ಪಿ. ಜೆ. ಕರುಗಳ್ನಡೆ ಚಿ "ನಿರ್ಬಾಗಿ ಆವಯ್" - ಏಕ್ ಪಾಟಿಂ ನದರ್

ಆಜ್ ತುಮ್ಚೆ ಮುಖಾರ್ ಮೊಜಿ ಆಭಿಪ್ರಾಯ್ ಮಾಂಡುಂಕ್ ವಿಂಚ್‍ಲ್ಲಿ ಕವಿತಾ, ಕವಿ ಪಿ. ಜೆ. ಕರುಗಳ್ನಡೆ ಹಾಚಿ "ನಿರ್ಭಾಗಿ ಆವಯ್". ಕವಿಕ್ ಹಾಂವ್ ವೈಯುಕ್ತಿಕ್ ಜಾವ್ನ್ ಲಾಗ್ಶಿಲ್ಯಾನ್ ವ್ಹಳ್ಕೊನ್ ಜಾಣಾ. ತೊ ತ್ಯಾ ಗಾದ್ಯಾಂತ್ಲ್ಯಾ ಚಿಕ್ಲಾಂತ್ ಬುಡ್‍ಲ್ಲೊ, ಘಡ್ಗಡ್ಯಾ ಪಾವ್ಸಾಂತ್ ಬಿಜ್‍ಲ್ಲೊ ಆನಿ ಕರ್ಕಟ್ಯಾ ವೊತಾಂತ್ ಬಾಜ್‍ಲ್ಲೊ ಮ್ಹನಿಸ್. ತ್ಯಾಚ್ ದೆಕುನ್ ತಾಚ್ಯಾ ಸುರ್ವಿಲ್ಯಾ ಕವಿತೆಂನಿ ಮಾಂಯ್‍ಗಾಂವ್ಚೊ ಪರ್ಮೊಳ್, ಗಾಂವ್ಚ್ಯಾ ಮಾತಿಯೆಚಿ ಮ್ಹೂರ್, ಶೆತಾಂ ಆನಿಂ ಫುಲಾಂ ಫಳಾಂಚೊ ಪರ್ಮೊಳ್ ಆಪ್ಟೊನ್ ಆಸ್ತಾಲೊ. ತಾಚ್ಯಾ ಕವಿತೆಂನಿ ಸಿಂತಿಮೆಂತಾಂ ಭರೊನ್ ವೊಮ್ತಾತೆಲಿಂ. ತ್ಯಾಚ್ ದೆಕುನ್ ಏಕ್ ಪೌವ್ಟಿಂ ಹಾವೆಂ ತಾಕಾ "ದುಖಿ ಆತ್ಮೊ" ಮುಣೊನ್ ಉಗ್ತ್ಯಾನ್ ವೊಲಾಯ್ಲೆಂ. ತಾಚೊ ಪರಿಣಾಮ್‍ಗಿ ಯ್ಯಾ ತಾಚ್ಯಾ ವಿದೇಶಿ ಜಿಣಿಯೆಚೊ ಪ್ರಭಾವ್, ತಾಚ್ಯಾ ಉಪ್ರಾಂತ್ ತಾಚ್ಯಾ ಲಿಖ್ಣೆಂತ್ ಉದೆಲ್ಲ್ಯೊ ಕವಿತಾ "ನಿಮಾಣಿ ಸೈರಿಕ್", "ಆಮಿಂ ತೆಗಿ ಭಯ್ಣಿ", "ವರ್ಸಾಚೆಂ ಕಾಪಾಡ್", "ತಿ ರಾತ್" ಆಸಲಿಂ ಕವಿತಾ ಮೊಜ್ಯಾ ಕಾಳ್ಜಾಕ್ ಖಿಳೊ ಮಾರುನ್ ಮೊಜ್ಯಾ ಭಿತರ್ ಪಿಚಾರ್ ಜಾಂವ್ಕ್ ಸಕ್ಲ್ಯಾಂತ್.

ಹೆಂ ಹಾವೆಂ ಕಿತ್ಯಾಕ್ ಹಾಂಗಾ ಬರಯ್ಲಾಂ ಮುಳ್ಳ್ಯಾರ್ ಆಪ್ಲ್ಯಾ ಆನ್ಭೊಗಾ ಸಾಂಗಾತಾ ಆಪ್ಲ್ಯಾ ಬರ್ಪಾಂಚೆರ್, ಆಪ್ಲ್ಯಾ ಚಿಂತ್ನಾಂಚೆರ್ ಆಪ್ಲಿ ಜಿಣಿ ಕಶಿ ಬದ್ಲಾವಣ್ ಹಾಡುಂಕ್ ಸಕ್ತಾ ಮುಣ್ಚ್ಯಾಕ್ ಕವಿ P.J. ಕರುಗಳ್ನಡೆ ಏಕ್ ಉಂಚ್ಲೆಂ ಉದಾಹರಣ್. ಆನಿ ಹಿಚ್ಚ್ ಬದ್ಲಾವಣ್ ಹರ್ಯೆಕಾ ಕವಿನಿಂ ಆಪ್ಲ್ಯಾ ಬರ್ಪಾಂ ವಯ್ರ್ ಆಪ್ಣಾಂವ್ಕ್ ಜಾಯ್.

ಕವಿತಾ ಆಶಿ ಆಸಾ....

==========

"ನಿರ್ಭಾಗಿ ಆವಯ್"

ಮಾನ್ ಧಾಂಪುಂಕ್ ವಿಣ್ಗಿ ಆವಯ್

ದೊನೀ ಹಾತ್ ಪೆಚಾಡ್ತಾತ್ ಅಶೆ

ಸಂಗಿಂ ತಾಂಡೆಲ್ ಪೂತ್ ಪಿಶೆ

ಆಸ್ವೆಲಾಕ್ ರಾಕ್ಚೆ ರಾಕ್ಕೊಸ್ ಕಶೆ

ವಿಕೃತ್ ಹಾಸೊ ಹಾಸ್ತಾತ್ ಖ್ಹುಶೆ

ತಕ್ಲ್ಯೆಂತ್ಲ್ಯೊ ಶಿರೊ ಮಾಯಾಗ್ ಜಾಲ್ಯಾತ್

ಭಂಡ್ ಅವ್ತಾರ್ ಕರುಂಕ್ ಲಾಗ್ಲ್ಯಾತ್

ಪದ್ವೆ ಆಶೆನ್ ಆವಯ್ ಹರ್ದ್ಯಾರ್

ಕಥಕ್ಕಳಿ ನಾಚ್ ನಾಚೊಂಕ್ ಲಾಗ್ಲ್ಯಾತ್

ಖೊಟೊ ಮುಟಿ ಸುಜೊಂವ್ಕ್ ಸೊಡ್ಲ್ಯಾತ್

ಅರ್ನುಕ್ ಲಾಗ್ಲ್ಯಾತ್ ಕಾನುನಾ ಕಾಂಟೊ

ತಾಕ್ಡಿ ಬಾವ್ಡಿ ಆಪ್ಶಿಚ್ ಧಲ್ತಾ

ದೊಳ್ಯಾಂಕ್ ಬಾಂದ್ಲಾ ಕಾಳೆಂ ದೆಕುನ್

ಮ್ಹೆಳೆ ಸಗ್ಳೆಂ ರಾತಿಕ್ ಚ್ ಉಡ್ತಾ

ಆವಯ್ ಬಾವ್ಡಿ ವಿಣ್ಗಿಚ್ ರಡ್ತಾ

ನಾಂಗೊರ್ ಖೊರೆಂ ರೈತಾ ಹಾತಿಂ

ಭರ್ತಾ ಕೊಣಾಚೆಂ ಚಾಮ್ಡ್ಯಾ ಪೊತೆಂ

ಕುಡಿಂತ್ಲೆಂ ರಗತ್ ಸಗ್ಳೆಂ ವ್ಹಾಳ್ಳಾಂ

ರುಕಾ ಫಾಂಟ್ಯಾರ್ ಮೊಡೆಂ ಲಾಬ್ಲಾಂ

ಆವಯ್ ಕಾಳಿಜ್ ಹುಸ್ಕೆವ್ನ್ ರಡ್ಲಾಂ

ತಿಚೊ ಶೆಲೊ ಹಾಣಿಂಚ್ ಕಾಡ್ಲಾ

ದುಸ್ರ್ಯಾ ಗಾಂವಾಂಕ್ ಚೊಳಿ ದಿಲಾ

ನಾಂತ್ ಆತಾಂ ವಸ್ತ್ರಾಂ ಆಂಗಾರ್

ನಾ ಕಸ್ಲೆಂಯ್ ಭಾಂಗಾರ್ ಶಿಂಗಾರ್

ಆವಯ್ಕ್ ಸಗ್ಳೆಂ ವಿಕುನ್ ಖೆಲಾಂ

ತಿತ್ಲೆಂಯ್ ತರೀ ಭರ್ಲೆಂ ನಾ ಹಾಂಚೆಂ

ರಗ್ತಾ ಮಧೆಂಯ್ ವೀಕ್ ಘಾಲಾಂ

ರಂಗ್ ಬದ್ಲುಂಚೆಂ ಪ್ರಯತನ್ ಕೆಲಾಂ

ಸುರಿಯೊ ತಲ್ವಾರಿ ಹಾತೆರ್ ಜಾಲಾಂ

ಆವಯ್ ರಗತ್ ಚಿವೊಂಕ್ ದಿಲಾಂ

ಆಪ್ಲೆ ಆವಯ್ಕ್ ವಿಣ್ಗೆಂ ಕೆಲಾಂ

ಗಾಯೆಕ್ ಆವಯ್ ಸ್ಥಾನ್ ದಿಲಾಂ

ತ್ಯೆಚ್ ಆವಯ್ಕ್ ಚಿರುಂಕ್ ಸೊಡ್ಲಾಂ

ವಿಶ್ವೆ ಸಗ್ಳ್ಯಾನ್ ವಿಕುಂಕ್ ವ್ಹೆಲಾಂ

ಜಲ್ಮ್ ದಿಲ್ಲೆಕ್ ವಾಟೆರ್ ಘಾಲಾಂ

ಸ್ಥಾನ್ ಮಾನ್ ರಾಜ್ ಪದ್ವಿ

ಜಾಂಗಾಡ್ ಎಕ್ಲ್ಯಾಕ್ ದುಸ್ರ್ಯಾಕ್ ತಕ್ಲಿ

ಪೋಟ್, ಮೆಂದು, ಕಾಳಿಜ್, ಅನ್ಕಿಟಿ

ಸಗ್ಳೆಂ ವಿಕ್ರ್ಯಾಕ್ ಆವಯ್ ದುಸ್ರ್ಯಾಕ್

ಭಜನ್ ದೇವ್ ಫಕತ್ ಜಾಂವ್ಚ್ಯಾ ಬಕ್ರ್ಯಾಕ್

- ಪಿ.ಜೆ.ಕರುಗಳ್ನಡೆ, ಬಾರ್ಕೂರ್.

==========

ಆತಾಂ ವಿಷಯಾಕ್ ಯೆತಾಂ. ಆಸಲೊ ಏಕ್ ಪಾಪ್, ಸತ್ತಿ ಆನಿ ಪಾತ್ಕಾಂವೀಣ್ ಕವಿ, ಕ್ರಾಂತಿಕಾರಿ ಜಾಂವ್ಕ್ ಕಶೆಂ ಸಾಧ್ಯ್? ಪರಿಸ್ಥಿತಿ ಎಕಾ ಸಾದ್ಯಾ ಆನಿ ಆಪ್ಲ್ಯಾ ಸಾಮಾಜಿಕ್ ಕಾಳ್ಜೆಚ್ಯಾ ಚಿಂತ್ನಾಂನಿ ಜಿಯೆಂವ್ಚ್ಯಾ ಮನ್ಶಾಕ್ ಖಂಯ್ಚ್ಯಾ ಖಂಯ್ ವ್ಹರುನ್ ಪಾಯ್ತಾ ಮುಣ್ಚ್ಯಾಕ್ ಕವಿಚಿ ವಯ್ಲಿ ಕವಿತಾ "ನಿರ್ಭಾಗಿ ಆವಯ್" ಚ್ ಕಾರಣ್ ಜಾವ್ನಾಸಾ.

ಕವಿತೆಚ್ಯಾ ಪಯ್ಲ್ಯಾ ಪಾರಾಂತ್ ಕಸಲಿ ಏಕ್ ಕ್ರೂರ್ ಆನಿ ಧಾರುಣ್ ಪರಿಸ್ಥಿತಿ ಕವಿನ್ ದೊಳ್ಯಾಂ ಮುಕಾರ್ ಉಬಿ ಕೆಲ್ಯಾ.

"ಮಾನ್ ಧಾಂಪುಂಕ್ ವಿಣ್ಗಿ ಆವಯ್

ದೊನೀ ಹಾತ್ ಪೆಚಾಡ್ತಾತ್ ಆಶೆ

ಸಂಗಿಂ ತಾಂಡೆಲ್ ಪೂತ್ ಪಿಶೆ

ಆಸ್ವೆಲಾಕ್ ರಾಕ್ಚೆ ರಾಕ್ಕೊಸ್ ಕಶೆ"

ಆಪ್ಲ್ಯಾ ಗರ್ಭಾಂತ್ ಜಲ್ಮ್ ದಿಲ್ಲ್ಯಾ ಆವಯ್ಚೊ ಮ್ಹಾನ್ ರಾಕ್ಚೊ ಹರ್ಯೆಕಾ ಪುತಾಂಚೆಂ/ಭುರ್ಗ್ಯಾಂಚೆಂ ಕರ್ತವ್ಯ್. ಪುಣ್ ಭುರ್ಗಿಂಚ್ ಕಾಮುಕಿ ಜಾಲ್ಯಾರ್? ಆಬಲ್ ಆವಯ್ ಲಾಗಿಂ ಕಿತೆಂ ಕರುಂಕ್ ಜಾತಾ? ಕಾಂಯ್ ಆಪ್ಲೊ ಜೀವ್ ವಚಾಚೆರ್ ಮ್ಹಾನ್ ರಾಕ್ಚೆಂ ಪ್ರಯತ್ನ್ ಕರುಂಕ್ ಆಸಾ. ಹಿಚ್ಚ್ ಪರಿಸ್ಥಿತಿ ಜಾಲ್ಯಾ ಆಮ್ಚ್ಯಾ ಭಾರತ್ ದೇಶಾಚಿ ಆತಾಂ. ಎಕಾ ಕುಶಿಕ್ ಆಮ್ಚೊ ಭಾರತ್ ದೇಶ್ ಆಪ್ಲೆಂ ಪ್ರಜಾಪ್ರಭುತ್ವಾಚೆಂ ಆಸ್ಥಿತ್ವ್ ಸಂಸಾರಾಂತ್ ಉರೊಂವ್ಕ್, ಆಪ್ಲೊ ಮ್ಹಾನ್ ಧಾಂಪುಂನ್ ಧರ್‌ಲ್ಯಾಬರಿ ಪ್ರಯತ್ನ್ ಕರ್ತಾ ತರ್, ತ್ಯಾಚ್ ಭಾರತ್ ದೇಶ್ ಮುಳ್ಳ್ಯಾ ಆವಯ್ಚೆ ಪೂತ್ ಜಾವ್ನಾಸ್ಚೆ ಸ್ವಾರ್ಥಿ ರಾಜಕಾರಣಿ, ವ್ಹಡ್ಲೆ ವ್ಹಡ್ಲೆ ಉದ್ಯೋಗ್‍ಪತಿ, ಧರ್ಮಾಂದ್ಳೆ ನಾಯಕ್ ಆಪ್ಲ್ಯಾ ಸ್ವಾರ್ಥಾ ಲಾಗೊನ್ ದೇಶಾಕ್ ಲುಟ್ತೆ ಆಸಾತ್. ಆನಿ ತೆ ಪೂತ್ ಜಾಲ್ಯಾರೀ ಕಶೆ ಆಸಾತ್? ಕವಿನ್ ವಿಂಚ್‍ಲ್ಲೆ ಶಭ್ಧ್ ಪಳೆಯಾ..... "ಆಸ್ವೆಲಾಕ್ ರಾಕ್ಚೆ ರಾಕ್ಕೊಸ್" .....ಮನ್ಶ್ಯಾಂಕ್ ಲಗಾಡ್ ಕಾಡುಂಕ್ ಆಸ್ವೆಲ್ ಏಕ್‍ಚ್ ಪುರೊ. ಪುಣ್ ತಸಲ್ಯಾ ಆಸ್ವೆಲಾಂಕ್ ಸಯ್ತ್ ರಾಕ್ಕೊಸ್ ರಾಕ್ತಾತ್, ತರ್? ತರ್ ಹೆ ಆಮ್ಚ್ಯಾ ದೇಶಾಂತ್ ಆಸ್ವೆಲ್ ಕೋಣ್ ಆನಿ ರಾಕ್ಕೊಸ್ ಕೋಣ್? ಸಮ್ಜಾತೆಲ್ಯಾಂಕ್ ಹಿಶಾರೊ ಪಾವ್ತಾ.

"ತಕ್ಲೆಂತ್ಲ್ಯೊ ಶಿರೊ ಮಾಯಾಗ್ ಜಾಲ್ಯಾತ್

ಭಂಡ್ ಆವ್ತಾರ್ ಕರುಂಕ್ ಲಾಗ್ಲ್ಯಾತ್

ಪದ್ವೆ ಆಶೆನ್ ಆವಯ್ ಹರ್ದ್ಯಾರ್

ಕಥಕ್ಕಳಿ ನಾಚ್ ನಾಚೊಂಕ್ ಲಾಗ್ಲ್ಯಾತ್

ಖೊಟೊ ಮುಟಿ ಸುಜೊಂವ್ಕ್ ಸೊಡ್ಲ್ಯಾತ್"

ಭಾರತಾಂತ್ ಸಭಾರ್ ಥರಾಂಚೆ ಶಾಸ್ತ್ರೀಯ್ ನಾಚಾಂಚೆ ರೂಪ್ ಪಳೆಂವ್ಕ್ ಮೆಳ್ತಾತ್. ಭರತನಾಟ್ಯಮ್ ಆಸಾ [ತಮಿಳ್ನಾಡು], ಕಥಕ್ ಆಸಾ [ಉತ್ತರ್ ಪ್ರದೇಶ್], ಕೂಚಿಪುಡಿ ಆಸಾ [ಆಂದ್ರ ಪ್ರದೇಶ್], ಒಡಿಸ್ಸಿ ಆಸಾ [ಒರಿಸ್ಸಾ], ಸತ್ತ್ರೀಯಾ ಆಸಾ [ಆಸ್ಸಾಮ್], ಮಣಿಪುರಿ ಆಸಾ [ಮಣಿಪುರ್], ಮೊಹಿನಿ ಆಟ್ಟಂ ಆಸಾ [ಕೇರಳ]. ಇತ್ಲೆ ಸರ್ವ್ ಪ್ರಕಾರ್ ಆಸ್ತಾನಾ ಕವಿನ್ ಕಥಕ್ಕಳಿಚ್ [ಕೇರಳ] ಕಿತ್ಯಾಕ್ ಲಾಗೊನ್ ವಿಂಚ್ಲಾಂ ಮುಳ್ಳೆಂ ಏಕ್ ಸವಾಲ್ ಮ್ಹಾಕಾ ನಿದೆಂತ್ ಸಯ್ತ್ ದೊಸುನ್ ಆಸ್‍ಲ್ಲೆಂ. ಹಾವೆಂ ಸರ್ವ್ ನಾಟ್ಯ್ ರೂಪಕಾಂಚ್ಯೊ ತಸ್ವಿರ‍್ಯೊ ಪಳೆಯ್ಲ್ಯೊ. ಸಗ್ಳ್ಯಾ ಪ್ರಕಾರಾಂನಿ ಸಾದೆಂಪಣ್, ಖಾಲ್ತೆಂಪಣ್ ಆನಿ ನಾಜೂಕ್ ಹಾಸೊ ಉಟೊನ್ ದಿಸ್ತಾತ್ ತರ್ ಕಥಕ್ಕಳಿ ನಾಚಾಚ್ಯೊ ತಸ್ವಿರ‍್ಯೊ ಪಳೆಂವ್ಕ್ ಇಲ್ಲೆಶೆಂ ಭ್ಯೆಂ ದಿಸ್ತಾ, ಆಂಗ್ ಶಿರ್ಶಿರ್ತಾ. ಕವಿಚ್ಯಾ ಹ್ಯಾ ಆದ್ಭುತ್ ಚಿಂತ್ಪಾಕ್ ಮಾನಾನ್ ತಕ್ಲೆ ಬಾಗಾಯ್ನಾಸ್ತಾನಾ ದುಸ್ರೊ ಉಪಾವ್ ನಾ. ತಕ್ಲೆಂತ್ಲ್ಯೊ ಶಿರೊ ಮಾಯಾಗ್ ಜಾಲ್ಯಾತ್, ಭಂಡ್ ಆವ್ತಾರ್ ಕರುಂಕ್ ಲಾಗ್ಲ್ಯಾತ್. ವ್ಹಯ್, ಸಾರ್ಕೆಂ ಶಿಕ್ಪಾ ಜ್ಞಾನ್ ಆಸ್ಲ್ಯಾರ್ ನಂಯ್‍ಗೀ ಹ್ಯಾ ರಾಕ್ಕೊಸಾಂಚ್ಯಾ ತಕ್ಲೆಂತ್ಲ್ಯೊ ಶಿರೊ ಬೊರೆಂ ಕಾಮ್ ಕರುಂಕ್ ಲಾಗ್ಚ್ಯೊ.

ಆಮ್ಚ್ಯಾ ಸ್ವಾರ್ಥ್ ರಾಜ್‍ಕಾರಣಿಂಚ್ಯಾ ದಬ್ಬಾಳಿಕೆಶಾಹಿ ಆಡಳಿತಾ ಲಾಗೊನ್ ಸ್ವತಂತ್ರ್ ದೇಶಾಂತ್ ಕಾನೂನಾಕ್ ಮೋಲ್ ನಾ. ತ್ಯಾಚ್ ದೆಕುನ್ ರಾಜಕಾರಣಿಂಕ್ ವಿರೋದ್ ಗೆಲ್ಲೊ ಆಧಿಕಾರಿ ಸಸ್ಪೆಂಡ್ ಜಾತಾ, ಕಾನೂನ್ ಉಕ್ಲುನ್ ಧರುಂಕ್ ಉಲಯಿಲ್ಲೊ ನ್ಯಾಯದೀಶ್ ದೀಸ್ ಉಜ್ವಾಡಾಜೆ ಜಾಲ್ಯಾರ್ ವರ್ಗಾವಣ್ ಜಾತಾ. ಆಮ್ಚ್ಯಾ ದೇಶಾಂತ್ ಮೆಳ್ಚೆ ಸಿ.ಸಿ. ಟಿವಿ , ಮೊಬಾಯ್ಲ್ ಕ್ಯಾಮರಾಚೆ ವಿಡಿಯೊ ಕೇವಲ್ Facebook, Whatsapp ಆನಿ ಇತರ್ ಸಾಮಾಜಿಕ್ ಜಾಳಿ ಜಾಗ್ಯಾಂಕ್ ಮಾತ್ರ್ ಸ್ಥಿಮಿತ್. ಹಾಂಗಾ ಕೊಣಾ ವಯ್ರ್ Case ಘಾಲುಂಕ್ ಜಾಯ್, ಕೊಣಾಂಕ್ ಜೈಲಾಕ್ ಘಾಲುಂಕ್ ಜಾಯ್, ಖಂಚ್ಯಾ ಸರ್ವ್ ಜಾತಿ ಕಾತಿಚ್ಯಾ ತರ್ನಾಟ್ಯಾಂಕ್ ಜೈಲಾಕ್ ಘಾಲ್ನ್ ತಾಂಚ್ಯಾ ಆಂಗಾಂತ್ ಥಾವ್ನ್ ರಗ್ತಾಚಿ ಕಾರಂಜಿ ಉಬೊನ್, ಆಂಗ್ ಭರ್ ಮಾಸ್ ಭಾಯ್ರ್ ಪಡಾಶೆಂ ಗಾಯ್ ಜಾಯ್ಶೆಂ ಮಾರುನ್ ತಾಂಚೆ ಹಾತ್ ಪಾಂಯ್ ಮೊಡುನ್, ತಾಂಕಾಂ ಉಟೊಂಕಿ ಜಾವ್ನೊಜೊ, ಬಸೊಂಕಿ ಜಾವ್ನೊಜೊ ತಶೆಂ ಕರಿಜೆ ತರ್ ಕಿತೆಂ ಕರುಂಕ್ ಜಾಯ್, ಕೊಣಾಚೆಂ ನಾಂವ್ ಪಾಡ್ ಕರುಂಕ್ ಜಾಯ್ ಮುಳ್ಳೊ ನಿರ್ಧಾರ್ ಜಾಲ್ಲ್ಯಾ ಉಪ್ರಾಂತ್‍ಚ್ ಹಾಣಿಂ ರಸ್ತ್ಯಾರ್ ದೆಂವ್ಚೆಂ. ತೆಂ ಕೇವಲ್ ತೊಣ್ಕೆ, ಪಾತೊರ್ ಕಾಣ್ಘೆವ್ನ್ ನಂಯ್ ಬಗಾರ್ ಬಂದೂಕ್ ಕಾಣ್ಘೇವ್ನ್. ಆನಿ ಹೆಂ ಸರ್ವ್ ಹೆ ಕಾಳೊಕಾಂತ್ ರಾವೊನ್ ಕರಿನಾಂತ್. "ಗೋಲಿ ಮಾರೋ ಸಾಲೊಂ ಕೊ" ಮುಣೊನ್ ಪೊಲಿಸಾಂಚ್ಯಾ ದೆಗೆನ್ಂಚ್ ರಾವೊನ್ Firing  ಕರ್ತಾತ್. ಹಟ್ ಧರುನ್ ಭಾಯ್ರ್ ಕಿತೆಂ ಚಲೊನ್ ಆಸಾ ಮುಣೊನ್ ದೊಳೆ ಉಗ್ತೆ ದವರುನ್ ಪಳೆವ್ನ್ ಆಸ್‍ಲ್ಲೆ 4 - 6 ದೊಳೆ ಸಯ್ತ್ ನ್ಯಾಯಲಯಾಂತ್ ದೊಳೆ ಧಾಂಪುನ್ ರಾವ್‍ಲ್ಲ್ಯಾ ನ್ಯಾಯ್ ದೇವತೆಕ್ ಎಕ್ಲೆಕ್‍ಚ್ ರಾವೊಂಕ್ ಸೊಡಿನಾಸ್ತಾನಾ ತಾಣಿಂಯ್ ದೊಳೆ ದಾಂಪುನ್ ಘೆಂವ್ಚಿ ಆನಿವಾರ್ಯ್ ಪರಿಸ್ಥಿತಿ ಉದೆಶೆಂ ಕರ್ತಾತ್. ಕಿತ್ಯಾಕ್ ಮುಳ್ಳ್ಯಾರ್ ಹಾಂಗಾ ಪ್ರಜಾಪ್ರಭುತ್ವಾಚ್ಯಾ ಠೀವಿ ಮುಖಾರ್ ಸಿಸಿಟಿವಿ ಚೆ ಸಯ್ತ್ ದೊಳೆ ದಾಂಪ್ತಾತ್ ಯ್ಯಾ ದಾಂಪಾಯ್ತಾತ್. ತ್ಯಾಚ್ ದೆಕುನ್ ಕಾನೂನ್ ಆಪ್ಣಾಕ್ ಜಾಯ್ ಜಾಲ್ಲ್ಯಾಬರಿ ಘುಂವ್ಡೊಂವ್ಕ್ ಲಾಗ್ಲ್ಯಾತ್. ತ್ಯಾಚ್ ದೆಕುನ್ ಕವಿ ಮುಣ್ತಾ "ಬಾವ್ಡಿ ತಾಕ್ಡಿ ಆಪ್ಶಿಚ್ ಧೊಲ್ತಾ"

ಹಾವೆಂ ಪಯ್ಲೆಂಚ್ ಸಾಂಗ್‍ಲ್ಲ್ಯಾಬರಿ ಕವಿನ್ ಗಾದ್ಯಾಂತ್ ಆನಿ ಹಿತ್ಲಾಂತ್ ಜಾಯ್ತೊ ವಾವ್ರ್ ಕೆಲ್ಲ್ಯಾಂತ್ ತಾಕಾ ರೈತಾಂ ವಯ್ರ್ ಹುಸ್ಕೊ ಚಡ್. ತ್ಯಾಚ್ ದೆಕುನ್ ತಾಂಚೆ ಕಷ್ಟ್ ತೊ ಜಾಣಾ. ದೇಶಾಚೊ ರೈತ್ ಆಪ್ಲ್ಯಾ ಮ್ಹಿನತೆಕ್ ಸಾರ್ಕೆಂ ಮೋಲ್ ಮೆಳನಾಸ್ತಾನಾ ಕಂಗಾಕ್ ಜಾವ್ನ್ ಗೆಲಾ. ಲೋನ್ ದಿಲ್ಲೆ ಬ್ಯಾಂಕ್ ತಾಚಿ ಪಾಟ್ ಸೊಡಿನಾಂತ್. ಪುಣ್ ತ್ಯಾ ದುಬ್ಳ್ಯಾ ರೈತಾಚ್ಯಾ ಕಷ್ಟಾಂ ವಾವ್ರಾಚೊ ಫಾಯ್ದೊ ಗ್ರೇಸ್ತ್ ಜೊಡ್ತಾ. ತ್ಯಾಚ್ ದೆಕುನ್ ಕವಿ ಗ್ರೇಸ್ತಾಂಕ್ ಚಾಮ್ಡ್ಯಾಕ್ ಸರಿ ಕರ್ತಾ. ಕಿತ್ಯಾಕ್ ಮುಳ್ಳ್ಯಾರ್ ದುಬ್ಳ್ಯಾಂನಿ ಚಾಮ್ಡ್ಯಾಚಿಂ ಪೊತಿಂ ಕಾಣ್ಘೇವ್ನ್ ಭೊಂವ್ಚೆಂ ಏಕ್ ಸ್ವಪಾಣ್ ಮಾತ್ರ್. ಹ್ಯಾ ದಬ್ಬಾಳಿಕೆಶಾಹಿ ಸಂಸ್ಕ್ರತೆನ್ ದುಬ್ಳ್ಯಾ ರೈತಾಕ್ ಇತ್ಲೆಂ ಕಂಗಾಲ್ ಕರುನ್ ಸೊಡ್ಲಾಂಗಿ... ತಾಣೆಂ ಆಪ್ಲೆಂ ರಗಾತ್ ಘಾಮಾ ರುಪಿಂ ವ್ಹಾಳೊನ್ ರೈತ್, ತಾಚೆಂ ಕುಟಾಮ್, ತಾಚಿಂ ಭುರ್ಗಿಂ ಕಂಗಾಲ್ ಜಾವ್ನ್ ವಚೊನ್ ದುಬ್ಳ್ಯಾ ರೈತಾಕ್ ಆತ್ಮ್‍ಹತ್ತ್ಯಾ ಶಿವಾಯ್ ದುಸ್ರಿ ವಾಟ್‍ಚ್ ದಿಸಾನಾಸ್ತಾನಾ ಆಪ್ಲಿ ಕೂಡ್ ಗಾಂವ್ಚ್ಯಾ ರುಕಾಕ್ ಉಮ್ಕಾಳಾವ್ನ್ ಸೊಡ್ತಾ ತೆಂ ಪಳೇವ್ನ್ ದೇಶ್‍ಚ್ ರಡ್ತಾ. ದೇಶಾಕ್ ಖಂಡಿತ್ ಜಾವ್ನ್ ಆಪ್ಲ್ಯಾ ಭುರ್ಗ್ಯಾಂಚಿ ಖಂತ್ ಆಸಾ ಪುಣ್ ಆಸಲ್ಯಾ ಕಂಗಾಲ್ ಭುರ್ಗ್ಯಾಂಚಿ ಆನಿಶ್ಚಿತ್ ಪರಿಸ್ಥಿತಿ ಪಳೆವ್ನ್, ಆಸ್ವೆಲಾಕ್ ರಾಕ್ಚ್ಯಾ ರಾಕ್ಕೊಸಾಂ ತಸಲ್ಯಾ ಪುತಾಂ ಮುಕಾರ್ ಆಸಹಾಯಕ್ ಜಾವ್ನ್ ದುಖಾಂ ಗಳಯ್ತೆ ಆಸಾ.

ಎಕ್ಲ್ಯಾ ಭುರ್ಗ್ಯಾನ್ ದುಸ್ರ್ಯಾ ದೇಶಾಕ್ ಜೈಕಾರ್ ಘಾಲ್ಲ್ಯಾ ತೆದ್ನಾಂ ಸಂಸಾರ್‌ಚ್ ವೊಮ್ತೊ ಉದಾರೊ ಜಾಲ್ಲ್ಯಾ ಬರಿ ಬೊಬೊ ಘಾಲ್ತಾತ್ ಹೆ ಆಸ್ವೆಲ ತಸಲೆ ಪುತ್. ಖಂಡಿತ್ ಜಾವ್ನ್ ಭುರ್ಗ್ಯಾಚೆಂ ಕ್ರತ್ಯ್ ಖಂಡನಾರ್ಹ್, ಕೊಣಿಂ ಮೆಚ್ವೊಂಚ್ಯಾ ತಸಲೆಂ ನಂಯ್. ಪುಣ್ ಆಸ್ವೆಲಾಂಕ್ ರಾಕ್ಚೆ ರಾಕ್ಕೊಸ್ ಸೆಜಾರಿ ದೇಶಾಕ್ ವಚೊನ್ ಬಿರಿಯಾಣಿ ಖಾವ್ನ್ ಯೆತಾನಾ, ಪುಲ್ವಾಮಾ ತಸಲ್ಯಾ ಆಮ್ಚ್ಯಾ ದೇಶಾಚ್ಯಾ ಶಹರಾಂನಿ ಡ್ ಉಗ್ತ್ಯಾನ್ ಪ್ರವೇಶ್ ಜಾವ್ನ್ ಆಮ್ಕಾಂ ರಾಕ್ಚೆ ಆಮ್ಚೆ ಸೈನಿಕ್ ಮಾರ್ಥಿರ್ ಮೊರ್ತಾನಾ ಖಂಯ್ ಆಸ್‍ಲ್ಲೆಂ ಹಾಂಚೆಂ ದೇಶ್ ಪ್ರೇಮ್? ಆವಯ್ ಸಮಾನ್ ದೇಶಾಕ್ ಲುಟುನ್ ಠಕ್ಕೆ ಉದ್ಯೋಗ್‍ಪತಿ ದೇಶಾಚಿ ಆರ್ಥಿಕ್ ದಿವಾಳಿ ಕರ್ನ್ ಉಗ್ತ್ಯಾನ್ ದೇಶ್ ಸೊಡ್ನ್ ಧಾಂವ್ತಾನಾ ತರ್ ಕೊಣೆ ಕಾಡ್ಲಾ ಆಪ್ಲ್ಯಾ ಆವಯ್ ಸಾರ್ಕ್ಯಾ ದೇಶಾಚೊ ಶೆಲೊ? ಹ್ಯಾ ನಮೂನ್ಯಾರ್ ತಿಚ್ಯಾ ವಯ್ರ್ ಆತ್ತ್ಯಾಚಾರ್ ಜಾತಾನಾ ಖಂಯ್ ಉರ್ತೆಲಿಂ ವಸ್ತ್ರಾಂ ಯ್ಯಾ ಭಾಂಗಾರ್ ಶ್ರಂಗಾರ್ ತಿಚ್ಯಾ ಆಂಗಾರ್?

ಕವಿಚ್ಯಾ ಮ್ಹನಾ ಭಿತರ್ಲೆ ಆಕ್ಲಾಸ್ ಇತ್ಲ್ಯಾಕ್ ರಾವಾನಾಂತ್. ದೇಶಾಂತ್ ಧರ್ಮಾ-ಧರ್ಮಾಚ್ಯಾ ನಾಂವಾರ್ ಜಾಂವ್ಚ್ಯಾ ರಗ್ತಾಪಾತಾ ವಯ್ರ್ ಆಪ್ಲಿ ತೀಕ್ಷ್ಣ್ ನದರ್ ಕವಿ ಘುಂವ್ಡಾಯ್ತಾ. ಸರ್ವ್ ಜಾತಿ ಕಾತಿಂಚೆಂ, ಸರ್ವ್ ಸುಕ್ಣ್ಯಾ-ಸಾವ್ಜಾಂಚೆಂ, ಮನ್ಜಾತಿಂಚೆಂ, ಮನ್ಶಾ ಕುಳಾಚೆಂ ರಗ್ತಾಣೊ ಬಣ್ಣ್ ತಾಂಬ್ಡೊ ತರೀ ತಾಚ್ಯಾ ಮದೆಂಯ್ ವೀಕ್ ಭರ್ಸುನ್, ತಾಚೊ ರಂಗ್ ಬದ್ಲುಂಚೆಂ ಪ್ರಯತ್ನ್ ಹ್ಯಾ ಆಸ್ವೆಲಾಂನಿ ಆನಿಂ ತಾಂಕಾಂ ರಾಕ್ಚ್ಯಾ ರಾಕ್ಕೊಸಾಂನಿ ಕೆಲಾಂ ತೆಂ ಖಂಡಿತ್. ಆತಾಂ ದೇಶಾಂತ್ ಘಡ್ಚಿಂ ಘಡಿತಾಂ ಪಳೆಯ್ತಾನಾ ಸ್ಪಷ್ಟ್ ಸಮ್ಜಾತಾ. ತರ್ ಹಾಂತುಂ ಫಾಯ್ದೊ ಕೊಣಾಕ್? ಬೂಕ್ ಆನಿ ಪೆನ್ನ್ ಹಾತಿಂ ಘೆಜೆ ಜಾಲ್ಲ್ಯಾ ಹಾತಾಂನಿ ಆಜ್ ಸುರಿಯೊ, ತಲ್ವಾರಿ ಆನಿ ಬಂದೂಕ್ಯೊ ಖೆಳ್ತಾತ್. ಹಾಂಗಾ ವ್ಹಾಳ್ತಾ ರಗಾತ್ ತರ್ನ್ಯಾ ಯುವಜನಾಂಗಾಚೆಂ ತರೀ, ಉಕ್ಸಾಣ್ ದೇಶಾಕ್‍ಚ್ಚ್. ಆಪ್ಲ್ಯಾ ನವ್ಯಾ ಚಿಂತ್ಪಾಂನಿ, ಆಪ್ಲೆಂ ಶಿಕಾಪ್ ದೇಶಾಚ್ಯಾ ಉದರ್ಗತೆ ಖಾತಿರ್ ಉಪಯೋಗ್ ಕರಿಜೆ ಆಸ್‍ಲ್ಲೊ ತರ್ನಾಟೊ ಆಜ್ ಆಪ್ಲ್ಯಾ ಸಮಾಜ್ ವಿರೋದಿ ಚಟುವಟಿಕ್ಯಾಂನಿ, ಧರ್ಮಾ ವಿರೋಧ್ ಕಾರ್ಯಾಂನಿ ದೇಶಾಕ್‍ಚ್ಚ್ ಆಸ್ಕತ್ ಕರುನ್ ಆಸಾ. ದೇಶಾಕ್‍ಚ್ ಲುಟುನ್ ಆಸಾ. ದೇಶಾಚೆಂ ಸಮ್ರದ್ದೆಚೆಂ ರಗಾತ್ ಆಸಲ್ಯಾ ಆಸ್ವೆಲಾಂನಿ ಆನಿ ತಾಂಕಾಂ ರಾಕ್ಚ್ಯಾ ರಾಕ್ಕೊಸಾಂನಿ ಚಿಂವೊಂನ್ ಸೊಡ್ಲಾಂ.

ಆಜ್ ಆವಯ್ ಸಾರ್ಕ್ಯಾ ದೇಶಾಚ್ಯಾಕಿ ಚಡ್ತಿಕ್ ಮಾಪಾನ್ ಗಾಯ್ ಆಮ್ಚ್ಯಾ ದೇಶಾಚಿ ಆವಯ್ ಜಾವ್ನ್ ಗೆಲ್ಯಾ. ಪುಣ್ ಹೆಂ ಕೊಣಾಕ್? ಸಾಧ್ಯಾ ಲೊಕಾಚ್ಯಾ ಮ್ಹನಾಂತ್ ಗಾಯೆಕ್ ದೆವಾಚೆಂ ಆನಿ ಆವಯ್ಚೆಂ ಸ್ಥಾನ್ ಮೆಳಾಸಾರ್ಕೆಂ ಕೆಲಾಂ ತರ್ ಆಸ್ವೆಲ್ಯಾ ಸಾರ್ಕ್ಯಾ ಪುತಾಂಚಿಂ ಕುಟ್ಮಾ ಆನಿ ಸಂತತ್ ಆನೀಕಿ ಗ್ರೇಸ್ತ್ ಕರ್ಚ್ಯಾ ಪಾಸೊತ್ ಆವಯ್ಚೊ ಮ್ಹಾನ್ ದಿಂವ್ಚ್ಯಾ, ಗಾಯೆಕ್ ಚಿರುನ್ ಗಾಯೆಚೆ ವಿಶ್ವೆ ಆಜ್ ಸಂಸಾರ್‌ಭರ್ ವಿಕ್ರ್ಯಾಕ್ ಪಡ್ಲ್ಯಾತ್. ತ್ಯಾಚ್ ದೆಕುನ್ ಆಮ್ಚ್ಯಾ ದೇಶಾಕ್ Beef Exports ಂತ್ ಸಂಸಾರಾಂತ್ ಬ್ರೇಜಿಲ್ ಉಪ್ರಾಂತ್ ದುಸ್ರೆಂ ಸ್ಥಾನ್ ಫಾವೊ ಜಾಲಾಂ. ಕಸಲಿ ಏಕ್ ಆಮ್ಚ್ಯಾ ದೇಶಾಚಿ ದುರ್ದಶಾ ನಂಯ್‍ಗೀ? ತರ್ ಹೆಂ ಸಾದ್ಯಾ ಲೋಕಾಕ್ ಮಾಂಕೊಡ್ ಕರ್ಚೆಂ ಆನಿ ತಾಂಚ್ಯಾ ದೊಳ್ಯಾಕ್ ಮಾತಿ ಘಾಲ್ಚೆಂ ಪ್ರಯತ್ನ್ ನಾಸ್ತಾನಾ ಆನಿ ಕಿತೆಂ?

ಹ್ಯಾ ಆಸ್ವೆಲಾಂಕ್ ರಾಕ್ಚ್ಯಾ ರಾಕ್ಕೊಸಾಂಚೊ ಸ್ವಾರ್ಥ್ ಕಿತ್ಲ್ಯಾ ಮಟ್ಟಾಕ್ ವಿಸ್ತಾರ್ಲಾ ತೆಂ ಕವಿನ್ ಆಖ್ರೇಚ್ಯಾ ಪಾರಾಂತ್ ಸುಂದರ್ ಥರಾನ್ ವಿವರ್ಸಿಲಾಂ. ಆಜ್ ಆಮ್ಚ್ಯಾ ದೇಶಾಚ್ಯಾ ಆಸ್ವೆಲಾಂಕ್ ರಾಕ್ಚ್ಯಾ ರಾಕ್ಕೊಸಾಂನಿ ಆಪ್ಣಾಚ್ಯಾ ಭದ್ರತೆಖಾತಿರ್, ಆಪ್ಣಾಚ್ಯಾ ಬಚಾವೆ ಖಾತಿರ್ ಉಂಚ್ಲ್ಯಾ ಆನಿ ಪ್ರಭಾವಿ ಹುದ್ದ್ಯಾಂಚೆರ್ ಆಪ್ಲ್ಯಾಂಕ್‍ಚ್ ದವರ್ನ್ ಕಾಣ್ಘೇವ್ನ್ ಕಶೆಂ ದೇಶಾ ವಯ್ರ್ ದಬ್ಬಾಳಿಕೆ ಕರುನ್ ಆಸಾತ್ ಮುಳ್ಳೆಂ ತೆಂ ಉಗ್ತೆಂ ಆನಿ ನಾಗ್ಡೆಂ ಸತ್ ಜಾವ್ನಾಸಾ. ಜಾಂವ್ದಿತ್ ತಿಂ ಮಾಧ್ಯಮಾಂ, ಜಾಂವ್ದಿ ತೆಂ ಕಾನೂನ್, ಜಾಂವ್ದಿ ತೆಂ ನ್ಯಾಯಾಂಗ್. ದೇಶಾಚ್ಯಾ ಪರ್ಜೆಚಿಂ ಸಾಂವಿಧಾನಿಕ್ ಆನಿ ಸೈದ್ದಾಂತಿಕ್ ಹಕ್ಕಾಂಸಾಂಬಾಳುಂಕ್ ಜಾಯ್ ಆಸ್‍ಲ್ಲೆ ಹೆ ಸಂಸ್ಥೆ ಎಕ್‍ಚ್ ಜಿವಾಚೆ ವಿವಿಧ್ ಆಂಗ್ ಆಸ್‍ಲ್ಲ್ಯಾಬರಿ. ಪುಣ್ ಹ್ಯಾ ಸ್ವಾರ್ಥಿ ರಾಕ್ಕೊಸಾಂಚ್ಯಾ ಆಬ್ಲೆಸಾಂಲಾಗೊನ್ ತಾಂಚ್ಯಾ ಘರ್ಚಿ ಆಸ್ಥ್ ತಶೆಂ ಜಾವ್ನ್ ಗೆಲ್ಯಾತ್. ಆನಿ ಹೆಂ ಸಮ್ಜಾನಾತ್‍ಲ್ಲಿ ಪರ್ಜಾ ಹ್ಯಾ ಆಸ್ವೆಲ್ ಆನಿ ರಾಕ್ಕೊಸಾಂ ಪಾಟ್ಲ್ಯಾನ್ ವಚೊನ್, ತಾಣಿಂ ಸಾಂಗ್‍ಲ್ಲೆಂ ಸರ್ವ್ ಸತ್ ಮುಣೊನ್ ಚಿಂತುನ್ ಭಜನ್ ಆನಿ ದೆವಾಚಿ ಸ್ತುತಿ ಕರ್ಚೆ ಬೊಕ್ರೆ ಜಾತಾತ್. ಹಾಂಚ್ಯಾ ಉಲೊವ್ಣ್ಯಾಕ್ ಭುಲೊನ್ ಆಜ್ ದೇಶಾಂತ್ ಕೊಮುವಾದ್ ಆನಿ ಆತಂಕ್‍ವಾದ್ ಉಬ್ಜೊಂಚೆ ಭಯೊತ್ಪಾದಾಕ್ ಜಾವ್ನ್ ಆಪ್ಲೆಂ ಜಿವಿತ್ ಪಿಡ್ದ್ಯಾರ್ ಕರುನ್ ಸೊಡ್ತಾತ್ ತರ್ ಹೆ ರಾಕ್ಕೊಸ್ A.C. ಚ್ಯಾ ಬೊಂಗ್ಲ್ಯಾನಿ ರಾವೊನ್, ಆಪ್ಲ್ಯಾ ಭುರ್ಗ್ಯಾಂಕ್ ಸುರಕ್ಷಿತ್ ದೇಶಾಂನಿ ವಸ್ತಿ ಕರೊವ್ನ್, ಉಂಚ್ಲೆಂ ಶಿಕಾಪ್ ದಿವೊವ್ನ್ ತಾಂಚಿ ಸಂತತ್ ಗ್ರೇಸ್ತ್ ಕರ್ತಾತ್. ತಾಂಚೆ ಪಾಟ್ಲಾವ್ದಾರ್ ಜಾವ್ನ್ ತಾಂಕಾಂ ಪಾತ್ಯೆಲ್ಲೆ ಸಾಮಾನ್ಯ್ ನಾಗರಿಕ್ ಮಾತ್ರ್ ತಾಂಚ್ಯಾ ಶಿರಿಗುಂಡಿಚ್ಯಾ ಖೆಳಾಂತ್ ಬಲಿ ಜಾಂವ್ಚೆ ಬೊಕ್ರೆ ಜಾತಾತ್.

ಆಶೆಂ ಕವಿನ್ ಏಕ್ ಕ್ರಾಂತಿಕಾರಿ ಜಾವ್ನ್ ದೇಶಾಚ್ಯಾ ವರ್ತಮಾನ್ ಪರಿಸ್ಥಿತೆಚಿಂ ರುಪಾಂ ಆಮ್ಚ್ಯಾ ಮದೆಂ ದವರ್ಲ್ಯಾಂತ್. ಆಮ್ಚೆ ತಸಲ್ಯಾ ನಾಗರಿಕಾಂಚಿ ಪರಿಸ್ಥಿತಿ ಜಾಲ್ಯಾರಿ ಕವಿಚ್ಯಾ ಚಿಂತ್ಪಾಂ ಥಾವ್ನ್ ವಿಂಗಡ್ ನಂಯ್. ಖಂಡಿತ್ ಜಾವ್ನ್ ಹಿ ಏಕ್ ವರ್ತಿ ದುಖಿ:ಭರಿತ್ ಆನಿ ಮುಕಾರಿಂ ಕಿತೆಂ ರಾಕೊನ್ ಆಸಾ ಮುಳ್ಳ್ಯಾ ಭಿಂಯಾನ್ ಭರ್‌ಲ್ಲ್ಯಾ ಚಿಂತ್ನಾಂಚಿ ಪರಿಸ್ಥಿತಿ ಆಜ್ ಆಮ್ಚ್ಯಾ ದೇಶಾಂತ್ ಉಬಿ ಜಾಲ್ಯಾ. ಆಜ್ ಕವಿ P.J, ಕರುಗಳ್ನಡೆ ತಸಲೊ ಥಂಡ್, ಶಾಂತಿ ಆನಿ ಸಮಾಧಾನೆಚೊ ರಾಯ್‍ಭಾರಿ, ರಡ್ಚೊ ಕವಿ ಆಸೊ ಉಪ್ರಾಟ್ಜೆ ಜಾಲ್ಯಾರ್ ಕಾರಣ್ ಕಿತೆಂ ಮುಣೊನ್ ಸೊದ್ನಾಂ ಕರ್ಚಿ ಗರ್ಜ್ ನಾ. ಆಮ್ಚ್ಯಾ ಗಾಂವಾಂನಿ, ಆಮ್ಚ್ಯಾ ಸೆಜಾರಾಂನಿ ದಿಸಾಂದಿಸ್ ಮುಳ್ಳ್ಯಾಬರಿ ಘಡ್ಚಿಂ ಘಡಿತಾಂಚ್ ಸಾಕ್ಸ್ ಜಾವ್ನಾಸಾತ್.

ದೇಶಾಚಿ ಪರಿಸ್ಥಿತಿ ಉಗ್ತಿ ಕೆಲ್ಲ್ಯಾ ಕವಿ ವಯ್ರ್ ಮ್ಹಾಕಾ ಶೀಣ್ ಜರೂರ್ ಆಸಾ. ಕವಿನ್ ಆಮ್ಚ್ಯಾ ಮುಖಾರ್ ದವರಿಲ್ಲೆ ಸಮಸ್ಯೆ ಕಾಂಯ್ ಆಜ್-ಕಾಲ್ಚೆ ನಂಯ್. ಪಾಟ್ಲ್ಯಾ 5-6 ವರ್ಸಾಂ ಥಾವ್ನ್ ವಿವಿದ್ ರುಪಾಂನಿ ಆಮ್ಚ್ಯಾ ದೇಶಾ ವಯ್ರ್ ಕಾಳ್ಯಾ ಮೊಡಾಂಬರಿ ಮಾಂಡುನ್ ಆಸಾತ್. ಆತಾಂ ಪರ್ಜೆಕ್ ಕಾಂಯ್ ನವೆ ಜಾವ್ನ್ ಉರೊಂಕ್ ನಾಂತ್. ಆಮ್ಚ್ಯಾ ಕವಿಂಚೊ ಏಕ್ ಆಭ್ಯಾಸ್ ಜಾವ್ನಾಸಾ ಕಿ ಸಮಸ್ಯಾಂಚಿ ಏಕ್ ಕೂಸ್ ಮಾತ್ರ್ ದಾಕೊಂವ್ಚಿ. ಆದಿಂ ಥಾವ್ನ್ ಹಾಂವ್ ಸಾಂಗಾತ್ತ್ ಆಯ್ಲಾಂ ಕವಿಂಚಿ ನೈತಿಕ್ ಜವಾಬ್ದಾರಿ ಕಿತೆಂ ಮುಣೊನ್. ಆರಂಭಾರ್ ಥೊಡ್ಯಾ ಕವಿಂನಿ ಸಮಸ್ಯೆ ದಾಕೊವ್ನ್ ದಿಂವ್ಚಿ ಮಾತ್ರ್ ಕವಿಚಿ ಜವಾಬ್ದಾರಿ ಮುಣೊನ್ ಸಾಂಗ್‍ಲ್ಲೆಂ ತರೀ, ಆಂಡ್ರೂ ಡಿ’ಕುನ್ಹಾ ತಸಲೆ ಮಾಲ್ಘಡೆ ಆನಿ ಜಾಣ್ತೆ ಕವಿ ಸಮಸ್ಯೆ ದಾಕೊಂವ್ಚ್ಯಾ ಸಾಂಗಾತಾ ಪರಿಹಾರಾಕ್ ವಾಟ್ ದಾಕೊಂವ್ಚಿ ಜವಾಬ್ದಾರಿ ಹರ್ಯೆಕಾ ಕವಿಕ್ ಥೊಡ್ಯಾ ಮಾಪಾನ್ ತರೀ ಬಾದ್ಯ್ ಜಾತಾ ಮುಳ್ಳೆಂ ಸತ್ ಒಪ್ವೊಂಕ್ ಲಾಗ್ಲ್ಯಾತ್ ಮುಳ್ಳಿ ಗಜಾಲ್ ಮ್ಹಾಕಾ ಸಂತೊಸ್ ದೀಂವ್ಕ್ ಸಕ್ಲ್ಯಾ.

ಕವಿ P.J, ಆನಿ ಹೆರ್ ಕವಿಂಕ್ ಹಾಂವ್ ಇತ್ಲೆಂಚ್ ಸಾಂಗೊಂಕ್ ಆಶೆತಾಂ ಕಿ ಸಮಸ್ಯೆ ಹರ್ಯೆಕ್ ಕಡೆನ್ ಆಸ್ತಾತ್. ಸಮಸ್ಯೆ ನಾಂತ್ ತರ್ ಜಿವಿತಾಕ್ ಸಯ್ತ್ ಕಾಂಯ್ ಮತ್ಲಾಬ್ ಆಸಾನಾ. ಪುಣ್ ತ್ಯಾ ಸಮಸ್ಯಾಂಚ್ಯಾ ಕಾಳೊಕಾಂತ್ ಆಮಿಂಯಿ ಸಾಸ್ಪೊಂಚ್ಯಾಕಿ. ಖಂಯ್‍ಗೀ ಉಜ್ವಾಡ್ ಫಾಂಕೊಂವ್ಚಿ ಲ್ಹಾನ್ ಪಣ್ತಿ ಜಾಂವ್ಚೆಂ ಪ್ರಯತ್ನ್ ಕರ್ಯಾಂ. ಉಜ್ವಾಡ್ ಫಾಂಕ್ತೊಲೊಚ್ಚ್ ಮುಣೊನ್ ಹರ್ದೆಂ ಬಡೊವ್ನ್ ಸಾಂಗೊಂಕ್ ಜಾಯ್ನಾ ತರೀ ತ್ಯಾ ದಿಶೆನ್ ಮೆಟಾಂ ಕಾಡ್ಚ್ಯಾಂತ್ ಕಿತೆಂಚ್ ಚೂಕ್ ನಾ.

ಆನಿ ತಶೆಂಚ್ ಜಾಂವ್ದಿ ಮುಣೊನ್ ಆಶೇವ್ನ್, ಕವಿ P.J,ಕ್ ಬೊರೆಂ ಮಾಗ್ತಾಂ ಆನಿ ಮ್ಹಾಕಾ ಸೈರಾಣ್ ಸಾಂಬಾಳ್ನ್ ವಯ್ಲೊ ವಿಮಾರ್ಸೊ ವಾಚ್‍ಲ್ಲ್ಯಾ ತುಮ್ಕಾಂ ಸರ್ವಾಂಕಿ ದೇವ್ ಬೊರೆಂ ಕರುಂ ಮುಣ್ತಾಂ.

ನಾನು ಮರೋಲ್, ತೊಟ್ಟಾಮ್