ಮ್ಹಜ್ಯಾ ಹಾಯ್ ಸ್ಕೂಲಾಚೆಂ ಶಿಕಾಪ್ ಪೊಂಪೈ ಇಸ್ಕೊಲಾಂತ್ ಜಾಲ್ಲೆಂ. 2001 ಇಸ್ವೆಂತ್ ಹಾಂವ್ ಆಟ್ವೆಕ್ ದಾಖಲ್ ಜಾತಾನಾ ತೀನ್ ವಿಭಾಗ್ ಆಸ್‌ಲ್ಲೆ. ಪೊಂಪೈ ಆಮ್ಚ್ಯಾ ವಾರಾಡ್ಯಾಂತ್ ನಾಂವ್ ವೆಲ್ಲೆಂ ಇಸ್ಕೊಲ್. ಶಿಕ್ಪಾ ಸಂಗಿಂ ಇತರ್ ಚಟುವಟಿಕೆಂಕ್ ಆನಿ ತಾಲೆಂತಾಂಕ್ ಆವ್ಕಾಸ್ ಮೆಳ್ತಾಲೊ ಜಾಲ್ಲ್ಯಾನ್ ಜಾಯ್ತಿಂ ಭುರ್ಗಿಂ ಪೊಂಪೈ ಇಸ್ಕೊಲಾಕ್ ವಿಂಚ್ತಾಲಿಂ. ಹ್ಯಾ ಇಸ್ಕೊಲಾಕ್ ಭರ್ತಿ ಜಾವ್ನ್ ಥೊಡ್ಯಾಚ್ ತೆಂಪಾನ್ ಹಾಂವ್ ಸರ್ವ್ ಟಿಚರಾಂಕ್ ವಳ್ಕಿಚೊ ಜಾಲ್ಲೊಂ. ಟಿಚರಾಂಕ್ ಮೊಗಾಚೆ ಆನಿ ಸದಾಂಚ್ ವಳ್ಕಿಚೆ ಜಾಯ್ಜೆ ತರ್ ಏಕ್‌ಚ್ ಶಿಕ್ಪಾಂತ್ ಬುದ್ವಂತ್ ಆಸಾಜಾಯ್ ನಾ ತರ್ ಪೊಕ್ರಿಪಣಾಂನಿ ನಾಂವ್ ವ್ಹರಿಜಾಯ್! ಮ್ಹಜೆ ಲಾಗಿಂ ಹಿಂ ದೊನೀ ತಾಲೆಂತಾಂ ಆಸ್‌ಲ್ಲಿಂ ಜಾಲ್ಲ್ಯಾನ್ ಸ್ಟಾಪ್ ರೂಮಾಚಿ ವಾಟ್ ಮಾಕಾ ಸದಾಂಚಿ ಜಾಲ್ಲಿ. ಸರ್ವ್ ತಾಲೆಂತಾಂಕ್ ಸದಾಂಚ್ ಪಾಟಿಂಬೊ ದೀವ್ನ್, ಸರ್ವ್ ಭುರ್ಗ್ಯಾಂಕ್ ಮೊಗಾಚಿ ಜಾಲ್ಲಿ ವಾಣಿ ಟಿಚರ್ ಮ್ಹಾಕಾಯಿ ಆಪ್ತ್ ಜಾಲ್ಲಿ. ಆಟ್ವಿ ಜಾವ್ನ್ ನೊವೆಕ್ ವರ್ಗ್ ಜಾತಾನಾ ವಾಣಿ ಟಿಚರಿನ್ ಮ್ಹಾಕಾ ಸ್ಕೂಲ್ ಪಾರ್ಲಿಮೆಂಟಾಚೊ ಸಭಾಪತಿ (Speaker) ಜಾವ್ನ್ ನೇಮಕ್ ಕೆಲ್ಲೊ. ಪೂಣ್ ಮ್ಹಜ್ಯಾ ಕ್ಲಾಸ್ ಟಿಚರಿನ್ ಮಾತ್ರ್, "ಹಣೆ ಬರಹ ಕೆಟ್ಟವ, ಮೂರ್ಖ, ಇದಕ್ಕೆ ಸ್ವಲ್ಪ ಪೈಸೆ ಕಡಿಮೆ, ಹಿ ಪ್ರಾಣಿಗೆ ಎಷ್ಟು ಹೇಳಿದರೂ ಆಷ್ಟೆ, ಭಾಷೆ ಇಲ್ಲದ ಪ್ರಾಣಿ, ಯಾವಾಗ ನೋಡಿದರೂ ತರಲೆ" ಮ್ಹುಣ್ ಸಭಾರ್ ಪಾವ್ಟಿಂ ಹಿಣ್ಸುಂಚೆಂ ಆಸ್‌ಲ್ಲೆಂ ಆನಿ ಮ್ಹಜಿ ಬಸ್ಕಾ ಬದ್ಲುಂಚಿ ಆಸ್‌ಲ್ಲಿ. ಏಕ್ ದೀಸ್ ಮ್ಹಾಕಾ ಕ್ಲಾಸ್ ಲೀಡರ್ ಕರ್ನ್ ಸೊಡ್ಲೊ! ತಶೆಂ ತರೀ ಸುದ್ರೊಂದಿ ಮ್ಹಣ್. ಹಾಂವ್ ಮಾತ್ರ್ ಖುಶಿ ಜಾಲ್ಲೊಂ, ದೋನ್ ಜವಾಬ್ದಾರಿ ಘೆವ್ನ್! ಕ್ಲಾಸ್ ಲೀಡರ್ ಆನಿ ಪಾರ್ಲಿಮೆಂಟ್ ಸ್ಪೀಕರ್!

ಧಾವೆಚಾ ಶಿಕ್ಪಾಕ್ ಸುರ್ವಾತ್ ದಿಲ್ಲಿ. ಶೈಕ್ಷಣಿಕ್ ವರ್ಸಾಚೆ ಸುರ್ವೆರ್ ಸ್ಕೂಲ್ ಪಾರ್ಲಿಮೆಂಟಾಚೆಂ ಮತದಾನ್ ಆಸ್‌ಲ್ಲೆಂ. ಸ್ಕೂಲ್ ಪೀಪಲ್ ಲೀಡರ್ (SPL) ಜಾಂವ್ಕ್ ಖುಶಿ ಆಸ್‌ಲ್ಲ್ಯಾ ಉಮೆದ್ವಂತ್ ಆಭ್ಯರ್ಥಿಂಕ್ ನೋಂದಾವಣ್ ಪತ್ರ್ ದೀಂವ್ಕ್ ಆಸ್‌ಲ್ಲೆಂ. ಮ್ಹಾಕಾ ಹ್ಯಾ ವಿಷಯಾಚೆರ್ ಆಸಕ್ತ್ ನಾತ್‌ಲ್ಲಿ ತರೀ ವಾಣಿ ಟಿಚರಿನ್ ಸ್ಟಾಪ್ ರೂಮಾಕ್ ಆಪವ್ನ್ ನೋಂದಾವಣ್ ಪತ್ರ್ ಭರ್ತಿ ಕರಯ್ಲೆಂ. ವೋಟ್ ಮಾಗೊಂಕ್ ವಚೊಂಕ್ ತಿಣೆಂಚ್ ಪಾಟ್ಲಾವ್ದಾರಿಂಕ್ ವಿಂಚುಂಕ್ ಕುಮೊಕ್ ಕೆಲಿ. ಮ್ಹಜೆಲಾಗಿಂ ಬಾರಾ ಪಾಟ್ಲಾವ್ದಾರಿ ಆಸ್‌ಲ್ಲೆ, ವೊಟಾಚಿ ಭಿಕ್ ಮಾಗ್ಚ್ಯಾಕ್! ಮತದಾನ್ ಚಲ್ಲೆಂ ಆನಿ ವೋಟ್ ಮೆಜುನ್ ಫಲಿತಾಂಶ್ ಯೆತಾನಾ ಚಡುಣೆಂ ಚಾರ‍್ಶಿಂ ಭುರ್ಗ್ಯಾಂ ಥಾವ್ನ್ ಮ್ಹಾಕಾ ಮೆಳ್‌ಲ್ಲೆ 12 ವೋಟ್ ಮಾತ್ರ್, ಮ್ಹಜೊಯ್ ಕುಡ್ಸುನ್! ಮ್ಹಾಕಾ ಸಲ್ವೊಣೆಚಿ ಶಿಣ್ ನಾತ್‌ಲ್ಲಿ, ಪೂಣ್ ಬಾರಾ ಪಾಟ್ಲಾವ್ದಾರಿ ಆಸ್‌ಲ್ಲ್ಯಾ ಎಕಾ ಅಭ್ಯರ್ಥಿಕ್ ಆಪ್ಣಾಚೊ ಸೆರ್ವೊನ್ ತೆರಾ ವೋಟ್ ಪುಣೀ ಮೆಳಾಜೆ ಆಸ್‌ಲ್ಲೆ ಮ್ಹುಣ್ ಚಿಂತಾನಾ ಇಲ್ಲೆಂ ಬೆಜಾರ್ ಜಾಲ್ಲೆಂ. ವಾಣಿ ಟಿಚರಿನ್ ಪರತ್ ಸ್ಟಾಪ್ ರೂಮಾಕ್ ಆಪವ್ನ್, SPL ವೋಟಾಂತ್ ಸಲ್ವಲ್ಯಾರ್ ವ್ಹಡ್ನಾ, ಎಕಾ ಬಳಿಷ್ಟ್ ಆಭ್ಯರ್ಥಿಚಿ ಗರ್ಜ್ ಅಮ್ಕಾಂ ಆಸಾ ಮ್ಹಣ್ ಸಾಂಗುನ್ ಮ್ಹಾಕಾ ತ್ಯಾ ಶೈಕ್ಷಣಿಕ್ ವರ್ಸಾಚೊ ಸಮಾಜ್-ವಿಜ್ಞಾನ್ ಸಂಘಾಚೊ ಆಧ್ಯಕ್ಷ್ ಕೆಲ್ಲೊ! ಮ್ಹಜಾ ಪೊಕ್ರಿಪಣಾಂಕ್ ಬಗ್ಲೆಕ್ ಕರುನ್, ಚುಕಿ ತಿದ್ವುನ್, ಮ್ಹಜೆ ಥಂಯ್ ಆಸ್‌ಲ್ಲ್ಯಾ ತಾಲೆಂತಾಂಕ್ ಜೀವ್ ದಿಲ್ಲ್ಯಾಂತ್ ವಾಣಿ ಟಿಚೆರಿಚೊ ಜಾಯ್ತೊ ಸಹಕಾರ್ ಆಸಾ. ತಿಕಾ ಹಾಂವ್ ಸದಾಂಚ್ ಋಣಿ. ಮ್ಹಜೆಂ ಪದ್ಯೋನ್ನತರ್ ಶಿಕಪ್ ಸಂಪ್‌ಲ್ಲ್ಯಾ ಉಪ್ರಾಂತ್ ಹಾಂವ್ ತಿಕಾ ಸುರತ್ಕಲ್ ಮೆಳ್‌ಲ್ಲ್ಯಾ ತವಳ್ ತಿಣೆ ಮ್ಹಜೆಂ ನಾಂವ್ ಸಾಂಗುನ್ ವಳೊಕ್ ಧರ್ತಾನಾ ಮ್ಹಾಕಾ ವ್ಹಡ್ ಸಂತೊಸ್ ಜಾಲ್ಲೊ!

ಮ್ಹಜ್ಯಾ ಇಸ್ಕೊಲಾಚ್ಯಾ ಜಿವಿತಾಂತ್ ಘಡ್‌ಲ್ಲೆಂ ಹೆಂ ಘಡಿತ್ ಲ್ಹಾನ್ ಜಾಂವ್ಕ್ ಪುರೊ. ಆಯ್ಚ್ಯಾ ರಾಜಕೀಯ್ ಕ್ಷೇತ್ರ‍ಾಚಿ ವಾಡಾವಳ್ ಆನಿ ತವಳ್ ತವಳ್ ಜಾಂವ್ಚಿ ಬದ್ಲಾವಣ್ ಪಳೆತಾನಾ ಮ್ಹಾಕಾ ಹ್ಯಾ ಘಡಿತಾಚೊ ಉಗ್ಡಾಸ್ ಧೊಸ್ಚೊ ಆಸಾ. ವಿಂಚೊನ್ ಆಯಿಲ್ಲ್ಯಾ ಜಾಯ್ತ್ಯಾ ಬರ‍್ಯಾ ಆಭ್ಯರ್ಥಿಂಕ್ ತಾಂಚಾ ಸಾಂಗಾತ್ಯಾನಿಂಚ್ ಆಡ್ ಪಾಂಯ್ ದಿಲ್ಲಿಂ ಘಡಿತಾಂ ಜಾಯ್ತಿಂ ಅಸಾತ್! ರಾಜಕಿಯಾಕ್ ಮಾತ್ರ್ ಸೀಮಿತ್ ಕರ್ನಾಸ್ತಾನಾ ಆಮ್ಚ್ಯಾ ಭೊಂವಾರಿಂ ಪಳೆಲೆಂ ತರೀ ಸಾಂಗಾತ್ಪಣಾಚೊ ನಾಟಕ್ ಖೆಳೊನ್/ದಾಕವ್ನ್, ಆವ್ಕಾಸ್ ಮೆಳ್ತಾನಾ ಸವ್ಕಾಸ್ ವಾರೆಂ ವಾಳ್ಚ್ಯಾ ಬಗ್ಲೆಕ್ ಸತ್ರಿ ಘುಂವ್ಡಾಯ್ಲಿಂ ಘಡಿತಾಂ ಜಾಯ್ತಿಂ ಪಳೆಂವ್ಕ್ ಮೆಳ್ತಾತ್. ಆತಾಂಚಿ ಪರಿಸ್ಥಿತಿ ಸೊಡ್ಯಾಂ ಆಮ್ಚ್ಯಾ ಸೊಡ್ವಾಣ್ದಾರಾಕೀ ವಿಕ್ರಿತ್ ಕೆಲ್ಲೊ ಬಾರಾಂತ್ಲ್ಯಾ ಎಕ್ಲ್ಯಾನ್‌ಚ್ ನೈಂಗೀ!

ಸನ್ನು ನಿಡ್ಡೋಡಿ