ಮೊಜೊ ಗಾಂವ್

ಸೊಭಿತ್ ತೊ ಗಾಂವ್ ಮ್ಹಜೊ

ರಾಕುನ್ ರಾವ್ಲ್ಯಾಂ ವೆಚಾಕ್ ಥಂಯ್

ದೀಸ್ ರಾತ್ ಚಿಂತುನ್ ಬಸ್ಲ್ಯಾಂ

ಕೆನ್ನಾ ಯೇತ್ ಅಪುರ್ಬಾಯೆಚಿ ಘಡಿ ತಿ

ಆಸಾ ಥಂಯ್ಸರ್ ಘರ್ ಮ್ಹಜೆಂ

ಜಾವ್ನ್ ಮಂದಿರ್ ಮೊಗಾಚೆಂ

ಆಸಾತ್ ವ್ಹಡಿಲಾಂ ತ್ಯಾ ಬಿಡಾರಾಂತ್

ರಾಕುನ್ ವಾಟ್ ಧುವೆಚ್ಯಾ ಯೆಣ್ಯಾಕ್

ಆಸಾ ಏಕ್ ತೋಟ್ ಭೊಂವಾರಿಂ

ಸೊಭಾಯ್ ದಿಂವ್ಚೆ ಲಾಂಬ್-ದೀಗ್ ಮಾಡ್!

ಆಕರ್ಷಿತ್ ಪೊಪ್ಳಾನಿಂ ಸುರ್ಗಾಂರಾಯ್‍ಲ್ಲೆ ಮಾಡಿಯೊ,

ಮಾಡ್ಯೆರ್ ಸರ್ತಾ ಮಿರಿಯಾಂಚಿ ವಾಲ್!

ಬಗ್ಲೆಕ್ ವಾಳ್ತಾ ವಿಶಾಲ್ ನಂಯ್

ನಾಂವಾಡ್ಲ್ಯಾ ತಿ "ಸುವರ್ಣಾ" ನಾಂವಾನ್!

ಪಲ್ತಡಿ ಸೊಬ್ಚೊ ಗಾಂವ್ ತೊ,

ಹಾಡುನ್ ಉಡಾಸ್ ನೆಣ್ತ್ಯಾ ಭುರ್ಗ್ಯಾಪಣಾಚೊ!

ಹೆವ್ಶಿನ್, ಆಲ್ತಡಿ ಅಸಾತ್ ಗಾದೆ

ದೀವ್ನ್ ಬೆಳಿಂ ವರ್ಸಾಕ್ ತೀನ್

ಅಶೆಂ ಕರ್ತಾ ತಿ ಪೋಶಣ್

ಆಮ್ಚ್ಯಾ ಗಾಂವ್ಚ್ಯಾ ಕಷ್ಟಿ ಶೆತ್ಕಾರಾಂಚೊ

ಉದೆವ್ನ್ ಯೆಂವ್ಚಾ ಸುರ್ಯಾ ಆನಿಂ

ವಾಳ್ಚ್ಯಾ ನಂಯ್ಚೆಂ ಮಿಲನ್ ತೆಂ!

ಸುಗಂಧ್ ಪರ್ಮಳ್ ತ್ಯಾ ಮಾತಿಯೆಚೊ

ವಿಸ್ರುಂಕ್ ಸಕ್ಚಿಂನಾ ಕೆದಿಂಚ್ ಹಾಂವ್!

ಯೆತೆಲಿಂ ಪಾಟಿಂ ಗಾವಾಂಕ್ ಹಾಂವ್

ಭೊಗುಂಕ್ ಆನ್ಭೊಗ್ ಪರತ್ ತೊ!

ಉಗ್ಡಾಸ್ ಕಾಡ್ತಾಂ ದೀಸ್ ರಾತ್

ಮ್ಹಜ್ಯಾ ಸೊಭಿತ್ ಮಾಂಯ್-ಗಾಂವಾಚೊ!

 ಜೊವಿ, ಪೆರಂಪಳ್ಳಿ

**********

Mozo gamv

sobhit to gamv mhozo

rakun rauleam vechak thoim

dis rat chintun bosleam

ken'na yet opurbayechi ghoddi ti

asa thoimsor ghor mhojem

zaun mondir mogachem

asat vhoddilam tea biddarant

rakun vatt dhuvechea yenneak

asa ek tott bhomvarim

sobhai dimvche lamb-dig madd!

akorxit popllanim surgamrai‍l'le maddio,

maddyer sorta mirianchi val!

boglek vallta vixal nom-i

namvaddlea ti "suvornna" namvan!

poltoddi sobcho gamv to,

haddun uddas nenntea bhurgeaponnacho!

heuxin, altoddi osat gade

diun bellim vorsak tin

oxem korta ti poxonn

amchea gamvchea koxtti xetkarancho

udeun yemvcha surea anim

vallchea nomychem milon tem!

sugondh pormoll tea matiecho

visrunk sokchimna kedinch hamv!

yetelim pattim gavank hamv

bhogunk anbhog porot to!

ugddas kaddtam dis rat

mhojea sobhit mam-i-gamvacho!

Jovi Perampalli