ಹಾಂವ್ ಪ್ರೈಮರಿಂತ್ ಶಿಕ್ತಾಲೊಂ. ಘರಾ ಲಾಗ್ಶಿಲ್ಯಾ ಇಸ್ಕೊಲಾಂತ್ ಶಿಕ್ಲಲೆ ದೀಸ್ ಆಜೂನ್ ಆಮರ್. ತ್ಯೊ ಯಾದಿ ತವಳ್ ತವಳ್ ಉಮಳ್ತಿತ್ ಪೂಣ್ ದೀಸ್ ಪರತ್ ಜಿವಾಳ್ಚೆ ನಾಂತ್. ಲಾನ್ಪಣಾರ್ ಥಾವ್ನ್‌ಚ್ ಹಾಂವ್ ಪೊಕ್ರಿ. ಮೊಜ್ಯಾ ಪೊಕ್ರಿಪಣಾಂಕ್ ಹಾಂವೆ ಇಸ್ಕೊಲಾಂತ್ ಆನಿ ಘರಾಂತ್ ಸರ್ಸರಿತ್ ಮಾರ್ ಖೆಲ್ಯಾತ್. 1990 ಚೊ ವೇಳ್. ತವಳ್ ಆತಾಂಚ್ಯಾ ಬರಿಂ ತಂತ್ರ್‌ಜ್ಞಾನ್ ವಾಡೊಂಕ್ ನಾತ್‌ಲ್ಲೆಂ. ಹಾತಿಂ ವಿಡಿಯೋ ಗೇಮ್ಸ್, ಮೊಬೈಲಾಂ ಯೇಂವ್ಕ್ ನಾತ್‌ಲ್ಲಿಂ. ಆಮ್ಚ್ಯಾ ಭುರ್ಗ್ಯಾಪಣಾರ್ ಆಮ್ಕಾಂ ಅಸಲ್ಯಾ Electronics Gadgets ಂಕ್ ಹಾತಿಂ ದರ್ಚೆಂ ಪಾವ್ಟ್ ನಾತ್‌ಲ್ಲೆಂ. ಮನೋರಂಜಾನಾಕ್ ಆಮ್ಗೆರ್ ಆಸ್‌ಲ್ಲೊ ಏಕ್ ರೆಡಿಯೊ ಆನಿ ಶೆಜಾರ್ಚ್ಯಾ ಘರಾ  Black and White T.V.  ಟಿವಿ ಪಳೆಂವ್ಚಿ ಆಯ್ತಾರಾ ಸಾಂಜೆರ್ ಮಾತ್ರ್. ಸಾಂಜೆಚಾ 4 ವ್ಹರಾಂಚೆರ್ ಕನ್ನಡ ಪಿಕ್ಚರ್, ಪವರ್ ಕಟ್ ಜಾಲ್ಯಾರ್ ತೆಂಯಿ ಪಂಕ್ಚರ್!

ಮ್ಹೊರಿಯೆಂತ್ಲ್ಯಾ ಭಾಣಾಕ್ ಉದಾಕ್ ಭರ್ನ್, ತೊಟಾಂತ್ಲೆ ಪಿಡೆ, ಕೋಂಬ್ ಯಾ ಘರಾ ಲಾಗ್ಶಿಲೆಂ ಕಸ್ತಳ್ ನಾಣ್ಯೆ ರಾಂದ್ಣಿಕ್ ಭರ್ನ್ ಉದಾಕ್ ತಾಪೊವ್ನ್ ಆಯ್ತಾರಾ ಸಾಂಜೆರ್ ಶೆಜಾರ್ಚ್ಯಾ ಘರಾ ಹಪ್ತ್ಯಾಂತ್ ಏಕ್ ಪಿಕ್ಚರ್ ಪಳೆಂವ್ಚಿ ಆತುರಾಯ್. ರಾಜ್‌ಕುಮಾರ್, ಆಂಬರೀಷ್, ಆನಂತ್‌ನಾಗ್, ಶಂಕರ್‌ನಾಗ್, ಉಪೇಂದ್ರ, ವಿಷ್ಣುವರ್ಧನ್, ರವಿಚಂದ್ರನ್ ಹಾಂಚಿಂ ಪಿಕ್ಚರಾಂ ಪಳೆವ್ನ್ ಸೊಮಾರಾ ಇಸ್ಕೊಲಾಚ್ಯಾ ವಾಟೆರ್ ವೆತಾನಾ ವಿಮರ್ಸೊ ಜಾತಾಲೊ. ಪಿಕ್ಚರಾಂತ್ಲಿಂ ಸನ್ನಿವೇಶಾಂ ಮತಿಂತ್ ರೊಂಬ್ತಲಿಂ. ನೆಣ್ಯ್ತಾ ಮತಿಂತ್ ಥೊಡಿಂ ಘಡಿತಾಂ ಸವಾಲಾಂಚಿಂ ಲಾರಾಂ ಉಟಾಯ್ತಾಲಿಂ. ಪೊಕ್ರಿಪಣಾಚ್ಯಾ ಸವಾಲಾಂಕ್ ವ್ಹಡಿಲಾಂ ಮೌನ್ ಜಾತಲಿಂ. ಮರ್ಡರಾಂ ಪಳೆವ್ನ್, ಬೋರ‍್ಡರಾಂ ಕ್ರಾಸ್ ಜಾಲ್ಲ್ಯಾ ಸವಾಲಾಂಕ್ ವ್ಹಡಿಲಾಂಚ್ಯಾ ಹಾತಿಂ ಆಡಾರಾಂ ಪಿಟೊ ಜಾಲ್ಲಿಂಯ್ ಆಸಾತ್!

ಮೊಜ್ಯಾ ಇಸ್ಕೊಲಾಂತ್ ಜಾಂವ್ಕ್ ಆಸ್ಚ್ಯಾ ಎಕಾ ಕಾರ್ಯಾಕ್ ಲಾಗ್ಶಿಲ್ಯಾ ಹಳೆ ವಿಧ್ಯಾರ್ಥಿಂನಿ ಸಾಂಗಾತ್ ದಿಲ್ಲೊ. ಭುರ್ಗ್ಯಾಂಚೊ ನಾಟಕ್ ಆಸ್‌ಲ್ಲೊ ಆನಿ ಏಕ್ ಮುಖೆಲ್ ಪಾತ್ರಾಕ್ ಆವ್ಕಾಸ್ ಮಾಕಾ ಮೆಳ್‌ಲ್ಲೊ. ಖುಶೆನ್ ಹಾಂವ್ ಒಪ್ವಾಲೊಂ ತರೀ ಪಾತ್ರ್ ಪರಿಚಯ್ ದೀವ್ನ್, ನಾಟ್ಕುಳ್ಯಾಚಿ ಕಾಣಿ ವಾಚ್ತಾನಾ ಹಾಂವೆಂ ಪಾತ್ರ್ ಕರುಂಕ್ ನಾ ಖುಶಿ ದಾಕಯ್ಲಿ. ಮಾಕಾ ಎಕಾ ಚಲಿಯೆಲಾಗಿಂ ಕಾಜಾರಾಚೊ ಪಾತ್ರ್ ಆನಿ ಹಾಂವ್ ತಯಾರ್ ನಾ. ಟೀಚರಿನ್ ಬೊಳಾವ್ನ್ ವಿಚಾರ್ ಕರ್ತಾನಾ ಹಾವೆಂ ಜಾಪ್ ದಿಲ್ಲಿ "ಹೊ ಪಾತ್ರ್ ಮಾಕಾ ನಾಕಾ , ಕಾಜಾರ್ ಜಾಲ್ಯಾರ್ ಭುರ‍್ಗಿಂ ಜಾತಾತ್!" ಆತಾಂಚ್ಯಾ ಮೊಡರ್ನ್ ಶೈಲೆರ್ ಸಾಂಗ್ಚೆಂ ತರ್ ಸ್ಟುಡೆಂಟ್ಸ್ ರೋಕ್ಸ್, ಟೀಚರ್ ಶಾಕ್ಸ್!

ಹೆಂ ಘಡಿತ್ ಮಾಕಾ ಆಜೂನ್ ಉಗ್ಡಾಸ್ ಆಸಾ. ಖುಶಾಲಿ ಘಜಾಲಿಂನಿ, ಹೆಂ ಸವಾಲ್ ಮ್ಹಜ್ಯಾ ಪೊಕ್ರಿಪಣಾಂಕ್ ಮೆಳೊನ್ ಲಿಪೊನ್ ಗೆಲಾಂ ಜಾವ್ಯೆತ್. ಪೂಣ್ ಗಂಭೀರ್ ರಿತಿನ್ ಪಳೆಯ್ಲಾರ್ ಹೊ ಜಾವ್ನಾಸ್‌ಲ್ಲೊ ಟಿವಿ ಪಳೆಯಿಲ್ಲೊ ಪ್ರಭಾವ್. ಟಿವಿರ್ ಆಯಿಲ್ಲಿಂ ಪಿಂತುರಾಂ ಪಳೆವ್ನ್ ಹಾತಿಂ ಬಂದುಕ್ಯೊ, ತಲ್ವಾರಿಂಚ್ಯಾ ಜಾಗ್ಯಾರ್ ಪಿಡೆ, ಲಾಂಬ್ ಸಾಂಗೊ ಯಾ ವಾಲಿ ಘೆವ್ನ್ ಖೆಳ್ತಾನಾ ದೆಕ್ಚ್ಯಾ ದೊಳ್ಯಾಂಕ್ ಖುಶಾಲ್, ಪೂಣ್ ನೆಣ್ತ್ಯಾ ಮತಿಚೆರ್ ಪಡ್ಚೊ ಪ್ರಭಾವ್ ಜಾಯ್ತೊ. ಆಜ್ ಆಮ್ಚ್ಯಾ ಸಮಾಜೆಂತ್, ಇಸ್ಕೊಲಾಂತ್, ಘರಾಂತ್ ಭುರ್ಗ್ಯಾಂಚ್ಯಾ ಹಾತಾಂನಿ ಘಡ್ಚ್ಯಾ ಜಾಯ್ತ್ಯಾ ಆನಾಹುತಾಂಕ್, ಬಾಳ್ಪಣಾರ್ ಹಾತಿಂ ಮೆಳ್ಚಿಂ  Electronics Gadgets  ಏಕ್ ಕಾರಣ್ ಜಾವ್ನಾಸಾತ್. ಜಲ್ಮಾ ಥಾವ್ನ್‌ಂಚ್ ಭುರ್ಗ್ಯಾಂಚ್ಯಾ ಹಾತಿಂ ಮೊಬಾಯ್ಲಾಂ, ಟ್ಯಾಬ್ ದೀವ್ನ್ ಚಲೊಂಕ್ ಶಿಕ್ಚ್ಯಾ ಪಯ್ಲೆಂಚ್ ತಾಣಿಂ ತಿಂ ವಾಪರುಂಕ್ ಶಿಕ್ತಾನಾ ಜಾಯ್ತಿಂ ಆಮ್ಚಿಂ ವ್ಹಡಿಲಾಂ ವ್ಹಡ್ವಿಕಾಯ್ ಉಲಾಯ್ತಾತ್. ವ್ಹಡ್ ಜಾವ್ನ್ ಯೆತಾನಾ ಭುರ್ಗ್ಯಾಂಕ್ ನಿಯಂತ್ರಣ್ ಹಾಡುಂಕ್ ಕಷ್ಟ್ ಜಾತಾ ಆನಿ ವ್ಹಡಿಲಾಂಚೊ ಸಂಯಮ್ ಚುಕ್ತಾ!

 Electronics Gadgets ಆಮ್ಚ್ಯಾ ಭುರ್ಗ್ಯಾಂಚೆ ಹಾತಿಂ ದಿತಾನಾ ತಾಂಚೆ ವಯ್ರ್ ನದರ್ ದವರ್ಚಿ ಭೋವ್ ಗರ್ಜೆಚಿ. ಚಡಾವತ್ ಜಾವ್ನ್ ವ್ಹಡಿಲಾಂಕ್ ತಂತ್ರ್‌ಜ್ಞಾನಾಚಿ ಜಾಣ್ವಾಯ್ ನಾತ್‌ಲ್ಲೆವರ್ವಿಂ ಭುರ್ಗಿಂ ತಾಚೊ ಫಾಯ್ದೊ ಉಟೊಂವ್ಕ್ ಸಕ್ತಾತ್. ಭುರ್ಗಿಂ ಸಮಾಜೆಂತ್ ವಾಡ್ತಾನಾ ಸದಾಂ ತಾಂಚಾ ವಾಡಾವಳಿಚೆರ್ ಆನಿ ಚಾಲ್-ಚಮ್ಕಣೆಚೆರ್ ಗಮನ್ ದವರ್ನ್, ಬರ‍್ಯಾ ವಾಯ್ಟಾಚಿ ಸಾರ್ಕಿ ಸಮ್ಜಣಿ ಯೆತಾಸರ್, ಭುರ್ಗ್ಯಾಂಕ್ ಕಶೆಂ ವಾಡಯ್ಜಯ್ ಮ್ಹಣ್ ಸಮ್ಜೊನ್ ಘೆಂವ್ಚಿ ಜವಾಬ್ದಾರಿ ಹರ್ಯೆಕಾ ಆವಯ್ ಬಾಪಯ್ಚಿ ಜಾವ್ನಾಸಾ.

ಸನ್ನು ನಿಡ್ಡೋಡಿ