ಬಾರ್ಬಿಕ್ಯೂಚ್ಯಾ ಸಾರಿಯೆರ್

ಪ್ರಾಣ್ ಅರ್ಪುಂಕ್ ಆಯ್ತೆ ಜಾಲ್ಲ್ಯಾ

ಕಾಳ್ಯಾ ಇಂಗ್ಳ್ಯಾಚ್ಯಾ ತೊಂಡಾರ್ ಅಮ್ರುಕೊ ಹಾಸೊ.

ತಾಚ್ಯಾ ನಾಜೂಕ್ ಹಾತಾನಿಂ

ತುರ್ತಾನ್ ಸಾರಿಯೆಕ್ ಬಲಿ ಜಾಂವ್ಚಿ ಆಶಾ

ಮೊವಾಳ್ ಬೊಟಾಂಕ್ ತಾಚ್ಯಾ ಅಪ್ಲೊ ರಂಗ್ ಲಾಂವ್ಚೊ ಅತ್ರೆಗ್.

ಎಕಾ ಇಂಗ್ಳ್ಯಾಕ್, ಶೀದಾ ತಾಚ್ಯಾ ಕಾಳ್ಜಾಕ್‍ಚ್ಚ್ ರಿಗ್ಚಿ ಅಬ್ಳಾಯ್

ತ್ಯಾ ಪಾಸೊನ್ ಗೊಬ್ರಾ ಪಿಟೊ ಸಾರವ್ನ್

ಗೊರೊ ಗೊರೊ ಜಾವ್ನ್ ತಾಚಿ ವಾಟ್ ಪಳೆವ್ನ್ ರಾವ್ಲಾ.

ಆಶೆಲ್ಯಾಪರಿಂ,. ತಾಚ್ಯಾ ಗೊರ್ಶ್ಯಾ ಹಾತಾಚ್ಯಾ ಸ್ಪರ್ಶ್ಯಾನ್

ಕಾಳೆ ಇಂಗ್ಳೆ ಸಗ್ಳೆ ಬಾರ್ಬಿಕ್ಯೂಚ್ಯಾ ಸಾರಿಯೆರ್ ಚಡ್ಲೆ

ಹರ್ದೆಂ ಉಬಾರ್ನ್, ವ್ಹಡಾ ಭರ್ಮಾನ್.

ಶಹೀದ್ ಜಾತೆಲ್ಯಾ ಸೊಜೆರಾಚೆಂ ಚಿತ್ರಣ್

ತಾಚೊ ಏಕ್ ಸ್ಪರ್ಶ್ ಜಿವಾ ಪ್ರಾಸ್ ಚಡ್ ಅಮೊಲಿಕ್.

ಸಾರಿಯೆರ್ ಮಾಂಡ್ಲೆಲ್ಯಾ ಹಳ್ದುವ್ಯಾ ಉಜ್ಯಾನ್

ಕಾಳ್ಯಾ ಇಂಗ್ಳ್ಯಾಂಕ್ ವಯ್ರ್-ಪಂದಾ ಲಾಸ್ಲೆಂ.

ಹುಸ್ಕಾರೊನ್, ವೋಂಟ್ ಆಂರ್ದುನ್, ಧಗ್ ಸೊಸುನ್

ಇಂಗ್ಳ್ಯಾನಿಂ ಕಾಳ್ಜಾ ಉಡಿ ಜಿವಿ ದವರ್ಲಿ.

ತೆಲಾ ಥೆಂಬೆ ಕುಡಿರ್ ಪಡ್ತಾನಾ,

ಥೊಡ್ಯಾ ಇಂಗ್ಳ್ಯಾಂಚಿ ತಾನ್ ಭಾಗ್ಲಿ.

ಪುಣ್ ಆಶಾ ನಂಯ್,

ಎಕ್‍ಚ್ಚ್ ಆಶಾ

ತಾಚ್ಯಾ ಸ್ಪರ್ಶ್ಯಾಕ್ ತಾನೆಂವ್ಚಿ.

ಕಾಳ್ಯಾ ಇಂಗ್ಳ್ಯಾಂಕ್ ಹಾತ್ ಚರಯಿಲ್ಲ್ಯಾ ತಾಣೆ

ರಂಗ್ ಬದ್ಲಿಲ್ಲ್ಯಾ ತಾಂಬ್ಡ್ಯಾ ಇಂಗ್ಳ್ಯಾಂಥಂಯ್

ದಾವೆಕ್ ಲಾಗೊನ್ ತೋಂಡ್ ಮೊಡ್ಲೆಂ.

ಆಶೆಚೊ ಸ್ವಾಸ್ ಜಗವ್ನ್ ದವರಿಲ್ಲೊ ಇಂಗ್ಳೊ

ವಿರಹಾಚ್ಯಾ ಉಬೆನ್ ಚಡಿತ್ ತಾಪ್ಲೊ.

ಆತಾಂ ಉಜೊ ಪಾಲ್ವಾಲಾ,

ಉರ್ಲಾ ಫಕತ್ ಗೊಬೊರ್.

ತೆಂ ಕರ್ಪಲ್ಲ್ಯಾ ಇಂಗ್ಳ್ಯಾಚ್ಯಾ ಕಾಳ್ಜಾಕ್ ಸೊಡ್ನ್,

ತಾಪ್ಲೆಲ್ಯಾ ಬಾರ್ಬಿಕ್ಯೂಚಿ ರೂಚ್ ಚಾಕೊನ್ ಅಸಾ.

ಕಿರಣ್ ನಿರ್ಕಾಣ್

**********

Barbikyuchea sarier

prann orpunk aite zal'lea

kallea inglleachea tonddar omruko haso.

Tachea nazuk hatanim

turtan sariek boli zamvchi axa

movall bottank tachea oplo rong lamvcho otreg.

Eka inglleak, xida tachea kallzak‍chch rigchi obllai

tea pason gobra pitto saroun

goro goro zaun tachi vatt polleun raula.

Axeleaporim,. Tachea gorxea hatachea sporxean

kalle inglle soglle barbikyuchea sarier choddle

hordem ubarn, vhodda bhorman.

Xohid zatelea sojerachem chitronn

tacho ek sporx jiva pras chodd omolik.

Sarier manddlelea hollduvea ujean

kallea inglleank voir-ponda laslem.

Huskaron, vontt amrdun, dhog sosun

inglleanim kallza uddi jivi dourli.

Tela thembe kuddir poddtana,

thoddea inglleanchi tan bhagli.

Punn axa nom-i,

ek‍chch axa

tachea sporxeak tanemvchi.

Kallea inglleank hat choroyil'lea tanne

rong bodlil'lea tambddea inglleanthoim

davek lagon tondd moddlem.

Axecho svas zogoun douril'lo ingllo

virohachea uben choddit taplo.

Atam uzo palvala,

urla fokot gobor.

Tem korpol'lea inglleachea kallzak soddn,

taplelea barbikyuchi ruch chakon osa.

Kiran Nirkan