ಮ್ಹಜ್ಯಾ ಶಿಕ್ಪಾ ಜಿಣ್ಯೆಂತ್ ಲಾಂಬ್ ಆವ್ದೆಕ್ ಸಾಂಗಾತ್ ದಿಲ್ಲೊ ಮ್ಹಜೊ ಮಿತ್ರ್ ಮೆಲ್ವಿನ್ ಪಿಂಟೊ. ಮ್ಹಜೆಂ ಘರ್ ದರೊಡೆ ಹಿತ್ಲಾಂತ್, ತಾಜೆಂ ಸೊಣೆಲ್. ಆಮಿ ಪಯ್ಲ್ಯಾ ಕ್ಲಾಶಿಂತ್ ಥಾವ್ನ್ ಡಿಗ್ರಿ ಪರ್ಯಾಂತ್ (Final B'Com) ಸಾಂಗಾತಾ, ಕಿರೆಂ ಇಗರ್ಜೆಚ್ಯಾ ಆಡಳ್ತ್ಯಾಖಾಲ್ ಆಸ್‌ಲ್ಲ್ಯಾ ಇಸ್ಕೊಲಾಂತ್ ಶಿಕ್‌ಲ್ಲ್ಯಾಂವ್. ಜಾಯ್ತ್ಯಾ ಪೊಕ್ರಿಪಣಾಂಕ್ ಆಮಿಂ ಸಾಂಗಾತಾ ಹಾತ್ ದಿಲಾ! ತವಳ್ ತವಳ್ ಮೆಳ್ತಾನಾ ಆತಾಂಯ್ ಜಾಯ್ತೆ ಪೌವ್ಟಿಂ ಹ್ಯಾ ಪೊಕ್ರಿಪಣಾಂಚೊ ಉಗ್ಡಾಸ್ ಕಾಡ್ನ್ ಹಾಸ್ತಾಂವ್. ಜಿಣ್ಯೆ ಪಾನಾಂ ಬರಯ್ತಾನಾ ಮ್ಹಜ್ಯಾ ಉಗ್ಡಾಸಾಕ್ ಆಯ್ಲೆಂ ಏಕ್ ಘಡಿತ್ ಹಾಂಗಾಸರ್......

ಪಾಂಚ್ವ್ಯಾ ಕ್ಲಾಶಿಂತ್ ಶಿಕ್ತೆಲ್ಯಾಂವ್. ಆಮ್ಚ್ಯಾ ಪಟ್ಟೆ ಇಸ್ಕೊಲಾಂತ್ ಪಾಂಚ್ವಿ ಕ್ಲಾಸ್ ವೆರಾಂಡಾಂತ್. ಚಾರಾಂಯಿ ಕುಶಿಂನಿ ಪಾಚ್ವೆಂ ಪರಿಸರ್, ಪ್ರಶಾಂತ್ ಜಾಗೊ, ನಿತಳ್ ವಾರೆಂ, ಎಕಾ ಉತ್ರಾನ್ ಸಾಂಗೊಂ ತರ್ ಆಪುರ್ಬಾಯೆಚೊ ಜಾಗೊ. ತೊ ಭೊಂವರ್ ಥಂಯ್ಸರ್ ಶಿಕ್ಲೆಲಿಂ ಮಾತ್ರ್ ವಿಸ್ರೊಂಚಿಂ ನಾಂತ್. ಸಾಧರಣ್ ಧನ್ಪರಾಂಚೊ ವೇಳ್. ಏಕ್ ಸ್ತ್ರೀ ಪುರಾಸಣೆನ್ ಆಮ್ಚ್ಯಾ ಇಸ್ಕೊಲಾ ತೆವ್ಶಿಂ ಆಯ್ಲಿ ಆನಿ ಪಿಯೆಂವ್ಕ್ ಉದಕ್ ಮಾಗಲಾಗ್ಲಿ. ತಿ ಥಕ್‌ಲ್ಲಿ, ಪುರಾಸಾಣೆನ್ ಆಯಿಲ್ಲ್ಯಾ ತಿಕಾ ಟೀಚರಿನ್ ಗಜಾಲ್ ಕಿತೆಂ ಮ್ಹಣ್ ವಿಚಾರ್ತಾನಾ, ವೊಲಾಂಬಾಯ್ ಘಾಲ್ಲೆಂ ಆಪ್ಣಾಚೆಂ ಗೈರುಂ (ಗಾಯ್) ಚುಕೊನ್ ಧಾಂವ್ಲಾಂ ಮ್ಹುಳ್ಳಿ ಗಜಾಲ್ ಸಮ್ಜಲಿ. ಗೈರಾಕ್ ಸೊಧುನ್ ಗುಡೆ ಭೊಂವುನ್, ವೊತಾಕ್ ಥಕ್‌ಲ್ಲಿ ತಿ ಕಾಂಯ್ ತರೀ ಇಲ್ಲೊ ವಿಶೆವ್ ಮೆಳತ್ ಮ್ಹಣ್ ಇಸ್ಕೊಲಾಕ್ ಪಾವ್‌ಲ್ಲಿ. ಇಸ್ಕೊಲಾ ಮುಕ್ಲ್ಯಾ ಗುಡ್ಯಾರ್ ವಚುನ್ ಸೊಧ್ಚಿ ತಿಕಾ ಗರ್ಜ್ ಮ್ಹಣ್ ಭೊಗ್ತಾಲೆಂ ಜಾವ್ಯೆತ್!

ಇಸ್ಕೊಲಾ ಮುಕ್ಲೊ ಗುಡೊ, ’ಬೊಟ್ಟು’. ತಿ ಸ್ತ್ರೀ ಥಕ್‌ಲ್ಲಿ ಜಾಲ್ಲ್ಯಾನ್, ಬೊಟ್ಟುಕ್ ವಚೊನ್ ಗೈರುಂ ಅಸಾಗೀ ಮ್ಹಣ್ ಪಳೆಂವ್ಕ್ ಪಾಂಚ್ವೆ ಕ್ಲಾಸಿಚ್ಯಾ ದೋಗ್ ಮುಖೆಲ್ಯಾಂಕ್ ಟಿಚರಿನ್ ವಿಂಚ್ಲೆಂ! ಹಾಂವ್ ಆನಿ ಮೆಲ್ವಿನ್ ಪಿಂಟೊ! ಹಾತಿಂ ಏಕ್ ಆಡಾರ್ ಘೆವ್ನ್ ಬೊಟ್ಟುಚಿ ವಾಟ್ ಧರ‍್ಲಿ. ಕಾಂಯ್ ಇಲ್ಲಿ ವಾಟ್ ರಸ್ತ್ಯಾರ್ ಚಲೊನ್ ಬೊಟ್ಟುಕ್ ರಿಗ್ಲ್ಯಾಂವ್. ಆಮ್ಚ್ಯಾ ಉಲೊಣ್ಯಾಂತ್ ಭ್ಯೆಂ ಎದೊಳ್‌ಚ್ ಉಚಾರ್ನ್ ಜಾಲ್ಲೆಂ. ದನ್ಪಾರಾಂಚೊ ವೇಳ್, ಗುಡ್ಯಾಚಿ ಸುವಾತ್, ಆಮ್ಚ್ಯಾ ಕಾನಾನಿಂ ಆಯ್ಕಾಲ್ಲ್ಯಾ ಕಾಣಿಯಾಂಕ್ ಹಳೂ ಜೀವ್ ಯೆತಾಶೆಂ ಭೊಗ್ಲೆಂ. ಇಲ್ಲೆಂ ಚಲೊನ್ ಮುಕಾರ್ ಪಾವ್ತಾನಾ, ಉತಳ್ ಜಾಗ್ಯಾರ್ ರೇಂವ್! ಉಗ್ಡಾಸಾಕ್ ಆಯ್ಲಿಂ ಉತ್ರಾಂ, ಮೆಲ್ಲಿಂ ರೇಂವ್ ಉಡಾಯ್ತಾತ್! "ಹಾಂಗಾ ರೇಂವ್ ಅಸಾರೇ, ಮೆಲ್ಲಿಂ ರೇಂವ್ ಉಡಯ್ತಿತ್" ಮ್ಹಣ್ ಆಮಿಂ ಪಿಡ್ಚ್ಯೋ! ಇಸ್ಕೊಲಾಕ್ ಪಾಟಿಂ ಪಾವೊನ್ ಬೊಟ್ಟುಂತ್ ಗೈರುಂ ನಾಂ ಮ್ಹಣ್ ಕಳಿತ್ ಕೆಲೆಂ!

“ಭುರ್ಗ್ಯಾಂ ಮುಕಾರ್ ತರ್ಕ್ ಕೆಲ್ಲಿಂ ಯಾ ಉಲಯ್ಲಿಂ ಘಡಿತಾಂ ಭುರ್ಗ್ಯಾಂಚ್ಯಾ ಮತಿಂತ್ ಕಸಲೊ ಪ್ರಭಾವ್ ಘಾಲ್ತಿತ್” ಮ್ಹಣ್ಚ್ಯಾಕ್ ಹೆಂ ಘಡಿತ್ ಏಕ್ ನಿದರ್ಶನ್ ಜಾವ್ನಾಸಾ. ಮೆಲ್ಲ್ಯಾಂಚೊ ಕಾಣಿಯೊ, ದನ್ಪಾರಾಂ ವೊತಾಕ್ ರೇಂವ್ ಉಡೊಂವ್ಚಿ, ಮೆಲ್ಲ್ಯಾಂಚೊ ಚುಡಿ. ಆಶೆಂ ಆಯ್ಕಾಲ್ಲ್ಯಾ ಆಮ್ಚ್ಯಾ ನೆಣ್ತ್ಯಾ ಮತಿಂತ್ ಭ್ಯೆಂ ಅಸ್‍ಲ್ಲೆಂ. ಪಾವ್ಸಾ ವೆಳಾರ್ ಉದ್ಕಾ ಸಂಗಿಂ ವಾಳೊನ್ ಆಯಿಲ್ಲಿ ರೇಂವ್ ಪಳೆವ್ನ್ ಭಿಯೆಲ್ಲ್ಯಾಂವ್!

ತಿಜೆಂ ಗೈರುಂ ಮೆಳ್ಳೆಂ ಯಾ ನಾ?! ಉಪ್ರಾಂತ್ಲ್ಯಾ ದಿಸಾಂನಿ ತಿ ಸ್ತ್ರೀ ಮೆಳ್ಳಿ ತರೀ ವಿಚಾರುಂಕ್ ಧಯ್ರ್ ಪಾವ್ಲೆಂ ನಾಂ.

ಸನ್ನು ನಿಡ್ಡೋಡಿ.