆಲೊ ಖರ್ಚ್, ತಿಚ್ಯಾಚ್ ಘರಾ ಸಂಭ್ರಮ್. ಖರಾರಾ ದಿಸಾ ಲಗ್ನಾಕ್ ದೀಸ್ ನಮಿಯಾರುಂಕ್ ಆಸಾ. ನವ್ಯಾ ಸಯ್ರ್ಯಾಂಕ್ ಪಾನ್ ಪೊಡ್ ಉದಾಕ್ ದೀವ್ನ್ ಮಾನಾನ್ ಯೆವ್ಕಾರ್ ದಿಂವ್ಚೊ. ಚುಕ್ಲ್ಯಾರ್ ಆಧಿಂ ಹೊ ವ್ಹಡ್ ಆಪ್ರಾಧ್ ಚ್!

ಖರಾರಾ ಕಾರ್ಯೆಂ ಫಿರ್ಗಜ್ ವಿಗಾರ್, ವ ಕುಟ್ಮಾಂತ್ ಕೊಣಿ ಮಣಿಯಾರಿ ಆಸ್ಲ್ಯಾರ್, ಫೊರ್ಮಾಂ ಅದಲ್ ಬದಲ್ ಕರ್ಚ್ಯಾ ಮುಖಾಂತ್ರ್, ಲ್ಹಾನ್ ಮಾಗ್ಣ್ಯಾವಿಧಿ ಸಂಗಿಂ ಚಲ್ತಾ. ಮುದಿಯೊ ಆಶಿರ್ವಾದಿತ್ ಜಾವ್ನ್ ಹೊಕಾಲ್ ಹೊರೆತಾಕ್ ಆನಿ ಹೊರೆತ್ ಹೊಕ್ಲೆಕ್ ಮುದಿ ಘಾಲ್ತಾ.  ಭಲಾಯ್ಕೆಚ್ಯಾ ಉತ್ರಾಂ ಸಂಗಿ, ಜೆವಾಣ್, ಬರೆಂ ಮಾಗ್ಚೆಂ, ಸಂಗೀತ್, ನಾಚ್, ಸಂತೊಸಾಂತ್ ಕಾರ್ಯೆಂ ಚಲ್ತಾ.  ಹೊಕ್ಲೆ ಘರ್ಚ್ಯಾಂಕ್, ಪಯ್ಲೆ ಪಾವ್ಟಿಂ ನವ್ಯಾ ಸಯ್ರ್ಯಾಂಕ್ ಸುಧಾರ್ಸಿತಾನಾ, ಕಾಂಯ್ ಚಡ್ ಉಣೆಂ ಜಾಂವ್ಕ್ ಆಸಾಗೀ , ಮ್ಹಳ್ಳೆಂ ಭ್ಯೆಂ ಆಸ್ತಾಚ್.

ಹೊರೆತ್, ಆಪ್ಲ್ಯಾ ಜಿಣ್ಯೆ ಸಾಂಗಾತಿಣ್ ಜಾಂವ್ಚ್ಯೆ ಚಲಿಯೆಕ್ ಕಾಣಿಕೊ ಹಾಡ್ನ್ ಯೆತಾ. ಹಾಂತು, ಕಾಪಾಡ್, ಸತ್ರಿ ಭಾಂಗಾರ್, ಸೊಭಾಯೆಕ್ ವಾಪರ್ಚ್ಯೊ ವಸ್ತು ಆನಿ ಸಾಧನಾಂ ಆಸ್ಯೆತ್. ಹೊರೆತಾಚೆಂ ಮರ್ಯಾದಿಚೆಂ ಸವಾಲ್ ದೆಕುನ್, ಬರ್ಯಾಂತ್ಲೆಂ ಬರೆಂ ದೀಂವ್ಕ್ ತೊ ಪ್ರಯತ್ನ್ ಕರ್ತಾ. ಜೆವ್ಣಾ ಉಪ್ರಾಂತ್, ನವಿಂ ಸಯ್ರಿಂ ಹೊಕ್ಲೆಚೆಂ ಘರ್ ಪಳೆಂವ್ಕ್, ವಳಕ್ ಕರುಂಕ್ ಥೊಡೊ ವೇಳ್ ವಾಪರ್ತಾತ್. ಕುಟ್ಮಾಚಿಂ ಆನಿ ವಿಂಚ್ಣಾರ್ ಆಮಂತ್ರಿತ್ ಹ್ಯಾ ಕಾರ್ಯಾಕ್ ಆಸ್ತಾತ್. ಕಾಶೆಲಿಂ ಸಯ್ರಿಂ, ಖರಾರಾ ಉಪ್ರಾಂತ್ ಲಗ್ನ್ ಜಾವ್ನ್ ವೆಚ್ಯಾ ಹೊಕ್ಲೆಕ್ ಆಪ್ಲ್ಯಾ ಘರಾ ಜೆವ್ಣಾಕ್ ಆಪವ್ನ್ ಸನ್ಮಾನ್ ಯಿ ಕರ್ತಾತ್. ಆತಾತಾಂ ಹಿ ರಿವಾಜ್ ಮಾತ್ಸಿ ಉಣಿ ಜಾಲ್ಯಾ.

ರೊಸಾಚೊ ಸಂಭ್ರಮ್:

ಲಗ್ನಾ ಖರಾರಾ ಉಪ್ರಾಂತ್ ಹೊಕ್ಲೆ ನವ್ರ್ಯಾಕ್ ಇಗರ್ಜ್ ಮಾತೆಚಿ ಶಿಕವ್ಣ್ ಕಡ್ಡಾಯಾಚಿ. ದೋನ್ ವ ಚಡಿತ್ ದಿಸಾಂನಿ ತಿಂ ನಮಿಯಾರ್ಲೆಲ್ಯಾ ದಿಸಾಂನಿ, ಹ್ಯಾ ಶಿಭಿರಾಂತ್ ಭಾಗ್ ಘೆತಾತ್. ಸಾಂಗಾತಾ ಭಾಗ್ ಘೆತ್ ಲ್ಲ್ಯಾಂತ್ ಎಕಾಮೆಕಾ ವಳ್ಕೊಂಕ್, ಸಮ್ಜೊಂಕ್ ಸಲೀಸ್. 

ರೊಸಾಚೆಂ ಕಾರ್ಯೆಂ ಆಮ್ಚ್ಯಾ ಕ್ರಿಸ್ತಿ ಸಂಸ್ಕೃತಿಂತ್ ಏಕ್ ಭೋವ್ ಸೊಭಿತ್ ಕಾರ್ಯೆಂ. ಭಲಾಯ್ಕೆ ದೃಷ್ಟೆನ್ ಲಗಿನ್ ಜಾಂವ್ಚ್ಯಾ ಜೊಡ್ಯಾಕ್, ಬರೆಂ ಮಾಗ್ಚೆಂ ಏಕ್ ಕಾರಾಣ್ ತರ್, ಕುಡಿಕ್ ನಾರ್ಲಾರೊಸಾ ನ್ಹಾಣ್ ಸೊಭಾಯೆಚೆಂ ಪ್ರತೀಕ್. ಆಪ್ತ್ ಕುಟ್ಮಾದಾರಾಂಕ್ ಸಾಂಗಾತಾ ಎಕ್ವೊಟಿತ್ ಜಾಂವ್ಚೊ ಸುಯೋಗ್. ಕುಸ್ಕಾಲ್ಲಿಂ ಮನಾಂ ಸಾರ್ಕಿಂ ಜಾಂವ್ಕ್ ಬರೊ ಸಂದರ್ಭ್. ಮೋಗ್ ವಾಡೊಂಕ್ ಜೊಕ್ತೊ ವೇಳ್. ಹೊಕ್ಲೆಗೆರ್ ಘರ್ಚಿ ಚಲಿ ಲಗ್ನ್ ಜಾವ್ನ್ ಪೆಲ್ಯಾ ಘರಾ ವೆತಾ ಮ್ಹಳ್ಳೆಂ ದೂಖ್ ಭಿತರ್ಲೆ ಭಿತರ್ ತರ್, ಹೊರೆತಾಗೆರ್, ನವಿ ಸುನ್ ಬಾಯ್ ಘರ್ ಭರ್ತಾ ಮ್ಹಳ್ಳೊ ಸುಖಾಳ್ ಆನಂದ್. 

ಹಾಂಗಾಯ್, ವಾಡೊಭರ್ ಲೋಕ್, ಕುಟ್ಮಾಚಿಂ ಸಯ್ರಿಂ, ಈಶ್ಟ್ ಮಂತ್ರ್, ಸೆಜಾರ್, ಅನಿ ಥೊಡಿಂಚ್ ನವಿಂ ಸಯ್ರಿಂ ಹಾಜರ್ ಆಸ್ತಾತ್. ಹೊಕಾಲ್ ವ ಹೊರೆತ್ ಮಾವ್ಳ್ಯಾಕ್, ಬಾಪ್ಲ್ಯಾಂಕ್ ಮಾನ್ ಹ್ಯಾ ದಿಸಾಪ್ರಾಪ್ತ್. ನಾರ್ಲ್ ಫೊಡುಂಕ್, ಕುವಾಳೊ ಕಾತ್ರುಂಕ್, ಸ್ತ್ರೀಯೊ ನಾರ್ಲ್ ಕಾಂತುಂಕ್ ಅನಿ ಗುರ್ಕಾರಾಕ್ ಯ್ ಮಾನ್ ಲಾಭೊಂಕ್ ಆಸ್ತಾ. ಮಾನ್ ಮೆಳಾನಾ ತರ್ ಗಲಾಟೊ ಜಾಲ್ಲೊಯ್ ಆಸ್ತಾ! ದೆಕುನ್ ಹೊರೆತ್ ವ ಹೊಕ್ಲೆ ಕುಟ್ಮಾಚಿಂ ಹ್ಯಾ ಬಾಬ್ತಿಂ ಚತ್ರಾಯ್ ಘೆತಾತ್. ಮಾವ್ಳ್ಯಾನ್ ಹೊಕ್ಲೆಕ್ ವ ಹೊರೆತಾಕ್ ರೊಸಾಚ್ಯಾ ಬಾಂಕಾರ್ ಬಸೊಂವ್ಚೆಂ. ಹೊಕ್ಲೆಕ್ ಧೆಡಿಯೊ, ನವ್ರ್ಯಾಕ್ ಧೆಡೆ, ಈಶ್ಟ್ ಆನಿ ಕುಟ್ಮಾಚೆ ಕಾಶಾ ಭಾವ್, ಭಯ್ಣಿಂ, ಲಾಗ್ಶಿಲಿಂ ಭಾಂವ್ಡಾಂ ಹೊ ಪಾತ್ರ್ ಘೆತಾತ್. 

ರೋಸ್ ಪುಸ್ಚೊ ಸಂಭ್ರಮ್ ಮಾಗ್ಣ್ಯಾ ದ್ವಾರಿಂ ಆರಂಭ್ತಾ. ಆವಯ್, ತಿಚ್ಯೊ ಭಯ್ಣಿಂ ಅನಿ ಲಾಗ್ಶಿಲಿಂ ಸಯ್ರಿಂ ನಾರ್ಲಾ ರೋಸ್, ನಾರ್ಲಾತೇಲ್ ಘೆವ್ನ್ ಹೊಕ್ಲೆಕ್ ವ ನವ್ರ್ಯಾಕ್ ರಿತಿ ರಿವಾಜಿ ಪ್ರಕಾರ್ ಮಾಖ್ತಾತ್. ವೊವಿಯೊ, ವೇರ್ಸ್ ಗಾಂವ್ಕ್ ಕುಟಾಮ್ ಆನಿ ವಾಡ್ಯಾಗಾರಾಂ ಎಕ್ವೊಟಿತ್ ಜಾವ್ನ್ ಸೊಭಾಯ್ ಚಡಯ್ತಾತ್. ದೆವಾಕ್ ಸ್ತುತಿ, ಆಲ್ಮಾಂಚೆಂ ಸ್ಮರಣ್, ಫಿರ್ಗಜ್ ಪಾತ್ರೊನಾಕ್, ಮರ್ಯೆಮಾಯೆಕ್ ಉಲೊ ದೀವ್ನ್, ಕುಟ್ಮಾದಾರಾಂಕ್ ಉಲ್ಲಾಸುನ್, ತಾರಿಫೊ ಯ್ ಕರ್ನ್ ವೊವಿಯೊ ವೇರ್ಸ್ ಘಾಂವ್ನ್ ರೊಸಾಕ್ ಸೊಭಾಯ್ ವಾಡಯ್ತಾತ್.

ಲಗ್ನಾಂ ಖರಿಂಚ್ ಸರ್ಗಾರ್ ನಿರ್ಧಾರಿತ್ ಆಸ್ತಾತ್. ಸುಬ್ರಹ್ಮಣ್ಯಾಚಿ ಜೊಡಿ ಸೊಧ್ಚೆಂ ಪ್ರಯತ್ನ್ ಮಾತ್ರ್ ಆಮ್ಚೆಂ. ಎಕಾಮೆಕಾಚೆಂ ಉಣೆಪಣ್ ಭರುಂಕ್, ಜೊಕ್ತಿ ಚಲಿ ಆನಿ ಜೊಕ್ತೊ ಚಲೊ ದೇವ್ ಪಯ್ಲೆಂಚ್ ತಯಾರ್ ದವರ್ತಾ. ಲಗ್ನಾ ದಿಸಾ ಆಧಿಂ ಘರಾಚ್ ವ್ಹಡ್ ಮಾಟೊವ್ ಘಾಲುನ್ ಸಂಭ್ರಮ್ ಚಲಂವ್ಚೊ ಆಸ್ ಲ್ಲೊ. ರೊಸಾಕ್ ಯ್ ಲಗ್ನಾಕ್ ಯ್ ಆದ್ಲೆ ದಿಸಾಚ್ ವಾಡ್ಯಾಗಾರ್, ಲಾಗ್ಶಿಲಿಂ ಸಯ್ರಿಂ ಘರಾಂಗ್ಣಾಂತ್, ಪಿಯಾವ್, ಲೊಸುಣ್, ಕುವಾಳೊ ಶಿಂದಾಪ್ ರಾಂದಾಪ್ ತಯಾರ್ ಕರ್ತಾಲಿಂ.

ಲಗ್ನಾ ಖಾತಿರ್ ಚ್ ದುಕೊರ್ ಪೊಸುನ್, ಲಗ್ನಾ ಆದ್ಲೆ ದಿಸಾ ಮಾರ್ನ್, ರುಚಿಕ್ ಮಾಸಾ ರಾಂದಾಪ್ ಕರ್ತಾಲಿಂ. ಆತಾಂ ತೊ ಸಂಭ್ರಮ್ ಮಾಯಾಗ್ ಜಾಲಾ. ಲಗ್ನಾ ಖಾತಿರ್ ಚ್ ಗಾಂವ್ಚೊ ಸೊರೊ ಪಯ್ಲೊಚ್ ತಯಾರ್ ಕರುಂಕ್ ಆಸ್ ಲ್ಲೊ. ಸಕಾಳಿಂ ರೆಸ್ಪೆರಾಚೊ ಸಂಭ್ರಮ್. ಹೊಕಾಲ್ ಆಪ್ಲ್ಯಾ ಘರಾ ಥಾವ್ನ್ ಧೆಡಿ ಆನಿ ಕುಟ್ಮಾ ಸಂಗಿಂ ತರ್ ಹೊರೆತ್ ಆಪ್ಲ್ಯಾ ಘರಾ ಥಾವ್ನ್ ಮಾಲ್ ಧೆಡೊ ಆನಿ ಕುಟ್ಮಾ ಸಂಗಿ ದೇವ್ ಮಂದಿರಾಕ್ ಪಾವ್ತಾತ್. ರೆಸ್ಪೆರಾಚ್ಯಾ ಮಿಸಾ ಸಂಗಿ ತಿಂ ಮಾತ್ರ್ ಮನಿ ಸಾಕ್ರಾಮೆಂತಾಂತ್ ಪತಿ ಆನಿ ಪತಿಣ್ ಜಾತಾತ್. 

ಉಪ್ರಾಂತ್ ಮಾಟ್ವಾಂತ್ಲೊ ವ್ಹಡ್ ಸಂಭ್ರಮ್ ಸುರ್ವಾತ್ತಾ.

ಲಗ್ನಾ ಉತ್ಸವ್:

ದೋನ್ ಕುಟ್ಮಾಂ ಏಕ್ ಜಾಂವ್ಚಿ ಅಪೂರ್ವ್ ಘಡಿ. ದೋನ್ ಕಾಳ್ಜಾಂಚೆಂ ಮಿಲನ್ ಘಡ್ಚೊ ಜಿವಿತಾಂತ್ ಅಮರ್ ಉರ್ಚೊ ದೀಸ್. ಆಜ್ ಕಾಲ್ ಕಾರ್ಯಿಂ ಸಾಲಾಂನಿ ಜಾತಾತ್. ದೋನ್ ಕುಟ್ಮಾಚಿಂ ಸಯ್ರಿಂ, ಲಾಗ್ಶಿಲಿಂ ಪಯ್ಸಿಲಿಂ, ಸೆಜಾರ್ ವಾಡೊ ಫಿರ್ಗಜ್, ಈಶ್ಟ್ ಮಂತ್ರ್ ಲಗ್ನಾ ಕಾರ್ಯಾಕ್ ಸೊಭ್ ದಿತಾತ್. 

ಕಾರ್ಯೆಂ ಸಗ್ಳೆಂ ಕಾರ್ಯನಿರ್ವಾಹಕಾಚ್ಯಾ ಹಾತಿಂ ಸೊಭಿತ್ ರಿತಿನ್ ಚಲ್ತಾ. ತೊ ಆಪ್ಲ್ಯಾ ನಾಜುಕ್ ಆನಿ ವಿಂಚ್ಣಾರ್ ಉತ್ರಾಂನಿ ಲಗ್ನಾ ಕಾರ್ಯಾಚಿ ಯಶಸ್ವಿ ಸಾಂಭಾಳ್ತಾ. ಪಯ್ಲ್ಯಾನ್ ಹೊಕಾಲ್ ಹೊರೆತ್ ಸಾಲಾಕ್ ಪಾವ್ತಾತ್ ಉಪ್ರಾಂತ್ ಸಯ್ರಿಂ. ಎಕಾಮೆಕಾ ಮಟ್ವ್ಯಾನ್ ಕುಟ್ಮಾಚಿ ವಳೊಕ್, ಲಗ್ನಾ ಕೇಕ್ ಕಾತ್ರಾಪ್, ಮಾನಾಚ್ಯಾ ವೆಕ್ತಿ ಥಾವ್ನ್ ಭಲಾಯ್ಕೆ ಸಂದೇಶ್, ಹೊಕ್ಲೆ ಹೊರೆತಾಚೊ ಆನಿ ಕುಟ್ಮಾದಾರಾಂಚೊ ಇಶ್ಟ್ ಮಂತ್ರಾಂಚೊ ನಾಚ್. ಉಪ್ರಾಂತ್ ಸಾಡೊ ನ್ಹೆಸೊಂಕ್ ಹೊಕ್ಲೆಕ್ ಆಪವ್ನ್ ವ್ಹರುನ್ ಫುಲ್ ಭಾಂಗಾರಾನ್ ಸೊಭಯ್ತಾನಾ, ನವ್ರೊ ಅಪ್ಲ್ಯಾ ಧೆಡ್ಯಾ ಸಂಗಿ ಸಯ್ರ್ಯಾಂಕ್ ಮೆಳೊನ್ ಎತಾ, ಮಾಲ್ಘಡ್ಯಾಂಚೆಂ ಬೆಸಾಂವ್ ಘೆತಾ.

ಹೊಕಾಲ್ ಫುಲ್ ಭಾಂಗಾರಾನ್ ತಯಾರ್ ಜಾತಚ್ ವೆದಿಕ್, ಹೊರೆತ್ ಆಪವ್ನ್ ಹಾಡ್ತಾ. ಎಕಾಮೆಕಾ ಫುಲಾಂ ಝೆಲೆ ಅರ್ಪಣ್ ಕರ್ತಾತ್. ಹೊರೆತ್ ಆಪ್ಲ್ಯಾ ಹೊಕ್ಲೆಕ್ ಕರಿಯಮಣಿಂತ್ ಸೊಭಯ್ತಾ.   ದೋನ್ ಕುಟ್ಮಾಂ ಏಕ್ ಜಾಲ್ಲೊ ಸಂದೇಶ್ ಎಯಾ ಎಣಿಚೊ ಮಾನ್, ಉಪ್ರಾಂತ್ ಹೊಕ್ಲೆ ಹೊರೆತಾಕ್ ಮಾಂವ್ ಮಾಂಯ್ ಚಿ ಕಾಣಿಕ್. ಮಾಂಯ್ ಜಾಂವ್ಯಾಕ್ ಮುದಿಶಿಂವ್ತಾ. ಉಪ್ರಾಂತ್ ಆಯೆರ್ ದಿಂವ್ಚೆಂ, ಬೆಸಾಂವ್ ದಿಂವ್ಚೆಂ ಚಲ್ತಾ. ನಿಮಾಣೊ ಹಂತ್ ಹೊಕ್ಲೆಕ್ ಒಪ್ಸುನ್ ದಿಂವ್ಚೆಂ ಕಾರ್ಯೆಂ.  ಕುಟ್ಮಾಚೆ ಮುಖೆಲಿ ಎಕಾಮೆಕಾಕ್ ಕಾಶೆಲ್ಯಾ ಸಯ್ರ್ಯಾಂ ಸಂಗಿ ಫುಡ್ ಕರುನ್ ರಾವೊನ್, ಹೊಕ್ಲೆಕ್ ನವ್ರ್ಯಾಚ್ಯಾ ಕುಟ್ಮಾಕ್ ಒಪ್ಸುನ್ ದಿತಾತ್. ಪಯ್ಲೆಂ ಲಾಗ್ಶಿಲಿಂ ಸಯ್ರಿಂ ಹೊಕ್ಲೆಕ್ ಬೆಸಾಂವ್ ದಿತಾತ್.  ಸರ್ವ್ ಸಂಗ್ತಿ ಸುಗಮ್ ರಿತಿನ್ ಸಂಪ್ಲೆಲ್ಯಾಕ್ ದೆವಾಕ್ ಆರ್ಗಾಂ ಜಾವ್ನ್ ಲಾವ್ದಾತೆ ಗಾಯ್ತಾತ್.  ಉಪ್ರಾಂತ್ ರುಚಿಕ್ ಜೆವ್ಣಾಕ್ ಉಲೊ ದಿತಚ್ ಸರ್ವಾಂ ಜೆವಾಣ್ ಸ್ವೀಕಾರ್ ಕರ್ತಾತ್. ಸಂತೊಸ್ ವಾಂಟುನ್ ಘೆಂವ್ಕ್ ಬಾಯ್ಲಾ ನಾಚಾಚೊ ದಬಾಜೊ ಗರ್ಜ್, ನಾ ತರ್ ಲಗ್ನಾ ಸಂಭ್ರಮಾಕ್ ಸೊಭಾಯ್ ನಾ ತಶೆಂ ಸಾಲ್ ಭರ್ ನಾಚ್ ಆನಿ ಪದಾಂಚೊ ವ್ಹಾಳೊ.

 ಹೊಕ್ಲೆ ಹೊರೆತಾ ಜೆವ್ಣಾ ಉಪ್ರಾಂತ್ ಹೊಕ್ಲೆಕ್ ನವ್ರ್ಯಾಗೆರ್ ಪಾವಂವ್ಕ್ ಲಾಗ್ಶಿಲಿಂ ಸಯ್ರಿಂ ವೆತಾತ್.  ಥಂಯ್ಸರ್ ವೇರ್ಸ್ ಗಾವ್ನ್ ಸಯ್ರ್ಯಾಂಕ್ ಸ್ವಾಗತ್ ಜಾತಾ. ಮಟ್ವ್ಯಾನ್ ಮಾಗ್ಣೆ ಜಾತಚ್, ಹೊಕ್ಲೆ ಹೊರೆತಾಕ್ ಆವಯ್ ದೂಧ್ ಪಿಯೆಂವ್ಕ್ ದಿತಾ. ಉಪ್ರಾಂತ್ ಸಯ್ರಿಂ ಆಪಾಪ್ಲ್ಯಾ ಘರಾ ವೆತಚ್ ಲಗ್ನಾ ಕಾರ್ಯೆಂ ಸಂಪ್ತಾ. ಪರ್ತಾಪಣಾಚೆಂ ಜೆವಾಣ್ ಹೊಕ್ಲೆಗೆರ್ ಖಂಚ್ಯಾ ದಿಸಾ ಮ್ಹಣ್ ನಿರ್ಧಾರ್ ಕರ್ನ್, ಲಾಗ್ಶಿಲ್ಯಾ ಥೊಡ್ಯಾ ಲಾಗ್ಶಿಲ್ಯಾ ಸಯ್ರ್ಯಾಂಸಂಗಿ ಜೆವಾಣ್ ಜಾಲ್ಯಾ ಉಪ್ರಾಂತ್ ಲಗ್ನಾ ಕಾರ್ಯೆಂ ಸಂಪೊನ್, ಹೊಕ್ಲೆ ಹೊರೆತಾಚೆಂ ಲಗ್ನಾ ಜಿವಿತ್ ಆರಂಭ್ ಜಾತಾ.

ಲಗ್ನ್ ಸಂಪಾನಾ, ಕುಟ್ಮಾಬಾಂಧಾಂತ್ ವಾಡೊನ್ಂಚ್ ವೆತಾ. ಮನ್ಶ್ಯಾ ಮೊಲಾಂಕ್ ಕಿರ್ಲಾವ್ನ್, ರುತಾ ಕರ್ಚೆಂ ಮಿಸಾಂವ್ ಲಗ್ನಾ ಭೆಸಾಚೆಂ. ಎಕ್ಲ್ಯಾನ್ ಜಿಯೆಂವ್ಕ್ ಸಲೀಸ್. ದೊಗಾಂನಿ ಹೊಂದ್ವೊನ್ ಜಿಯೆಂವ್ಕ್ ಕಷ್ಟ್. ಆಮ್ಚ್ಯಾ ಪುರ್ವಜಾಂನಿ, ವಿವಿಧ್ ಕಷ್ಟ್ ನಶ್ಟ್, ಸಮಸ್ಯೆ ಫುಡ್ ಕರ್ನ್ ಕುಟ್ಮಾಂ ರುತಾ ಕರ್ನ್ ಆಮ್ಕಾಂ ಬರ್ಯಾಂತ್ಲಿ ಬರಿ ದೇಖ್ ದಿಲ್ಯಾ. ಲ್ಹಾನ್ ಲ್ಹಾನ್ ಸಮಸ್ಯೆ ಎತಾನಾ, ತೆ ಧಯ್ರಾನ್ ಫುಡ್ ಕರ್ನ್ ಕುಟಾಮ್ ಸಾಂಗಾತಾ ದವರುಂಕ್ ಆಮ್ಕಾಂ ಜವಾಬ್ದಾರಿ ಭಾಂದ್ತಾ. ಆಮ್ಚಿಂ ಲಗ್ನಾಂ ಥೊಡ್ಯಾಚ್ ದಿಸಾಂಚ್ಯಾ ಗಮ್ಮತ್ ಆನಿ ಸಂಭ್ರಮಾಂನಿ ಮಾತ್ರ್ ವ್ಯಸ್ತ್ ಉರಾನಾಸ್ತಾಂ, ಜಿವಿತಾಚ್ಯಾ ಹರ್ಯೆಕಾ ಘಡಿತಾಂನಿ ಹಾತಾಕ್ ಹಾತ್ ಧರುನ್ ಎಕಾಮೆಕಾ ಖಾತಿರ್ ಸಮರ್ಪಿತ್ ಆನಿ ರಾಕಣ್ ದಿಂವ್ಚಿಂ ಜಾಂವ್ದಿತ್.

- ಫೆಲ್ಸಿ ಲೋಬೊ, ದೇರೆಬೈಲ್