ಹಾಂವ್ ಹಳ್ಳೆಂತ್ ಜಲ್ಮಲ್ಲೊಂ. ಮ್ಹಜಿ ಜೀವನ್ ಶೈಲಿ ಹಳ್ಳೆಚಿ. ಹಳ್ಳೆಚ್ಯಾ ಪರಿಸರಾಂತ್ ಜಿಯೆಲ್ಯಾರ್ ತೊಂಡಾರ್ ಆತಾಂಯ್ ಕಳಾ ಯೆತಾ. ಹಳ್ಳೆಚೆಂ ವಾತಾವರಣ್ ಕುಡಿಕ್ ಹೊಮ್ಮೊತಾ. ಹಳ್ಳೆಚೊ ಭೊಂವರ್ ಏಕ್ ಧಾದೊಸ್ಕಾಯ್ ದಿತಾ. ಘರ್, ಇಸ್ಕಾಲ್ ಆನಿ ಹಪ್ತ್ಯಾಂತ್ ಏಕ್ ದೀಸ್ ಇಗರ್ಜ್ ಸೊಡ್ಲ್ಯಾರ್ ಪೆಂಟೆಕ್ ವಚೊಂಕ್ ಮೆಳ್ಚೊ ಆವ್ಕಾಸ್ ಆಪ್ರೂಪ್ ಆಸ್‌ಲ್ಲೊ. ಸಂಸಾರಾಚ್ಯೊ ಖಬ್ರೊ ಘರಾ ಪಾವೊಂಕ್ ಟಿವಿ ನಾತ್‌ಲ್ಲಿ. ದಿಸಾಳಿಂ ಪತ್ರಾಂ ಘರಾ ಯೇನಾತ್‌ಲ್ಲಿಂ. ಸದಾಂ ದಿಸಾಳಿಂ ಕಾಮಾಂ, ಇಲ್ಲೊ ಖೆಳ್ ಆನಿ ಇಸ್ಕೊಲಾಚೆಂ ಲಿಸಾಂವ್ ಹೆಂಚ್ ಮ್ಹಜೆಂ ದಿಸ್ಪಟ್ತೆಂ ಜೀವನ್. ಆಸಲ್ಯಾ ಭೊಂವಾರಾಂತ್ ಜಿಯೆತಾನಾ ಜಾಣ್ವಾಯ್ ಇತ್ಲ್ಯಾಚ್ ವಿಷಯಾಂಕ್ ಸೀಮಿತ್ ಆಸ್‌ಲ್ಲಿ. ಫಿಲ್ಮ್ ಇಂಡಸ್ಟ್ರಿ, ಕ್ರಿಕೆಟ್ ಇಂಡಸ್ಟ್ರಿ, ಪೊಲಿಟಿಕಲ್, ರೀಜನಲ್, ಹಿಸ್ಟೋರಿಕಲ್ ಆಶೆಂ ಸಗ್ಳ್ಯಾಂ ವಿಷಯಾಂ ಥಾವ್ನ್ ಭಾಯ್ರ್. ಮುಡೊ ಉಕಲ್ನ್ ಖಾಂದ್ಯಾರ್ ಘೆಂವ್ಚೊ ಮೀಸೆ ನಾರಾಯಣ ಮ್ಹಾಕಾ ಪೈಲ್ವಾನ್, ಥಳಾ ಹಾತರ್ ಕೊಯಿತುಲ್ ಪಾಜುನ್ ಯೆಂವ್ಚೊ ಐತಪ್ಪಣ್ಣ ವಿಲನ್!

ಚವ್ತ್ಯಾ ಯಾ ಪಾಂಚ್ವ್ಯಾ ಕ್ಲಾಶಿಂತ್ ಶಿಕ್ತಾಲೊಂ. ಸಾರ್ಕೆಂ ಉಗ್ಡಾಸ್ ನಾ. ಶಿಕ್ಪಾಂತ್ ಇಲ್ಲೊಂ ಮುಕಾರ್ ತರೀ ಪುಸ್ತಕದ ಬದನೆಕಾಯ್! (ಆತಾಂ ನಂಯ್). ಟಿಚರಿನ್ ವಿಚಾರ್‌ಲ್ಲ್ಯಾ ಸವಾಲಾಂಕ್ ಜಾಪಿ ದಿತಲೊಂ. General Knowledge ವಿಚಾರ್ಲ್ಯಾರ್ ಮಾತ್ರ್ ಮೆಳ್ತಲೆ ಕುಂಬಳ ಕಾಯಿ! ಸಮಾಜ-ವಿಜ್ಞಾನ ಕ್ಲಾಶಿಂತ್ ಟಿಚರಿನ್ ಸವಾಲ್ ವಿಚಾರಿಲ್ಲೆಂ "ನಿನ್ನ ಆದರ್ಶ ವ್ಯಕ್ತಿ (Role Model) ಯಾರು?" ಹಾಂವೆಂ ಜಾಪ್ ದಿಲ್ಲಿ "ಆಮ್ಮ". ಥೊಡಿಂ ಭುರ್ಗಿಂ ಕಿಸ್ಕ್ ಕರ್ನ್ ಹಾಸ್‌ಲ್ಲಿಂ. ಟಿಚರಿನ್ ಮಾತ್ರ್ ಕ್ಲಾಶಿಂತ್ ಇಲ್ಲೆಂ ಸಮ್ಜೊವ್ನ್, ಸ್ಟಾಪ್ ರುಮಾಕ್ ಆಪವ್ನ್ ವ್ಹರುನ್ ಭಗತ್ ಸಿಂಗ್, ವಿವೇಕಾನಂದ, ಲಾಲ್ ಬಹದ್ದೂರ್ ಶಾಸ್ತ್ರಿ, ಮಹಾತ್ಮ ಗಾಂಧಿ ಆಸಲ್ಯಾ ಮಹಾನ್ ಮನ್ಶ್ಯಾಂಚೆ ಜಿಣ್ಯೆ ವಿಶಿಂ ಲಿಕ್ಲೆಲೆ ಬೂಕ್ ಹಾತಿಂ ದೀವ್ನ್, ತೆ ವಾಚುಂಕ್ ಸಾಂಗ್‌ಲ್ಲೆ. ಉಪ್ರಾಂತ್ಲ್ಯಾ ದಿಸಾಂನಿ ಹಾಂವೆಯಿ ಎಕ್ಲ್ಯಾ ಮಹಾನ್ ವ್ಯಕ್ತಿಕ್ ಮ್ಹಜೊ ಆದರ್ಶ್ ವ್ಯಕ್ತಿ ಜಾವ್ನ್ ವಿಂಚ್ಲೊ.

ಕಾಂಯ್ ಥೊಡ್ಯಾ ದಿಸಾಂ ಪಯ್ಲೆಂ ಏಕ್ ಲೇಖನ್ ವಾಚ್ತಾನಾ ಮ್ಹಾಕಾ ಹ್ಯಾ ಘಡಿತಾಚೊ ಉಗ್ಡಾಸ್ ಆಯ್ಲೊ, ಮ್ಹಜಿಂ ಚಿಂತ್ನಾಂ ಪರತ್ ಪಾಟಿಂ ಪಾಟಿಂ ಗೆಲಿಂ, ಜಿಣ್ಯೆಚ್ಯಾ ಪಯ್ಣಾರ್ ಹರ್ಯೆಕಾ ಘಡ್ಯೆ ಮ್ಹಾಕ ಸಾಂಗಾತ್ ಮ್ಹಜ್ಯಾ ಮಮ್ಮಿಚೊ ಆನಿ ಪಪ್ಪಚೊ ಆಸ್ತಲೊ. ತಾಣಿಂ ಮ್ಹಾಕಾ ಶಿಕೊಂಕ್ ದಭಾವ್ ಘಾಲ್ನಾಸ್ತಾನಾ ಇಸ್ಕೊಲಾಚ್ಯಾ, ಇಗರ್ಜೆಚ್ಯಾ ಹರ್ ಚಟುವಟಿಕೆಂನಿ ಪಾತ್ರ್ ಘೆಂವ್ಕ್ ಆವ್ಕಾಸ್ ಕರ್ನ್ ದಿಲ್ಲೊ. ಕೆದ್ನಾಂಯ್ ತುವೆಂ ತಾಚೆ ಬರಿಂ ಜಾಯ್ಜೆ, ಹಾಚೆ ಬರಿಂ ಜಾಯ್ಜೆ ಮ್ಹಣ್ ಕೊಣಾಯ್ಕಿ ದಾಕವ್ನ್, ಯಾ ಮಹಾನ್ ಮನ್ಶ್ಯಾಂಚಿ ಕಾಣಿ ಸಾಂಗೊನ್ ತಾಂಚೊ ಪಾಟ್ಲಾವ್ ಕರುಂಕ್ ಸಾಂಗ್‍ಲ್ಲೊ ನಾ. ಹಾಂವೆ ಕೆಲ್ಲ್ಯೊ ಚುಕಿ ತಿದ್ವುನ್, ಆಡ್ ವಾಟೆರ್ ವೆತಾನಾ ಸಮ್ಜಣಿ ದೀವ್ನ್, ಲಾನ್ಪಣಾರ್ ಥಾವ್ನ್ಂಚ್ ಘರ್ಚೆಂ ಹರ್ಯೆಕ್ ಕಾಮ್ ಕರುಂಕ್ ಶಿಕವ್ನ್, ತಾಲೆಂತಾಂಕ್ ಪಾಟಿಂಬೊ ದೀವ್ನ್, ಮುಖೆಲ್ಪಣ್ ಘೆಂವ್ಕ್ ಹುರುಪ್ ದೀವ್ನ್ ಸಂಸಾರಾರ್ ಕಶೆಂ ಚಲಾಜಯ್ ಮ್ಹುಣೊನ್ ತಾಣಿಂ ಶಿಕಯ್ಲೆಂ. ಹಾಂವೆ ತವಳ್ ದಿಲ್ಲಿ ಜಾಪ್ ಸಾರ್ಕಿ ಮ್ಹಣ್ ಬೊಗ್ಲಿ, ಆತಾಂ ವೀಸ್ ವರ್ಸಾಂ ಉಪ್ರಾಂತ್!

ಆಜ್ ಮೊಜ್ಯಾ ಜಿವಿತಾಂತ್ ಮ್ಹಜಿಂ ಆದರ್ಶ್ ವ್ಯಕ್ತಿ ಜಾವ್ನಾಸಾತ್ ಮೊಜಿಂ ’ಪಪ್ಪ-ಮಮ್ಮಿ’!

ಅಶೆಂ ಭೊಗ್ತಾಕೀ ಖಂಚಾಯ್ ಮುಖೆಲ್ಯಾಚೊ ಪಾಟ್ಲಾವ್ ಕರ್ನ್ ಪಾಟ್ಲಾವ್ದಾರಿ ಜಾಂವ್ಚ್ಯಾ ಬದ್ಲಾಕ್, ಜಿಣಿಯೆಂತ್ ಬರೆ ಶೆಗುಣ್ ಆಪ್ಣಾವ್ನ್, ಪೆಲ್ಯಾಕ್ ಮಾನ್ ದೀವ್ನ್, ಆಮ್ಚಿಂಚ್ ತಾಲೆಂತಾಂ ಆನಿ ಆಮ್ಚೆ ಥಂಯ್ ಆಸ್‍ಲ್ಲಿ ಕಲಾ ಊರ್ಜಿತ್ ಕರ್ನ್ ಗೆಲ್ಯಾಂವ್ ತರ್ ಆಮ್ಕಾಂಚ್ ಏಕ್ ಮುಖೆಲಿ ಜಾವ್ಯೆತ್!

ಸನ್ನು ನಿಡ್ಡೋಡಿ