ಆಯ್ತಾರಾಚೆಂ ಮೀಸ್

ಮಿರ್ನ್ಯಾಮಾನ್ ಮಾರ್ಲಿ ಘಾಂಟ್, ಸಾರ್ಕೆಂ ಸಾಡೆಸವಾಂಕ್

ಆಯ್ತಾರಾಚೊ ದೀಸ್ ಬಾಬಾ, ವಚೊಂಕ್ ಆಸಾ ಮಿಸಾಕ್

ಧಾಂವಾ-ಧಾಂವಿಂ ಪಾವ್ಲೊಂ ತರಿ, ಸುರು ಜಾಲಾಂ ಮೀಸ್

ಬಸೊಂಕ್ ಜಾಗೊ ಸೊಧ್ತಾನಾ, ಮೆಳ್ಳಿ ಚೆಡ್ವಾಂಚಿ ಕುಸ್

ಕುಶಿನ್ ಉಬೊ ಆಸಾ ಪಂಗಡ್, ಗಾಂವ್ಚ್ಯಾಕ್ ರಂಗೀನ್ ಕಂತಾರ್

ಹಾಸೊ ಕಿತೆಂ, ಫೊಕಣಾಂ ಕಿತೆಂ, ಹಾಂಚೊ ದುಸ್ರೊಚ್ ಸಂಸಾರ್

ನವೆ ನವೆ ತಾಳೆ ಬಾಬಾ, ನವೆಂ ನವೆಂ ಕಂತಾರ್

ತಾಳ್ ನಾಂ, ಮುಳ್ ನಾಂ, ಲೊಕಾಕ್ ಕರ್ತಾತ್ ವಿರಾರ್

ಧಾಂವೊನ್ ಆಯಿಲ್ಲೆಂ ಚೆಡುಂ ಏಕ್, ಬಗ್ಲೆನ್ ಮ್ಹಜ್ಯಾ ಬಸ್ಲೆಂ

ವಾಂಕ್ಡ್ಯಾ ದೊಳ್ಯಾಂನಿ ಚೊಯ್ಲೆಂ ಹಾಂವೆ, ಅರ್ದೆಂ ಆಸಾ ಆಂಗ್ಲೆಂ

ಪಳೆತಚ್, ಜಿವಾಂತ್ ಬಾಬಾ, ಏಕ್ ಥರ್‌ಶೆಂ ಭೊಗ್ಲೆಂ

ಖಂಯ್ಚೆಂ ಪಳಂವ್, ಖಂಯ್ಚೆಂ ಸೊಡುಂ, ಸವಾಲ್ ಏಕ್ ಧೊಸ್ಲೆಂ

ಕೋಣ್‍ಗಾಯ್ ಹೆಂ ಚೆಡುಂ, ಪಳೆಂವ್ಕ್ ನಾಂ ಹಾಕಾ ಪಯ್ಲೆಂ

ಜಾಂವ್ಕ್ ಪುರೊ ನವೆಂ ಸಯ್ರೆಂ, ಜಾಂವ್ಕ್ ಪುರೊ ಭಾಯ್ಲೆಂ

ಕೊಣಾಗರ್ ಆಯ್ಲಾಂ ಹೆಂ, ಚಿಂತ್ತಾಂ ವಾಡ್ಯಾ ಭಾಯ್ಲೆಂ

ಸೊಡುಂಕ್ ನಜೊ ಹಾಕಾ ಹಾಂವೆ, ಮೀಸ್ ಜಾಂವ್ದಿ ಪಯ್ಲೆಂ

ಸೆರ್ಮಾಂವಾರ್ ಪಾದ್ರಿ ಮ್ಹಣ್ತಾ, ಪಾತ್ಕಾಂ ತುಮಿಂ ಸೊಡಾ

ಹಾಂವ್ ಹಾಂಗಾ ಚೆಡ್ವಾಂಕ್ ಮ್ಹಣ್ತಾಂ, ಮಟ್ವಿಂ ಆಂಗ್ಲಿಂ ಸೊಡಾ

ವಾಂಜೆಲಾಂತ್ ಜೆಜುನ್ ಸಾಂಗ್ಲಾಂ, ಆಯ್ಕಾ ಆಟ್ ಭಾಗಿ

ಸೊಭಿತ್ ಚೆಡುಂ ಕುಶಿನ್ ಬಸ್ಲಾಂ, ಹಾಂವಿ ಆಜ್ ಭಾಗಿ

ದಿಯಾ ಶಾಂತಿ ಎಕಾಮೆಕಾಕ್, ಮ್ಹಣಾಲೊ ಪಾದ್ರಿ ವಯ್ರ್ ಥಾವ್ನ್

ದಿಲಿ ಶಾಂತಿ ಚೆಡ್ವಾಕ್ ಹಾಂವೆ, ಕಾಳ್ಜಾಂತ್ ಇಲ್ಲೆಂ ಧಯ್ರ್ ಘೆವ್ನ್

ಸ್ವಾದಿಕ್ ಪರ್ಮಳ್ ಮಾರ‍್ಲೊ ಬಾಬಾ, ಥಾಚಾ ಆಂಗಾ ಥಾವ್ನ್

ಚೆಡ್ವಾಕ್ ಪಳೆವ್ನ್ ಚಿಂತ್ಲೆಂ ಹಾಂವೆ, ತುಂ ಗೊ ಮ್ಹಜೆಂ ಆಜ್ ಥಾವ್ನ್

ಪಾದ್ರಿ ಇಲ್ಲೊ ಮುಕಾರ್ ಆಯ್ಲೊ, ವಾಚುನ್ ಸಾಂಗ್ಚ್ಯಾಕ್ ಚಿಟಿ

ಏಕ್ ದೀಸ್ ಚೆಡ್ವಾ ಆಸ್ತೆಲಿಂಗೊ, ಆಮ್ಚಿಂಯ್ ನಾಂವಾ ಚಿಟಿರ್

ಖಂಯ್ ಥಾವ್ನ್ ತುಂ ಆಯ್ಲಾಂಯ್ ಕೊಣ್ಣಾ, ವಚಾನಾಕಾ ಪಾಟಿಂ

ಏಕ್ ಪಾವ್ಟಿಂ ಕಬ್ಲಾತ್ ದಿಗೊ, ಭಂವ್ಯಾಂ ಬೊಂಬೆ, ಊಟಿ

ಮೀಸ್ ಬಾಬಾ ಅಕೇರ್ ಜಾಲೆಂ, ಗೆಲೊಂ ತಾಚ್ಯಾ ಪಾಟ್ಲ್ಯಾನ್

ಹಾಯ್.. ಮುಣೊನ್ ಸಾಂಗೊನ್ ತಾಕಾ, ರಾವ್ಲೊಂ ತಾಚ್ಯಾ ಮುಕ್ಲ್ಯಾನ್

ಅರೆ..! ಆತಾಂ ದೊಳ್ಯಾಂಕ್ ದಿಸ್ಲಿ, ಮಟ್ವಿ ಕರಿಯಮಣಿ

ಮಾಫ್ ಕರ್ ಗೊ ಬಾಯೆ ಮ್ಹಾಕಾ, ಆಸ್ಲೊಂ ಸ್ವಪ್ಣಾನಿಂ!

ರೋಶು ಬಾಬಾ ಬಾರ್ಕುರ್

**********

Aitarachem mis

mirneaman marli ghantt, sarkem saddesovank

aitaracho dis baba, vochonk asa misak

dhamva-dhamvim paulom tori, suru zalam mis

bosonk zago sodhtana, mell'lli cheddvanchi kus

kuxin ubo asa pongodd, gamvcheak rongin kontar

haso kitem, fokonnam kitem, hancho dusroch somsar

nove nove talle baba, novem novem kontar

tall nam, mull nam, lokak kortat virar

dhamvon ayil'lem cheddum ek, boglen mhojea boslem

vankddea dolleamni choilem hamve, ordem asa anglem

polletoch, jivant baba, ek thor‌xem bhoglem

khoinchem pollomv, khoinchem soddum, soval ek dhoslem

konn‍gai hem cheddum, polleunko nam haka poilem

zaunko puro novem soirem, zaunko puro bhailem

konnagor ailam hem, chint'tam vaddea bhailem

soddunk nozo haka hamve, mis zamvdi poilem

sermamvar padri mhonnta, patkam tumim sodda

hamv hanga cheddvank mhonntam, mottvim anglim sodda

vanjelant jezun sanglam, aika att bhagi

sobhit cheddum kuxin boslam, hamvi az bhagi

dia xanti ekamekak, mhonnalo padri voir thaun

dili xanti cheddvak hamve, kallzant il'lem dhoir gheun

svadik pormoll maro‍lo baba, thacha anga thaun

cheddvak polleun chintlem hamve, tum go mhojem az thaun

padri il'lo mukar ailo, vachun sangcheak chitti

ek dis cheddva astelingo, amchim-i namva chittir

khoim thaun tum ailam-i konn'nna, vochanaka pattim

ek pauttim koblat digo, bhomveam bombe, utti

mis baba oker zalem, gelom tachea pattlean

hai.. Munnon sangon taka, raulom tachea muklean

ore..! atam dolleank disli, mottvi koriyomonni

maf kor go baye mhaka, aslom svopnnanim!

Roshu Baba, Barkur