ವಸ್ತುರ್ ಉಲಯ್ಲೆಂ

ಕೊಣಾಯ್ಕಿ ನಾಕಾ ಜಾಲ್ಲೆಂ

ನಾಕಾಂಕ್ ಪಯ್ಸ್ ಜಾಲ್ಲೆಂ

ಮೆಳ್ಕುಟೆಂ ಘಾಣಿಚೆಂ

ಆಂಗಾರ್ ಉಮ್ಕಾಳ್ಚೆಂ

ಪಿಂಜ್ಕರ್ ವಸ್ತುರ್ ಹಾಂವ್!

ಶಹರಾಂತ್ಲ್ಯಾ ರಸ್ತ್ಯಾ ದೆಗೆಂನಿ

ನಿಶ್ಟುರ್ ಪಾಂಯಾ ಮುಳಾನಿಂ

ಮೊಡೊನ್ ಪೊಡ್‍ಲ್ಲ್ಯಾ ಗುಡ್ಸುಲಾಂತ್

ಕಸ್ರ್ಯಾ ರಾಶಿಚ್ಯಾ ಉಸ್ವಾಸಾಂತ್

ವಸ್ತಾ ಮ್ಹಜೊ ಲಾನ್ಸೊ ಗಾಂವ್!

ತೊಂಡಾಂತ್ಲಿ ಥಿಂಪಿ,

ನಾಕಾಂತ್ಲೆಂ ಕಿರ್ಮೆಂ

ಗಾಳಿ ವಾರೆಂ, ಶಿರಾಪಾಚೆಂ ಸಾರೆಂ

ಜಿರ‍್ತಾ ಸದಾಂ ಮ್ಹಜೆ ಥಂಯ್

ಕುಡಿಚೊ ಘಾಮ್, ವಾಟೆಚಿ ಮಾತಿ

ಜಶಿ ಹಜಾರ್ ಬುರಾಕಾಂಚಿಂ ಶಿರೊತಿ

ಸಂಸಾರಾ ಹಾತಿಂ ಮೊರ್ತಾಂ

ಸದಾಂ ಜಿಯೆಂವ್ಚೆಂ ಖ್ಹಂಯ್?

ಏ ಯೆಮ್ಕುಳ್ಯಾ, ಆಯ್ಕ್

ವ್ಹಯ್, ನಿತಳಾಯ್ ಮ್ಹಜೆಲಾಗಿಂ ನಾಂ

ನಿರ್ಮಳ್ ತುಂಯ್ ನಯ್!

ಆಪ್ಡುಂಕ್ ಮ್ಹಕಾ, ತುಕಾ ಲಜ್

ಮ್ಹಕಾ ಶುಭ್ರ್ ಜಾಂವ್ಚಿ ಖೊರೊಜ್

ಕೂಡ್ ಮ್ಹಜಿ ಘಾಣ್ ಯೆತಾ ವ್ಹಯ್

ತುಂಯ್ ಕಾಂಯ್ ಸುಗಂಧ್ ದ್ರವ್ಯಾನಿಂ

ಬುಡವ್ನ್ ಕಾಡ್‍ಲ್ಲೊ ನಯ್!

ಗ್ರೇಸ್ತಾ ತುಜಿ ಮುಸ್ತಾಯ್ಕಿ ಪಳೆತಾನಾ

ಮ್ಹಕಾ ಮ್ಹಜೆಂ ದುಬ್ಳೆಂಪಣ್ ದಿಸ್ಲೆಂನಾ!

ಫರಕ್ ಫಕತ್ ಕಾಳಾಚೊ

ಪಯ್ಶ್ಯಾ ಕುಶಿನ್ ಫುಡ್ ಕರುನ್

ನಿದ್ಚ್ಯಾ ಆಯ್ಚ್ಯಾ ಸಂಸಾರಾಕ್

ಮ್ಹಜೆಂ ಪಿಂಜ್ಕರ್ ವಸ್ತುರ್ ತೊಪ್ಲೆಂ

ಆನಿಂ ತುಜೆಂ ದಿಸೊನ್ಂಕ್ ನಾಂ!

ರೋಬಿನ್, ನೀರುಡೆ

**********

vostur uloilem

konnaiki naka zal'lem

nakank pois zal'lem

mellkuttem ghannichem

angar umkallchem

pinjkor vostur hamv!

xohorantlea rostea degemni

nixttur pamya mullanim

moddon podd‍l'lea guddsulant

kosrea raxichea usvasant

vosta mhozo lanso gamv!

tonddantli thimpi,

nakantlem kirmem

galli varem, xirapachem sarem

jiro‍ta sodam mhoje thoim

kuddicho gham', vattechi mati

zoxi hozar burakanchim xiroti

somsara hatim mortam

sodam jiemvchem khhom-i?

e yemkullea, aik

vhoi, nitollai mhojelagim nam

nirmoll tum-i noi!

apddunk mhoka, tuka loz

mhoka xubhr zamvchi khoroz

kudd mhoji ghann yeta vhoi

tum-i kaim sugondh droveanim

buddoun kadd‍l'lo noi!

gresta tuji mustaiki polletana

mhoka mhojem dubllemponn dislemna!

forok fokot kallacho

poixea kuxin fudd korun

nidchea aichea somsarak

mhojem pinjkor vostur toplem

anim tujem dison'nk nam!

Robin Neerude