ಜಿಣ್ಯೆ ಪಾನಾಂಚೊ ಪಯ್ಲೊ ಆಂಕ್ಡೊ ಬರೊವ್ನ್ ಕಾಡ್‌ಲ್ಲೊ. ಬರ‍್ಯೊ ಪ್ರತಿಕ್ರಿಯಾ ಮೆಳ್‌ಲ್ಲ್ಯೊ. ಮ್ಹೊಜ್ಯಾ ಮೌಶೆನ್ ಮಾತ್ರ್ ಬೊಜಾ ವಿಶ್ಯಾಂತ್ ಕೆದ್ನಾಂ ಬರೊಂವ್ಕ್ ಮ್ಹುಣೊನ್ ವಿಚಾರ್ ಕೆಲೊ. ತಿ ಮಮ್ಮಿಚಿ ದಾಕ್ಟಿ ಭಯ್ಣ್. ತಿಕಾ ಆಮಿಂ ಬೇಬಿ ಆಂಟಿ ಮ್ಹಣ್ ಆಪೊಂವ್ಚೆಂ. ತಿಚ್ಯಾ ನಾಂವಾ ತೆಕಿದ್ ತಿ ಆಮ್ಕಾಂ ಮೊಗಾಳ್. ಮ್ಹೊಜ್ಯಾ ಜಿಣ್ಯೆ ಪಾನಾರ್ ಬೊಜಾ ವಿಶಿಂ ಲಿಖುಂಕ್ ಹಾಂವೆಂ ಚಿಂತುಂಕ್ ನಾತ್‌ಲ್ಲೆಂ. ಪೂಣ್ ಮೌಶೆನ್ ಮ್ಹೊಜ್ಯಾ ಲಾನ್ಫಣಾಚೆಂ ಏಕ್ ಘಡಿತ್ ಉಗ್ಡಾಸಾಕ್ ಹಾಡ್ಲೆಂ ಮಾತ್ರ್ ನಂಯ್ ಜಾಯ್ತ್ಯೊ ಹೆರ್ ಯಾದಿ ಜಿವಾಳ್ ಕೆಲ್ಯೊ. ಕಾಲ್ಚ್ಯಾ ದಿಸಾ ಪರತ್ ತಿ ತೆಂಚ್ ಮ್ಹುಣಾಲಿ “ಬೊಜೊ ಹಾಡ್‍ಲ್ಲೆ ವಿಶಿಂ ಬರಯ್‌ರೆ. ಮ್ಹಾಕಾ ತೆಂ ಚಿಂತಾನಾ ಆತಾಂಯ್ ಹಾಸೊಂಕ್ ಯೆತಾ!”

ಹಾಂವೆಂ ಶಿಕ್ಚ್ಯಾ ಇಸ್ಕೊಲಾಚ್ಯಾ ಭೊವಾರಿಂ ಚಡಾವತ್ ಜಾವ್ನ್ ಆಕ್ರಿಸ್ತಾಂವಾಚಿಂ ಘರಾಂ ಆನಿ ದೋನ್ ದಿವ್ಳಾಂ ಆಸ್‌ಲ್ಲಿಂ. ಇಸ್ಕೊಲ್ ಪಾಂಚ್ವಿ ಪರ್ಯಾಂತ್ ಮಾತ್ರ್. ಇಸ್ಕೊಲಾಂತ್ ಭುರ್ಗ್ಯಾಂಚೊ ಸಂಖೊ ಚಡಾವತ್ ಜಾವ್ನ್ ಸತ್ತಾರಾಂ ಭಿತರ್. ಆಕ್ರಿಸ್ತಾಂವಾಚ್ಯಾ ಘರಾಂನಿಂ ಜಾಂವ್ಚ್ಯಾ ಥೊಡ್ಯಾ ಕಾರ್ಯಾಂಕ್ ಆಮ್ಕಾಂ ಜೆವ್ಣಾಕ್ ಆಪವ್ಣೆಂ ಮೆಳ್ತಾಲೆಂ. ದಿವ್ಳಾಚ್ಯಾ ಹರ್ಯೆಕಾ ಜೆವ್ಣಾಕ್ ಆಮಿಂ ತಯಾರ್ ಆಸ್ತೆಲ್ಯಾಂವ್. ಪೂಣ್ ಹಾಂವೆಂ ಮ್ಹಜ್ಯಾ ಜಿಣಿಯೆಂತ್ ಪಯ್ಲ್ಯಾ ಬೊಜಾಕ್ ಘೆಲ್ಲೆಂ ಘಡಿತ್ ಮಾತ್ರ್ ಅತಾಂಯ್ ಮ್ಹಜ್ಯಾ ಕುಟ್ಮಾಚ್ಯಾಂಕ್ ಉಗ್ಡಾಸಾಂತ್ ಅಸಾ. ಸಕಾಳಿಂ ಇಸ್ಕೊಲಾಕ್ ವೆತಾನಾ ಬುತಿ ವೆಲ್ಲಿ.ಇಸ್ಕೊಲಾಂತ್ ಮಾತ್ರ್ ’ಇವತ್ತು ಬೊಜ್ಜದ ಊಟ ಉಂಟು’ ಮ್ಹುಣೊನ್ ದಾಂಗ್ರೊ ಫೆರಾಯ್ಲೊ. ಹಾಂವ್ ಲ್ಹಾನ್, ಮ್ಹಾಕಾ, ತವಳ್ ಬೊಜೊ ಮ್ಹಣ್ ಕಿತೆಂ ಕಳಿತ್ ನಾ. ಹಾಂವ್ ಸಯ್ತ್ ಸರ್ವಾಂ ಸಾಂಗಾತಾ ಜೆವ್ಣಾಕ್ ಗೆಲೊಂ. ಪಂಗ್ತೆರ್ ಬಸೊನ್, ಕೆಂಳ್ಬ್ಯಾ ಖೊಲ್ಯಾರ್ ಭೊಟಾಂನಿಂ ರಾಂದ್ಲೆಲ್ಯಾ ತರ್ಕಾರಿ ನಿಸ್ತ್ಯಾನ್, ಕೊದ್ದೆಲಾನ್, ವೋರ್ನ್ ಆನಿ ತುಪಾ ಸಂಗಿಂ ಕೆಲ್ಲ್ಯಾ ಹೊಳಿಗೆ ಸಾಂಗಾತಾ ಸಕತ್ತ್ ಜೆವ್ಲೊಂ. ಪಾಟಿಂ ವೆತಾನಾ ಪರತ್ ಹಾತಿಂ ಏಕ್ ಪೊಟ್ಲಿ ಪಾವ್ಲಿ. ಥೊಡೆಂ ಗೊಡ್ಶೆಂ ಆನಿ ಚಟ್ಟಾಂಬಡೊ ತಾಂತುನ್ ಆಸ್ಲೊ. ಘರ್ಚ್ಯಾಂಕ್ ಮ್ಹಣ್ ಘೆತ್ಲೆಂ, ಮ್ಹಜೆಂ ಪೋಟ್ ಭರೊನ್ ಘಟ್ಟ್ ಜಾಲ್ಲೆಂ!

ಘರಾ ಪಾವ್ತಾನಾ ಭುತಿ ತಶಿಚ್ ಆಸ್‍ಲ್ಲಿ. ಮಮ್ಮಿಕ್ ಖಬರ್ ಮೆಳ್ಳಿ ಪೂತ್ ಭೊಜಕ್ ಗೆಲ್ಲೊ. ಮಮ್ಮಿ ಆತಾಂ ತಾಪ್‌ಲ್ಲಿ. ಹಾತಿಂ ಬೊಡಿ ಯೆತಾನಾ, ಹಾಂವೆಂ ಮಾತ್ರ್ ಮ್ಹೊಜೆ ದೊಳೆ ಆಂಬಾಡೆ ಕರ್ನ್, ’ಹಾಂವ್ ಬೊಜಾಕ್ ಘೆಲ್ಲೊಂ ವ್ಹಯ್, ಪೂಣ್ ಭೊಜೊ ಖಾಂವ್ಕ್ ನಾ ಘರಾ ಹಾಡ್ಲಾ’ ಮ್ಹಣ್ ಚಟ್ಟಂಬಾಡೊ ಭಾಯ್ರ್ ಕಾಡ್‌ಲ್ಲೊ! ಹೆಂ ಘಡಿತ್ ಸಭಾರಾಂಕ್ ಹಾಸ್ಯಸ್ಪದ್ ಜಾಲ್ಲೆಂ. ಆತಾಂಯ್ ಉಗ್ಡಾಸ್ ಕಾಡುನ್ ಸಾಂಗೊನ್ ಹಾಸ್ತಾತ್!

ಲ್ಹಾನ್ಪಣಾಲೆಂ ನೆಣ್ತೆಂಪಣ್, ಮುಗ್ಧತಾ, ಪ್ರಾಮಾಣಿಕ್ಪಣ್ ವ್ಹಡ್ ಜಾವ್ನ್ ಯೆತಾನಾ ಮಾಜ್ವೊನ್ ಯೇವ್ನ್ ಆಸ್ತಾ. ಸಭಾರ್ ಘಡಿತಾಂ, ಪೊಕ್ರಿಪಣಾಂ ಆಮ್ಚ್ಯಾ ಜಿಣಿಯೆಂತ್ ಉಗ್ಡಾಸಾಚಿಂ ಜಾವ್ನ್ ಉರ್ತಾತ್. ಮೊಗಾಚ್ಯಾಂ ಸಂಗಿಂ, ಇಷ್ಟಾಂ ಸಂಗಿಂ, ಕುಟ್ಮಾ ಸಂಗಿಂ ಮೆಳ್ತಾನಾ ಹ್ಯಾ ಘಡಿತಾಂಚೊ ಉಗ್ಡಾಸ್ ಕಾಡ್ನ್ ಹಾಸೊಂಕ್ ಲಾಯ್ತಾತ್ ಆನಿ ವೆಗ್ಳ್ಯಾಚ್ ಸಂಸಾರಾಕ್ ವರ್ನ್ ಪಾಯ್ತಾತ್! ತುಮ್ಚ್ಯಾ ಜಿಣಿಯೆಂತೀ ಆಸಲಿಂಚ್ ಘಡಿತಾಂ ಘಡ್ಲ್ಯಾಂತ್ ಜಾಂವ್ಕ್ ಪುರೊ. ಆಜ್ ತೆ ದೀಸ್ ಉಗ್ಡಾಸಾಂತ್ ಮಾತ್ರ್! ಪರತ್ ಮೆಳ್ಚೆನಾಂತ್!

ಸನ್ನು ನಿಡ್ದೋಡಿ.