ಹಾವೆಂ ಮ್ಹಜ್ಯಾ ಲಾನ್ಪಣಾರ್ ಆಯ್ಕಲ್ಲ್ಯಾ ಘಡಿತಾಂ ಪಯ್ಕಿ ಕುಲೆ ತಪ್ಪು ಲಾಗ್ಚೆಂ ಘಡಿತ್ ಏಕ್. ಹೆಂ ಕುಲೆ ತಪ್ಪು ಮ್ಹುಳ್ಳ್ಯಾರ್ ಕಿತೆಂ ಮುಣೊನ್ ಹಾಂವ್ ನೆಣಾಂ. ವೇಳ್ ವಿಬಾಡುನ್ ಹೆವ್ಶಿನ್ ತೆವ್ಶಿನ್ ಚಲ್ತಾನಾ ಜಾಯ್ತೆಪಾವ್ಟಿಂ ಮಾಲ್ಘಡ್ಯಾನಿಂ ವಿಸಾರ್ಚೆಂ ಅಸಾ. “ಕಿತೆರೆಂ ಕುಲೆ ತಪ್ಪು ಲಾಗ್‌ಲ್ಲ್ಯಾಬರಿಂ ಭೊಂವ್ತಾಯ್?!" ಕುಲೆ ತಪ್ಪು ಲಾಗ್ಲ್ಯಾರ್ ಭೊಂವ್ತಾತ್ ಖಂಯ್, ಕಿತೆಂಚ್ ಕಳಾನಾಸ್ತಾನಾ, ವಾಟ್ ಮೆಳಾನಾಸ್ತಾನಾ, ಭಂವ್‌ಲ್ಲ್ಯಾ ಕಡೆನ್‍ಚ್ ಪರ್ತೆಕ್ ಪರ್ತೆಕ್ ಭಂವೊನ್ ಆಸ್ಚೆಂ!.

ಮ್ಹಜೊ ಆಬ್ (ಮಮ್ಮಿಚೊ ಬಾಬ್) ನಿಡ್ದೋಡಿ ಫಿರ್ಗಜೆಚಾ ಭೊಂವಾರಾಂತ್ ಖಡ್ಪಾರ್ ಜೆನಿಯಾಮ್ ಮ್ಹಣ್ ಸಭಾರಾಂಕ್ ವಳ್ಕಿಚೊ. ಕ್ರಷಿ ತಾಚ್ಯಾ ಜಿವಿತಾಚೊ ಏಕ್ ವಾಂಟೊ. ಕ್ರಷಿ ಕರ್ತಾನಾ ರಾನ್ವಟ್ ಮನ್ಜಾತಿಂ ಥಾವ್ನ್ ಬಾಧಕ್ ಜಾಂವ್ಚೆಂ ಆಡಾಂವ್ಚ್ಯಾಕ್ ಉರ‍್ಲಾಂ, ಆಟ್ಕಿಲಾಂ, ಫಾಸ್ ಮಾಂಡ್ತಾಲೊ. ಆಬಾಚೆಂ ನಶಿಬ್ ಬರೆಂ ತರ್ ಆಟ್ಕಿಲಾಂತ್ ಸೊಂಸೊ ನಾ ತರ್ ಜಾಯ್ತೆ ಪೌವ್ಟಿಂ ಕೊಳಿಂದ್ರ್ ಸಾಂಪಡ್ತಲೊ. ತ್ಯಾ ಎಕಾ ದಿಸಾ ತರ‍್ಕಾರೆಚಿ ರೂಚ್ ಚಾಕುಂಕ್ ಆಯಿಲ್ಲೊ ಸೊಂಸೊ ಆಬಾಚ್ಯಾ ಬರ‍್ಯಾ ನಶಿಬಾಕ್ ಆಟ್ಕಿಲಾಂತ್ ಸಾಂಪ್ಡೊನ್, ಆಬಾಚ್ಯಾ ಹಾತಾಂತ್ ರುಚಿಕ್ ಮಸಾಲಾಂತ್ ಭರ್ಸೊನ್, ರಾಂದ್ಣಿ ಉಜ್ಯಾರ್, ಮಾತ್ಯೆ ಕುಂಡ್ಲ್ಯಾಂತ್ ಶಿಜ್‌ಲ್ಲೊ. ಮ್ಹಜೆಂ ಘರ್ ಲಾಗಿಂಚ್ ಆಸ್‌ಲ್ಲ್ಯಾನ್ ಆಬ್ ಇಲ್ಲೆಂ ಸೊಂಸ್ಯಾಚೆಂ ಮಾಸ್ ಘೆವ್ನ್ ಆಮ್ಗೆರ್ ಯೆಂವ್ಚ್ಯಾ ವೆಳಾ ಆಬಾಕ್ ಕುಲೆ ತಪ್ಪು ಲಾಗ್ಲೊ! ಆಬ್ ಗುಡ್ಯಾರ್ ಭೊವೊನ್‍ಚ್ ಆಸಾ ಪರ್ತೇಕ್ ಪರ್ತೇಕ್. ಕೊಣೆ ಎಕ್ಲ್ಯಾನ್ ಪಳೆವ್ನ್ ಆಬಾಕಡೆ ಉಲಯ್ತಾ ಮ್ಹುಣಸರ್!

ಮ್ಹಾಕಾ ಶಿಕಯ್ಲಿ ಟಿಚರ್ ಇಸ್ಕೊಲಾಚ್ಯಾ ಥೊಡ್ಯಾ ಭುರ್ಗ್ಯಾಂಕ್ ಘೆವ್ನ್ ಕಾನೆಶ್ಮಾರಿ ಕಾಡುಂಕ್ ಘೆಲ್ಲಿ. ದೊನ್ಪಾರಾಂಚ್ಯಾ ವೊತಾಕ್ ತಿಕಾಯಿ ಕುಲೆ ತಪ್ಪು ಲಾಗ್‍ಲೊ. ಟಿಚರ್ ಮುಕ್ಲ್ಯಾನ್ ಆನಿ ಭುರ್ಗಿಂ ಪಾಟ್ಲ್ಯಾನ್! ವಾಟ್ ಮೆಳನಾಸ್ತಾನಾ ಭೊಂವ್ತಲಿಂ ಖಂಯ್ ,  ಕೋಣೆ ಎಕ್ಲ್ಯಾನ್ ಯೇವ್ನ್ ಉಲಾಯ್ತಾ ಮ್ಹುಣಸರ್!

ಘಡಿತಾಂ ಅಯ್ಕೊನ್ ಏಕ್ ವಿಷಯ್ ಸಮ್ಜಲ್ಲೊಂ, ಕೊಣೆಂಯಿ ಲಾಗಿಂ ಯೇವ್ನ್ ಉಲಯ್ಲ್ಯಾರ್ ಲಾಗ್‌ಲ್ಲೊ ಕುಲೆ ತಪ್ಪು ಸುಟ್ತಾ ಮ್ಹುಣೊನ್. ಪೂಣ್ ಕುಲೆ ತಪ್ಪು ಮ್ಹಳ್ಯಾರ್ ಕಿತೆಂ? ಮ್ಹಾಕಾಯಿ ಭ್ಯೆಂ ಮ್ಹಜ್ಯಾ ಲಾನ್ಪಣಾರ್, ಕುಲೆ ತಪ್ಪು ಲಾಗತ್ ಮ್ಹುಣೊನ್. ಮಮ್ಮಿಲಾಗಿಂ ವಿಚಾರ್ತಾನಾ ಮಮ್ಮಿನ್ ಸಾಂಗ್ಲೆಂಕೀ “ಕುಲೆ ತಪ್ಪು” ಮ್ಹುಳ್ಯಾರ್ ಎಕಾ ಜಾತಿಚೊ ಪಾಲೊ, ಕಂರ‍್ಟಾಂ, ಗಣೆರಾಂ, ಬಬ್ಳೆರಾಂ, ಭೆಣ್ಸಾಂ ಖಾಂವ್ಕ್ ಮ್ಹಣ್ ಬೊಲ್ಯಾಂತ್ ಹಾತ್ ಘಾಲಿನಾಕಾ ಕುಲೆ ತಪ್ಪು ಲಾಗ್ತಾ. ತುಳು ಬಾಷೆಂತ್ “ತಪ್ಪು” ಮ್ಹಳ್ಯಾರ್ ’ಸೊಪ್’(ಪಾಲೊ) ಮ್ಹಣ್ ಕಳಿತ್ ಆಸ್‍ಲ್ಲ್ಯಾ ಹಾಂವೆ ವ್ಹಯ್ ಮ್ಹುಣೊನ್ ಚಿಂತ್ಲೆಂ. ಮಮ್ಮಿಕ್ ಭ್ಯೆಂ ಆಸ್‌ಲ್ಲೆಂ ಜಿವ್ದಾಳಿಂಚೆಂ. ಇಸ್ಕೊಲಾಚಾ ವಾಟೆರ್ ಹಾವೆಂ ಬೊಲ್ಯಾನಿಂ ಲಿಪೊನ್ ಬಸೊನ್ ಖೆಳ್ಚೆಂ ಆನಿ ಮೆಳ್ಚಿಂ ಫೊಳಾಂ ವಿಂಚುನ್ ಖಾಂವ್ಚಿಂ ತಿಯೀ ಜಣಾಂ. ಪೊಕ್ರಿಪಣಾಚಿಂ ಕಾಮಾಂ ರಾವುಂಕ್ ತಿಣೆ ಜಾಯ್ತೆಂ ಪ್ರಯತ್ನ್ ಕೆಲ್ಲೆಂ. ಪೂಣ್ ಬೊಲ್ಯಾನಿಂ ಆಸ್ಚೊ”ಕುಲೆ ತಪ್ಪು” ಲಾಗ್ತಾ ಮ್ಹಳ್ಳ್ಯಾ ಭಿಂಯಾನ್, ತಿಕಾ ಆಧಾರ್ ಜಾವ್ನ್ ಹಾವೆಂ ಗೊಟ್ಯಾಂತ್ (ಹಾಟಿಯೆಕ್) ಸಾರ‍್ಯಾಕ್ ಗರ್ಜೆಚೊ ಸೊಪ್ ಹಾಡ್ಚ್ಯಾ ಕಾಮಾಕ್ ಕಾತರ್ ಪಡ್‌ಲ್ಲಿ.

ಥೊಡ್ಯಾ ದಿಸಾಂ ಉಪ್ರಾಂತ್ ಮಮ್ಮಿನ್ ಪರತ್ ಸಮ್ಜಯ್ಲೆಂ, ಕುಲೆ ತಪ್ಪು ಮ್ಹಳ್ಯಾರ್ ಸೊಪ್/ಪಾಲೊ ನೈಂ, ತೆಂ ಏಕ್ ವಾಯ್ಟ್ ವಾರೆಂ!

ವರ್ಸಾಂ ವೀಸ್ ಉತ್ರಾಲಿಂ ಹ್ಯಾ ಘಡಿತಾಕ್. ಮಾಕಾ ಮಾತ್ರ್ ಆಜ್ ಮ್ಹಣಸರ್ ಕುಲೆ ತಪ್ಪು ಮ್ಹುಳ್ಳ್ಯಾರ್ ವಾಯ್ಟ್ ವಾರೆಂಚ್ ಮ್ಹಣ್ ಕಳಿತ್! ತುಮ್ಕಾಂ ಕಳಿತ್ ಆಸಾ ತರ್ ಮ್ಹಾಕಾ ಇಲ್ಲೆಂ ತಿಳ್ಸಿಯಾ.

ಸನ್ನು ನಿಡ್ಡೋಡಿ