ಮಾಂಯ್ 

ಮಾಂಯ್,

ಹ್ಯಾ ಸಂಸಾರಾಚ್ಯಾಕೀ

ತುಜ್ಯಾ ಗರ್ಭಾಂತ್ಲೊ ಸಂಸಾರ್

ಅಪುರ್ಬಾಯೆಚೊ.

ಥಂಯ್ಸರ್ ನಾಂತ್ ಮನಿಸ್

ಮ್ಹಜ್ಯಾ ನೆಣ್ತ್ಯಾಪಣಾಚ್ಯಾ

ಸೊಬಾಯೆಕ್ ಪಿಸ್ವೊನ್

ಮ್ಹಜ್ಯಾ ಮಾಸಾಳ್ ಪೊಲ್ಯಾಂಕ್

ಚಿಮ್ಟೊ ಕಾಡ್ತೆಲೆ.

ಮ್ಹಜ್ಯಾ ಗೊದ್ದ್ಯಾ ಉತ್ರಾಂನಿ

ಮಜಾ ಭೊಗುನ್

ಮಕಾ ಸಮಾ ಉಲೊಂವ್ಕ್

ಕಳಾನಾ ಮ್ಹಣ್

ತುಕ್ಲಾಯ್ತೆಲೆ.

ಹೆರಾಬರಿ ಹಾಂವ್

ಶಿಕ್ಪಾಂತ್ ಹುಶಾರ್ ನಾ

ಮ್ಹಣೊಂನ್ ಮಜ್ಯಾ

ಆತ್ಮ್ ವಿಶ್ವಾಸಾಕ್ ಹಿಣ್ಸಿತೆಲೆ.

ತರ್ನಾಟ್ಪಾಣಾರ್

ಮ್ಹಜಾ ಸೊಬಾಯೆಚೆರ್

ಅಬ್ಳಾಯೆಚಿ ದೀಷ್ಟ್ ಘಾಲ್ತೆಲೆ.

ಎಕ್ಸುರಿ ಚಲ್ತಾನಾ

ಬೊಲ್ಯಾಂ ಮಧೆ

ಬಲಾತ್ಕಾರಾನ್

ಮಜೆ ನಿಸ್ಕಳ್ಪಣ್

ಮಸ್ತಿತಲೆ.

ಖಬ್ರೆ ಜಾಳಿನಿಂ, ಪತ್ರಾನಿಂ

ಮ್ಹಜ್ಯಾ ಅತ್ಯಾಚಾರಾಚ್ಯೊ

ನಮುನ್ಯಾವಾರ್

ಕಾಣ್ಯೊ ದೀವ್ನ್

ಫಾಯ್ದೊ ಜೊಡ್ತೆಲೆ.

ವಾಟೆನ್ ಚಲ್ತಾನಾ

ಭಿರ್ಮತೆಚಿ

ಪೊಕೊಳ್ ದೀಷ್ಟ್ ಘಾಲುನ್

ಜಿಯೆಂವ್ಚೊ ಭರ್ವಸೊ

ಹೊಗ್ಡಾಂವ್ಕ್ ಕರ್ತೆಲೆ.

ಮಾನಸಿಕ್ ಸಂತುಲನ್

ಹೊಗ್ಡಾಂವ್ನ್

ಮಾಂಯ್ ತುವೆಂ

ಜೀವ್ಘಾತ್ ಕೆಲ್ಲ್ಯಾ ವೆಳಾರ್

ನಕ್ಲಿ ಭುಜಾವಣ್ ದೀವ್ನ್

ಮ್ಹಾಕಾ ಭುಜಯ್ತೆಲೆ.

ಹಾಂವೆ ನಿಸ್ಕಳ್ಪಣ್

ಹೊಗ್ಡಾಂವ್ಕ್ ಕಾರಣ್

ಮ್ಹಜಿ ಸೊಭಾಯ್

ಮ್ಹಜೊ ಭರ್‌ಲ್ಲೊ ಜೀವ್

ಮಜಿ ಚಾಲ್ ಮಣೊನ್

ಖಬಾರ್ ಕರುನ್

ಜಿಬೆಚಿ ಖೊರೊಜ್ ಕಾಡ್ತೆಲೆ.

ಮಾಂಯ್,

ಹೊ ಸಂಸಾರ್ ಅಮ್ಕಾಂ

ಸಾಂಗ್ಲೊಲೊ ನಂಯ್

ಪರತ್ ಹ್ಯಾ ಸಂಸಾರಾಕ್.

ತುಂ ಯೇನಾಕಾ.

ಮ್ಹಾಕಾಯ್ ಹಾಡಿನಾಕಾ.

ಡಾಯ್ನಾ ಶರಲ್, ವಾಲೆನ್ಸಿಯಾ.

**********

Mam-i

mam-i,

hea somsaracheaki

tujea gorbhantlo somsar

opurbayecho.

Thoimsor nant monis

mhojea nennteaponnachea

sobayek pisvon

mhojea masall poleank

chimtto kaddtele.

Mhojea god'dea utramni

moza bhogun

moka soma ulounko

kollana mhonn

tuklaitele.

Herabori hamv

xikpant huxar na

mhonnomn mojea

atm' vixvasak hinnsitele.

Tornattpannar

mhoza sobayecher

obllayechi dixtt ghaltele.

Eksuri choltana

boleam modhe

bolatkaran

moje niskollponn

mostitole.

Khobre zallinim, potranim

mhojea oteacharacheo

nomuneavar

kanneo diun

faido zoddtele.

Vatten choltana

bhirmotechi

pokoll dixtt ghalun

jiemvcho bhorvoso

hogddaunko kortele.

Manosik sontulon

hogddamvn

mam-i tuvem

jiughat kel'lea vellar

nokli bhuzaunn diun

mhaka bhuzoitele.

Hamve niskollponn

hogddaunko karonn

mhoji sobhai

mhozo bhor‌l'lo jivo

moji chal monnon

khobar korun

jibechi khoroz kaddtele.

Mam-i,

ho somsar omkam

sanglolo nom-i

porot hea somsarak.

Tum yenaka.

Mhakai haddinaka.

Dina Sheral, Valencia