ಬಾಳ್ಪಣಾಚ್ಯೊ ಯಾದಿ ಉಮಾಳಾಯಿಲ್ಲೆ ಭುರ್ಗ್ಯಾಂಚೆಂ ಕವಿತಾ ಸಾದರೀಕರಣ್

ದುಬಾಯ್ ಆಗಸ್ಟ್ 25:

ಆಂಕ್ರಿ.ಕಾಮ್ ಆನಿ ಗೀತ್ ಗಜಾಲ್ ಪಂಗ್ಡಾಚ್ಯಾ ಮುಕೆಲ್ಪಣಾರ್ ಯುಎಇಂತ್ ದುಬಾಯ್‌ಚ್ಯಾ ಬಿರಿಯಾನಿ 2020 ಸಾಲಾಂತ್ ಚಲ್‌ಲ್ಲ್ಯಾ ಭುರ್ಗ್ಯಾಂಚೊ ಕವಿತಾ ಸಾದರೀಕರಣ್ ಆನಿ ಕವಿ ಕಿರಣ್ ನಿರ್ಕಾಣ್ ಹಾಚೊ ಬಾಳ್ ಕವಿತೆಂಚೊ ಪುಸ್ತಕ್ "ನಕ್ತಿರಾಂ" ಹಾಚೆಂ  ಲೋಕಾರ್ಪಣ್ ಕಾರ್ಯೆಂ ಜಮ್ಲೆಲ್ಯಾ ಕೊಂಕಣಿ ಸಾಹಿತ್ಯ್ ರಸಿಕಾಂಕ್ ತಾಂಚ್ಯೊ ಬಾಳ್ಪಣಾಚೊ ಯಾದಿ ಜಿವ್ಯೊ ಕರುಂಕ್ ಸಕ್ಲೆಂ ಆನಿ ಮಧುರ್ ಘಡಿಯಾಂಚೆ ಉಮಾಳೆ ಚಾಕೊಂಕ್ ಕಾರಾಣ್ ಜಾಲೆಂ.

ಕಾರ್ಯಾಚಿ ಸುರ್ವಾತ್ ಮೆಲ್ವಿನ್ ಕಲಾಕುಲ್ ಹಾಣೆಂ ಕವಿ ಕಿಶೂ ಬಾರ್ಕುರ್ ಹಾಂಚಿ "ಧಾಕ್ಟ್ಯಾ ದೆವಾಚಿ ಭುರ್ಗಿಂ" ಕವಿತಾ ವಾಚುನ್ ಆರಂಬ್ ಜಾಲಿ. ಯುಎಇಂತ್ ಪಯ್ಲೆ ಪಾವ್ಟಿಂ ಭುರ್ಗ್ಯಾಂನಿಂ ಕವಿತಾ ಸಾದರೀಕರಣ್ ಕರ್ಚಿ ಆನಿ ಹ್ಯಾ ಕಾರ್ಯಾಚೆಂ ಅಧ್ಯಕ್ಷ್‌ಪಣ್ ಡಿಯೋನಾ ಕೊರೆಯಾ ಹಾಣೆಂ ಘೆತ್‌ಲ್ಲೆಂ. ಬಾಯ್ ಡಿಯೋನಾನ್ ಸುಂದರ್ ಥರಾನ್ ಕವಿತಾ ಸಾದರ್ ಕರ್ಚ್ಯಾ ಭುರ್ಗ್ಯಾಂ ಸಾಂಗಾತಾ ಸಂವಾದ್ ಚಲಯ್ಲೊ ಆನಿ ಕವಿತೆಚಿ ವ್ಹಳಕ್ ಕರ್ನ್ ದಿಲಿ. ಬ್ರಿಯಾನ್ನಾ ನವೋಮಿ ಡಿಸೋಜ ಮಡಂತ್ಯಾರ್, ಅಮೋರ್ ಮ್ಯಾನುವೆಲ್ ಮೆಂಡೊನ್ಸಾ ತಲ್ಲೂರ್, ಲಿಯೋರಾ ಡಿಸೋಜ ಪಾಂಬೂರ್, ಅಲಿಕಾ ಸೆನೋರಾ ಪಿಂಟೊ ಬಜ್ಪೆ, ಲನಿಶಾ ಸಿಯೊನಾ ನೊರೊನ್ಹಾ  ಬೆಳ್ಳೂರ್, ಡೆಲಿಶಾ ರೂಥ್ ಕೊರೆಯಾ ಪೆರ್ನಾಲ್, ನಿಕೋಲ್ ಜೆನೆಲ್ ಸಿಕ್ವೇರಾ ಬ್ರಹ್ಮಾವರ್, ಅನೋರ್ ಟೆರೆನ್ ಮೆಂಡೊನ್ಸಾ ತಲ್ಲೂರ್ ಆನಿ ಅಧ್ಯಕ್ಷಿಣ್ ಡಿಯೋನಾ ರೆಬೆಕ್ಕಾ ಕೊರೆಯಾ ಪೆರ್ನಾಲ್ ಹಾಣಿಂ ಕವಿ ಕಿರಣ್ ನಿರ್ಕಾಣ್ ಹಾಚ್ಯಾ ನಕ್ತಿರಾಂ ಪುಸ್ತಕಾಂತ್ಲಿಂ ಕವಿತಾ ವಾಚನ್ ಕೆಲ್ಯೊ. ಕಿರಣ್ ನಿರ್ಕಾಣ್ ಹಾಣೆಂ ವಾಚನ್ ಕೆಲ್ಲ್ಯಾ ಕವಿತೆಂ ಪಾಟ್ಲಿ ಕಾಣಿ, ಭುರ್ಗ್ಯಾಂಚ್ಯಾ ಕವಿತೆಂತ್ ಲಿಪೊನ್ ಆಸ್ಚಿಂ ಲಿಸಾಂವಾಂವಿಶಿಂ ಝಳಕ್ ದಿಲಿ.

ಕಾವ್ಯ್ ರಸಿಕಾಂಚೆಂ ಮನಾಂ ಜಿಕ್‌ಲ್ಲ್ಯಾ ಭುರ್ಗ್ಯಾಂಚ್ಯಾ ಕವಿತಾ ಸಾದರೀಕರಣಾಚ್ಯಾ ಉಪ್ರಾಂತ್, ಯುಎಇಚೊ ನಾಮ್ಣೆಚೊ ಕವಿ ಆರ್ಥರ್ ಪಿರೇರಾ ಹಾಣೆಂ ತಾಚ್ಯಾ ಆನಿ ಇತರ್ ಭಾಶೆಥಾವ್ನ್ ಅನುವಾದಿತ್ ಕೆಲ್ಲ್ಯೊ ಕವಿತಾ ಸಾಂಗಾತಾ ಗುಂತುನ್ ಸಾದರ್ ಕೆಲ್ಯೊ ಆನಿ ತಾಚ್ಯಾ ವಿಶಿಷ್ಟ್ ಸಾದರೀಕಣಾಚ್ಯಾ ಶೈಲೆವರ್ವಿಂ ಲೊಕಾಮನಾಂ ಪಿಸ್ವೊಂಕ್ ಪಾವ್ಲಿ.

ನಾಟಕಿಸ್ತ್ ಆನಿ ಕವಿ ಡೊನಿ ಕೊರೆಯಾ ಹಾಣೆಂ "ಗಲ್ಫಾಂತ್ಲಿಂ ಕೊಂಕ್ಣಿ ಭುರ್ಗಿಂ ಆನಿ ಕೊಂಕ್ಣೆಚೊ ಫುಡಾರ್" ಮ್ಹಳ್ಳ್ಯಾ ವಿಶಯಾಚೆರ್ ಆಪ್ಲೆ ವಿಚಾರ್ ಪ್ರಸ್ತುತ್ ಕೆಲೆ. ಆಪ್ಲ್ಯಾ ಉಲವ್ಪಾರ್ ಡೊನಿನ್ ಘರಾಂತ್ ಭುರ್ಗ್ಯಾಂ ಸಾಂಗಾತಾ ಕೊಂಕ್ಣಿ ಉಲಂವ್ಚಿ ಆನಿ ತಾಂಕಾಂ ಕೊಂಕಣಿ ಭಾಸ್, ಸಾಹಿತ್ಯ್ ಆನಿ ಸಂಸ್ಕ್ರತೆಥಂಯ್ ವೋಡ್ ಉಬ್ಜಂವ್ಚಿ ಹರ್ ಪ್ರಯತ್ನ್ ಕರ್ಚ್ಯಾಕ್ ಉಲೊ ದಿಲೊ. ಹ್ಯಾ ಸಂಧರ್ಭಾರ್ "ಘರಾಂತ್ ಕೊಂಕಣಿ" ಮ್ಹಳ್ಳೆಂ ಅಭಿಯಾನ್ ಸೂಚಿತ್ ಕರ್ಚ್ಯಾ ಮುಕಾಂತ್ರ್ ಹರ್ ಕೊಂಕಣಿ ಘರಾನಿಂ ಕೊಂಕಣಿ ಭಾಶೆಂತ್‌ಚ್ ಉಲಂವ್ಕ್ ಪ್ರಯತ್ನ್ ಕರುಂಕ್ ಡೊನಿನ್ ಉಪ್ಕಾರ್ ಮಾಗ್ಲೊ ಅನಿ ಸರ್ವಾನಿಂ ಹ್ಯಾ ಅಭಿಯಾನಾಚೊ ವಾಂಟೊ ಜಾಂವ್ಕ್ ಸುಚಾಯ್ಲೆಂ.

ಹ್ಯಾ ಉಪ್ರಾಂತ್ ಚಲ್‌ಲ್ಲ್ಯಾ ಮ್ಹಟ್ವ್ಯಾ ವೆದಿ ಕಾರ್ಯಾಕ್ ಕೊಂಕಣಿ ಸಮರ್ಥಕ್, ನಟ್, ಗಾವ್ಪಿ ಆನಿ ಉದ್ಯಮಿ ಮಾನೆಸ್ತ್ ಜೋಸೆಫ್ ಮಥಾಯಸ್ ಮಾನಾಚೆ ಸಯ್ರೆ ಜಾವ್ನಾಸ್‌ಲ್ಲೆ. ತಾಂಚೆ ಸಾಂಗಾತಾ ವೆದಿರ್ ಆರ್ಥರ್ ಪಿರೇರಾ, ಕಿರಣ್ ನಿರ್ಕಾಣ್ ಆನಿ ಆಂಕ್ರಿ.ಕಾಮ್ ಹಾಚೆ ಸಂಪಾದಕ್ ಸನ್ನು ಮೋನಿಸ್ ಬೊಳಿಯೆ ಹಾಜರ್ ಆಸ್‌ಲ್ಲೆ. ಸನ್ನು ಮೋನಿಸ್ ಬೊಳಿಯೆನ್ ಆಂಕ್ರಿ.ಕಾಮ್, ಗೀತ್ ಗಜಾಲ್ ಪಂಗ್ಡಾವಿಶಿಂ ಮಾಹೆತ್, ನಕ್ತಿರಾಂ ಬೂಕಾಚಿ ಪರಿಚಯ್ ಕರ್ಚ್ಯಾ ಸವೆಂ ಸರ್ವಾಂಕ್ ಯೆವ್ಕಾರ್ ಪಾಠಯ್ಲೊ. ಸ್ಟೇಫನ್ ವಾಮಂಜೂರ್ ಹಾಣೆಂ ಗೋಡ್ ಉದ್ಕಾಚೊ ಯೆವ್ಕಾರ್ ಸಯ್ರ್ಯಾಂಕ್ ಆನಿ ಜಮ್ಲೆಲ್ಯಾ ಸಭಿಕಾಂಕ್ ಮಾಗ್ಲೊ.  ಮಾನೆಸ್ತ್ ಜೋಸೆಫ್ ಮಥಾಯಸ್ ಹಾಣಿಂ ಕವಿತಾ ಸಾದರೀಕರಣ್ ಕಾರ್ಯಾಚೆ ಅಧ್ಯಕ್ಷಿಣ್ ಡಿಯೋನಾ ಆನಿ ಕವಿತಾ ಸಾದರ್ ಕೆಲ್ಲ್ಯಾ ಭುರ್ಗ್ಯಾಂಕ್ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ. ಕಿರಣ್ ನಿರ್ಕಾಣ್ ಹಾಚೊ ಬಾಳ್ ಸಾಹಿತ್ಯಾಚೊ ಪುಸ್ತಕ್ "ನಕ್ತಿರಾಂ" ಬಾಳ್ ನಿಕೋಲ್ ಇವಾ ಹಾಚ್ಯಾ ಇಸ್ಕೊಲಾಚ್ಯಾ ಪೊತ್ಯಾಥಾವ್ನ್ ಕಾಡ್ನ್ ಮೊಕ್ಳಿಕ್ ಕೆಲೊ. ಹ್ಯಾಚ್ ಸಂಧರ್ಭಾರ್ ಸಾಂ ಲುವಿಸ್ ಕಾಲೇಜ್ ಮಂಗ್ಳುರ್ ಮುಕಾಂತ್ರ್ ಜಾಂವ್ಚೊ ದೋನ್ ವರ್ಸಾಂಚೊ ಪದ್ಯುತ್ತರ್ ಕೊಂಕಣಿ ಡಿಪ್ಲೊಮಾಂತ್ ದುಸ್ರೆಂ ಆನಿ ತಿಸ್ರೆಂ ಸ್ಥಾನ್ ಜೊಡ್‌ಲ್ಲ್ಯಾ ಆರ್ಥರ್ ಪಿರೇರಾ ಆನಿ ಕಿರಣ್ ನಿರ್ಕಾಣ್ ಹಾಂಕಾಂ ಜೋಸೆಫ್ ಮಥಾಯಸ್ ಹಾಣಿ ಶಾಲ್ ಪಾಂಗ್ರುನ್, ಫುಲಾಂ ತುರೊ ದೀವ್ನ್ ಉಲ್ಲಾಸ್ ಪಾಠಯ್ಲೆ.

ಸಾಹಿತ್ಯ್ ಅಭಿಮಾನಿಂಕ್ ಉದ್ದೇಸುನ್ ಉಲಯಿಲ್ಲ್ಯಾ ಮಾನೆಸ್ತ್ ಜೋಸೆಫ್ ಹಾಣೆಂ, ಆಂಕ್ರಿ ಆನಿ ಗೀತ್ ಗಜಾಲ್ ಪಂಗ್ಡಾಕ್, ತಾಂಚಾ ನವೆಂಸಾಂವಾಂಚ್ಯಾ ಚಿಂತ್ಪಾಂಕ್ ಶಾಭಾಸ್ಕಿ ಪಾಠಯ್ಲಿ. ಭುರ್ಗ್ಯಾಂಕ್ ಕೊಂಕ್ಣೆಚೆಂ ಭವಿಶ್ಯ್ ಮ್ಹಣ್ ಸಾಂಗ್ಚ್ಯಾ ಸಾಂಗಾತಾ ತಾಂಕಾಂ ಕೊಂಕ್ಣೆಥಂಯ್ ಆಕರ್ಶಿತ್ ಕರುಂಕ್ ಅಸಲ್ಯೊ ಯೆವ್ಜಣ್ಯೊ ಉಪ್ಕಾರ್ತಾತ್. ವ್ಯವಹಾರಿಕ್ ವಾ ವಾವ್ರಾಚ್ಯಾ ದ್ರಶ್ಟೆನ್ ಕೊಂಕಣಿ ಗರ್ಜ್ ನಾಂ ಮ್ಹಣ್, ಕೊಂಕಣಿ ತಿರಸ್ಕಾರ್ ಕರಿನಾಸ್ತಾಂ ಆಮ್ಚ್ಯಾ ಮಾಲ್ಘಡ್ಯಾನಿಂ ಜಿಯೆಲ್ಲ್ಯಾ ಆನಿ ಆಮ್ಕಾಂ ವಾಂಟ್‌ಲ್ಲ್ಯಾ ಗ್ರೇಸ್ತ್ ಸಂಸ್ಕ್ರತೆಕ್ ಉರಂವ್ಕ್ ಆನಿ ವಾಡಂವ್ಕ್ ಆಮಿ ವ್ಹಡಿಲಾನಿಂ ಮಿನತ್ ಘೆಜಯ್ ಆನಿ ಭುರ್ಗ್ಯಾಂಕ್ ಹ್ಯಾ ದಿಶೆನ್ ಪ್ರೇರಿತ್ ಕರುಂಕ್ ಉಲೊ ದೀವ್ನ್ ಸರ್ವಾಂಕ್ ತಾಣಿಂ ಆಭಿನಂದನ್ ಪಾಠಯ್ಲೆಂ.

ಡೈನಾ ಶರಲ್ ಹಿಣೆಂ ಕಾರ್ಯೆಂ ಚಲವ್ನ್ ವೆಲೆಂ. ಕಿರಣ್ ನಿರ್ಕಾಣ್ ಹಾಣೆಂ ಧನ್ಯವಾದ್ ಅರ್ಪಿಲೆಂ. ಸನ್ನು ನಿಡ್ಡೋಡಿ, ಹಿಲ್ಸನ್ ಅಲ್ಲಿಪಾದೆ ಹಾಣಿಂ ವೆದಿ ಆನಿ ಕಾರ್ಯಾಚಿ ಸರ್ಭರಾಯ್ ಸಾಂಭಾಳ್ಳಿ.

....................................

Ballponnacheo yadi umallayil'le bhurgeanchem kovita sadorikoronn

Dubai August 25:

Aankri.com ani Geet Gazaal pongddachea mukelponnar yueint Dubai‌chea biriani 2020 salant chol‌l'lea bhurgeancho kovita sadorikoronn ani kovi Kiran Nirkan hacho ball kovitencho pustok "Noktiram" hachem  lokarponn karyem zomlelea konkonni sahity rosikank tancheo ballponnacho yadi jiveo korunk soklem ani modhur ghoddianche umalle chakonk karann zalem.

Kareachi survat Melwyn Kalakul hannem kovi kixu barkur hanchi "Dhakttea Devachi Bhurgim" kovita vachun aromb zali. Yueint poile pauttim bhurgeamnim kovita sadorikoronn korchi ani hea kareachem odhyokx‌ponn Deona Rebecca Correa Pernal hannem ghet‌l'lem. Bai Deona sundor thoran kovita sador korchea bhurgeam sangata somvad choloilo ani kovitechi vhollok korn dili. Brianna Naomi D'Souza Madanthyar, Amor Manuel Mendonca Tallur, Leora Dsouza Pamboor, Alica Senora Pinto, Lanisha Syona Noronha Bellore, Delisha Ruth Correa Pernal, Nicole Jenelle Sequeira Brahmavar, Anor Teran Mendonca Tallur ani odhyokxinn Deona Rebecca koreya pernal hannim kovi kironn nirkann hachea Noktiram pustokantlim kovita vachon keleo. Kiran Nirkan hannem vachon kel'lea kovitem pattli kanni, bhurgeanchea kovitent lipon aschim lisamvamvixim zhollok dili.

Kauy rosikanchem monam jik‌l'lea bhurgeanchea kovita sadorikoronnachea uprant, UAEcho namnnecho kovi Arthar Pereira hannem tachea ani itor bhaxethaun onuvadit kel'leo kovita sangata guntun sador keleo ani tachea vixixtt sadorikonnachea xoileurvim lokamonam pisvonk pauli.

Nattokist ani kovi Dony Correa hannem "golfantlim konknni bhurgim ani konknnecho fuddar" mholl'llea vixoyacher aple vichar prostut kele. Aplea uloupar Dony’n ghorant bhurgeam sangata konknni ulomvchi ani tankam konkonni bhas, sahity ani somskrotethoim vodd ubzomvchi hor proitn korcheak ulo dilo. Hea sondhorbhar "Ghorant Konkani" mholl'llem obhian suchit korchea mukantr hor konkonni ghoranim konkonni bhaxent‌ch ulounko proitn korunk ddonin upkar maglo oni sorvanim hea obhianacho vantto zaunko suchailem.

Hea uprant chol‌l'lea mhottvea vedi kareak konkonni somorthok, nott, gaupi ani udyomi manest Joseph Mathias manache soire zaunas‌l'le. Tanche sangata vedir Arthar Pereira, Kiran Nirkan ani “Aankri.com” hache sompadok Sannu Monis Boliye hazor as‌l'le. Sannu Monis Boliyen ankri.Kam', Geet Gazaal pongddavixim mahet, “Noktiram” bukachi porichoi korchea sovem sorvank yeukar patthoilo. Stephan Vamanjoor hannem godd udkacho yeukar soireank ani zomlelea sobhikank maglo.  Manest Joseph Mathias hannim kovita sadorikoronn kareache odhyokxinn ddiona ani kovita sador kel'lea bhurgeank uddasachi kannik diun man kelo. Kironn nirkann hacho ball sahiteacho pustok "Noktiram" ball nikol iva hachea iskolachea poteathaun kaddn mokllik kelo. Heach sondhorbhar St Aloysius college Mangalore mukantr zamvcho don vorsancho podyut'tor konkonni ddiplomant dusrem ani tisrem sthan zodd‌l'lea Arthar Pereira ani Kiran Nirkan hankamk, Joseph Mathias hanni xal pangrun, fulam turo diun ul'las patthoile.

Sahity obhimanink ud'desun uloyil'lea manest Joseph Mathias, Aankri ani Geet Gazaal pongddak, tancha novemsamvanchea chintpank xabhaski patthoili. Bhurgeank konknnechem bhovixy mhonn sangchea sangata tankam konknnethoim akorxit korunk osoleo yeuzonneo upkartat. Vyouharik va vaurachea droxtten konkonni gorz nam mhonn, konkonni tiroskar korinastam amchea malghoddeanim jiel'lea ani amkam vantt‌l'lea grest somskrotek urounko ani vaddounko ami vhoddilanim minot ghezoi ani bhurgeank hea dixen prerit korunk ulo diun sorvank tannim abhinondon patthoilem.

Diana Sharal hinnem karyem choloun velem. Kiran Nirkan hannem dhonyovad orpilem. Sannu Niddodi, Hilson Allipade hannim vedi ani kareachi sorbhorai sambhall'lli.

.........................

बाळपणाच्यो यादी उमाळायिल्ले भुर्ग्यांचें कविता सादरीकरण

दुबाय आगसट २५:

आंक्री.काम आनी गीत गजाल पंगडाच्या मुकेल्पणार युएइंत दुबाय‌च्या बिरियानी २०२० सालांत चल‌ल्ल्या भुर्ग्यांचो कविता सादरीकरण आनी कवी किरण निर्काण हाचो बाळ कवितेंचो पुसतक "नक्तिरां" हाचें  लोकार्पण काऱ्यें जम्लेल्या कोंकणी साहित्य रसिकांक तांच्यो बाळपणाचो यादी जिव्यो करुंक सकलें आनी मधूर घडियांचे उमाळे चाकोंक काराण जालें.

काऱ्याची सुर्वात मेलवीन कलाकूल हाणें कवी किशू बार्कूर हांची "धाकट्या देवाची भुर्गीं" कविता वाचून आरंब जाली. युएइंत पयले पावटीं भुर्ग्यांनीं कविता सादरीकरण कर्ची आनी ह्या काऱ्याचें अध्यक्ष‌पण डियोना कोरेया हाणें घेत‌ल्लें. बाय डियोनान सुंदर थरान कविता सादर कर्च्या भुर्ग्यां सांगाता संवाद चलयलो आनी कवितेची व्हळक कर्न दिली. ब्रियान्ना नवोमी डिसोज मडंत्यार, अमोर म्यानुवेल मेंडोन्सा तल्लूर, लियोरा डिसोज पांबूर, अलिका सेनोरा पिंटो बजपे, लनिशा सियोना नोरोन्हा  बेळ्ळूर, डेलिशा रूथ कोरेया पेर्नाल, निकोल जेनेल सिकवेरा ब्रह्मावर, अनोर टेरेन मेंडोन्सा तल्लूर आनी अध्यक्षीण डियोना रेबेक्का कोरेया पेर्नाल हाणीं कवी किरण निर्काण हाच्या नक्तिरां पुसतकांतलीं कविता वाचन केल्यो. किरण निर्काण हाणें वाचन केल्ल्या कवितें पाटली काणी, भुर्ग्यांच्या कवितेंत लिपोन आसचीं लिसांवांविशीं झळक दिली.

काव्य रसिकांचें मनां जीक‌ल्ल्या भुर्ग्यांच्या कविता सादरीकरणाच्या उपरांत, युएइचो नामणेचो कवी आर्थर पिरेरा हाणें ताच्या आनी इतर भाशेथावन अनुवादीत केल्ल्यो कविता सांगाता गुंतून सादर केल्यो आनी ताच्या विशिषट सादरीकणाच्या शैलेवर्वीं लोकामनां पिस्वोंक पावली.

नाटकिसत आनी कवी डोनी कोरेया हाणें "गलफांतलीं कोंकणी भुर्गीं आनी कोंकणेचो फुडार" म्हळ्ळ्या विशयाचेर आपले विचार प्रसतूत केले. आपल्या उलवपार डोनीन घरांत भुर्ग्यां सांगाता कोंकणी उलंवची आनी तांकां कोंकणी भास, साहित्य आनी संसक्रतेथंय वोड उबजंवची हर प्रयत्न कर्च्याक उलो दिलो. ह्या संधर्भार "घरांत कोंकणी" म्हळ्ळें अभियान सूचीत कर्च्या मुकांत्र हर कोंकणी घरानीं कोंकणी भाशेंत‌च उलवंक प्रयत्न करुंक डोनीन उपकार मागलो अनी सर्वानीं ह्या अभियानाचो वांटो जावंक सुचायलें.

ह्या उपरांत चल‌ल्ल्या म्हटव्या वेदी काऱ्याक कोंकणी समर्थक, नट, गावपी आनी उद्यमी मानेसत जोसेफ मथायस मानाचे सयरे जावनास‌ल्ले. तांचे सांगाता वेदीर आर्थर पिरेरा, किरण निर्काण आनी आंक्री.काम हाचे संपादक सन्नू मोनीस बोळिये हाजर आस‌ल्ले. सन्नू मोनीस बोळियेन आंक्री.काम, गीत गजाल पंगडाविशीं माहेत, नक्तिरां बूकाची परिचय कर्च्या सवें सर्वांक येवकार पाठयलो. स्टेफन वामंजूर हाणें गोड उदकाचो येवकार सयऱ्यांक आनी जम्लेल्या सभिकांक मागलो.  मानेसत जोसेफ मथायस हाणीं कविता सादरीकरण काऱ्याचे अध्यक्षीण डियोना आनी कविता सादर केल्ल्या भुर्ग्यांक उडासाची काणीक दीवन मान केलो. किरण निर्काण हाचो बाळ साहित्याचो पुसतक "नक्तिरां" बाळ निकोल इवा हाच्या इसकोलाच्या पोत्याथावन काडन मोकळीक केलो. ह्याच संधर्भार सां लुवीस कालेज मंगळूर मुकांत्र जांवचो दोन वर्सांचो पद्युत्तर कोंकणी डिपलोमांत दुस्रें आनी तिस्रें स्थान जोड‌ल्ल्या आर्थर पिरेरा आनी किरण निर्काण हांकां जोसेफ मथायस हाणी शाल पांग्रून, फुलां तुरो दीवन उल्लास पाठयले.

साहित्य अभिमानिंक उद्देसून उलयिल्ल्या मानेसत जोसेफ हाणें, आंक्री आनी गीत गजाल पंगडाक, तांचा नवेंसांवांच्या चिंत्पांक शाभासकी पाठयली. भुर्ग्यांक कोंकणेचें भविश्य म्हण सांगच्या सांगाता तांकां कोंकणेथंय आकर्शीत करुंक असल्यो येवजण्यो उपकार्तात. व्यवहारीक वा वावराच्या द्रश्टेन कोंकणी गर्ज नां म्हण, कोंकणी तिरसकार करिनासतां आमच्या मालघड्यानीं जियेल्ल्या आनी आमकां वांट‌ल्ल्या ग्रेसत संसक्रतेक उरवंक आनी वाडवंक आमी व्हडिलानीं मिनत घेजय आनी भुर्ग्यांक ह्या दिशेन प्रेरीत करुंक उलो दीवन सर्वांक ताणीं आभिनंदन पाठयलें.

डैना शरल हिणें काऱ्यें चलवन वेलें. किरण निर्काण हाणें धन्यवाद अर्पिलें. सन्नू निड्डोडी, हिल्सन अल्लिपादे हाणीं वेदी आनी काऱ्याची सर्भराय सांभाळ्ळी.