"ಹಲೋ.........." ಘುಸ್ಪಡ್ನಾಕಾತ್!! ಆತಾಂ ಜಾಂವ್ಚೆಂಯೀ ನಾ. ಪಳೆಂವ್ಕ್ ದಿಸ್ತಾ ಕೊಲೊ, ಪಾದ್ರಿ ಜಾಂವ್ಚೊ ಚಲೊ, ಕಾಜಾರ್ ಕಸೊ ಜಾಲೊ?! ಮ್ಹಣ್ ವೊವ್ಯಾನಿಂ ಗಾವುನ್ ರೋಸ್ ಸಯ್ತ್ ಪುಸ್ಲಾ ಮಾಕಾ ಆಮ್ಚಾ ಗಾಂವ್ಚಾಂನಿ.  ಸಾತ್ವ್ಯಾ ಸಾಕ್ರಾಮೆಂತಾಕ್ ಏದೊಳ್‍ಚ್ ಪಾ(ಗ)ಳೊ ದೀವ್ನ್ ಜಾಲಾ. ಹಾವೆಂ ಬರಂವ್ಚೆಂ ಸರೊನ್ ಗೆಲ್ಲ್ಯಾ ಘಡಿತಾಂಚೆರ್ ಮಾತ್ರ್.

ದೆವಾಸ್ಪಣಾಚಾ ಕುಟ್ಮಾಂತ್ ಜಲ್ಮೊನ್, ಧಾರ್ಮಿಕ್ ಪರಿಸರಾಚಿ ವೋಡ್ ಇಲ್ಲಿಶಿ ಚಡ್‍ಚ್ ಘೆವ್ನ್ ಹಾಂವ್ ವಾಡ್‍ಲ್ಲೊಂ. ಆಮ್ಗೆರ್ TV ನಾತ್‍ಲ್ಲಿ, 1990ವೆರ್ ವಾಡ್‍ಲ್ಲ್ಯಾ ಆಮ್ಚಾ ಹಾತಾನಿಂ ಮೊಬೈಲಾಂ, ವೀಡೀಯೋ ಗೇಮ್, ಟ್ಯಾಬ್ಲೆಟ್, ಐಪ್ಯಾಡ್, ಲ್ಯಾಪ್ ಟೋಪ್ ಅಶೆಂ ಇಲೆಕ್ಟ್ರಾನಿಕ್ಸ್ ಗೆಡ್ಜೆಟ್ಸ್ ನಾತ್‍ಲ್ಲೆ. ಕುಟ್ಮಾಚಾ ಸಂಗಿಂ ಖೆಳೊನ್, ವೆಳಾಕ್ ಚಡ್ ಮಹತ್ವ್ ಆಸ್‍ಲ್ಲೊ. ಸಕಾಳಿಂ - ಸಾಂಜೆಚಿಂ ಮಾಗ್ಣೆಂ ವೆಳಾರ್ ಜಾತೆಲೆಂ. ಘರಾಂತ್ ಶಿಸ್ತ್ ಆಸ್‍ಲ್ಲ್ಯಾನ್, ಲ್ಹಾನ್ಪಣಾರ್ ಮ್ಹಾಕಾ ಇಲ್ಲಿ ಭಕ್ತ್ ಆಸ್‌ಲ್ಲಿ!!

ಇಗರ್ಜಿಚಾ ಆನಿ ವಾಡ್ಯಾಚಾ ಸರ್ವ್ ಕಾಮಾನಿಂ ಮ್ಹಜೊ ಪ್ರಮುಖ್ ಪಾತ್ರ್ ಆಸ್ತಾಲೊ. ಕುಟ್ಮಾಚಾ ಆನಿ ವಾಡ್ಯಾಚಾ ಚಡ್ತಾವ್ ಕಾರ್ಯಾನಿಂ ಮಾಗ್ಚ್ಯಾಚೆಂ ಮುಕೇಲ್ಪಣ್ ಘೆಂವ್ಕ್ ಮಾಕಾಚ್ ಆವ್ಕಾಸ್ ಮೆಳ್ತಾಲೊ. ಕೊಂಕ್ಣಿ ಉತ್ರಾಂ ಸುಡಾಳ್ ಜಾವ್ನ್ ವಾಳ್ತಾಲಿಂ ಜಾಲ್ಲ್ಯಾನ್, ಜಾಯ್ತ್ಯಾನಿಂ ’ತುಂ ಖಂಡಿತ್ ಪಾದ್ರಿ ಜಾತಾಯ್’ ಮ್ಹಣ್ ಬೆಸಾಂವ್ ದಿಲ್ಲೆಂಯ್ ಆಸಾ. ’ತುಂ ಕಿತೆಂ ಜಾತಾಯ್?" ಮ್ಹಣ್ ಕೊಣೀ ಮಾಕಾ ಸವಾಲ್ ಕೆಲೆಂ ತರೀ ಮ್ಹಜಿ ಜಾಪ್ ತಿಚ್ಚ್, ’ಹಾಂವ್ ಪಾದ್ರ್ಯಾಬ್ ಜಾತಾಂ’. ’ಕಾಜಾರ್ ಜಾಂವ್ಚೆ ತರ್ ತುಜೆಚ್ ಲಾಗಿಂ’ ಮ್ಹಣ್ ಕಾಳ್ಜಾಕ್ ಲಾಗ್‍ಲ್ಲ್ಯಾ ಚಲಿಯೆಕ್ ಭಾಸ್ ದಿಲ್ಲ್ಯಾ ಉಪ್ರಾಂತೀ  ’ತುಂ ಸೆಮೆನರಿಂತ್ ಶಿಕ್ತಾಯ್ಗೀ’ ಮ್ಹಣ್ ಜಾಯ್ತ್ಯಾನಿಂ ವಿಚಾರ್‌ಲ್ಲೆಂ ಆಸಾ. ಪಾದ್ರಿಪಣಾಕ್ ವೆಚಿ ಗಿರಾಂತ್ ಕಶಿ ಆನಿ ಕೆದಾಳಾ ಮ್ಹಜ್ಯಾ ತಕ್ಲೆಕ್ ಗೆಲ್ಲಿ ತೆಂ ಕಳಿತ್ ನಾ, ಪೂಣ್ ಹೈಸ್ಕೂಲ್ ಸಂಪ್ಲ್ಯಾ ಉಪ್ರಾಂತ್ ಮಾತ್ರ್ ಏಕ್ ದೀಸ್ ಸಯ್ತ್ ಹ್ಯಾ ವಿಶಿಂ ಚಿಂತ್‌ಲ್ಲೆಂ ನಾ!

ಕಾರ್ಮೆಲಿತ್ ಆನಿ ಜೆಜ್ವಿತ್ ಘರಾನಿಂ ಮ್ಹಜೊ ವಿಳಾಸ್ ದೀವ್ನ್ ಜಾಲ್ಲೊ. ಆಮ್ಚಾ ಘರಾ ಫೋನ್ ನಾತ್‌ಲ್ಲೆಂ. ಶೆಜಾರ್ಚಾ ಘರಾ ಥಾವ್ನ್ "ಸನ್ನೋ.... ಪಾದ್ರ್ಯಾಬಾಚೊ ಪೋನ್..." ಮ್ಹಣ್ ಉಲೊ ಮಾರ್ತಾನಾ ಮ್ಹಾಕಾಚ್ ಕನ್ಫ್ಯೂಸ್ ಜಾತಾಲೆಂ...... ’ಕೋಣಾಚೊ ಫೋನ್ ಜಾಯ್ತ್?’ ...ಸಾಂ. ಪ್ರಾನ್ಸಿಸ್ ಆಸ್ಸಿಸಿ, ಡೋನ್ ಬೊಸ್ಕೊ, ರೆದೆಂಪ್ತೋರಿಸ್ತ್, SVD, ಬಾಳೊಕ್ ಜೆಜು.... ಪಾದ್ರ್ಯಾಬಾಂ ಥಾವ್ನ್?? ಹೈಸ್ಕೂಲ್ ಶಿಕ್ತಾನಾ ದೇವ್ ಆಪವ್ಣ್ಯಾವಿಶಿಂ ಮಾಹೆತ್ ದೀಂವ್ಕ್ ಆಯಿಲ್ಲ್ಯಾ ಸರ್ವ್ ಯಾಜಾಕಾಂಕ್ ಹಾಂವೆ ನಂಬರ್ ದೀವ್ನ್ ಜಾಲ್ಲೊ! ರಜೆಚಾ ದಿಸಾನಿಂ ಶಿಭಿರಾಂಕ್ ಯೇಂವ್ಕ್ ಪತ್ರಾಂ ವೆಳಾರ್ ಪಾವ್ತಾಲಿಂ.

ಹೈಸ್ಕೂಲಾಂತ್ ಆಸ್ತಾನಾ ಚಾರ್ ದಿಸಾಂಚೆ ಎಕಾ ಶಿಬಿರಾಕ್ ಗೊಯಾಂ ಪಾವ್‌ಲ್ಲೆ ಥಂಯ್ ಹಾವೆಂ ಸದಾಂ ಸಕಾಳಿಂ ಮಿಸಾಕ್ ಲಿತುರ್ಜೆಂತ್  ಘೆತ್‌ಲ್ಲೊ ಪಾತ್ರ್ ಆನಿ  ಸಾಂಜೆಚಾ ಆವ್ಮರೆ ತೇರ್ಸಾಂತ್ ಘೆತ್‌ಲ್ಲೆಂ ಮುಕೇಲ್ಪಣ್ ಪಳೆವ್ನ್ ಹಾಂವ್ ಪಾದ್ರ್ಯಾಬಾಂಕ್ ಚಡ್ ಮೆಚ್ವಲ್ಲೊಂ. ಸೈಟ್ ಸೀಯಿಂಗ್ ಮ್ಹಣ್ ಬೋವ್ ಆಪುರ್ಭಾಯೆಚೆ ಜಾಗೇಯೀ ಪಳೆವ್ನ್ ಆಯಿಲ್ಲೊಂ. ಪಯ್ಲೆ ಪಾವ್ಟಿಂ ಗೊಯಾಂ ಪಾವ್‍ಲ್ಲ್ಯಾ ಮಾಕಾ ಥಂಯ್ಚೊ ಗಾಂವ್ ಬರೋ ಲಾಗ್‍ಲ್ಲೊ. ಹಾತಿಂ ಜರ್ ಮೊಬೈಲ್ ಆಸ್‌ಲ್ಲೆಂ ತರ್ ಬೀಚಾಂತ್ ಪಳೆಂವ್ಕ್ ಮೆಳ್ಚಾ ಗೊರ‍್ಯಾ ಕಾತಿಚಾ ಪರ್ಗಾವ್ಯಾಂ ಸಂಗಿ ಮ್ಹಜಿಯೀ ಏಕ್ ಸೆಲ್ಫಿ ಆಸ್ತಿ!!!

ಆಜ್ ದೇವ್ ಆಪೊವ್ಣಿಂ ಜಾಯ್ತಿಂ ಉಣಿಂ ಜಾವ್ನ್ ಆಯ್ಲ್ಯಾಂತ್. ಜಾಯ್ತಿಂ ಕಾರಾಣಾಂಯೀ ಆಸಾತ್!. ದೇವ್ ಆಪೊವ್ಣ್ಯಾವಿಶಿಂ ಮಾಹೆತ್ ದೀಂವ್ಕ್ ಆತಾಂಯ್ ಆಮ್ಚಿಂ ಧಾರ್ಮಿಕ್ ವ್ಹಡಿಲಾಂ ವಾವುರ್ನ್ ಆಸಾತ್. ತಾಂಚೆ ಪ್ರಯತ್ನ್ ತಿಂ ಕರ್ತಾತ್, ಪೂಣ್ ಸಕ್ಕಡ್ ಜಾಂವ್ಚೆಂ ದೆವಾಚಾ ನಿರ್ಮೊಣ್ಯಾ ಪ್ರಕಾರ್! ಮ್ಹಜ್ಯಾ ಲಾನ್ಪಣಾರ್ ಮಾಕಾಯೀ ಶಿಬಿರಾಂತ್ ವಾಂಟೊ ಘೆಂವ್ಕ್ ಆವ್ಕಾಸ್ ಕರ್ನ್ ದಿಲ್ಲ್ಯಾ, ಚತ್ರಾಯೆನ್ ಸಾಂಬಾಳ್‍ಲ್ಲ್ಯಾ, ವೆಳಾರ್ ರುಚಿಕ್ Break Fast, Lunch, Evening Snacks & Night  Dinner arrange ಕೆಲ್ಲ್ಯಾ ಸರ್ವ್ ಪಾದ್ರ್ಯಾಂಬಾಕ್ ದೇವ್ ಬರೆಂ ಕರುಂ!

ಚಡ್ ಸಮ್ಜಣಿ ನಾತ್‌ಲ್ಲ್ಯಾ ಲ್ಹಾನ್ ಪ್ರಾಯೆರ್ ಹಾಂವ್ ಪಾದ್ರ್ಯಾಬ್ ಜಾತಾಂ, ದಾಕ್ತೆರ್ ಜಾತಾಂ, ಇಜ್ನೆರ್ ಜಾತಾಂ, ಟಿಚರ್ ಜಾತಾಂ ಮ್ಹಣ್ ಸಾಂಗತ್ ಆಯಿಲ್ಲಿಂ. ಹರ್ ಭುರ್ಗಿಂಯೀ ಶಿಕ್ಪಾಚೊ ಹರ್ ಹಂತ್ ಚಡ್ತಾನಾ ಜಾಣ್ವಾಯೆಕ್ ಸರಿ ಜಾವ್ನ್ ಆಪ್ಲಿ ವಾಟ್ ಧರ್ತಾತ್. ವಡಿಲಾಂಚಾ ವೊತ್ತಾಯೆಕ್, ಮಾನಸಿಕ್ ದಬಾವ್ ಘೆವ್ನ್, ಅಪ್ಣಾಕ್ ಖುಶಿ ನಾತ್‌ಲ್ಲ್ಯೊ ಡಿಗ್ರ್ಯೊ ಜೊಡ್ಲೆಲಿಂ ಜಾಯ್ತಿಂ ಆಸಾತ್! ಜೊಕ್ತಿ ಜಾಣ್ವಾಯ್ ಮೆಳ್ನಾಸ್ತಾಂ, ಪಾಟಿಂಬೊ ಮೆಳ್ನಾಸ್ತಾಂ, ಆರ್ಥಿಕ್ ಪರಿಸ್ಥಿತೆಂತ್ ಚಿಡ್ಕುನ್, ಜಾಯ್ ಜಾಲ್ಲೆಂ ಶಿಕಾಪ್ ಆಪ್ಣಾಂವ್ಕ್ ಜಾಯ್ನಾಸ್ತಾನಾ, ಹಾತಾಕ್ ಮೆಳ್‌ಲ್ಲೆಂ ಶಿಕಾಪ್ ಆರಾವ್ನ್ ಉಪ್ರಾಂತ್ ಚುರ‍್ಚುರೆ ಬೊಗ್ಚಿಂಯ್ ಆಸಾತ್.

ಆಯ್ಚಾ ಸಂಸಾರಾರ್ ಭುರ್ಗ್ಯಾಂ ಥಂಯ್ ಆಸ್ಚೆಂ ತಾಲೆಂತ್ ಪಳೆವ್ನ್, ಭುರ್ಗ್ಯಾಂಕ್ ತ್ಯಾ ಕ್ಷೇತ್ರಾಂತ್ ಉಮೆದ್ ಆಸಾ ತೆಂ ಸಮ್ಜುನ್, ಲ್ಹಾನ್ಪಣಾರ್ ಥಾವ್ನ್‌ಚ್ ಜೊಕ್ತೆಂ ಶಿಕಪ್ ಆನಿ ಮಾರ್ಗದರ್ಶನ್ ದೀವ್ನ್ ಆಯ್ಲ್ಯಾಂವ್ ತರ್ ತಾಂಚೊ ಫುಡಾರ್ ಬರೊ ಜಾಯ್ತ್!

ಆಜ್ ಜರ್ ಕೋಣೀ ’ಹಾಂವ್ ಪಾದ್ರ್ಯಾಬ್ ಜಾತಾಂ’ ಮ್ಹಣ್ತಾನಾ ಯಾ ಘರ್ಚಾನಿ ’ತೊ ಶಿಬಿರಾಕ್  ಗೆಲಾ’ ಮ್ಹಣ್ತಾನಾ ಮಾಕಾ ಮಾತ್ರ್ ಮ್ಹಜ್ಯಾ ಜಿಣಿಯೆಚೊ ಪಾಟ್ಲೊ ಉಗ್ಡಾಸ್ ಧೊಶಿನಾಸ್ತಾಂ ರಾವಾನಾ.

ಸನ್ನು ನಿಡ್ಡೋಡಿ