ಕೊವೆಂತಾಚಿ ಸಿಸ್ಟರ್

ನೆಣ್ತಿಂ ಭುರ್ಗಿಂ ತವಳ್ಚಿಂ ಆಮಿಂ

ಜಾಣ್ತಿಂ ಜಾಂವ್ಕ್ ಗೆಲ್ಲ್ಯಾಂವ್ ಆಮಿಂ

ಘೆವ್ನ್ ಮತಿಂತ್ ಹಜಾರ್ ಸವಾಲಾಂ

ಕರುಂಕ್ ಥೊಡಿಂ ಮಟ್ವಿಂ ನವಾಲಾಂ!

ದೀಸ್ ತೆ ಬೊವ್ ಆಪುರ್ಬಾಯೆಚೆ,

ಆಳ್ಸಾಯೆನ್ ಮನ್ ನಾಸ್ತಾಂ ತರೀ

ಬೂಕ್ ಏಕ್ ಹಾತಿಂ ಧರುನ್

ಗೆಲ್ಯಾಂವ್ ಆಮಿ ದೊತೊರ್ನಿಚ್ಯಾ ಕ್ಲಾಸಿಕ್!

ಪಳಂವ್ಕ್ ತಿ ಆಸ್ಲಿ ಮಟ್ವಿ

ಘಾಲ್ತಾಲಿ ಮಾತ್ಯಾಕ್ ಕಾಳೊ ಕೊಟ್ಟು!

ಚಸ್ಮಾ ಗಾಲ್ಲೆ ದೊಳೆ ತಿಚೆ,

ಮಿರ್ಯೊ ಪಡ್ಲೆಲಿ ಕಾತ್ ತಿಚಿ

ನೆಸ್ತಲಿ ಮಾದ್ರಿಚೆಂ ನ್ಹೆಸಾಣ್ ತಿ,

ಚಿಂತಾಪ್ ಅಸ್ಲೆಂ ತವಳ್ ಮತಿಂತ್

ನೆಸುಂಕ್ ತಿಚೆಂ ಆಂಗ್ಲೆಂ ಮ್ಹಜ್ಯಾನ್,

ಜಾವ್ನ್ ಉರ್ಲೆಂ ಸ್ವಪಾಣ್ ಆಜೂನ್!

ನಾಂವ್ ತಿಚೆಂ ಹಾಂವ್ ನೆನಾಸ್ಲಿಂ

ಪಳಂವ್ಕ್ ತಿ ದಿಸ್ತಾಲಿ ಜೋರ್

ದೆಕುನ್ ನಾಂವ್ ದವರ್ಲೆಂ ಆಮಿಂ

ಕೊಟ್ಟು ಗಾಲ್ಚಿ ಜೋರ್ ಸಿಸ್ಟರ್!

ರುಪ್ಣ್ಯಾಂತ್ ಕಡಕ್ಕ್ ದಿಸ್ತಾಲಿ ತರಿ,

ಶಿಕಯ್ಲಿ ತಿಣೆಂ ದೊತೊರ್ನ್ ಬರಿ

ಕರುಂಕ್ ಜಾಂವ್ಚೆಂ ನಾಂ ತಿಕಾ ಸರೀ

ನೆಣಾಂ ಖಂಯ್ ಆಸಾ ತಿ ಮಾದ್ರ್ ಖರಿ!

ದಿಲಿ ತಿಣೆಂ ಶಿಕೊವ್ಣ್ ಸಾರ್ಕಿ

ಉಗ್ಡಾಸ್ ದವ್ರುಂಕ್ ಉತ್ರಾಂ ದೆವಾಚಿಂ

ಕರುನ್ ಖರಿ ತಯಾರಾಯ್ ಕ್ರಿಸ್ತಾಚಿ

ಸೆಂವ್ಲೊ ಪಯ್ಲೊ ಕುಮ್ಗಾರ್ ಭಕ್ತಿಪಣಿಂ!

ವಿಸ್ರುಂಕ್ ಜಾಂವ್ಚೆ ನಾ ತಿಕಾ

ಬೆಸಾಂವ್ ದೀಂವ್ ಬಾಪ್ ತಿಕಾ

ರಾಕೊನ್ ವರುಂ ದೀಸ್ ರಾತ್

ಮೆಳುಂ ತಿಕಾ ಲಾಂಬ್ ಆವ್ಕ್!

ಜೊವಿ, ಪೆರಂಪಳ್ಳಿ

**********

Koventachi sisttor

nenntim bhurgim toullchim amim

zanntim zaunko gel'leamv amim

gheun motint hozar sovalam

korunk thoddim mottvim novalam!

dis te bovo apurbayeche,

allsayen mon nastam tori

buk ek hatim dhorun

geleamv ami dotornichea klasik!

pollounko ti asli mottvi

ghaltali mateak kallo kott'ttu!

chosma gal'le dolle tiche,

mireo poddleli kat tichi

nestoli madrichem nhesann ti,

chintap oslem toull motint

nesunk tichem anglem mhojean,

zaun urlem svopann azun!

namv tichem hamv nenaslim

pollounko ti distali zor

dekun namv dourlem amim

kott'ttu galchi zor sisttor!

rupnneant koddokk distali tori,

xikoili tinnem dotorn bori

korunk zamvchem nam tika sori

nennam khoim asa ti madr khori!

dili tinnem xikounn sarki

ugddas dourunk utram devachim

korun khori toyarai kristachi

semvlo poilo kumgar bhoktiponnim!

visrunk zamvche na tika

besamv dimv bap tika

rakon vorum dis rat

mellum tika lamb auk!

Jovi Perampalli