ವಿಗ್ಗ್ ಆನಿ ಪೆಗ್

ಪಯ್ಲೆಂ ಹಾಂವ್

ಮಾಗಿರ್ ಗಾಂವ್

ವಿಗ್ ನ್ಹೆಸೊನ್

ಪೆಗ್ ಮಾರುನ್

ಜಿಯೆಂವ್ಚೊ ಹೊ

ಕಣ್ಣೊಜಿ ಸಂಸಾರ್

ಸದೆಂವ್ ಜಾಂವ್!

***

ತರ್ನೊ ಹಾಂವ್

ಪರ್ನೊ ಜಾತಾನಾ

ಖಡ್ಡ್ಯಾ ತಕ್ಲೆ ಶೆತಾಚೆರ್

ಸುಕಿಧಾಡ್ ಪಡ್ತಾನಾ

ಒಂಪ್ಲಿ ಹಾವೆಂ

ವಿಗ್ಗಾಚಿ ಕ್ರತಕ್ ನೇಜ್.

ದಿಸಾ ಕೊನ್ಶ್ಯಾರ್

ಮೊಜ್ಯಾ ವೊಂಟಾಂಚೆರ್

ಪೆಗ್ಗಾಚೆಂ ಅಮಾಲ್ ಚಡ್ತಾನಾ

ಜಿಬೆಕ್ ರುಚ್ಲಿನಾ ನೀಸ್-ಪೇಜ್!

***

ಹಾಂವ್ ಕಾಯ್ದೆ ಪಾಳಿನಾ

ದೆಂವ್ಚಾರಾಕ್ ಲೆಕಿನಾ

ಉಪಾದೆಸಾಂಕ್ ಮಾರ್ಲಿ

ವಿಗ್ಗಾ ಶೆಂಡಿ...

ಪೆಗ್ ಶೆಕುನ್

ಸತ್‍ಚ್ ಉಲಂವ್ಚೊ ಹಾಂವ್

ಕುಮ್ಸಾರ್ ಜಾಂವ್ಕ್ ನಾ ರೆಡಿ!

***

ಹಾಂವ್ ಲೊಕಾಕ್ ಬರೊ

ದೆವಾಕ್ ಮಾತ್ರ್ ಭೆರೊ

ವಿಗ್ಗಾ ಸಾಂಗಾತಾ ಪೆಗ್ಗಾ ಸಾವ್ಳಿ

ಮಾತ್ಯಾರ್ ಆಸ್ತಾನಾ

ದಿಸ್ಚೊ ಕಸೊ ಸರ್ಗಿಂಚೊ ದೊರೊ?

***

ವಿಗ್ಗಾ ಪಂದಾ ಪಿರಾಯ್ ಧಾಂಪುನ್

ಪೆಗ್ಗಾ ಅಮಾಲಾಕ್ ಸಲಾಮ್ ಠೊಕುನ್

ಆಪ್ಣಾಕ್‍ಚ್ ಕಳಿತ್ ನಾಸ್ತಾಂ

ಪಾತ್ಕಾ ಲೊಟಾಂತ್ ಮರ್ಣಾ ಕುಶಿಂ

ಹಳೂ ಮೆಟಾಂ ಕಾಡ್ಚೊ

ಆಧುನಿಕ್ ಹೆಡ್ಡಾ ಹಾಂವ್.

ಪಯ್ಲೆಂ ಹಾಂವ್

ಮಾಗಿರ್ ಗಾಂವ್

ಉಪ್ರಾಂತ್ ದೇವ್

ಅಶೆಂ ಮ್ಹಣ್ಚೊ ಹಾಂವೀ ಕ್ರಿಸ್ತಾಂವ್?

ಚಿಕ್ಕ ಪಾಂಗ್ಳಾ.

**********

Vigg ani peg

poilem hamv

magir gamv

vig nheson

peg marun

jiemvcho ho

konn'nnoji somsar

sodemv zamv!

***

torno hamv

porno zatana

khodd'ddea tokle xetacher

sukidhadd poddtana

ompli havem

viggachi krotok nez.

Disa konxear

mojea vonttancher

peggachem omal choddtana

jibek ruchlina nis-pez!

***

hamv kaide pallina

demvcharak lekina

upadesank marli

vigga xenddi.

Peg xekun

sot‍ch ulomvcho hamv

kumsar zaunko na reddi!

***

hamv lokak boro

devak matr bhero

vigga sangata pegga saulli

matear astana

discho koso sorgincho doro?

***

vigga ponda pirai dhampun

pegga omalak solam' tthokun

apnnak‍ch kollit nastam

patka lottant mornna kuxim

hollu mettam kaddcho

adhunik hedd'dda hamv.

Poilem hamv

magir gamv

uprant devo

oxem mhonncho hamvi kristamv?

Chikka Pangla