ಕ್ರಿಸ್ಮಸ್ ಆಯ್ಲೆಂ

ಸೆಲ್ಲಿಬಾಯೆಕ್ ಹ್ಯಾ ಪಾವ್ಟಿಂ ಏಕ್ ನವೊ ಹುರಪ್, ನವಿ ಹುಮೆದ್ ಆಯಿಲ್ಲಿ. ಅದ್ಲ್ಯಾ ವರ್ಸಾ ಕೊರೊನಾಕ್ ಲಾಗೊನ್ ಪೂತ್ ಕ್ರಿಸ್ಮಸಾಕ್ ಜಾಂವ್, ಆನಿ ಕಿತೆಂಯ್ ಜಾಂವ್, ಗಾಂವಾಕ್ ಯೇಂವ್ಕ್ ನಾತ್‌ಲ್ಲೊ. ಹ್ಯಾ ಪಾವ್ಟಿಂ ಸೆಲ್ಲಿಬಾಯೆನ್ ಫೋನಾರ್ ದುಕಾಂ ಗಳಯ್ತಾನಾ ಪುತಾಕೀ ರಾವೊಂಕ್ ಜಾಲೆಂ ನಾ. "ಕುಸ್ವಾರ್ ಕರ್ ಮಾಮ್ಮಿ, ಹಾಂವ್ ಕ್ರಿಸ್ಮಸಾಕ್ ಗಾಂವಾಕ್ ಯೆತಾಂ" ಮ್ಹಣ್ ಪುತಾನ್ ಫೋನಾರ್ ಸಾಂಗ್ತಾನಾ, ಸೆಲ್ಲಿಬಾಯೆಚಾ ದೋನ್ ಬಾವ್ಳ್ಯಾಂಕ್, ಚ್ಯಾರ್ ಬಾವ್ಳ್ಯಾಂಚೆಂ ಬಳ್ ಆಯಿಲ್ಲೆಂ.

"ಅಳೆಯಾ, ಆಯ್ಕಾಲೆಂಗೀ... ಸ್ಟ್ಯಾನಿ ಕ್ರಿಸ್ಮಸಾಕ್ ಗಾಂವಾಕ್ ಯೆತಾ ಖಂಯ್, ಕುಸ್ವಾರ್ ಕರುಂಕ್ ಸಾಂಗ್ಲಾಂ. ತಾಂದ್ಳಾಚೆ ಲಾಡು, ನೆವ್ರ್ಯೊ, ಕುಕ್ಕಿಸಾಂ ಆನಿ ತಾಂದ್ಳಾಚ್ಯೊ ಚಾಕ್ಲ್ಯೊ ಮ್ಹಳ್ಯಾರ್ ತಾಕಾ ಭಾರಿ ಪಸಂದ್. ತುಂ ಆತಾಂಚ್ ಪೆಂಟೆಕ್ ವಚೊನ್ ಜಾಯ್ ಜಾಲ್ಲೆಂ ಸಗ್ಳೆಂ ಹಾಡ್ನ್ ಯೇ ಪಳೆಯಾಂ".

ದೊನ್ಪಾರಾಂ ಜೇವ್ನ್ ಆಡ್ ಪಡ್ಲೆಲ್ಯಾ ಆಪ್ಲ್ಯಾ ಘೊವಾಕ್ ಫುಸ್ಲಾಂವ್ಕ್ ಲಾಗ್ಲಿ ಸೆಲ್ಲಿಬಾಯ್. "ಮಾಗಿರ್ ಗೆಲ್ಯಾರ್ ಜಾಯ್ನಾಯೆ?” ಮಳ್ಳೆಂ ಚಿಂತಾಪ್ ಮತಿಂತ್ ಆಯ್ಲ್ಯಾರೀ ಪೂತ್ ದೋನ್ ವರ್ಸಾಂ ಉಪ್ರಾಂತ್ ಗಲ್ಫಾ ಥಾವ್ನ್ ಯೆತಾ ಮ್ಹಳ್ಳ್ಯಾ ಸಂತೊಸಾನ್ ಇಂತಾಮ್ ಉಟಾ‌ಉಟಿಂ ಪೆಂಟೆಕ್ ವಚೊಂಕ್ ತಯಾರ್ ಜಾಲೊ.

ಸೆಲ್ಲಿಬಾಯ್ ಪೂತ್ ಯೆತಾ ಮ್ಹಳ್ಳ್ಯಾ ಸಂತೊಸಾನ್ ಪಿಕ್‌ಲ್ಲಿ. ಘಡಿಯೆ ಭಿತರ್ ಧುವೆಕ್ ಫೊನ್ ಕರ್ನ್, ಭಾವ್ ಯೆತಾ ಮ್ಹಣ್ ಸಾಂಗೊನ್ ಜಾಲ್ಲೆಂ. ತಾಕಾಯ್ ಕುಳಾರಾ ಆಪೊವ್ಣೆಂ ದೀವ್ನ್‌ಯ್ ಜಾಲ್ಲೆಂ. ಅಶೆಂ ಸಾಂಜೆ ಭಿತರ್ ಸೆಜಾರಾ ಸ್ಟ್ಯಾನಿ ಗಾಂವಾಕ್ ಯೆಂವ್ಚಿ ಖಬರ್ ಪಾವೊನ್ ಜಾಲ್ಲಿ.

ಸಾಂಜೆರ್ ಘೊವ್ ಆನಿ ಬಾಯ್ಲ್ ದೊಗಾಂಯ್ ಕುಸ್ವಾರ್ ಕರುಂಕ್ ಲಾಗ್ಲಿಂ. "ಹ್ಯಾ ಪಾವ್ಟಿಂ ಪೂತ್ ಗಾಂವಾಕ್ ಯೆತಾ ಮ್ಹಣ್ ಆಮ್ಕಾಂಯ್ ಘರಾ ಕೆಲ್ಲೊ ಕುಸ್ವಾರ್ ಖಾಂವ್ಚೆಂ ಭಾಗ್ ಮೆಳ್ಳೆಂ, ನಾಂ ತರ್ ಬೇಕರಿಚ್ ಗತ್" ಮ್ಹಣಾಲೊ ಇಂತಾಮ್ ಬಾಯ್ಲೆಕ್ ಕೊಕ್ಕೆಂ ಲಾವ್ನ್. "ವ್ಹಯ್ ಭುರ್ಗಿಂ - ಕುಟಾಮ್ ಸಗ್ಳೆಂ ಸಾಂಗಾತಾ ಮೆಳ್ಳ್ಯಾರ್, ಫೆಸ್ತ್ ಪರಬ್ ಸಗ್ಳೆಂ, ನಾ ತರ್ ಕೊಣಾಕ್ ಮ್ಹನ್ ಯೆತಾ ಫೆಸ್ತ್ ಕರುಂಕ್?" ಮ್ಹಣಾಲಿ ಸೆಲ್ಲಿಬಾಯ್ ಆಪ್ಲೊ ವಾದ್ ಮಾಂಡುನ್. "ವ್ಹಯ್ ತೇಂಯ್ ಸಾರ್ಕೆಂಚ್" ಇಂತಾಮಾನ್ ಸಹಮತಿ ದಾಕಾವ್ನ್ ವಾದ್ ಆಕೆರ್ ಕೆಲೊ. "ತುಜ್ಯಾ ಲಾಗಿಂ ಉಲೊವ್ನ್ ಹಾಂವ್ ಜಿಕಾನಾಂ, ಮೌನ್ಂಚ್ ರಾಂವ್ಚೆ ಬರೆಂ". ಚಿಂತಿಲಾಗ್ಲೊ ಮತಿಂತ್’ಚ್.

"ಕ್ರಿಸ್ಮಸಾಕ್ ಪಾಂಚ್ ದೀಸ್ ಉರ್ಲೆ ಆನಿ ಸ್ಟ್ಯಾನಿ ಯೇಂವ್ಕ್ ತೀನ್ ದೀಸ್, ಆಮಿಂ ಪ್ರಾಯ್ವಾಂತಾಂನಿ ಕಿತ್ಲೊ ಮ್ಹಣೊನ್ ಕುಸ್ವಾರ್ ಕರ್ಚೊ? ಕೆಲ್ಲ್ಯಾ ಉಪ್ರಾಂತ್ ಇಲ್ಲೊ ಚಡ್’ಚ್ ಕರಿಜಯ್ ಸೆಜಾರಾ ವಾಂಟುಂಕೀ ಆಸಾ. ತುಂ ಏಕ್ ಚಾರ್ ದಿಸಾಂಕ್ ಆಯಿಲ್ಲೆಂಯ್ ತರ್ ಬರೆಂ ಜಾತೆಂ ಪುತಾ". ಮ್ಹಣಾಲಿ ಸೆಲ್ಲಿ ಬಾಯ್ ಫೊನಾರ್ ಆಪ್ಲ್ಯಾ ಧುವೆ ಲಾಗಿಂ.

"ಮಾಮ್ಮಿ, ಯೇಂವ್ಕ್ ಮ್ಹಾಕಾಯ್ ಆಶಾ ಆಸಾ, ಪುಣ್ ಆಮ್ಗೆರೀ ಕುಸ್ವಾರ್ ಕರುಂಕ್ ಧರ್ಲಾ. ತೆಂ ನಾಸ್ತಾಂ ತುಜೊ ಜಾಂವಂಯ್‌ಯೀ ಕ್ರಿಸ್ಮಸಾಕ್ ಗಾಂವಾಕ್ ಆಯ್ಲಾ. ಆನಿ ಹಾಂವೆಂ ಕಶೆಂ ಆತಾಂ ಕುಳಾರಾ ಯೆಂವ್ಚೆಂ? ತುಂಚ್ ಸಾಂಗ್ ಮ್ಹಾಕಾ" ಮ್ಹಣಾಲೆಂ ಬಯ್ಯಾ ಆಪ್ಲಿ ಆಸಹಾಯಕತಾ ಸಾಂಗೊನ್. "ಹಾಂ ಮಾಮ್ಮಾ, ಆಶೆಂ ಕರ್ಯಾಂ, ಹಾಂವ್ ಇಲ್ಲೊ ಚಡ್’ಚ್ ಕರ್ತಾಂ, ಮಾಗಿರ್ ಆಮಿಂ ಕಶೆಂಯ್ ಫೆಸ್ತಾ ಸಾಂಜೆರ್ ಯೆತಾಂವ್ ಪಳೆ, ತವಳ್ ಹಾಡ್ನ್ ಯೆತಾಂ. ಕಿತೆಂ ಮಣ್ತಾಯ್?" ಮ್ಹಣಾಲೆಂ ಬಯ್ಯಾ. "ತೆಂ ಸಾರ್ಕೆಂ ಜಾತಾಯೆ ಪುತಾ, ತುಮಿಂ ಹಾಡ್ಲೆಲ್ಯಾ ಮೊಗಾಚ್ಯಾ ಕಾಣಿಕೆಕ್, ತುಮಿಂ ಪಾಟಿಂ ವೆತಾನಾಂ ಆಮಿಂ ಕಿತೆಂಯ್ ದೀನಾಕಾವೆ ತರ್?" ಮ್ಹಣಾಲಿ ಸೆಲ್ಲಿಬಾಯ್ ನಿರಾಶೆನ್. "ಹಾಂವ್ ಸೆಜಾರಾ ಕೊಣಾಕ್ ತರೀ ಆಪಯ್ತಾಂ ಕುಮ್ಕೆಕ್, ತುಂ ನೊವ್ರ್ಯಾ ಆನಿ ಭುರ್ಗ್ಯಾಂ ಸಾಂಗಾತಾ ಫೆಸ್ತಾ ಸಾಂಜೆರ್ ಯೇ ಪುತಾ" ಮ್ಹಣಾಲಿ ಸೆಲ್ಲಿಬಾಯ್.

ಸೆಲ್ಲಿಬಾಯೆಚಿ ಕುಸ್ವಾರ್ ಕರ್ಚಿ ಉಮೆದ್ ಫುಣಿ ಉಣಿಂ ಜಾಂವ್ಕ್ ನಾತ್ಲಿಂ. ಪೂಣ್ ಪ್ರಾಯೆ ನಿಮ್ತಿಂ ಮಾತ್ರ್ ತಿ ಇಲ್ಲಿಶಿ ಆಸ್ಕತ್ ಜಾಲ್ಲಿ. ಆನಿ ಧರ್ಲೆಲೆಂ ಕಾಮ್ ಕಶೆಂ ತರಿ ಪೊಂತಾಕ್ ಪಾವಯ್ಜಾಯ್ ಮ್ಹಳ್ಳೆಂ ಹಟ್ ತಿಕಾ ಆಸ್ಲೆಂ. ದೆಕುನ್ಂಚ್ ತಿಣೆಂ ಇಂತಾಮಾಕ್ ಫುಸ್ಲಾವ್ನ್ ತರೀ, ತಾಂದ್ಳಾ ಲಾಡು ಆನಿ ಚಾಕ್ಲ್ಯೊ ಘುಂವ್ಡಾವ್ನ್ ಸೊಡ್ಲ್ಯೊ. ನೆವ್ರ್ಯೊ ಲಾಟುನ್ ಭರ್ತಾನಾ ಮಾತ್ರ್ ಇಂತಾಮ್ "ಬಸೊನ್ ಬಸೊನ್ ಮ್ಹಜ್ಯಾ ಪಾಟಿಂತ್ ಭರೊನ್ ಯೆತಾ, ಪಾಂಯ್ ಮುಯೆಂವ್ಕ್ ಲಾಗ್ತಾ ಮ್ಹಣ್, ದೋನ್ ಪೆಗ್ಗ್ ಚಡ್’ಚ್ ಮಾರ್ನ್, ಫ್ಯಾನಾ ಪಂದಾ ನೀಟ್ ನಿದ್’ಲ್ಲೊ.

ಇತ್ಲೊ ಕುಸ್ವಾರ್ ಕಸೊಯ್ ಜಾಲೊ ಆನಿ ಕುಕ್ಕಿಸಾಂ ಆನಿ ಥೊಡ್ಯೊ ತುಕ್ಡ್ಯೊ ಕೆಲ್ಯಾರ್, ಧರಲ್ಲೆಂ ಕಾಮ್ ಸಾರ್ಥಕ್ ಜಾತಾ. ಸೆಲ್ಲಿಬಾಯ್ ಆಪ್ಲೆಸ್ತಾಕಿಂ ಚಿಂತುಂಕ್ ಲಾಗ್ಲಿ. ಹ್ಯಾ ಪಾವ್ಟಿಂ ತಿಕಾ ಮಿಸಾಕ್ ವೆತಾನಾ ನೆಸ್ಣಾಚಿ ಖಂತ್ ನಾತ್’ಲ್ಲಿ. ಪೂತ್ ಯೆತಾ ಆನಿ ಆವಯ್ಕ್ ನವಿ ಸಾಡಿ, ಬಾಪಾಯ್ಕ್ ನವಿ ಮುಸ್ತಾಯ್ಕಿ ಘೆವ್ನ್ ದಿತಾ ಮ್ಹಳ್ಳೊ ಭರ್ವಸೊ ಆಸ್’ಲ್ಲೊ. ದೆಕುನ್ಂಚ್ ತಿ ಹ್ಯಾ ಪಾವ್ಟಿಂ ಪುತಾಕ್ ತಾಚ್ಯಾ ರುಚಿಚೆಂ ಖಾಣ್ ರಾಂದುಂಕ್ ಪಡ್’ಲ್ಲಿ. ತಾಂತುಂ ದುಕ್ರಾ ಮಾಸ್‌ಯ್ ಏಕ್. ತೆಂ ಪೂತ್ ಯೆಂವ್ಚ್ಯಾ ಅದ್ಲ್ಯಾ ದಿಸಾ ರಾಂದ್ಲ್ಯಾರ್, ದುಸ್ರ್ಯಾ ದಿಸಾ ಸಾರ್ಕೆಂ ಜಾತಾಂ, ತಾಚಿ ರುಚ್’ಯ್ ಚಡ್ತಾ. ಆಶೆಂ ಸಗ್ಳೆಂ ಆಲೋಚನ್ ಘೆವ್ನ್ ನಿದೊಂಕ್ ಗೆಲಿ ಸೆಲ್ಲಿಬಾಯ್.

ಸ್ಟ್ಯಾನಿಚೆಂ ಫೋನ್, ಸಾಕಾಳಿಂ ಫುಡೆಂಚ್ "ಫಾಲ್ಯಾಂ ಗಾಂವಾಕ್ ಯೇಂವ್ಕ್ ಚೆಡ್ಯಾಕ್ ಕಾಂಯ್ ಶೊಪಿಂಗಾಕ್ ಗೆಲ್ಲ್ಯಾ ಕಡೆ ಥಾವ್ನ್ ಫೊನ್ ಕರ್ತಾ ಜಾಯ್ಜೆ". ಮ್ಹಣ್ ಇತಾಮಾನ್ ಫೋನ್ ಕಾಡ್ಲೊ.
"ಹಾಲೊ ಪಪ್ಪಾ ಬರೆಂ ಜಾಲೆಂ ತುಂವೆಂ ಫೋನ್ ಕಾಡ್ಲೆಂಯ್, ಮಾಮ್ಮಿನ್ ಕಾಡ್ಲೆಲೆಂ ತರ್ ಮ್ಹಜಿ ಫಜಿಂತ್ ಜಾತಿ!" ಮ್ಹಣಾಲೊ. ದರ್ವೊಡೊನ್ ಇಂತಾಮ್ ಆಕಾಂತ್ಲೊ "ಕಿತೆಂ ಜಾಲೆಂ ಪುತಾ? ಕಸಲಿ ಗಜಾಲ್?" ವಿಚಾರಿಲಾಗ್ಲೊ ಹಾಳೂ ತಾಳೊ ಕಾಡ್ನ್. "ಪಪ್ಪಾ, ಹಾಂವೆಂ ಗಾಂವಾಕ್ ಯೆಂವ್ಚಿ ಸಗ್ಳಿ ತಾಯಾರಾಯ್ ಕೆಲ್ಲಿ. ಆನಿ ಫಾಲ್ಯಾಂ ಮ್ಹಜೆಂ ಫ್ಲಾಯ್ಟ್ ಆಸ್‌ಲ್ಲೆಂ. ಪೂಣ್, ಮ್ಹಜ್ಯಾ ಸಾಂಗಾತಾ ಕಾಮ್ ಕರ್ತೆಲ್ಯಾಚ್ಯಾ ಘರಾ ಆನಾಹುತ್ ಘಡ್ಲಾಂ ಪಪ್ಪಾ, ತಾಚಿ ಆವಯ್ ಮರಣ್ ಪಾವ್ಲ್ಯಾ ಆಜ್ ಫಾಂತ್ಯಾರ್, ಆನಿ ತೊ ಆಜ್’ಚ್ ಗಾಂವಾಕ್ ಭಾಯ್ರ್ ಸರ್ಲಾ. ಕೊರೊನಾ ಯೇವ್ನ್ ಕಂಪನಿಂತ್ ಕಾಮೆಲಿ ಸಯ್ತ್ ಉಣೆಂ ಆನಿ ಆಮಿಂ ದೊಗಾಂಯ್ನಿ ಗಾಂವಾಕ್ ಗೆಲ್ಯಾರ್, ಹಾಂಗಾ ದುಸ್ರ್ಯಾಂ ವಯ್ರ್ ಕಾಮಾಚೆಂ ವೊಜೆಂ ಚಡ್ತಾ. ದೆಕುನ್ ತೊ ವಚೊನ್ ಪಾಟಿಂ ಆಯಿಲ್ಲ್ಯಾ ಉಪ್ರಾಂತ್ ಮ್ಯಾನೇಜಾರಾನ್ ಮ್ಹಾಕಾ ಗಾಂವಾಕ್ ವೊಚೊಂಕಾ ವಿನಂತಿ ಕೆಲ್ಯಾ. ದೆಕುನ್ ಹಾಂವ್ ಆನಿ ಏಕ್ ಪಂದ್ರಾ ದಿಸಾಂ ಉಪ್ರಾಂತ್ ಗಾಂವಾಕ್ ಯೆತಾಂ. ಆತಾಂ ಹೆಂ ಕಶೆಂ ಪುಣಿ ಮಾಮ್ಮಿಕ್ ಸಮ್ಜಾಯ್ ಆನಿ ಸಮಧಾನ್ ಕರ್" ಏಕಾಚ್ ಉಸ್ವಾಸಾಂತ್ ಸಾಂಗೊನ್ ಸಂಪಯಿಲ್ಲೆಂ ತಾಣೆಂ.

"ಕಿತೆಂ ಬಾಪಯ್ ಆನಿ ಪೂತ್ ಗುಟಾನ್ ಉಲೆಯಿಲ್ಲ್ಯಾ ಬರಿಂ ಆಸ್ಲೆಂ ತುಮ್ಚೆಂ ಉಲೊವ್ಣೆಂ, ಬೊತ್ಲೆಚಿ ಗಜಾಲ್ ದಿಸ್ತಾ, ಕಿತ್ಲೆ ಬೋತ್ಲ್ ಹಾಡುಂಕ್ ಸಾಂಗ್ಲೆಯ್?" ಮ್ಹಣಾಲಿ ಸೆಲ್ಲಿಬಾಯ್ ಹಳೂ ಲಾಗಿ ಯೇವ್ನ್. ಇಂತಾಮ್ ಫೋನ್ ಥಂಯ್ಚ್ ಸೊಪ್ಯಾರ್ ದವರ್ನ್ ಸರರಾಂ ಭಿತರ್ ಗೆಲೊ ಆನಿ ಏಕ್ ಪೆಗ್ಗ್ ನಿಟ್ಟ್ ಮಾರಿಲಾಗ್ಲೊ.

ಆತಾಂ ಇಂತಾಮಾಕ್ ಇಲ್ಲೆಂ ಧಯ್ರ್ ಆನಿ ಸಕತ್ ದೊನಿ ಆಯಿಲ್ಲೆ ಪರಿಂ ಜಾಲೆಂ, ಬಾಯ್ಲೆಕ್ ಫೋನಾರ್ ಉಲಯಿಲ್ಲಿ ಆನಿ ಜಾಲ್ಲಿ ಗಜಾಲ್ ಸಾಂಗೊಂಕ್. ಫಟಾಫಟ್ ಭಾಯ್ರ್ ಯೇವ್ನ್ ಮ್ಹಣಾಲೊ ಇಂತಾಮ್ "ಸ್ಟ್ಯಾನಿ ಆನಿ ಪಂದ್ರಾ ದಿಸಾಂನಿ ಗಾಂವಾಕ್ ಯೆತಾ ಖಂಯ್, ತಾಚ್ಯಾ ಸಾಂಗಾತ್ಯಾಚಿ ಆವಯ್ ಸರ್ಲ್ಯಾ ಮ್ಹಣ್ ತಾಚೊ ಸಾಂಗಾತಿ ಗಾಂವಾಕ್ ವೆತಾ ಖಂಯ್. ತಶೆಂ ಹಾಕಾ ಆತಾಂ ಯೇಂವ್ಕ್ ಜಾಯ್ನಾ ಖಂಯ್".

ಇತ್ಲೆಂ ಸಾಂಗೊನ್ ಇಂತಾಮ್ ಸೊಪ್ಯಾರ್ ಗಳ್ಳೊ. ಸೆಲ್ಲಿಬಾಯ್ ಘಡ್ಗಡೊ ಮಾರ್ಲೆಲ್ಯಾ ಪರಿಂ ಮೊನಿ ಜಾಲ್ಲಿ. ಯೆದೊಳ್ ಪರ್ಯಾಂತ್, ಪೂತ್ ಫಾಲ್ಯಾಂ ಯೆತಾ ಮ್ಹಳ್ಳ್ಯಾ ಖುಶೆನ್ ಘರಾಕ್ ಘರ್’ಚ್ ಹಾಸೊನ್ ಖೆಳೊನ್ ಆಸ್ಲೆಂ, ಆತಾಂ ಎಕಾಚ್ ಫರಾ ಮೌನ್ ಸಾಗೊರಾಂತ್ ವ್ಹಾಳೊಂಕ್ ಲಾಗ್ಲೆಂ.

ಸೆಲ್ಲಿಬಾಯೆಗೆಲೆಂ ಕ್ರಿಸ್ಮಸ್ ಹ್ಯಾ ಪಾವ್ಟಿಂಯ್ ವಾಟ್ ಪಳೆವ್ನ್ಂಚ್ ಜಾಲೆಂ. ಪೂಣ್, ಕುಸ್ವಾರ್ ಮಾತ್ರ್ ವಾಂಟ್ಸೊ ತೊ ವಾಂಟುನ್, ಪುತಾಕ್ ಮ್ಹಣೊನ್ ಥೊಡೊ ಸಾಂಭಾಳ್ನ್ ಧವರ್ಲಾ ಸೆಲ್ಲಿಬಾಯೆನ್.

ಕ್ಲೈವ್ ಸೋಜ್, ಬೊಳಿಯೆ.