ಹಾವೆಂ ಬರೊಂವ್ಚ್ಯಾ ಆನಿ ವಾಚ್ಚ್ಯಾ ಚಾರ್ ಆಕ್ಷರಾಂಕ್ ಬುನ್ಯಾದ್ ಪಡ್‌ಲ್ಲಿ ಘರಾ ಲಾಗ್ಶಿಲ್ಯಾ ಇಸ್ಕೊಲಾಂತ್. ಕಿರೆಂ ಫಿಗರ್ಜೆಚಾ ಆಡಳ್ತ್ಯಾಖಾಲ್ ಆಸ್‍ಲ್ಲ್ಯಾ ಹ್ಯಾ ಇಸ್ಕೊಲಾಂತ್ ಹಳ್ಳೆಚ್ಯಾ ಭುರ್ಗ್ಯಾಂಕ್ ಪಾಂಚ್ವಿ ಪರ್ಯಾಂತ್ ಶಿಕ್ಚೊ ಆವ್ಕಾಸ್ ಆಸ್‍ಲ್ಲೊ. ಕುದ್ರಿಪದವು-ಸಂಕಲಕರಿಯ ರಸ್ತ್ಯಾರ್ ಮೆಳ್ಚ್ಯಾ ’ಪಟ್ಟೆ’ ಮ್ಹಳ್ಳ್ಯಾ ಕಡೆನ್ ಆಸ್ಚೆಂ ಇಸ್ಕೊಲ್ ಪೊಂಪೈ ಪ್ರಾಥಮಿಕ ಶಾಲೆ, ಏಳಿಂಜೆ ಪಟ್ಟೆ. ಹೆಂ ಇಸ್ಕೊಲ್ ’ಪಟ್ಟೆ ಶಾಲೆ’ ಮ್ಹಣ್ ಗಾಂವ್ಚ್ಯಾಕ್ ವಳ್ಕಿಚೆಂ. 1994 ಇಸ್ವೆಂತ್ ಮ್ಹಜ್ಯಾ ವ್ಹಡ್ ಭಯ್ಣಿಚೆ ಹಾತ್ ದರುನ್ ಹ್ಯಾ ಇಸ್ಕೊಲಾಚಿಂ ಮೆಟಾಂ ಚಡ್‍ಲ್ಲೊಂ. ಹಾತಿಂ ಕಡ್ಡಿ ಘೆವ್ನ್ ಸ್ಲೇಟಿಚೆರ್ ಗಿಚ್ಚುನ್ ಆಸ್‍ಲ್ಲ್ಯಾ ಮ್ಹಜ್ಯಾ ಆಕ್ಷರಾಂಕ್ ಆಕಾರ್ ದೀವ್ನ್ ಆಕ್ಷರಾಂಚಿ ವಳಕ್ ದಿಲ್ಲಿ ಸುಜಾತಾ ಟಿಚರಿನ್. ಹ್ಯಾ ಇಸ್ಕೊಲಾಂತ್ ಲಿಸಾಂವಾ ಸಂಗಿಂ ಲ್ಹಾನ್ ಪ್ರಾಯೆರ್ ಶಿಕೊಂಕ್ ಮೆಳ್‌ಲ್ಲಿ ಶಿಸ್ತ್ ವರ್ತಿ. ಜಿಣ್ಯೆ ಪಾನಾಚಾ ಆಂಕ್ಡ್ಯಾರ್ ಹ್ಯಾ ಇಸ್ಕೊಲಾಚೆಂ ನಾಂವ್ ಆನಿ ಇಸ್ಕೊಲಾವಿಶಿಂ ಕಾಂಯ್ ಇಲ್ಲೆಂ ಲಿಕ್ಲೆಂ ನಾಂ ತರ್ ಸೊಭ್ ಯೆಂವ್ಚಿಚ್ ನಾ!

ಘರಾ ಥಾವ್ನ್ ಇಸ್ಕೊಲಾಕ್ ಪಾಂಯ್ ವಾಟ್. ಸಕಾಳಿಂಚೆ ಪೆಜೆ ಜೆವಾಣ್ ಜಾವ್ನ್, ಮಾಡಾಂ ಮಾಡಿಯಾಂಚಿಂ ತೊಟಾಂ, ಗಾದ್ಯಾ ಮೆರೊ, ಗುಡೊ, ಪಾವ್ಸಿಲ್ಯಾ ದಿಸಾನಿಂ ಉದಾಕ್ ವಾಳ್ಚೆ ತೋಡ್, ವ್ಹಾಳಾಂ ಉತ್ರೊನ್ ಇಸ್ಕೊಲಾಕ್ ವೆಚಿ ಮಜಾ ವೆಗ್ಳಿಚ್. ಕರ‍್ಟಾಂ, ಭೆಣ್ಸಾಂ, ಗೊಂಯ್ಟಾಂ, ಬಬ್ಳೆರಾಂ, ಗಣೆರಾಂ, ಸುರ್ಣಾಂ, ಸಾಂಫೆರಾಂಚಿ ರೂಚ್, ದರಾಂಬೆ, ಬಿಂಡಾ, ಚಿಂಚಾಂಚಿ ಆಮ್ಸಾಣ್ ಸಯ್ತ್ ಆಮ್ಕಾಂ ಪಸಂದ್. ಎಕಾಚ್ ಗಾಂವ್ಚಿಂ ಸರ್ವ್ ಆಮಿ ಸಾಂಗಾತಾ ಮೆಳೊನ್ ಹಾತಾಕ್ ಹಾತ್ ಮೆಳೊನ್ ಇಸ್ಕೊಲಾಕ್ ಚಮ್ಕಲ್ಲಿ ವಾಟ್, ಇಸ್ಕೊಲಾ ಲಾಗ್ಸಾರ್ ಆಸ್‌ಲ್ಲೆಂ ಆಚಾರಣ್ಣಾಚೆಂ “ಕೊಡ ಪಟ್ಟೆ”, ಉದ್ಕಾ ಆಸ್ರ್ಯಾಕ್ ಏಕ್ ಬೋರ್‌ವೆಲ್ ಆನಿ ಚಿಕ್ಕಣ್ಣಾಚೆಂ ತಳೆಂ, ತೋಳಾರ್ ಮಾಸ್ಟ್ರಾಚೆಂ ಆಂಬ್ಯಾ ತೋಟ್ ಆನಿ ಕೊಬಾಂ ತೋಟ್, ಇಸ್ಕೊಲಾ ಲಾಗಿಂಚ್ ಆಸ್ಚೆಂ ಮಿಂಗೆಲಾಮಾಚೆಂ ಘರ್, ಸಾಂಜೆರ್ ಖೆಳ್ಚೆಂ ಬೊಟ್ಟು, ಪಟ್ಟೆ ದೇವಸ್ಥಾನ ಸರ್ವ್ ಆಜ್ ಉಗ್ಡಾಸಾಂತ್ ಮಾತ್ರ್. ಆಜ್ ಹ್ಯಾ ಇಸ್ಕೊಲಾಚ್ಯಾ ಬಾಗ್ಲಾಂಕ್ ಬಿಗಾಂ ಪಡ್ಲ್ಯಾಂತ್!

ಶಿಕ್ಪಾ ಸಂಗಿಂ ಹ್ಯಾ ಇಸ್ಕೊಲಾಂತ್ ಹೆರ್ ಜಾಯ್ತ್ಯಾ ಕಾಮಾಂಕ್ ಆವ್ಕಾಸ್ ಮೆಳ್ಳಾ. ಮಾಡಾಂಕ್ ಉದಾಕ್, ಸುಡೆತಿಂಚೆ ಇರ್ ಕಾಡ್ನ್ ಸಾರ್ಣಿ ಕರುಂಕ್, ಖೊಲಿಯೊ ಆನಿ ಬೊಟ್ಟುಂತ್ಲೆಂ ಶೆಣ್ ಹಾಡ್ನ್ ಮಾಡಾಂಕ್ ಘಾಲುಂಕ್, ಫುಲಾಂ ಝಡಾಂ ಲಾಂವ್ಕ್, ಇಸ್ಕೊಲಾಚಿ ನಿತಳಯ್, ಭಂವ್ತಾಣಿಚೆಂ ಕಸ್ತಳ್ ಸಂಗಿಂ ಘಾಲುನ್ ಸುರ್ಮುಣ್ ದೀಂವ್ಕ್ ಆಶೆಂ ಇಸ್ಕೊಲಾಚಾ ವ್ಹಡಿಲಾಂ ಸಂಗಿಂ ಮೆಳೊನ್ ಆನಿ ತಾಂಚಾ ಮಾರ್ಗದರ್ಶನಾನ್ ಕೆಲ್ಲಿಂ ಕಾಮಾಂ ಥರಾವಳ್. ಹಳ್ಳೆಚ್ಯಾ ಇಸ್ಕೊಲಾಂತ್ ಶಿಕ್ತನಾ ಹಳ್ಳೆಚಿಚ್ ಶೈಲಿ ಖೆಳಾಂತ್, ಶಿಕ್ಪಾಂತ್ ಆನಿ ಕಾರ್ಯಾಂತ್. ಮುಖೆಲ್ ಶಿಕ್ಷಕಿ ಪ್ಲೊಸ್ಸಿ ಟೀಚರ್, ಲೀನ ಟೀಚರ್ ಆನಿ ತಾಂಕಾಂ ಸಾಂಗಾತ್ ದೀಂವ್ಕ್ ಸುಜಾತಾ ಟೀಚರ್. ಹ್ಯಾ ಇಸ್ಕೊಲಾಂತ್ ಕರ್ಚಿಲ್ಲೆ ಪಾಂಚ್ ವರ್ಸಾಂಚೆ ಶಿಕ್ಪಾಚೆ ದೀಸ್ ನಿಯಾಳ್ನ್ ಉಗ್ಡಾಸಾಚ್ಯೊ ವೊಣದಿ ಬಾಂದುಂಕ್ ಸಕನ್, ಪೂಣ್ ಮುಳಾವ್ಯಾ ಶಿಕ್ಪಾಕ್ ಬುನ್ಯಾದ್ ಪಡ್‌ಲ್ಲ್ಯಾ ಹ್ಯಾ ಇಸ್ಕೊಲಾಚೆಂ ಕೊಸಳ್‌ಲ್ಲೆಂ ಪಾಕೆಂ ಪರತ್ ಉಬಾರುಂಕ್ ಸಾಧ್ಯ್ ಜಾಂವ್ಚೆಂ ನಾ!

ಇಸ್ಕೊಲಾಚೆಂ ಬಾಂದಪ್ ಆಜ್ ಬೊಂವ್ತಿ ವಾಡೊನ್ ಯೆಂವ್ಚಿಂ ಕಾಂಟ್ಯೆ ಝಡಾಚಿಂ ಭೊಲಿಂ ಗ್ರಾಸುಂಕ್ ಲಾಗ್ಲ್ಯಾಂತ್. ಹ್ಯಾ ಇಸ್ಕೊಲಾಚ್ಯಾ ವಾಟೆರ್ ಚಮ್ಕತಾನಾ ಜಿಣ್ಯೆಚಿಂ ರೊದಾಂ ಪಾಟಿಂ-ಪಾಟಿಂ ಘುಂವ್ತಾತ್ ಆನಿ ವಿಷಿಷ್ಠ್ ಚಿಂತ್ಪಾ ಸಾಗೊರಾಂತ್ ಬುಡಾಯ್ತಾತ್. ತ್ಯಾ ಇಸ್ಕೊಲಾ ಸಂಗಿಂ ಆಸ್ಚೊ ಬಾಂಧ್ ವೆಗ್ಳೊಚ್. ಹೆಂ ವಾಚ್ತಾನಾ ತುಮ್ಕಾಂಯೀ ತುಮ್ಚ್ಯಾ ಪ್ರಾಥಮಿಕ್ ಇಸ್ಕೊಲಾಚೊ ಉಗ್ಡಾಸ್ ಯೆತಲೊಚ್!

ಸನ್ನು ನಿಡ್ಡೋಡಿ